1. So i Biblija vačeri ando odova sar o Jehova dikhela upro manuša?

DA LI bi mangeja o manuša te formirinen po mišljenje tutar premali boja kože koja isi tut, premalo odova sar izgledineja ja premalo odova kobor hijan učo, tikno, thulo ja slabo? Verovatno na. Kobor tano šukar te džana so o Jehova na formirini po mišljenje amendar premalo odova sar o manuša dikhena amen! Na primer, ked o Samuilo dikhlja e Jesejese čhaven, ov na dikhlja odova so o Jehova dikhlja. O Jehova phendža e Samuilese so jekh ando e Jesejese čhave ka ovel kralj ko Izrael. Ama, kova olendar ka ovel? Ked o Samuilo dikhlja e Jesejese najphuredere čhave, ov ano peste phendža: „Sigurno tano ov e Jehovaso pomazaniko.“ O Elijav hine odobor šužo, so o Samuilo mislindža so ov ka ovel kralj. „Ama o Jehova phendža e Samuilese: ’Ma dikh ko odova sar izgledini hem kobor tano učo, sose na birindžum ole.‘“ So sikljovaja akalestar? O Jehova phenela: „O manuš dikhela odova so šaj jačhencar te dikhel pe, a o Jehova dikhela odova soj tano ko vilo“ (1. Sam. 16:1, 6, 7).

2. Premalo Jovan 7:24, sose na valjani te formirina amaro mišljenje averendar premalo odova sar izgledinena? Vačer jekh primer.

² Sar nesavršena manuša, sare amen but sigate formirinaja amaro mišljenje averendar premalo odova sar izgledinena. (Čitinen Jovan 7:24.) Ama, sa o buča kola dikhaja amare jačhencar ki jekh osoba, na mothovena amendže but buča olatar. Na primer, čak hem jekh but šukar doktori našti te džanel but kotar po pacijenti ako samo dikhela le. Ov valjani šukar te šunel e pacijente te šaj te džanel kola problemija e sastipaja hine le angleder, sar osetini pe akana hem kola simptomija isi le. O doktori šaj čak te phenel lese te džal ko rendgen te šaj te dikhel so desini pe ko leso telo. Ked na bi  čerela odova, ov šaj te del le pogrešno terapija. Isto adžahar, hem amen našti potpuno te haljova amare phraljen hem e phenjen samo premalo odova sar izgledinena. Amen valjani te da sa amendar te pendžara save tane on sar manuša. Džandžola pe, amen našti te džana soj tano ko lengo vilo, odolese niked na ka haljova len adžahar sar so o Jehova haljola len. Ama, amen šaj te da sa amendar te oponašina e Jehova. Sar?

3. Sar e biblijake primerija ko akava članko ka pomožinen amen te oponašina e Jehova?

³ Sar o Jehova postupini pe slugencar? Ov šunela len, haljola lenge okolnostija hem sa o buča kola utičindže upro lende. Isto adžahar, ov mothovi saosećanje premalo lende. Ked ka dikha sar o Jehova sa akava mothovdža premalo Jona hem o Ilija, premali Agara hem premalo Lot, tegani ka haljova sar šaj hem amen te oponašina le.

4. Sose šaj te ovel amen negativno mišljenje ando Jona?

⁴ Odolese so na džanaja sa andi e Jonasi situacija, amen šaj te mislina so ov hine nepouzdano manuš pa čak hem so na hine verno. Ov direktno ando Jehova dobindža zapovest te džal ki Niniva hem te objavini i poruka andi osuda. Umesto te šunel e Jehova, o Jona khuvdža ko brodo kova dželo ko suprotno smer, „dur e Jehovastar“ (Jona 1:1-3). Da li bi tu deja e Jonase pana jekh šansa te čerel po zadatko? Verovatno na. Ama, o Jehova dikhlja so o Jona zaslužini pana jekh šansa (Jona 3:1, 2).

