8. ČLANKO PROUČIBASE
ĐILI 130 Spremno te oprostina
Sar šaj te oprostina sar o Jehova?
Sar so o Jehova ando vilo oprostinđa tumenđe, ađahar ćeren hem tumen (KOL. 3:13)
SO KA SIKLJOVA?
Ko akava članko ka dikha so valjani te ćera te šaj te oprostina nekase ko povredinđa amen.
1-2. (a) Ked šaj te ovel amenđe posebno pharo te oprostina nekase? (b) Sar i Deniza mothovđa soj tani spremno te oprostini?
DA LI tano tuće pharo te oprostine averenđe? Butenđe tano pharo, posebno ked neko phenđa ja ćerđa diso sova but povredinđa amen. Ama, amen šaj te cida amendar i holi hem te oprostina. Te dikha o primer andi amari phen i Deniz a koja oprostinđa diso but baro. Ko 2017. berš, oj hem olaki porodica posetinđe amaro glavno sedište. Ked irinđe pe ćhere, jekh vozači našalđa i kontrola upro pe vorda hem khuvđa len. Tegani, i Deniza pelji ko nesvest. Ama, ked uštinđa dikhlja so olake ćhave hine povredime hem so olako rom, o Brajan, mulo. Ked akana setini pe ko odova trenutko, oj phenela: „Na hine man snaga nisose hem na đanđum kaj tano mo šero.“ Kasnije, šunđa so odova vozači na hine mato, ni drogirimo niti dikhlja ko telefoni ked khuvđa len. Odolese, molinđa e Jehova te del la mir te šaj te kontrolišini pe osećanja.
2 O vozači hine odgovorno aso saobraćajno udes ko kova olako rom mulo. Ako bi ovela proglasimo sar krivo, ov bi đala ko phanlipe. Ama, neko ando sudo phenđa e Denizaće so ando odova sar oj ka svedočini ka zavisini so ka ovel odole manušeja. I Deniza phenela: „Osetinđum ka phene so neko phravela mi rana hem upro late ćhorela but lon, sose morandiljum te vaćerav ando najphare trenutkija kotar mo životi.“ Samo nekobor kurće palo odova, i Deniza đelji ko sudo hem valjanđa te vaćeri anglo manuš sebepi kova olaki porodica patini. Tegani, oj zamolinđa e sudija te mothovi milosrđe odole manušese. b Ked završinđa, e sudija ukljinđa o rojbe. Ov phenđa: „Ko akala 25 berš sar hijum sudija, niked na šunđum diso asavko. Niked na šunđum so i porodica koja našalđa pe mangle, rodela te mothovav milosrđe e manušese kova tano optužimo. Niked na šunđum so neko isi le odobor baro mangipe hem soj tano spremno te oprostini.“
3. So podstakninđa e Deniza te oprostini?
3 So pomožinđa e Denizaće te oprostini? Oj razmislinđa ando odova kobor o Jehova oprostini (Mih. 7:18). Ked hijam zahvalna aso odova so o Jehova oprostini amenđe, odova ka podstaknini amen te oprostina averenđe.
4. So o Jehova mangela amen te ćera? (Efešanima 4:32)
4 O Jehova mangela hem amen te oprostina averenđe sar so ov oprostini amenđe. (Čitin Efešanima 4:32.) Ov ađićeri amendar spremno te oprostina okolenđe kola povredinena amen (Ps. 86:5; Luka 17:4). Ko akava članko, ka razmotrina trin buća kola ka pomožinen amen te oprostina.
MA ĆHIV TE OSEĆANJA KI STRANA
5. Premalo Poslovice 12:18, sar šaj te osetina amen ked neko povredini amen?
5 Amen šaj te ova but povredime odolese so neko phenđa ja ćerđa, posebno ako odija osoba tani amaro šukar amal ja ćherutno (Ps. 55:12-14). Podijekh puti, odija dukh tani odobor bari so ka phene neko posavđa amen ćhurikaja. (Čitin Poslovice 12:18.) Amen šaj te trudina amen te ćhiva amare osećanja ki strana. Ama, ako ćeraja odova, odova bi ovela samći neko posavđa amen ćhurikaja, a amen pana mukhaja i ćhurik ki odija rana. Isto ađahar, našti te ćhiva amare osećanja ki strana hem te ađićera te ovel amenđe pošukar.
6. Sar šaj te reagujina ked neko povredini amen?
6 Ked neko povredini amen, amari prvo reakcija šaj te ovel te holjana. I Biblija phenela so odova šaj te ovel. Ama, oj upozorini amen te na mukha i holi te ovel pozorali amendar (Ps. 4:4; Ef. 4:26). Sose? Odolese so but putija sar osetinaja amen ađahar hem postupinaja. A i holi retko ked anela diso šukar (Jak. 1:20). Ma bistri, te ove holjamo tani reakcija, a te aćhove holjamo tani ti odluka.
