1. So o Jehova dikhela ko pe sluge?

O JEHOVA, O DEVEL „radujini pe pekle narodose“ (Ps. 149:4). Akala lafija but ohrabrinena amen. O Jehova dikhela kobor šukar osobine isi amen hem kobor šukar manuša šaj te ova hem pomožini amen te ova oleja amala. Ako amen aćhovaja verna olese, ov ka aćhol paše amencar zauvek! (Jov. 6:44).

2. Sose tano disavenđe pharo te verujinen so o Jehova mangela len?

² Disave šaj te phenen: „Ðanava so o Jehova mangela pe narodo, ama sar šaj te ovav sigurno so ov mangela lično man?“ Sose šaj neko ađahar te razmislini? I Oksana * koja hine la but pharo detinjstvo, phenela: „But hijum le bahtali ked krstinđum man hem ked počminđum te ovav pioniri. Ama, 15 berš palo odova, počminđum te setinav man ko sa o lošna buća kola desinđe pe maje ked hijum le tikni. Mislinđum so o Jehova više na mangela man hem so na hijum dovoljno šukar manuš te zaslužinav oleso mangipe.“ I Jua, jekh phen koja služini sar pionir, koja isto ađahar hine la but pharo detinjstvo, phenela: „Predajinđum mo životi e Jehovase odolese so mangljum te ćerav le bahtalo, ama hijum le uverimi so niked na ka mangel man.“

3. Sostar ka vaćera ko akava članko?

³ Isto sar akala duj verna phenja, hem tu but mangeja e Jehova, ama šaj pućeja tut, da li ov mangela tut. Sose valjani te uverine tut ko odova so ov ćaće brinini pe tutar? So šaj te pomožini tuće ked isi tut negativna mislija? Akana ka dikha o odgovorija ko akala pućiba.

4. Sose tano opasno te sumnjina ko odova so o Jehova mangela amen?

⁴ O mangipe dela amen but bari snaga. Ako hijam uverime ko odova so o Jehova mangela amen, odova ka podstaknini amen te služina lese celone vileja čak hem ked tano amenđe pharo. Ki aver strana, ako sumnjinaja ko odova so o Jehova brinini pe amendar, amen ka našala amari snaga (Posl. 24:10). Ked hijam obeshrabrime hem ked počminaja te mislina so o Devel na mangela amen, tegani našti te borina amen protiv e Bengese napadija (Ef. 6:16).

5. So desinđa pe disave phralenđe hem phenjenđe kola mislinđe so o Jehova na mangela len?

⁵ Disave phralengi hem phenjengi vera oslabinđa ked počminđe te sumnjinen ko odova da li o Jehova mangela len hem da li brinini pe olendar. Jekh starešina kova vićini pe Džejms, phenela: „Iako služinđum ko Betel hem ki skupština ki koja vaćeri pe aver ćhib, pućljum man da li o Jehova tano zadovoljno odoleja so ćerava? Ko jekh trenutko, čak pućljum man da li ov šunela me molitve.“ I Eva, koja isto tani ki punovremeno služba, phenela: „Haljiljum soj tano opasno te mislina so o Jehova na mangela amen, odolese so odova utičini ko sa o buća kola ćeraja ki olesi služba. Tegani na ka ovel amen želja te ćera o buća kola o Jehova mangela hem ka našala amari radost ki služba e Jehovase.“ O Majkl, kova služini sar stalno pionir hem starešina, phenela: „Ako na verujineja so o Devel brinini pe tutar, ka cide tut olestar.“

6. So valjani te ćera ked počminaja te razmislina so o Devel na mangela amen?

⁶ Akala iskustvija mothovena amenđe sar o negativno razmišljanje šaj lošno te utičini ko amaro amalipe e Devleja. Ama, so šaj te ćera ako počminaja te razmislina so o Devel na mangela amen? Amen valjani odmah te cida akala mislija andi amari godi. Molin tut e Jehovase te cidel tutar o mislija kola uznemirinena tut, hem te del tut „e Devleso mir“ kova ka arakhi to vilo hem ti godi (Ps. 139:23; Fil 4:6, 7). Setin tut so na hijan kokri. Hem avera verna phralja hem phenja isto ađahar borinena pe pekle negativna osećanjencar. Čak hem e Jehovase sluge ko purano vreme borinđe pe odoleja. Akana ka dikha so šaj te sikljova ando primer kotar o apostol Pavle.

7. Kole problemencar borinđa pe o Pavle?

⁷ Da li podijekh puti osetineja so isi tut but odgovornostija hem soj tano tuće but pharo te ćere sa so valjani te ćere? Ako tano ađahar tegani ka haljove sar osetinđa pe o Pavle. Ov brininđa pe na samo asi jekh skupština, nego „aso sa o skupštine“ (2. Kor. 11:23-28). Da li hijan dugo nabormo hem sebepi odova na hijan radosno? O Pavle hine le jekh problemi sebepi kova patinđa. Šaj hine le problemi pe sastipaja hem odolese manglja te saćol (2. Kor. 12:7-10). Da li hijan obeshrabrimo sebepi ti nesavršenost? Podijekh puti hem o Pavle osetinđa pe ađahar. Ov kokri pese phenđa soj tano „jadno manuš“, odolese so but putija valjanđa te borini pe te ćerel odova soj tano ispravno (Rimlj. 7:21-24).