5. So sikljovaja andi e Jonasi molitva koja tani pisimi ko Jona 2:1, 2, 9?

⁵ Ki pi molitva, o Jona mothovdža savo tano manuš. (Čitinen Jona 2:1, 2, 9.) Sigurno o Jona but putija molindža pe e Jehovase. Jekh ando odola molitve, odija koja vačerdža dži hine ko e mačheso vodži, pomožini amen te haljova so ov na hine samo manuš kova našlja ando poklo zadatko. Olese lafija mothovena so ov hine ponizno, zahvalno hem odlučno te šunel e Jehova. Odolese, na hijam iznenadime so o Jehova na dikhlja samo e Jonase greške, nego odgovorindža ki olesi molitva hem ponodri mukhlja le te ovel oleso proroko.

6. Sose valjani te da sa amendar pažljivo te šuna?

⁶ Te šaj pažljivo te šuna averen, valjani te ova ponizna hem strpljiva. Isi barem trin razlogija sose tano šukar te čera odova. Sar prvo, verovatno na ka formirina negativno mišljenje averendar sigate. Sar dujto, ka haljova sar amaro phral osetini pe hem sose čerela disave buča. Odova ka pomožini amen te ova pana pobuter  saosećajna premalo leste. Sar trito, ked mukhaja amare phralje te vačeri, ov ka haljol so mučini le. Disavo puti, o manuš našti potpuno te haljol pe osećanja sa dži na vačeri olendar (Posl. 20:5). Jekh starešina kotar i Azija phenela: „Setinava man so jekh puti grešindžum, adžahar so vačerdžum angleder te šunav sostar čerela pe. Jekha phenjače phendžum so valjani pošukar te pripremini pe komentarija. Palo odova, haljiljum so oj na džanela šukar te čitini hem soj tano lače but pharo te del komentarija.“ Kobor tano važno svako starešina „te šunel“ angleder te del savet (Posl. 18:13).

7. So sikljovaja ando način sar o Jehova postupindža e Ilijaja?

⁷ Disave amare phraljendže hem e phenjendže tano pharo te vačeren ando pe osećanja, sebepi o buča kola desindže pe olendže angleder, sebepi olengi kultura ja sebepi olenge osobine. So šaj amen te čera te šaj olendže te ovel polokho te phraven pe amendže? Setin tut sar o Jehova postupindža premalo Ilija ked našlo andi Jezavelja. O Ilija tek palo nekobor dive mothovdža e Jehovase sar osetini pe. Tegani, o Jehova pažljivo šundža le. Palo odova, ov ohrabrindža le hem dindža le te čerel jekh važno zadatko (1. Kralj. 19:1-18). Isto adžahar, šaj ka nakhel but vreme angleder so amare phralja hem phenja ka ovel len dovoljno poverenje upro amende te vačeren amendže sar osetinena pe. Ako hijam strpljiva sar o Jehova, on ka oven spremna te vačeren amendže sar osetinena pe. Tegani valjani pažljivo te šuna len.

8. Premalo Postanak 16:7-13, sar o Jehova pomožindža e Agarače?

⁸ Ked ulji e Avrahamesi romni, i Agara, e Saraki sluškinja, počmindža te ponašini pe lošno. I Sara na hine la čhave. Ked i Agara ačhilji khamni, počmindža te ponašini pe bizo poštovanje premali Sara. I situacija hine odobor phari, so i Sara fordindža e Agara ando čher (Post. 16:4-6). Odolese so hijam nesavršena, šaj te mislina so i Agara hine ponosno romni koja zaslužindža te ovel fordimi ando čher. Ama, o Jehova na mislindža adžahar olatar. Ov bičhaldža pe anđele koro late. Ked arakhlja la ov pomožindža lače te menjini po stav hem blagoslovindža la. I Agara haljilji so o Jehova dikhlja hem džandža celo olaki situacija. Odolese hine podstaknimi te phenel: „Tu hijan Devel kova sa dikhela“ hem „kova dikhela man.“ (Čitinen Postanak 16:7-13.)

