7. ČLANKO PROUČIBASE
ĐILI 15 Slavin e Kralje!
Kobor značini tuće odova so o Jehova oprostini?
Tu ćaće oprostineja (PS. 130:4)
SO KA SIKLJOVA?
Ka razmotrina nekobor ilustracije andi Biblija kola opisujinena sar o Jehova oprostini amenđe. Akava članko ka pomožini amen te ova pobuter zahvalna e Jehovase aso odova.
1. Sose tano pharo te đana so neko mislini ked phenela „oprostinava tuće“?
„OPROSTINAVA TUĆE.“ Kobor tane utešna akala lafija, posebno ako đaneja so phenđan ili ćerđan diso so nekas povredinđa. Ama, but putija tano pharo te haljova so i osoba mislini ked phenela so oprostinđa amenđe. Da li phenela tuće odova sose mangela te đane so pana aćhiljen amala? Da li mangela te phenel so na mangela više te vaćeri odolestar? Svakonese akala lafija isi len različito značenje.
2. Sar tano ki Biblija opisujimo sar o Jehova oprostini?
2 But razlikujini pe odova sar o Jehova oprostini amenđe ando odova sar amen oprostinaja jekh jekhese. Niko našti te oprostini sar o Jehova. O psalmista ando Jehova phenđa: „Ama tu ćaće oprostineja, odolese o manuša isi len strahopoštovanje premalo tute“ (Ps. 130:4). a O Jehova ćaće oprostini. U stvari, ov mothovđa amenđe so značini ćaće te oprostina. Ko disave stihija ko Hebrejska spisija e biblijake piscija ked opisujinđe sar o Jehova oprostini koristinđe disave lafija kola niked na koristinđe te opisujinen sar o manuša oprostinena.
3. Sar o Jehova oprostini averćhane amendar? (Isaija 55:6, 7)
3 Ked o Jehova oprostini nekase, odola grehija tane potpuno kosle. Palo odova, odija osoba pana šaj te ovel paše e Jehovaja. But hijam zahvalna e Jehovase so potpuno hem velikodušno oprostini amenđe. (Čitin Isaija 55:6, 7.)
4. Sar o Jehova pomožini amen te haljova so značini ćaće te oprostina?
4 Ako o Jehova oprostini averćhane amendar, sar šaj amen, o nesavršena manuša, te haljova so značini ćaće te oprostina? Ov pomožini amen ađahar so koristini but šuže ilustracije kola opisujinena sar ov oprostini. Ko akava članko ka razmotrina nekobor. On ka mothoven amenđe sar o Jehova cidela amare grehija hem mukhela amen palem te ova olese amala. Đi ka razmotrina odola ilustracije, ka barjol amaro mangipe hem amari zahvalnost premalo amaro milosrdno Dad.
O JEHOVA CIDELA AMARE GREHIJA
5. So desini pe ked o Jehova oprostini amare grehija?
5 Ki Biblija tane o grehija često uporedime sar jekh baro pharipe. O kralj David pe grehija ađahar opisujinđa: „Me grehija ćedinđe pe ko mo šero sar jekh baro pharipe, but tane maje phare“ (Ps. 38:4). Ama, o Jehova oprostini okolenđe so kajinena pe (Ps. 25:18; 32:5). O hebrejsko lafi kova tano prevodimo sar „oprostini“ značini „vazde“ ili „akhar“. Ked o Jehova oprostini amare grehija, ov cidela o pharipe kova isi amen. Odova tano sar ka phene ko pike isi amen baro pharipe, a ov lela le amendar.
„Oprostinđan“ (Ps. 32:5)
6. Kobor dur o Jehova cidela amare grehija?
6 Jekh aver ilustracija mothovi amenđe kobor dur o Jehova cidela amare grehija. Ko Psalam 103:12 pisini: „Kobor o istok tano dur ando zapad, odobor ov cidela amare prestupija amendar.“ O istok tano but dur ando zapad. On duj niked na ka resen pe. Odova značini so o Jehova cidela amare grehija amendar odobor dur so amen našti ni te zamislina. Akava uverini amen so o Jehova potpuno oprostini amenđe.
„Kobor o istok tano dur ando zapad“ (Ps. 103:12)
7. Sar i Biblija opisujini so o Jehova ćerela amare grehonencar? (Mihej 7:18, 19)
7 O Jehova ko simbolično način cidela amare grehija dur amendar. Ama, so ćerela olencar? Da li arakhi len koro peste? Na. O kralj Jezekija ando Jehova pisinđa: „Fordinđan sa me grehija palo to dumo.“ Ili sar so pisini ki fusnota: „Cidinđan sa me grehija više te na dikhe len“ (Is. 38:9, 17). Odova značini so ked neko kajini pe o Jehova fordela olese grehija hem više na dikhela len. Akava stih bi šaj te ovel prevodimo hem ađahar: „Tu hijan premalo mande asavko samći niked na grešinđum.“ I Biblija istaknini slično buti ki jekh aver ilustracija ko Mihej 7:18, 19. (Čitin.) Odothe vaćeri pe so o Jehova amare grehija fordela hor ko more. Ko purano vreme hine nemoguće te arakhi pe disavi buti koja hine fordimi hor ko more.
