I Biblija samo jekh puti vaćeri ando tetovaže. Ki Levitska 19:28 pisini: „Ma ćeren tetovaže ki tumari koža“. O Devel dinđa akija zapovest e Izraelconđe te šaj te razlikujinen pe ando avera narodija kola ćerđe pese tetovaže ando pe devlenge anava ja simbolija kola predstavinena olenge devlen (Ponovljeni zakoni 14:2). Iako sar hrišćanija na hijam talo e Mojsijeso zakon, valjani ozbiljno te razmislina ando načelija kotar akija zapovest.

Da li jekh hrišćanin šaj te ćerel pese tetovaža?

 Razmislin ando disave biblijake stihija:

•   „O đuvlja. . . te oven skromna“ (1. Timoteju 2:9). Akava načelo važini hem e muršenđe. Valjani te pazina sar ka osetinen pe avera hem na valjani te privucina averengi pažnja.

•   Nesave manuša tetovirinena pe te mothoven koj tane, te razlikujinen pe averendar, ja te mothoven so šaj te ćeren sa so mangena pe teloja. Ama, i Biblija podstaknini e hrišćanen: „Den tumaro telo sar žrtva koja tani đivdi, sveto hem ugodno e Devlese, te koristinen tumari godi đi služinena olese“ (Rimljanima 12:1). Razmislin sose mangeja te ćere tuće tetovaža. Ako mangeja te ćere odova samo sebepi te pratine disavi moda ja te đanđol pe so hijan deo andi disavi grupa, ma bistri so ti želja šaj te nakhel, a i tetovaža ka aćhol. Odova so ka puće tut sose mangeja te ćere tuće tetovaža, ka pomožini tut te ane mudro odluka (Poslovice 4:7).

•   „O planija ando bućarno manuš sigurno ka uspinen, a koj tano sigutno sigurno perela ko ćororipe“ (Poslovice 21:5). O manuša obično ki sig ćerena pese tetovaže bizo te razmislinen ando posledice. Odova šaj te ćerel lenđe pharo te arakhen buti ja te oven ko šukar odnosija avere manušencar. Isto ađahar o tetovaže koštinena but pare, a pharo tano te ikalen pe hem but dukhala. O istraživanje mothovi so but manuša kola isi len tetovaže kajinena pe sebepi odova.