Te šaj te penđare nekas šukar, važno tano te đane so odija osoba angleder ćerđa hem kola pharipa hine la. Isto ađahar, ako mangeja šukar te penđare e Devle, valjani te sikljove so ov ćerđa e manušenđe. Šaj ka iznenadine tut ked ka sikljove so ov ćerđa but buća te šaj te ovel amen pošukar životi hem akana hem ki budućnost.

O Jehova tano Stvoritelj hem olese osobine dićhona ko sa so ćerđa (Rimljanima 1:20). „Ov koristinđa pi sila te ćerel i phuv, pi mudrost te ćerel i phuv te ovel stabilno hem po razum te phravel o nebo“ (Jeremija 10:12). Sa so o Devel ćerđa, mothovi so ov brinini pe amendar.

Razmislin kobor tano amaro životi pošužo sebepi so o Jehova ćerđa amen „premali pi slika“ (Postanak 1:27). Odova značini so ki određeno mera amen šaj te mothova olese šuže osobine. Ov dinđa amen sposobnost te haljova sar dikhela ko buća hem te đana soj tano lošno, a soj tano šukar anglo olese jaćha. Ked trudinaja amen te živina premalo olese merilija, amaro životi ovela pobahtalo. Uzo odova, ov ćerđa amen ađahar te šaj te ova paše oleja.

Amari phuv hem sa so o Devel ćerđa mothovi so ov mangela amen. Sar so o apostol Pavle phenđa, o Devel „na aćhavđa [amen], a te na mothovi [amenđe] savo tano ađahar so ćerđa šukar buća, dinđa [amen] boršim kotar nebo hem ćerđa [amare] poljija but te bijanen, dinđa [amen] but habe hem pherđa [amaro] vilo bahtalipaja“ (Dela apostolska 14:17). O Devel na dinđa amen samo odova so valjani amenđe, već dinđa amen but buća te šaj te uživina. Ama, sa odova nane ništa premalo odova so ađićeri amen ki budućnost.

O Jehova ćerđa i phuv te šaj o manuša večno te živinen ano late. Ki Biblija pisini: „I phuv dinđa e  manušenđe“ hem „na stvorinđa la bizo razlog, već ćerđa la ađahar te šaj o manuša te živinen upro late“ (Psalam 115:16; Isaija 45:18). Ko valjanđa te živini ki phuv hem kobor? „O pravednikija ka nasledinen i phuv, hem zauvek ka živinen upro late“ (Psalam 37:29).

Ked o Jehova ćerđa e prvo murše hem e đuvlja, e Adame hem e Eva, ov ćhivđa len ko edensko vrt te ćeren buti hem te brininen pe olestar (Postanak 2:8, 15). Uzo odova, o Devel phenđa lenđe: „Nek ovel tumen but ćhave hem tumendar nek oven but manuša, pheren i phuv hem vladinen upro late“ (Postanak 1:28). Ađahar o Adam hem i Eva šaj hine zauvek te živinen ko raj ki phuv. Ama, on irinđe po dumo e Devlese hem sebepi odova našalđe i prilika te oven maškaro „pravednikija“ kola „ka nasledinen i phuv“. Iako on odova ćerđe, e Devlesi namera e manušencar hem e phuvjaja na meninđa pe. Najangleder, te dikha so o Devel pana ćerđa amenđe.

I Biblija tani penđardi sar e Devleso Lafi. Sose o Jehova dinđa amen po Lafi? Te šaj pošukar te penđara le (Poslovice 2:1-5). Ćaće tano so i Biblija na dela amen odgovor ko svako pućibe kova isi amen ando Devel – nijekh knjiga odova našti (Propovednik 3:11). Pa ipak, sa so pisini ano late pomožini amenđe pošukar te penđara le. Andi Biblija šaj te haljova sar o Devel postupini e manušencar hem save manušen mangela, a save na (Psalam 15:1-5). Isto ađahar, oj mothovi sar o Devel mangela te služina lese, sar te živina hem sar valjani te dikha ko pare. Ama, savo tano o Devel ćaće, šaj pana pošukar te haljova ked ki Biblija čitinaja so ćerđa hem so vaćerđa oleso Ćhavo, o Isus Hrist (Jovan 14:9).

Pana jekh razlog sose o Jehova dinđa amen po Lafi tano te šaj te sikljova sar te ovel amen bahtalo životi. Prekali Biblija, o Jehova mothovi amenđe sar šaj te ovel amen bahtali porodica, sar te ova zadovoljna hem sar te ikljova ko krajo amare problemencar. Sar so ka dikha ko akava časopis, ki Biblija šaj te arakha o odgovorija ko važna pućiba, sar soj tane: Sose patinaja hem so ađićeri amen ki budućnost? Isto ađahar, oj mothovi so o Devel već ćerđa te bi ispunini pi namera e manušencar.

