1. Sar ovaja nekasa paše amala?

TE BI ovaja nekasa amal, o prvo korako tano te družina amen oleja. Ked vačeraja nekasa ando amare mislija hem osećanja, amen ovaja amala. Ama, podijekh puti nane lokho te ova e Isuseja paše amala sose isi amen disave prepreke. Kola tane disave olendar?

2. Koja tani amari prvo prepreka?

² I prvo prepreka tani odija so amen na pendžardžam lično e Isuse. But hrišćanja ando prvo veko hine len isto prepreka. Ipak, o apostol Petar phendža: „Iako niked na dikhljen le, tumen mangena le. Iako hem akana na dikhena le, ipak verujinena upro leste“ (1. Petr. 1:8). Odova značini soj tano moguće te ova paše amala e Isuseja bizo te pendžara le lično.

3. Koja tani amari dujto prepreka?

³ I dujto prepreka tani odija so amen našti te vačera e Isuseja. Ked molinaja amen, amen direktno vačeraja e Jehovaja. Iako molinaja amen ko e Isuseso nav, amen na vačeraja direktno oleja. Ni o Isus na mangela te molina amen olese. Sose? Sose i molitva tani deo ando amaro obožavanje hem jedino e Jehova šaj te obožavina (Mat. 4:10). Ama, šaj te mothova so mangaja e Isuse.

4. Koja tani amari trito prepreka hem sostar ponodri ka vačera?

 ⁴ I trito prepreka tani odija so o Isus bešela ko nebo, hem so našti te ova oleja. Iako hijam fizički dur olestar, amen šaj te džana but buča ando Isus. Ka osmotrina štar buča kola valjani te čera te bi zorjačeraja amaro amalipe e Isuseja. Ama, angleder odova ka dikha sose tano važno te ova paše amala e Hristeja.

5. Sose mora te ova e Isusese amala? (Dikh o okvirija „ O amalipe e Isuseja ljegari amen dži o amalipe e Jehovaja“ hem „ Sar valjani te dikha ki e Isusesi uloga?“).

⁵ Amen mora te ova e Isusese amala, te bi ovaja e Jehovaja šukar amala. Sose tano adžahar? Isi duj razlogija. Sar prvo, o Isus phendža pe apostolendže: „O Dad hem kokri mangela tumen, sose tumen zamangljen man“ (Jov. 16:27). Isto adžahar, phendža: „Jedino prekalo mande šaj te avel pe ko Dad“ (Jov. 14:6). Ked bi pokušinaja te ova e Jehovase amala bizo te ova paše amala e Isuseja odova bi ovela sar ked bi pokušinaja te khuva ko čher bizo te koristina o udar. O Isus koristindža slično ilustracija ked kokri pestar phendža soj tano „udar ko kova khuvena o bakre“ (Jov. 10:7). O dujto razlog tano so o Isus savršeno oponašindža pe Dadese osobine. Ov phendža pe apostolendže: „Ko dikhlja man, dikhlja hem e Dade“ (Jov. 14:9). Odolese, o najvažno način te pendžara e Jehova tano te proučina e Isuseso životi. Ked ka sikljova ando Isus, amaro mangipe premalo leste ka barjol. So pobuter mangaja e Isuse, pobuter ka manga hem olese Dade.

6. Kova pana razlog isi sose mora te ova e Isusese amala? Objasnin.

 ⁶ Te bi o Devel odgovorini ko amare molitve, amen mora te ova e Isusese amala. Odova tano diso pobuter nego li ko krajo ando amare molitve samo te phena o lafija „ko e Isuseso nav.“ Mora te haljova sar o Jehova koristini e Isuse dži odgovorini ko amare molitve. O Isus phendža pe apostolendže: „So god rodena ko mo nav, ka čerav odova“ (Jov. 14:13). Iako samo o Jehova šunela hem odgovorini ko amare molitve, ov koristini e Isuse te bi izvršini olese odluke (Mat. 28:18). Angleder te oprostini amendže, ov dikhela da li primenindžam e Isuseso savet te oprostina averendže. Na primer, o Isus phendža: „Ako tumen oprostinena e manušendže olenge greške, hem tumaro nebesko Dad ka oprostini tumendže. Ama ako tumen na oprostinena e manušendže olenge greške, tegani ni tumaro Dad na ka oprostini tumare grehija“ (Mat. 6:14, 15). Sar so o Jehova hem o Isus ponašinena pe šukar premalo amende, isto adžahar tano važno hem amen te ponašina amen premalo avera.