„Fordinđan sa me grehija palo to dumo“ (Is. 38:17)
„Sa olenge grehija ka forde hor ko more“ (Mih. 7:19)
8. So sikljiljam đi akana?
8 Ando akala ilustracije sikljiljam so ked o Jehova oprostini, ov potpuno cidela amare grehija hem nane potreba pana te osetina krivica. Sar so o David phenđa, „bahtale tane okola kase lošna delija tane oprostime hem kase grehija tane ućharde. Bahtalo tano o manuš kase grehija o Jehova na pamtini“ (Rimlj. 4:7, 8). O Jehova ćaće oprostini!
O JEHOVA KOSELA AMARE GREHIJA
9. Sar i Biblija pomožini amen te haljova so o Jehova potpuno oprostini?
9 O Jehova koristinđa jekh aver ilustracija te šaj te pomožini amen te cenina odova so prekali otkupnina kosela amare grehija. Ki Biblija čitinaja so o Jehova thovela amare grehija. Sebepi odova o grešniko ovela čisto (Ps. 51:7; Is. 4:4; Jer. 33:8). O Jehova objasnini so ovela ko krajo: „Ako tane tumare grehija sar i loli boja, ka oven parne sar o iv. Ako tane sar i tamno loli boja, ka oven parne sar i vuna“ (Is. 1:18). But tano pharo te ikalji pe disavi loli fleka ando šeja. Ama, o Jehova koristinđa akija ilustracija te uverini amen so amare grehija šaj te thoven pe ka phene niked na hine.
„Ako tane tumare grehija sar i loli boja, ka oven parne sar o iv“ (Is. 1:18)
10. Sar i Biblija opisujini kobor tano o Jehova velikodušno ked oprostini?
10 Sar so phenđam ko prethodno članko, o grehija tane sar „dugija“ (Mat. 6:12; Luka 11:4). Svako puti ked grešinaja, amare dugija ovena pobare. Amen but dugujinaja e Jehovase. Ama, ked ov oprostini amenđe odova tano sar ka phene oprostini amaro dugo. Ov na rodela te platina lese aso grehija kola oprostinđa amenđe. Sar soj tani jekh osoba but radosno ked tano oprostimo olako dugo, ađahar hem amen hijam radosna ked o Jehova oprostini amenđe.
„Oprostin amenđe amare dugija“ (Mat. 6:12)
11. So značini odova so ki Biblija pisini so amare grehija tane kosle? (Dela apostolska 3:19)
11 O Jehova na samo so oprostini amare dugija ili grehija, ov kosela len. (Čitin Dela apostolska 3:19.) Ked tane o dugija oprostime odova tano ka phene odija suma koja dugujinaja tani precrtimi. Ama, o broja pana dićhona. A ked nešto kosela pe, odova tano averćhane. Te šaj te haljova akija ilustracija valjani te setina amen so o mastilo kova koristinđa pe ko purano vreme šaj hine lokho te kosel pe. Neko šaj hine te lel jekh sapano sunđeri hem te kosel odova so hine pisimo. Znači ked jekh dugo hine „koslo“, ov nestajinđa. O manuša više našti hine te dikhen odova so hine angleder pisimo. O dugo ka phene niked na postojinđa. But tano utešno te đana so ked o Jehova oprostini amare grehija, odova tano sar ka phene niked na ćerđam len (Ps. 51:9).
„Šaj te kosen pe tumare grehija“ (Dela 3:19)
12. So sikljovaja andi ilustracija kotar gusto oblako?
12 Isi pana jekh ilustracija koja opisujini sar o Jehova kosela amare grehija. Ov phenela: „Ka kosav te prestupija hem ka oven sar ka phene o oblako garavđa len, hem te grehija, pa ka oven ka phene o gusta oblakija garavđe len“ (Is. 44:22). Ked o Jehova oprostini, odova tano ka phene koristini jekh gusto oblako te garavi amare grehija hem više na dikhaja len ni amen ni ov.
„Ka kosav te prestupija hem ka oven sar ka phene o oblako garavđa len“ (Is. 44:22)
13. Sar osetinaja amen ked o Jehova oprostini amare grehija?
13 So odova amenđe značini? Ked o Jehova oprostini amare grehija, amen na valjani te osetina krivica celo životi. E Isusesi otkupno žrtva potpuno platinđa amare grehija. Ked o Jehova oprostini, odova tano ka phene niked na ćerđam odova greh. Ako kajinaja amen aso amare grehija, o Jehova ađahar ka oprostini amenđe.
