Oja, o Beng čače postojnela. I Biblija baši leste vakerela kaj tano „vladeteli e svetoskoro“, jekh duhovno suštestvo kova so ulo lošno hem kova so buningja pe protiv o Devel (Jovan 14:30; Efešanite 6:11, 12). I Biblija isto agjaar koristinela javera da anava kola so sikavena koj tano ov čače:

•   Satana, kova so značinela „Protivniko“ (Jov 1:6).

•   Beng, kova so značinela „Klevetniko“ (Otkrovenie 12:9).

•   Sap, kolea so ki Biblija mislinela pe bašo „Izmamniko“ (2. Korinkjanite 11:3).

•   Okova so iskušinela (Matej 4:3).

•   Okova so hovavela (Jovan 8:44).

O Beng nane o lošnipe ko manuša

 Nesave mislinena kaj o Satana o Beng tano o lošnipe so postojnela andre ki amende. Ama, adava nane točno soske ki Biblija pišinela jekh razgovor maškar o Devel hem o Satana. Džanaja kaj o Devel tano sovršeno hem ki leste nane ni hari lošnipe. Tegani, sar šaj o Devel te kerel lafi e lošnipaja ki peste? (5. Mojseeva 32:4; Jov 2:1-6). Osven adava, o Satana kergja e Isusea da lafi, kova so isto agjaar tano sovršeno (Matej 4:8-10; 1. Jovanovo 3:5). Znači, i Biblija sikavela kaj o Beng tano čačutni ličnost, a na samo o lošnipe ki amende.

 Dali valjani te iznenadinel amen adava so but manuša na verujnena kaj o Beng postojnela sar ličnost? Ni hari. I Biblija vakerela kaj o Satana hovavela e manušen te šaj te ispolninel ple namere (2. Solunjanite 2:9, 10). Jekh taro leskere najbare hovajba tano kaj ov na postojnela, hem bute džene čhivgja len te verujnen ko akava (2. Korinkjanite 4:4).

Pogrešno mislibe: Lucifer tano panda jekh anav so isi e Benge.

 Čačipe: O hebrejsko lafi kova so ko nesave Biblie tano prevedimo sar Lucifer značinela „tu so svetinea“ (Isaija 14:12). O kontekst taro akava stiho sikavela kaj akale lafea mislinela pe ki dinastija taro vavilonska carija kolen so o Devel valjani sine te ponižinel len adaleske so sine but gorda (Isaija 14:4, 13-20). Otkeda peli akaja dinastija, asana sine lenge hem tegani koristingja pe o lafi „tu so svetinea“.

Pogrešno mislibe: O Satana tano e Devleskoro sluga kova so iskušinela e manušen te šaj te pomožinel e Devleske te sudinel lenge.

 Čačipe: O Beng nane e Devleskoro sluga nego leskoro dušmani. Ov protivinela pe, vakerela hovajba hem krivinela e manušen kola so služinena e Devleske (1. Petrovo 5:8; Otkrovenie 12:10).