7. Ko ka ovel le korist andi e Isusesi otkupno žrtva?

⁷ Samo okola kola tane paše amala e Isuseja ka oven len korist kotar olesi otkupno žrtva. Sar džanaja odova? O Isus phendža so ka del „po dživdipe pe amalendže“ (Jov. 15:13). O verna manuša kola živindže angleder o Isus te avel ki phuv, isto ka ovel len zadatko te sikljon ando Isus hem te mangen le. Iako odola verna manuša, sar soj tane o Avraham, i Sara, o Mojsije, hem i Rava, ka uskrsninen, o večno životi ka dobinen samo okola kola ka oven e Isusese amala (Jov. 17:3; Dela 24:15; Jevr. 11:8-12, 24-26, 31).

8-9. Premalo e Isusese lafija kotar Jovan 15:4, 5, so šaj te čera sebepi amaro amalipe e Isuseja hem sose tano odova važno?

⁸ Bahtale hijam dži sarađujinaja e Isuseja ki služba hem dži sikavaja averen kotar i šukar vest ando Kraljevstvo. Ked o Isus hine ki phuv, ov hine učitelj. Ked irindža pe ko nebo, o Isus nastavindža te predvodini ko propovedibe hem sikavibe sar o poglavari andi hrišćansko skupština. Ov dikhela hem cenini to trud dži pomožineja averendže te pendžaren ole hem olese Dade. U stvari, amari buti niked na bi uspinaja bizi e Jehovasi hem e Isusesi pomoć. (Čitinen Jovan 15:4, 5.)

⁹ E Devleso Lafi jasno sikavi so mora te manga hem te barjačera amaro mangipe premalo Isus ako mangaja te ugodina e Jehovase. Odolese, hajde te dikha štar buča kola ka pomožinen amendže te ova e Isusese amala.

10. Koja prvo buti valjani te čera te bi ovaja e Isusese amala?

¹⁰ (1) Pendžar e Isuse. Dži čitinaja o štar Jevanđelja, amen šaj te pendžara e Isuse. Ked hor razmislinaja ando odola biblijake izveštaja kola vačerena kotar e Isuseso dživdipe hem ked dikhaja sar ov ponašindža pe šukar premalo manuša, amen ka ova podstaknime te manga le hem te poštujina le. Na primer, iako hine olengo Gospodari, ov na dikhlja upro lende sar upro robovija. Umesto odova, ov podelindža olencar pe mislija hem pe osećanja (Jov. 15:15). Ked olendže hine pharo hem olese hine pharo. Ked on rundže hem ov rundža  olencar (Jov. 11:32-36). Čak hem olese protivnikija džandže so o Isus hine amal okolencar kola šundže hem prihvatindže olesi poruka (Mat. 11:19). Ked ponašinaja amen premalo avera sar so o Isus ponašindža pe premalo pe apostolija, ka ova ko šukar odnos olencar, ka ova zadovoljna, bahtale hem pana pobuter ka cenina e Hriste.

11. Koja dujto buti valjani te čera te bi ovaja e Isusese amala hem sose odova tano važno?

¹¹ (2) Oponašin o način sar o Isus razmislini hem postupini. Ked pošukar pendžaraja le hem ked oponašinaja o način sar ov razmislini, amen ka ova popaše amala oleja (1. Kor. 2:16). Sar šaj te oponašina e Isuse? Razmislin ando jekh primer. O Isus niked na dikhlja pi korist nego averengi (Mat. 20:28; Rimlj. 15:1-3). Sebepi so hine le asavko stav, ov hine samopožrtvovano hem spremno te oprostini. Na hine le navika te holjani sigate sebepi o buča kola o manuša vačerdže olestar (Jov. 1:46, 47). Na čhivdža e manušendže etiketa sebepi o buča kola čerdže angleder (1. Tim. 1:12-14). O Isus phendža: „Sarine ka džanen so hijen me učenikija, ako isi tumen mangipe maškaro tumende“ (Jov. 13:35). Puč kokri tut: „Da li sar o Isus, dava sa mandar te ovav ko mir me phraljencar?“

