Razmislin ando odova kobor paše šaj te oven o manuša kola tane duj ista bliznakija. On isiljen jekh posebno odnos jekh jekheja. I Nensi Segal, i direktorka ando jekh Istraživačko centar e bliznakonendže, koja tani isto bliznakinja, vačeri so „disave oljendar čak džanena sar tano ked vačereja džikasa ko čače džanela so mislineja, bizo te vačere diso“. Jekh džuvlji mothodža savo odnos isila pe bliznakinja: „Amen džana sa jekh jekhatar.“

Sose šaj odobor šukar te haljonpe? O naučnikija mothovena so uzo odova kuri barilje hem sar o dad hem i daj bajačerdže oljen, jekh najbari buti ko sa odova utičinena o slična genija ko bliznakija.

RAZMISLIN AKALJESTAR: O Devel kova čerdža odola but šukar genija sigurno najšukar pendžari svakone manuše. Hem čače, o David vačerdža: „Garadžan man ko me dajako vodži. Me kokala na hine garavde tutar dži hijumlje čerdo garavde [...] Te jačha dikhlje dži hijumlje plod, ki tiklji knjiga hine pisime sa oljese kotora“ (Psalam 139:13, 15, 16). Samo o Devel šaj čače te haljol sar hijam čerde hem sa odova so utičija ko amaro dživdipe. Sebepi so o Devel šukar pendžari amen hem džanela sar hijam čerde, odova mothovi amendže so ov haljola amen ko sa.

O David moljijape: „Jehova, tu hor dikhljan ano mande hem pendžareja man. Tu džaneja ked bešava hem ked uštava. Tu čak dural džaneja so isima ki godi. Pana o lafija na alje maje ki čhib, a tu, Jehova, već džanejaljen sa“ (Psalam 139:1, 2, 4). Isto adžahar, o Jehova džanela so isimen hor ko vilo, čak „sa so isi ki godi hem svako želja džanela“ (1. Letopisa 28:9; 1. Samueleso 16:6, 7). So akala stihija vačerena amendže ando Devel?

Iako ki molitva našti te vačera sa so mislina hem sa so isimen ko vilo, amaro Devel na dikhela samo so amen čera, nego hem haljola sose čera diso. Ov čak dikhela o šukaripe so bi manga te čera, iako amari nesavršenost na mukelamen te čera odova so manga. Sebepi so o Devel čhidža ano amende mangipe, ov jedva adžičeri te dikhel odova so mislina hem sose diso čera mangipa (1. Jovaneso 4:7-10).

 So sikljova ando Devljeso Lafi

• „E Jehovase jačha dikhena e pravednikonen hem oljese kana šunena oljengi molitva“ (1. PETARESO 3:12).

• O Devel dija po lafi adžahar so pheja: „Ka pomožinavtu te haljove o buča hem ka sikavavtu kolje drumoa valjani te dža. Ka davtu savet, mi jakh ka ovel upro tute“ (PSALAM 32:8)

Ked isimen pharipa, da lji šaj te pomožinimen odova so džana so o Devel haljola amen hem odova so džanela so isimen ko vilo? Te dikha so ulo e Ana andi Nigerija. Oj phenela: „Hine maje but pharo hem odoljese mislijum nane sose te živinav. Valjandžum kokri, bizo rom te akharav gajlja andi mi čhaj koja hine ki bolnica sebepi so hinela hidrocefalus (pani ano šero). Ko odova vakti, o doktorija arakhlje maje so isima rak ki čuči hem valjandžum te džav ki operacija, te lav i hemoterapija hem zračenje. Najpharo hine maje te ovav ki bolnica sose tegani hem mi nabormi čhaj hine odothe.“

So pomožija e Anače te nakhel sa akala pharipa? Oj phenela: „Mislijum ando lafija kotar Filipskonendže 4:6, 7 kuri pisini: ’E Devljeso rahati, kova nijekh godi našti te haljol, ka arakhi tumare vilje hem tumari godi‘. Svako puti ked mislijum kotar akala lafija hijumlje popaše e Jehova hem džandžum so ov but pošukar haljolama nego me. Isto adžahar, but pomožijema me phralja hem me phenja kotar dvorana kola manca služinena e Devljese.

„Iako pana hijumlje nabormi, moklo hem me čhajako sastipe ulo pošukar. Sebepi so o Jehova hine amenca, sikljiljam so ked isimen pharipa na valjani te razmislina lošno. E Jakoveso 5:11 zorjačerimen: ’Bahtalje vičina okoljen so ačhilje zoralje. Šujen sar o Jov ačhilo zoralo hem dikhljen so o Jehova čerdža ko krajo oljese, dikhljen so o Jehova isilje vilo svakonese hem soj tano kovlje viljeso.‘“ O Jehova but šukar haljilo save pharipa hinelje o Jov, odoljese hem amen šaj te ova sigurna so o Jehova haljola svako amaro pharipe so isimen.