Te ove holjamo tani reakcija, ama te ićere i holi tani ti odluka
7. Sar šaj pana te osetina amen ked neko povredini amen?
7 Ked neko povredini amen, šaj te osetina but bari dukh. Na primer, jekh phen koja vićini pe En, phenela: „Ked hijum le tikni mo dad aćhavđa me daja hem ženinđa pe me dadiljaja. Tegani, mislinđum so niko na brinini pe mandar. Ked on hine len ćhave, osetinđum ka phene neko lelja mo than. Sar bariljum, niked na osetinđum mangipe.“ Jekh phen koja vićini pe Džordžet, phenela sar osetinđa pe ked olako rom ćerđa preljuba: „Kotar tiknipe hijam le amala. Zajedno služinđam sar pionirija. Osetinđum bari dukh ko vilo ked ćerđa odova.“ Amari phen i Naomi phenela: „Našti hine ni te zamislinav so mo rom ka povredini man. Odolese, ked phenđa maje so ćorjale dikhlja pornografija, osetinđum man prevarimi hem izdajimi.“
8. (a) Kola razlogija isi amen te oprostina averenđe? (b) Sar pomožini amen odova so oprostinaja? (Dikh o okvir „ So ako doživinđan disavi trauma?“)
8 Amen našti te utičina ko odova so o manuša ka phenen ja ka ćeren. Ama, šaj te utičina ko odova sar ka reagujina. Najšukar so šaj te ćera tano te oprostina. Sose? Odolese so mangaja e Jehova, a ov mangela te oprostina averenđe. Ako ićeraja i holi hem na oprostinaja, verovatno ka ćera diso bizo te razmislina hem čak šaj te rumina amaro sastipe (Posl. 14:17, 29, 30). Razmislin andi phen koja vićini pe Kristina. Oj phenela: „Ked hijum holjami ili povredimi, na asava but. Tegani hava nezdravo hrana hem na sovava dovoljno. Isto ađahar, but maje popharo te kontrolišinav me emocije, a sa odova utičini ko mo brak hem ko mo odnos averencar.“
9. Sose na valjani te ićera i holi ano amende?
9 Iako i osoba koja povredinđa amen šaj niked na izvininđa pe amenđe, amen ipak šaj te ćera diso. So? I Džordžet, kola angleder pominđam, phenela: „Valjanđa maje disavo vreme, ama ipak uspinđum te na ićerav i holi ano mande hem te na ovav holjami upro mo bivšo rom. Sebepi odova, hine man mir ko vilo.“ Ked oprostinaja, amen pomožinaja kokri amenđe. Tegani, na ićeraja i holi ano amende hem na mukhaja i ogorčenost te utičini ko odova sar ka ponašina amen premalo avera. Isto ađahar, odova pomožini amen te osetina amen šukar hem palem te uživina ko životi (Posl. 11:17). Ama, so ako palo sa akala buća so ćerđan, pana našti te oprostine?
MUKH TE NAKHEL I HOLI
10. Sose valjani te mukha te nakhel vreme te oporavina amen? (Dikh o slike.)
10 So ka pomožini tuće te nakhel ti holi? But tano važno te mukhe te nakhel vreme te oporavine tut. Palo odova so dobinđa medicinsko pomoć, jekha osobaće koja isi la ozbiljna povrede ka valjani vreme te saćol. Ko slično način, hem amenđe ka valjani vreme te oporavina amen angleder so ka ova spremna nekase te oprostina ando vilo (Prop. 3:3; 1. Petr. 1:22).
Sar so asi jekh povreda valjani vreme hem nega te saćol, ađahar hem amenđe valjani vreme te oporavina amen (Dikh o 10. odlomko)
11. Sar šaj i molitva te pomožini tuće te oprostine?
11 Molin tut hem rode ando Jehova te pomožini tut te oprostine. c I En, kolatar vaćerđam angleder, phenela sar i molitva pomožinđa laće. Oj phenela: „Molinđum man e Jehovase te oprostini sarinenđe ki porodica aso buća kola phenđam ja ćerđam, a kola hine pogrešna. Palo odova, pisinđum jekh lil me dadese hem olese romnjaće hem phenđum lenđe so oprostinava lenđe.“ I En priznajini so na hine laće lokho te ćerel odova. Ama, oj phenela: „Nadinava man so odova so mangava te oprostinav sar o Jehova, ka podstaknini me dade hem olese romnja te sikljon diso pobuter olestar.“
12. Sose valjani te oslonina amen upro Jehova, a na upro amare osećanja? (Poslovice 3:5, 6)
12 Oslonin tut upro Jehova, a na upro te osećanja. (Čitin Poslovice 3:5, 6.) O Jehova uvek đanela soj tano najšukar amenđe (Is. 55:8, 9). Niked na ka rodel amendar te ćera diso so šaj te povredini amen. Odolese, ked podstaknini amen te oprostina, šaj te ova sigurna so odova ćerela aso amaro šukaripe (Ps. 40:4; Is. 48:17, 18). Ki aver strana, ako osloninaja amen upro amare osećanja, amen niked na ka šaj te oprostina (Posl. 14:12; Jer. 17:9). I Naomi, kolatar vaćerđam angleder, phenela: „Ki početka, mislinđum so našti te oprostinav me romese so dikhlja pornografija. Darandiljum so palem ka povredini man ja so ka bistrel kobor bari dukh anđa maje sebepi odova. Đanđum so o Jehova haljola sar osetinava man. Ama, počminđum te haljovav so odova so o Jehova haljola me osećanja, na značini so složini pe odoleja. Ov đanela sar osetinava man hem so valjani maje vreme te nakhel mandar i holi, ama isto ađahar mangela hem te oprostinav.“ d