9. Sose o Jehova hine ljubazno premali Agara?

⁹ So o Jehova dikhlja ki Agara? Ov džandža ki koja situacija hine i Agara hem so sa nakhlja (Posl. 15:3). I Agara hine Egipćanka koja živindža ki jevrejsko porodica. Da li disavo puti osetindža pe sar stranco? Da li nedostajindža lače olaki porodica ja olaki phuv? Uzo odova, oj na hine e Avrahamesi jedino romni. Ko odova vreme, disave verna murša hine len pobuter ando jekh romni. Ama, ki početka odova na hine e Jehovasi namera (Mat. 19:4-6). Sebepi odova na hine čudno so ko porodice hine bare problemija sar soj tane ljubomora hem mržnja. O Jehova džandža so i Agara na ponašindža pe šukar premali Sara. Ama, isto adžahar haljilo sar i Agara osetindža pe hem so sa nakhlja hem hine ljubazno premalo late.

10. Sar šaj pana pošukar te pendžara amare phraljen hem phenjen?

¹⁰ Amen šaj te oponašina e Jehova, adžahar so ka da sa amendar te haljova jekh jekhe. Pendžar te phraljen hem te phenjen pošukar. Vačer olencar angleder hem palo sastanko. Dža olencar ki služba hem ako šaj vičin len te aven koro tute ko ručko. Ked ka  čere odova šaj ka ove iznenadimo. Na primer, šaj ka dikhe so i phen kolatar mislindžan so na mangela te družini pe, u stvari tani ladžutni. O phral kolestar mislindžan so mangela o materijalna buča, u stvari tano phravde vasteso. Ja i porodica koja but putija harini ko sastanak, u stvari isi la protivljenje čhere (Jov 6:29). Naravno, amen na valjani „te mešina amen ko tuđa buča“ (1. Tim. 5:13). Ama, ipak tano šukar te džana diso ando amare phralja hem phenja hem ando odova so nakhlje ko po dživdipe.

11. Sose tano važno o starešine te pendžaren pe phraljen hem pe phenjen?

¹¹ Posebno o starešine valjani šukar te pendžaren e phraljen hem e phenjen. Te dikha o primer ando phral Artur kova služindža sar pokrajinsko nadgledniko. Ov hem jekh aver starešina dželje ki jekh phen koja dičhilji soj tani samči ladžutni. O Artur phenela: „Haljiljam so olako rom mulo but sigate palo olengo venčanje. Iako hine la but pharipa, oj pomožindža pe duje čhajendže te mangen e Jehova hem on ulje olese verna sluge. Ama, akana oj više na dikhela šukar hem patini kotar i depresija. Ama, olako mangipe premalo Jehova hem olaki vera tane zorale. Haljiljam so šaj but buča te sikljova kotar akija phen“ (Fil. 2:3). Akava pokrajinsko nadgledniko oponašindža e Jehovaso primer. O Jehova haljola pe verno slugen hem osetini olengi dukh (Izl. 3:7). O starešine kola šukar pendžarena pe phraljen hem pe phenjen, šaj pošukar te pomožinen len.

12. Sose hine šukar so i Naomi pošukar pendžardža e phenja kotar pi skupština?

¹² Šaj isi dijekh phral ja phen koja nervirini tut, ama ako deja sa tutar šukar te pendžare len, verovatno ka ove podstaknimo te mothove saosećanje premalo lende. Te dikha jekh primer. „Jekh phen ki mi skupština vačeri but glasno“, phenela i Naomi, koja živini ki Azija. „Me mislindžum so oj na džanela šukar te ponašini pe. Ama, ked dželjum olaja ki služba, oj phendža maje so pomožini pe roditeljendže te biknen mačhe ko pazari. Odolese, valjandža te vačeri but glasno te šaj te šunen la o mušterije.“ I Naomi phenela: „Sikljiljum so ako mangava te haljovav e phraljen hem e phenjen valjani pošukar te pendžarav len.“ Valjani but te trudina amen te pendžara amare phraljen pošukar. Ked primenineja o savet andi Biblija te phrave to vilo, tegani oponašineja e Jehova kova mangela „sa e manušen“ (1. Tim. 2:3, 4; 2. Kor. 6:11-13).