Isi amen pana but razlogija te verujina so i Biblija tani jekh posebno knjiga koja avela ando Devel. Iako pisinđe la 40 manuša ko period ando 1 600 berš, oj isi la jekh tema ando početko đi o krajo (2. Timoteju 3:16). Oj razlikujini pe ando avera purane knjige, sose iako nakhlje but berša, olake lafija na meninđe pe, a odova mothovena hem o purane biblijake rukopisija. Isto ađahar, oj aćhilji sa đi amare dive iako but manuša manglje te ćhinaven averen te prevodinen, te štampinen hem te čitinen i Biblija. Ama ipak, oj prevodinđa pe hem štampinđa pe pobuter ando sa avera knjige. Odova so i Biblija avdije postojini, mothovi so „o lafi ando amaro Devel aćhola zauvek“ (Isaija 40:8).

O Devel ćerđa diso posebno te šaj o manuša te ovel len životi sar so ov ko početko manglja. Sar so vaćerđam, ov manglja o manuša zauvek te živinen ki phuv. Ama, ked o Adam odlučinđa te na šunel e Devle hem ked grešinđa, ov našalđa i prilika te živini večno, a odija prilika našalđe hem o ćhave kola valjanđa te ovel le. Sar so i Biblija phenela „prekalo jekh manuš ko sveto khuvđa o greh hem prekalo greh o meribe hem ađahar o meribe alo ko sa o manuša sose sare ulje grešna“ (Rimljanima 5:12). Sebepi so o Adam na šunđa e Devle, dićhilo so olesi namera na ka ispunini pe. Ama, so o Devel ćerđa?

Olese osobine dićhilje ko sa so ćerđa. Sebepi soj tano pravedno, ov kazninđa e Adame hem e Eva aso odova so ćerđe. Ama, sebepi po mangipe dinđa aver prilika olenge budućo ćhavenđe. Sebepi soj tano mudro, ov odmah arakhlja rešenje aso odova problemi (Postanak 3:15). Te šaj te oslobodini e manušen ando greh hem ando meribe, ov dinđa jekh zadatko pe Ćhavese, e Isusese. So valjanđa o Isus te ćerel?

 Te šaj te oslobodini e manušen ando Adameso greh, o Jehova bićhalđa e Isuse ki phuv te sikavi e manušen sar te živinen „hem te del po đivdipe sar otkupnina butenđe“ a (Matej 20:28; Jovan 14:6). Sebepi so o Isus hine savršeno manuš sar o Adam, ov šaj hine te del po životi sar otkupno žrtva. Ki aver strana, ov aćhilo poslušno e Jehovase čak đi o meribe. O Isus na zaslužinđa te merel hem odolese o Jehova uskrsninđa le hem irinđa le ko nebo. Ađahar, o Isus šaj hine te ćerel okova so o Adam na ćerđa – ov dinđa prilika okolenđe kola šunena e Devle te živinen večno. Sar so pisini ki Biblija „odolese so jekh manuš na hine poslušno, but manuša ulje grešnikija, ađahar hem sebepi so jekh hine poslušno, but manuša ka oven pravedna“ (Rimljanima 5:19). Prekali Isusesi otkupno žrtva, o Devel ka ispunini po obećanje so o manuša ka živinen večno ki phuv.

Odova sar o Jehova reagujinđa ki Adamesi pobuna, but vaćeri amenđe olestar. Ov mothovđa so ništa našti te ćhinavi le te ispunini pi namera. Ked ov diso phenela, odova hem ovela (Isaija 55:11). Isto ađahar, odova mothovi kobor o Jehova mangela amen. „O Devel mothovđa mangipe premalo amende ađahar so bićhalđa pe jedinobijande Ćhave ki phuv te bi prekalo leste dobinaja životi. Odova mangipe značini akava: na mangljam amen e Devle, nego ov manglja amen hem bićhalđa pe Ćhave sar žrtva ando pomirenje aso amare grehija“ (1. Jovanova 4:9, 10).

O Devel „pe Ćhave na arakhlja ando meribe, već dinđa le sebepi amaro“ hem odova uverini amen so ka del amen hem sa aver so obećinđa amenđe (Rimljanima 8:32). So o Devel obećini amenđe? Dikh ko aver članko.