Ked hijan ko pharipa, sigurno očekujineja to paše amal te pomožini tuće. Sebepi odova, disave mislinena so o Devel nane olengo amal sose dićhola lenđe so ov na ćerela ništa te pomožini len. Ama, o Devel na samo so ćerđa amenđe but buća, već pana hari ov ka cidel sa amare problemija. So ov ka ćerel?

O Devel ka cidel sa o lošnipe ađahar so ka cidel okole kastar avela o lošnipe. I Biblija ki 1. Jovanova 5:19 mothovi koj tano odova: „Celo sveto tano ko e Lošnonese vasta“. Odova „Lošno“ tano o Satana, o Beng, kastar o Isus phenđa soj tano „vladari akale svetoso“ (Jovan 12:31). Glavno razlog sose avdije isi odobor problemija tano sebepi so o Beng utičini upro manuša. So o Devel ka ćerel?

Pana hari, o Jehova prekalo po Ćhavo, o Isus Hrist, ka „uništini okole kova isi le moć te ćerel neko te merel, a odova tano o Beng“ (Jevrejima 2:14; 1. Jovanova 3:8). Sar so i Biblija mothovi, kokri o Beng tano svesno so na aćhilo lese pana but vreme (Otkrivenje 12:12). Ama, o Devel ka cidel hem sa okolen kola ćerena lošnipe (Psalam 37:9; Poslovice 2:22).

Palo odova so ka cidel sa o lošnipe andi phuv, amaro Stvoritelj ka ćerel sa so valjani te šaj te ispunini okova so manglja e phuvjaja hem e manušencar. Savo životi ađićeri amen?

Ka ovel amen mir hem sigurnost. „O krotka ka nasledinen i phuv hem ka uživinen ko baro mir“ (Psalam 37:11).

Ka ovel amen but buća hajbase. „Ki phuv ka ovel pherdo điv hem o najuće bregija ka oven pherde điveja“ (Psalam 72:16).

Ka ovel amen šuže ćhera hem ka uživina ki buti. „On ka ćeren ćhera hem ka bešen ano lende, ka sadinen o drakha hem ka han olengo plod. [...] Me izabranikija ka uživinen ko sa so ćerena pe vastencar“ (Isaija 65:21, 22).

Da li mangeja te ovel tut asavko životi? Pana hari, odova ka ovel ćaće.

Avdije, svako manuš šaj te naborsaljol hem te merel. Ama, pana hari više na ka ovel ađahar. Sebepi e Isusesi otkupno žrtva, o Devel ka ispunini pi namera hem tegani nijekh manuš kova mothovi vera ko Isus na ka ovel uništimo, nego ka ovel le večno životi (Jovan 3:16). Savo životi ka ovel amen?

O nabormipe više na ka ovel. „Nijekh manuš ki phuv na ka phenel: ’Nabormo hijum.‘ E manušenđe kola živinena ki odija phuv ka oven oprostime olenge grehija“ (Isaija 33:24).

O meribe više na ka ovel. „Zauvek ka uništini o meribe. O Svevišnjo Gospod Jehova ka kosel sa e manušenge asva“ (Isaija 25:8).

O manuša zauvek ka živinen. „E Devleso dar tano o večno đivdipe prekalo Hrist Isus, amaro Gospod“ (Rimljanima 6:23).

O mulje ka oven irime ko životi. „O Devel ka uskrsnini hem okolen soj tane pravedna hem okolen soj tane nepravedna“ (Dela apostolska 24:15). E Isusesi otkupno žrtva koristini hem okolenđe so mulje.

Sar o Devel ka ćerel sa odova?

O Devel ka ispunini pi namera e phuvjaja hem e manušencar prekali jekh nebesko vladavina, kuri ka vladini oleso Ćhavo, o Isus (Psalam 110:1, 2). Ando odova kraljevstvo vaćeri pe ki molitva Očenaš. O Isus sikavđa pe učenikonen te molinen pe: „Amaro Dad, kova hijan ko nebo, [...] nek avel to Kraljevstvo“ (Matej 6:9, 10).

E Devleso Kraljevstvo ka vladini upri celo phuv hem ka cidel sa i patnja hem i dukh. Odija vladavina ka ovel najšukar e manušenđe! Odolese, đi hine ki phuv, o Isus dinđa sa pestar te propovedini „i šukar vest ando Kraljevstvo“ hem phenđa pe učenikonenđe te ćeren isto odova (Matej 4:23; 24:14).

Sebepi po mangipe premalo manuša, o Jehova obećinđa so ka ispunini sa odola obećanja. Da li odova ćhivela tut pana pošukar te penđare le hem te ove paše oleja? Sar odova so ka ove paše e Devleja ka utičini upro tute? Odolestar ka vaćera ko aver članko.