O MANUŠA

So phenela i Biblija: O Devel „na stvorinđa la [i phuv] bizo razlog, već ćerđa la ađahar te šaj o manuša te živinen upro late“ (ISAIJA 45:18).

AMARI PHUV

So phenela i Biblija: „Jekh naraštaj đala, aver avela, a i phuv aćhola zauvek“ (PROPOVEDNIK 1:4).

SO AKAVA ZNAČINI: Premali Biblija, i phuv niked na ka ovel uništimi hem uvek ka živinen manuša upro late. Tegani, ko so mislini pe ked phenela pe so ka avel o krajo ando akava sveto?

RAZMISLIN ANDO AKAVA: I Biblija uporedini o krajo ando sveto odoleja so ulo ko e Nojese dive. Ko odova vreme, i phuv hine pherdi „nasilno manušencar“ (Postanak 6:13). Ama, o Noje hine pravedno manuš. Odolese, o Devel spasinđa ole hem olese porodica, ama uništinđa e lošno manušen ko Potop. Ando odova so tegani ulo ki Biblija pisini: „Odova sveto tegani hine uništimo ked hine potopimo panjeja“ (2. Petrova 3:6). Odova hine krajo ando sveto kova postojinđa ko odova vreme. Ama, so hine uništimo? Na i phuv, nego o lošna manuša ki phuv. Odolese, ked i Biblija vaćeri ando krajo kotar akava sveto, tegani na mislini pe so ka ovel uništimi amari phuv. Nego mislini pe so ka oven uništime o lošna manuša ki phuv hem sa o lošna buća kola on avdije ćerena.

O PROBLEMIJA HEM O LOŠNIPE

So phenela i Biblija: „Pana hari hem o lošna više na ka oven. Ka dikhe uduri kuri hine, a on na ka oven odothe. Ama o krotka ka nasledinen i phuv, hem ka uživinen ko baro mir“ (PSALAM 37:10, 11).

SO AKAVA ZNAČINI: O Potop kova hine ko e Nojese dive na uništinđa zauvek sa o lošnipe andi phuv. Palo Potop, o lošna manuša palem nastavinđe te ćeren te ovel but pharo o životi sarinenđe. Pana hari, o Devel ka uništini sa o lošnipe. Sar so phenela o psalmista: „O lošna više na ka oven.“ Prekalo po kraljevstvo o Devel ka uništini sa o lošnipe. Odova kraljevstvo tano e Devlesi vladavina koja ando nebo ka vladini upro poslušna manuša ki phuv.

RAZMISLIN ANDO AKAVA: Da li o manuša kola avdije vladinena upri phuv ka mangen te podržinen e Devleso Kraljevstvo? I Biblija phenela so na ka ćeren odova. On ka oven protiv odova Kraljevstvo (Psalam 2:2). So ka ovel tegani? E Devleso Kraljevstvo ka uništini sa o vladavine, a „samo ov ka aćhol večno“ (Danilo 2:44). Ama, sose ka oven uništime o manušikane vladavine?

So phenela i Biblija: „O manuš našti te upravini ni pe korakonencar“ (JEREMIJA 10:23).

SO AKAVA ZNAČINI: O manuša nane stvorime te vladinen jekh upro jekheste. On lošno vladinena upro manuša hem našti te rešinen olenge problemija.

RAZMISLIN ANDO AKAVA: Ki enciklopedija Britannica Academic pisini so o vlastija našti te „rešinen o problemija sar soj tane o ćororipe, bokhalipe, nabormipe, prirodna katastrofe, maribe hem nasilje.“ Oj ponodri phenela: „Disave verujinena so jedino ako bi postojini samo jekh vlast ko celo sveto, oj šaj te anel trajno rešenje aso akala problemija.“ Ama, čak hem ked bi udružinena pe sa o manušikane vladavine ko sveto, hem ponodri bi vladinena o nesavršena manuša kola našti te rešinen o problemija ando kola vaćerđam. Samo e Devleso Kraljevstvo tano vladavina koja isi la moć te rešini zauvek sa o problemija ko celo sveto.

Premalo odova so vaćeri i Biblija, o šukar manuša na valjani te daran so ka ovel uništimo o sveto hem o lošna buća koro leste. Ustvari, amen jedva ađićeraja akava purano sveto te ovel zamenimo e Devlese neve svetoja kova ka ovel but šužo!

Ked ka ovel sa akava? Ko aver članko ka dikha o odgovor andi Biblija.