12. Koja trito buti valjani te čera te bi ovaja e Isusese amala, hem sar šaj te čera odova?

¹² (3) Sarađujin e Hristese phraljencar. Ked čeraja diso aso pomazime phralja, o Isus upro odova dikhela samči olese čeraja (Mat. 25:34-40). O najvažno način sar podržinaja odole pomazime phraljen tano ked daja sa amendar te propovedina hem te čera učenikonen, sar so o Isus phendža amendže (Mat. 28:19, 20; Dela 10:42). Bizo „avera bakre“, e Hristese phralja ne bi uspinena te propovedinen ko celo sveto (Jov. 10:16). Ako pripadineja ki grupa ando avera bakre, svako puti ked propovedineja, na samo so mangeja odole pomazime phraljen nego hem e Isuse.

13. Sar šaj te primenina e Isuseso savet ando Luka 16:9?

¹³ Isto adžahar, e Jehovaja hem e Isuseja ovaja amala ked daja amare dobrovoljna prilogija te bi podupirina amari organizacija. (Čitinen Luka 16:9.) Na primer, šaj te da prilog aso međunarodno delo. Odola prilogija koristinena pe aso propovedibe ko dur thana, te čeren pe neve ja te renovirinen pe purane dvorane ja avera amare objektija hem sar pomoć okolendže kola doživindže katastrofa ja dijekh aver nesreća. Isto adžahar, ked daja amare prilogija, amen učharaja o troškovija andi amari skupština. Ja šaj finansijski te pomožina dijekhe phraljese ja phenjače kase valjani pomoć (Posl. 19:17). Odola tane načinja sar šaj te podržina e Hristese phraljen.

14. Premalo Efešanima 4:15, 16, koja štarto buti valjani te čera te bi ovaja e Isusese amala?

¹⁴ (4) Podržin o odluke kola anena pe ki skupština. Ked sarađujinaja okolencar kola brininena pe amendar, amen zorjačeraja amaro amalipe e Isuseja. (Čitinen Efešanima 4:15, 16.) Na primer, akana daja sa amendar te koristina sa o dvorane ko šukar način. Odolese, šaj te desini pe jekh skupština te spojini pe avere skupštinaja hem te menjinen pe olenge terenija. Sebepi odova, i organizacija uštedindža but pare kola dobini  ando dobrovoljna prilogija. Ki aver strana, sebepi akala promene disave objaviteljija valjandže te čeren bare promene. Odola verna objaviteljija šaj služindže ki jekh skupština but berša hem ulje povezime e phraljencar andi odija skupština. Ama, on tane akana zamolime te nakhen ki aver skupština. O Isus tano but bahtalo ked dikhela so odola objaviteljija tane spremna te prihvatinen odija promena.

15. Sar ka zorjačera amalipe e Isuseja ki budućnost?

¹⁵ Okola kola tane pomazime e sveto duhoja nadinena pe so zauvek ka vladinen e Isuseja, sar olese suvladarija ko e Devleso Kraljevstvo. On ka bešen e Hristeja – ka dikhen le, ka vačeren oleja hem ka sarađujinen oleja (Jov. 14:2, 3). Hem okola kola isi len zemaljsko nada ka osetinen e Isuseso mangipe hem i briga. Iako on na ka dikhen e Isuse, on ka zorjačeren po amalipe oleja dži ka uživinen ko životi kova o Jehova hem o Isus omogućindže olendže (Is. 9:6, 7).

16. Kola blagoslovija ka dobina sebepi amaro amalipe e Isuseja?

¹⁶ Ked prihvatinaja e Isuseso poziv te ova olese amala, amen dobinaja but blagoslovija. Na primer, već akana osetinaja oleso mangipe hem olesi podrška. Isi amen mogućnost večno te živina. Hem odova soj tano najvažno, amaro amalipe e Isuseja ka ljegari amen dži diso so najviše vredini – ko paše odnos e Isusese Dadeja, e Jehovaja. Čače tani bari čast te ova vičime e Isusese amala!