„Aćhoven đangavde, sose, na đanena ni o dive ni o vreme“ (MATEJ 25:13).

„Pazinen, oven đangavde, sose na đanena ked tano o vreme te ovel odova“ (MARKO 13:33).

Niko ki phuv na đanela ked tačno ka avel o krajo ando akava sveto. Ama, o Devel odredinđa o „dive hem o vreme“ ked tačno ka avel o kraj (Matej 24:36). Da li odova značini so nisar našti te đana da li tano o krajo paše? Na. O Isus phenđa pe učenikonenđe te obratinen pažnja ko but događaja kola ka mothoven soj tano o krajo but paše, samći anglo amare udara.

Akala događaja ka oven znak kotar krajo ando akava sveto. O Isus phenđa: „Ka uštel o narodo upro narodo hem o kraljevstvo upro kraljevstvo, ka oven bokhalipa hem zemljotresija ko razna thana“ (Matej 24:3, 7). Isto ađahar, ov phenđa so ka oven „zarazna nabormipa“ ili epidemije (Luka 21:11). Da li dikheja sar ispuninena pe o događaja kola o Isus prorokujinđa?

Avdije o manuša patinena odolese so isi mariba, bokhalipe, zemljotresija hem avera katastrofe kola ovena jekh palo jekh. Na primer, ko 2004. berš jekh but baro zemljotres ko Indijsko okeani anđa đi odova te ovel cunami hem tegani mulje oko 225 000 manuša. Aso samo trin berš, sebepi i pandemija ando koronavirus mulje 6,9 milionija manuša ko celo sveto. O Isus phenđa so asavke događaja ka mothoven so o krajo ando sveto tano paše.

I Biblija o period angleder te avel o kraj vićini „poslednja dive“ (2. Petrova 3:3, 4). Ki 2. Timoteju 3:1-5 pisini so ko poslednja dive o manuša ka oven sa pološna hem pološna. (Dikh o okvir „ Hari angleder te avel o krajo ando akava sveto“.) Da li dikheja e manušen kola tane sebična, pohlepna, nasilna hem kola na mothovena mangipe jekh premalo jekheste? Akava tano pana jekh dokaz so živinaja paše ko krajo ando akava sveto.

Kobor ka trajinen o poslednja dive? I Biblija phenela samo „hari vreme.“ Palo odova o Devel ka uništini okolen „so uništinena i phuv“ (Otkrivenje 11:15-18; 12:12).

O Devel već odredinđa o dive hem o vreme ked ka uništini sa o lošna buća ko akava sveto (Matej 24:36). Ama, isi pana jekh šukar vest, o Devel „na mangela nijekh te merel“ (2. Petrova 3:9). Ov dela amen prilika te sikljova koja tani olesi volja hem te ova lese poslušna. Sose? Odolese so mangela te preživina o krajo ando akava sveto hem te živina ko nevo sveto ked i phuv ka ovel raj.

O Devel pobrininđa pe sa o manuša te sikljon sar šaj te oven deo ando nevo sveto kuri ka vladini oleso Kraljevstvo. O Isus phenđa so i šukar vest ando e Devleso Kraljevstvo „ka propovedini pe ko celo sveto“ (Matej 24:14). Ko celo sveto, e Jehovase svedokija trošinena milijarde satija te vaćeren hem te sikaven e manušen andi nada koja pisini ki Biblija. O Isus phenđa so ko celo sveto ka vaćeri pe ando Devel angleder te avel o kraj.

Pana hari ka avel vreme ked o manuša više na ka vladinen. Ama, i šukar vest tani so tu šaj te preživine o kraj ando akava sveto hem te ove ko nevo sveto, ko raj kova o Devel obećinđa. Ko aver članko ka dikha so šaj te ćere te šaj te živine ko odova nevo sveto.