O JEHOVA PRIHVATINI PALEM TE OVA PAŠE OLEJA
Odolese so o Jehova oprostini amenđe, amen šaj te ova paše amala oleja (Dikh o 14. odlomko)
14. Sose šaj te verujina e Jehovase so potpuno oprostini amenđe? (Dikh o slike.)
14 Ked o Jehova oprostini amenđe, šaj te ova sigurna so palem šaj te ova olese amala. Odolese, nane potreba hem ponodri te ovel amen osećaj andi krivica. Na valjani te dara soj tano o Jehova pana holjamo upro amende hem so rodela način sar te kaznini amen. Odova niked na ka desini pe. Sose šaj te verujina e Jehovase ked phenela so oprostinđa amenđe? Ov phenđa e prorokose, e Jeremijase: „Ka oprostinav lenđe olengo greh hem više na ka avel maje ki godi olengo greh“ (Jer. 31:34). O apostol Pavle ponovinđa isto misao (Jevr. 8:12). Ama, so odova ćaće značini?
„Više na ka avel maje ki godi olengo greh“ (Jer. 31:34)
15. So značini odova so o Jehova više na setini pe ko amare grehija?
15 Ki Biblija, o izraz „na ka avel maje ki godi“ na odnosini pe uvek ko odova te razmislina ando diso so hine angleder. Disavo puti, akava izraz značini „te ćera diso“. O zločinco ko stubo phenđa e Isusese: „Isus, setin tut koro mande ked ka ave ko to Kraljevstvo“ (Luka 23:42, 43). Ov na rodinđa e Isusestar samo te setini pe upro leste nego hem te ćerel diso olese ked aso odova ka avel o vreme. E Isusese lafija mothovena amenđe so ov ka uskrsnini le. Znači, ked o Jehova phenela so na setini pe ko amare grehija, odova značini so na ka ćerel ništa protiv amende. Ov na ka kaznini amen ki budućnost sebepi o grehija kola oprostinđa amenđe.
16. Kasa i Biblija uporedini amen?
16 I Biblija koristini jekh aver ilustracija te opisujini savi sloboda isi amen ked tano amenđe oprostimo. Koro late pisini so odolese so hijam nesavršena, amen hijam „robija ando greh“. Ama, ked o Jehova oprostini amenđe, amen hijam sar o robija kola tane „oslobodime ando grehija“ (Rimlj. 6:17, 18; Otkr. 1:5). Ked đanaja so o Jehova oprostinđa amenđe, amen šaj te ova bahtale sar o robo kova tano oslobodimo.
„Hijen oslobodime ando greh“ (Rimlj. 6:18)
17. Sar o opraštanje pomožini amenđe? (Isaija 53:5)
17 Čitin Isaija 53:5. Odolese so hijam grešna, i Biblija uporedini amen e manušencar kola isi len nabormipe kolestar merela pe. Prekali Isusesi otkupno žrtva, o Jehova saćarđa amen (1. Petr. 2:24). Ked grešinaja, amen ruminaja amaro amalipe e Jehovaja. Ama, sebepi i otkupnina ov šaj te oprostini amenđe hem šaj palem te ova amala oleja. Sar so jekh manuš kova saćilo ando jekh ozbiljno nabormipe tano but bahtalo, amen hijam but bahtale so šaj te ova paše e Jehovaja.
„Sebepi olese rane amen hijam saćarde“ (Is. 53:5)
SAR UPRO AMENDE UTIČINI ODOVA SO O JEHOVA OPROSTINI AMENĐE?
18. So o ilustracije kolendar vaćerđam mothovena amenđe ando Jehovaso opraštanje? (Dikh o okvir „Sar o Jehova oprostini amenđe?“)
18 So sikljiljam ando akala ilustracije? Ked o Jehova oprostini, ov odova ćerela potpuno hem zauvek. Sebepi odova šaj te ova paše oleja. Ama, đanaja so odova tano jekh baro poklon ando Jehova. Ov odova dela amen sose mangela amen hem sose tano velikodušno, a na odolese so zaslužinaja (Rimlj. 3:24).
19. (a) Aso so valjani te ova zahvalna? (Rimljanima 4:8) (b) Sostar ka vaćera ko aver članko?
19 Čitin Rimljanima 4:8. Amen hijam but zahvalna e Jehovase so oprostini amenđe (Ps. 130:4). Ama, ako mangaja o Jehova te oprostini amenđe valjani te ćera diso but važno. O Isus phenđa: „Ako tumen na oprostinena e manušenđe olenge prestupija, tegani ni tumaro Dad na ka oprostini tumare prestupija“ (Mat. 6:14, 15). Jasno dikhaja soj tano but važno te oponašina e Jehova hem te oprostina averenđe. Ama, sar šaj te ćera odova? Odolestar ka vaćera ko aver članko.
ĐILI 46 O hvala Jehova
a Ko izvorno hebrejsko tekst ko Psalam 130:4 koristini pe o izraz kova odnosini pe ko odova so samo o Jehova ćaće oprostini.
