Ko akava interesno stiho pišinela: „Ako dikhea kaj negde ki tli phuv maltretirinena e čorole hem čhinavena lestar i pravda ko sudo hem ponašinena pe lea nepravedno, ma čudin tut. Soske okole so postapinela agjaar dikhela le nekoj soj tano pobaro lestar, a isi javera da soj tane panda pobare lendar“ (Prop. 5:8).

Akala stihija šukar opišinena e manušen soj ki vlast. Ama, ako razmislinaja poviše bašo akava, ko akala lafija isi čačipe bašo Jehova kova so dela amen uteha.

O stiho taro Propovednik 5:8 kerela lafi bašo vladeteli kova so mučinela e čorolen hem čhinavela lendar i pravda. O vladeteli na smejnela te bistrel kaj šaj dikhela le nekoj soj tano ki pobari položba lestar ili kas so isi pobari vlast lestar. Ustvari, šaj isi javera da kola soj tane ki panda pobari položba lendar. Žalno tano adava kaj, ko sa o manušikane vlade šaj te ovel korupcija, hem i vlast zloupotrebinela pe ko različna načinija, a o obično narodo mora te trpinel o posledice taro adava.

Ama, čak ako dikhjola kaj nane nadež, utešno tano te džana kaj o Jehova dikhela okolen so isi len bari položba ko manušikane vlade. Amen šaj te molina amen e Devleske te pomožinel amenge hem te vakera leske so mučinela amen (Ps. 55:22; Fil. 4:6, 7). Džanaja kaj „o Jehova ple jakhencar rodela ki celo phuv te sikavel pli sila ki korist okolenge so služinena leske celo vilea“ (2. Let. 16:9).

Sprema adava, o Propovednik 5:8 potsetinela amen kaj ko sveto ko kova so živinaja sekogaš isi nekoj so isi le pobari vlast taro nekoj javer. A panda považno, akava stiho potsetinela amen kaj e Jehova isi le i najbari vlast, ili ov tano o Najbaro Vladeteli. Ov akana vladinela preku plo Čhavo, o Isus Hristos, kova tano Cari ko e Devleskoro Carstvo. O Semokjno Devel, kova so dikhela sa, hem leskoro Čhavo, tane apsolutno pravedna.