Dali o Devel tano prisutno segde hem ko sa?
So vakerela i Biblija:
O Devel šaj te dikhel sa hem te dejstvujnel kote so mangela (Izreki 15:3; Evreite 4:13). Ama, i Biblija na vakerela kaj o Devel tano prisutno segde okolu amende hem ko sa. Namesto adava, oj vakerela kaj ov tano ličnost hem kaj isi le plo than kote so živinela.
Sar izgledinela. O Devel tano duhovno ličnost (Jovan 4:24). O manuša našti te dikhen le (Jovan 1:18). O vizie soj tane pišime ki Biblija sikavena kaj o Devel živinela ko jekh odredimo than. Nijekh lendar na sikavela kaj ov tano prisutno segde (Isaija 6:1, 2; Otkrovenie 4:2, 3, 8).
Kote živinela. O Devel živinela ko duhovno podračje, kova soj odvojmo taro sa soj materijalno. Ki Biblija pišinela kaj o Devel živinela ko nebo (1. Carevite 8:30). Isto agjaar, ki late čitinaja kaj, ki jekh prilika, o duhovna suštestvija terdile anglo Jehova, a hem adava sikavela kaj ov arakhljola ko odredimo than (Jov 1:6).
Ako o Devel nane prisutno segde hem ko sa, dali šaj te grižinel pe mange lično?
Oja. O Devel interesinela pe bašo sekova manuš. Iako arakhljola ko duhovno podračje, ov primetinela sa e manušen ki Phuv so mangena te oven leske poslušna, hem spremno tano te pomožinel lenge (1. Carevite 8:39; 2. Letopisi 16:9). Te dikha sar o Jehova grižinela pe okolenge soj leske verna.
Keda molinea tut. O Jehova šaj te šunel tli molitva ko isto momenti keda vakerea la (2. Letopisi 18:31).
Keda sian obeshrabrimo. „O Jehova tano paše uzo adala soj phage vilea hem spasinela adalen soj phage duhoja“ (Psalm 34:18).
Keda valjani tuke vodstvo. O Jehova vetinela: „Ka dav tut razboritost hem ka sikavav tut“ (Psalm 32:8). Ov kerela adava preku plo Lafi, i Biblija.
Pogrešna haljojba bašo e Devleskoro prisustvo
Pogrešno haljojbe: O Devel tano prisutno ko sa adava so stvoringja.
Čačipe: O Devel na živinela ni ki Phuv ni ko bilo kova javer than ko materijalno univerzum (1. Carevite 8:27). Točno tano kaj o čerenja hem o javera bukja so stvoringja „objavinena e Devleskiri slava“ (Psalm 19:1). Ama, isto sar so jekh umetniko na živinela ki slika so crtingja, agjaar o Devel da na živinela ko adava so stvoringja. Sepak, i slika šaj te vakerel amenge nešto bašo adava so crtingja la. Slično, o materijalno da sveto vakerela amenge nešto bašo e Devleskere osobine, na primer leskiri mokj, mudrost hem mangipe (Rimjanite 1:20).
Pogrešno haljojbe: Te šaj te džanel sa hem te ovel semokjno, o Devel mora te ovel prisutno segde hem ko sa.
Čačipe: Te šaj te vlijajnel, o Devel koristinela plo sveti duh, javere lafencar pli sila. Preku o sveti duh, o Devel šaj te dikhel sa hem te kerel sa so mangela, kote mangela hem keda mangela, bizo te ovel ov lično prisutno (Psalm 139:7).
Pogrešno haljojbe: O Psalm 139:8 vakerela kaj o Devel tano prisutno segde hem ko sa soske ko akava stiho pišinela: „Te ukljav hem ko nebo, tu bi ovea sine adathe, keda bi buljarava sine mi postela ko grobo, dikh, tu bi ovea sine adathe da“.
Čačipe: Akava stiho na kerela lafi bašo adava kote živinela o Devel. Namesto adava, poetska lafencar sikavela kaj o Devel šaj te pomožinel amenge kote hem te ova, soske ni jekh than nane leske but dur.
a Jehova tano o anav e Devleskoro, kova so doznajnaja le tari Biblija.
Šaj isto ka interesinel tut
OSNOVNA BIBLISKA SIKLJOJBA
Dali čače postojnela Devel?
Istražin o dokazija kola so sikavena kaj tano logično te verujna kaj postojnela Devel.
ODGOVOR BAŠO BIBLISKA PUČIBA
Soj tano o sveti duh?
Isi šukar pričine soske i Biblija bašo sveti duh vakerela kaj tano e Devleskere „vasta“.