13. Premalo Postanak 19:15, 16, so čerdže o anđelija ked o Lot odugovlačindža hem sose?

¹³ Ko jekh but važno period ko oleso dživdipe, o Lot na šundža odmah odova so o Jehova phendža lese te čerel. Duj anđelija alje ko Lot hem phendže lese te ikali pe porodica kotar o Sodom. Sose? On phendže: „Ka uniština akava than“ (Post. 19:12, 13). Tajsato dive, sabalje, o Lot hem olesi porodica pana hine čhere. Odolese, o anđelija pana jekh puti upozorindže e Lote, ama ov odugovlačindža. Amen šaj te mislina so o Lot na obratindža pažnja ko odova so o Jehova phendža lese te čerel ja čak so hine neposlušno. Ama, o Jehova na vazdindža pe vasta olestar. „Sebepi so o Jehova smilujindža pe upro leste“, o anđelija ljelje olese porodica kotar vas hem ikaldže len andi diz. (Čitinen Postanak 19:15, 16.)

14. Kova razlog šaj hine le o Jehova sebepi kova mothovdža samilost premalo Lot?

¹⁴ Isi nekobor razlogija sose o Jehova mothovdža samilost premalo Lot. Ov šaj na manglja odmah te mukhel po čher sebepi so možda darandilo ando manuša kola hine avrijal kotar i diz. Ama, hine pana diso. O Lot verovatno džandža so ki dolina koja hine paše, duj kraljija pelje ko jame ko kola hine bitumen (Post. 14:8-12). Sar rom hem dad, o Lot sigurno brinindža pekle porodicače. Uzo odova, o Lot hine barvalo hem sigurno hine le šužo čher ko Sodom (Post. 13:5, 6). Naravno, ni jekh kotar akala buča na hine razlog o Lot te na čerel odova so o Jehova phendže lese. Ama, o Jehova na dikhlja samo e Lotesi greška, nego dikhlja le sar jekh „pravedno manuš“ (2. Petr. 2:7, 8).

15. Umesto te kritikujina odova so avera čerena, so valjani te čera?

¹⁵ Umesto te kritikujina odova so avera čerena, valjani te da sa amendar te haljova olenge osećanja. I Veronika, jekh phen kotar i Evropa, pokušindža te čerel odova. Oj phenela: „Jekh phen dičhilji soj tani uvek neraspoloženo. Na manglja te družini pe nikasa. Disavo puti, darava hine te vačerav olaja. Ama, mislindžum ano mande: ’Ked bi me ovava ko olako than, maje bi sigurno valjani  amal.‘ Odolese, odlučindžum te pučav la sar osetini pe hem oj počmindža te phravel maje po vilo. Akana pošukar haljovava la.“

16. Sose valjani te molina amen te ova pana posaosećajna?

¹⁶ Jedino osoba koja potpuno haljola amen tano o Jehova (Posl. 15:11). Odolese, molin tut olese te pomožini tut averen te dikhe adžahar sar so ov dikhela len hem te haljove sar šaj te mothove lendže saosećanje. I molitva pomožindža amare phenjače, koja vičini pe Anđela te ovel posaosećajno. E Anđelače hine but pharo te složini pe jekha phenjaja koja hine kotar olaki skupština. Oj phenela: „Hine but lokho te perav ki zamka te kritikujinav e phenja hem te vazdav me vasta olatar. Ama, molindžum man e Jehovase te pomožini man te haljovav akale phenja.“ Da li o Jehova šundža e Anđelaki molitva? Oj phenela: „Zajedno dželjam ki služba hem palo odova vačerdžam nekobor satija. Dži šundžum la, pokušindžum te čhivav man ko olako than. Akana pobuter mangava la hem odlučno hijum te pomožinav lače.“

17. So valjani te ova odlučna te čera?

¹⁷ Amen našti te birina premalo kase ka ova saosećajna, a premalo kase na. Čače tano adžahar so disave amare phralja hem phenja sar o Jona, o Ilija, i Agara hem o Lot, šaj kokri pese čerdže o problemija. Mora te priznajina so podijekh puti sare amen kokri hijam kriva aso amare problemija. Odolese tano normalno so o Jehova rodela amendar te ova saosećajna jekh premalo aver (1. Petr. 3:8). Ked šunaja e Jehova, amen zorjačeraja o jekhipe ki amari porodica koja tani ko celo sveto. Odolese, ov odlučno pažljivo te šune te phraljen hem te phenjen, šukar te pendžare len hem te mothove saosećanje premalo lende.