TRUDIN TUT TE DIKHE O ŠUKAR BUĆA KO AVERA
13. Premalo Rimljanima 12:18-21, so valjani te ćera?
13 Ked oprostinaja nekase ko but povredinđa amen, na valjani samo te odlučina te na vaćera odolestar so hine. Ako i osoba koja povredinđa amen tano dijekh phral ja phen, tegani amaro cilj tano te ćera te ovel mir (Mat. 5:23, 24). Umesto te ićera i holi ano amende, valjani te mothova milosrđe hem te oprostina. (Čitin Rimljanima 12:18-21; 1. Petr. 3:9.) So šaj te pomožini amen te ćera odova?
14. So valjani te trudina amen te ćera hem sose?
14 Amen valjani te trudina amen upri osoba koja povredinđa amen te dikha sar o Jehova. Ov birini te dikhel o šukar buća ko manuša (2. Let. 16:9; Ps. 130:3). Amen obično ko manuša arakhaja odova so rodaja, bilo odova te ovel šukar ja lošno. Ked trudinaja amen te dikha odova soj tano šukar ko manuša, ka ovel amenđe polokho te oprostina. Na primer, o phral Džarod phenela: „Hine maje polokho te oprostinav jekhe phralese ked razmislinđum ando buća kola sviđinena pe maje koro leste, a na ando olese greške.“
15. Sose tano šukar te phena e osobaće so oprostinđam laće?
15 Pana jekh važno buti tani te phena e osobaće koja povredinđa amen so oprostinđam laće. Sose? Zapazin so i Naomi, kolatar vaćerđam angleder, phenela: „Mo rom pućlja man: ’Da li oprostinđan maje?‘ Ked phravđum mo muj te vaćerav odova, našti hine ništa te phenav. Tegani haljiljum so pana na oprostinđum lese ando vilo. Sar đelo o vreme, šaj hine te vaćerav odola duj lafija: ’Oprostinava tuće.‘ Ked oprostinđum lese, me rome ukljinđa o rojbe. Hijum le iznenadimi kobor hine lese polokho hem kobor baro mir me osetinđum. Kotar tegani počminđum palem te verujinav lese hem palem uljam najšukar amala.“
16. So sikljiljam ando opraštanje?
16 O Jehova mangela te oprostina averenđe (Kol. 3:13). Iako đanaja odova, podijekh puti šaj te ovel amenđe pharo te oprostina. Ama, odova šaj te ćera ako na ćhivaja amare osećanja ki strana hem ako mukhaja te nakhel amendar i holi. Tegani ka uspina te dikha o šukar buća ko avera. (Dikh o okvir „ Trin buća kola ka pomožinen tut te oprostine“.)
SOSE TANO ŠUKAR TE OPROSTINA?
17. Sose valjani te oprostina?
17 Amen isi amen but razlogija te oprostina. Aće te dikha samo nekobor. Sar prvo, ađahar oponašinaja amare milosrdno Dade, e Jehova hem ugodinaja lese (Luka 6:36). Sar dujto, mothovaja so hijam zahvalna aso odova so oprostini amenđe (Mat. 6:12). Sar trito, isi amen šukar sastipe hem hijam ko šukar odnos averencar.
18-19. So šaj te ovel ked oprostinaja?
18 Ked oprostinaja averenđe, šaj te oven amen disave blagoslovija kola na očekujinđam. Na primer, zapazin so desinđa pe e Denizaće, kola pominđam angleder. Ko odova vreme, oj na đanđa so o manuš sebepi kova hine o saobraćajno udes manglja palo suđenje te mudari pe. Ama, odova so i Deniza oprostinđa lese, podstakninđa le te proučini i Biblija e Jehovase svedokonencar.
19 Amen šaj te mislina so te oprostina nekase tani jekh andi najphari buti koja valjani te ćera. Ama, ma te bistra so odova šaj te anel amenđe hem but bare blagoslovija (Mat. 5:7). Odolese, hajde sare te trudina amen te oponašina e Jehova ađahar so ka oprostina averenđe.
ĐILI 125 „Bahtale tane o milosrdna“
a Disave anava tane menime.
b Ki asavki situacija svako hrišćanin valjani lično te odlučini so ka ćerel.
c Ko amaro sajt dikh o videa aso savremena đilja „Opraštajmo“, „Pomozi mi da oprostim“ hem „Pomiri se s bratom“.
d Ked neko dikhela pornografija odova tano greh hem anela bari šteta. Ama, odova nane biblijsko temelji aso razvod.