8. So pomožinđa e Pavlese te istrajini ko pe problemija?

⁸ O Pavle doživinđa but kušnje hem hine obeshrabrimo, ama ov na ćhinavđa te služini e Jehovase. So pomožinđa lese ko odova? Iako hine svesno soj tano nesavršeno manuš, i zorali vera ki otkupnina pomožinđa lese. Ov đanđa aso e Isuseso obećanje so „svako  ko verujini upro leste ka ovel le večno životi“ (Jov. 3:15; Rimlj. 6:23). O apostol Pavle hine le asavki vera ki otkupnina. Ov hine uverimo so o Jehova tano spremno te oprostini čak hem okolenđe kola ćerđe baro greh, ako kajinena pe (Ps. 86:5).

9. So sikljovaja ando e Pavlese lafija kotar Galatima 2:20?

⁹ Isto ađahar, o Pavle hine sigurno so o Devel but mangela le, odolese so đanđa so bićhalđa pe Ćhave te merel olese. (Čitin Galatima 2:20.) Zapazin e Pavlese ohrabrujuća lafija ko krajo ando akava stih: „Živinava premali vera ko e Devleso ćhavo, kova manglja man hem dinđa po đivdipe maje“. O Pavle na mislinđa soj tano odobor lošno so o Devel našti te mangel le. Ov na phenđa: „Haljovava sose o Jehova mangela me phralen, ama sose bi mangela man?“ O Pavle pisinđa e hrišćanenđe ko Rim: „O Hrist, đi pana hijam le grešnikija, mulo amenđe“ (Rimlj. 5:8). E Devle ništa našti te ćhinavi te mangel amen!

10. So sikljovaja ando Rimljanima 8:38, 39?

¹⁰ Čitin Rimljanima 8:38, 39. O Pavle hine potpuno uverimo so o Jehova but mangela amen. Odolese, ov pisinđa so ništa „našti te ulavi amen ando e Devleso mangipe.“ Ov đanđa kobor o Jehova hine strpljivo premalo Izraelcija. Isto ađahar, đanđa kobor  baro milosrđe o Jehova mothovđa premalo leste. Avere lafencar, o Pavle samći phenđa: „Ako o Jehova bićhalđa pe Ćhave te merel maje, da li me valjani te sumnjinav so ov mangela man?“ (Rimlj. 8:32)

11. Iako o Pavle ćerđa grehija kola pominena pe ki 1. Timoteju 1:12-15, sose hine sigurno so o Devel mangela le?

¹¹ Čitin 1. Timoteju 1:12-15. O Pavle verovatno osetinđa pe but lošno ked razmislinđa odolestar so angleder ćerđa. Odolese na iznenadini amen so kokri pese phenđa soj tano „najbaro grešniko.“ Angleder te upoznajini o ćaćipe, o Pavle progoninđa e hrišćanen kotar jekh diz ki aver. Disaven ćhivđa ko phanlipe, a aso disave složinđa pe te oven mudarde (Dela 26:10, 11). Šaj li te zamisline sar o Pavle osetinđa pe ako bi ko sastanak resela dijekhe terne hrišćane kase roditeljija hine mudarde sebepi oleste? Iako o Pavle pokajinđa pe aso odova so ćerđa angleder, ov đanđa so našti te menjini i prošlost. Prihvatinđa so o Isus mulo olese hem odolese pisinđa: „Sebepi e Devleso nezaslužimo šukaripe, me hijum apostol“ (1. Kor. 15:3, 10). So amen sikljovaja akalestar? Tu valjani te uverine tut ko odova so o Hrist mulo tuće hem ađahar phravđa o drumo te šaj tu te ove paše amal e Jehovaja (Dela 3:19). E Devlese tano važno so tu ćereja akana hem so ka ćere ki budućnost, a na o greške kola ćerđan ki prošlost, bizo obzir da li tegani hijan le e Jehovaso svedoko ili na (Is. 1:18).

12. Sar šaj o lafija andi 1. Jovanova 3:19, 20 te pomožinen amen ked osetinaja amen so na hijam vredna hem so avera našti te mangen amen?

¹² Ked razmislinaja odolestar so o Isus mulo te šaj amare grehija te oven oprostime, šaj te phena: „Me na hijum odobor vredno neko te ćerel maje odova.“ Sose šaj ađahar te razmislina? Sebepi so amaro nesavršeno vilo šaj te hovavi amen ađahar so ćhivela amen  te mislina so na hijam vredna hem so avera našti te mangen amen. (Čitin 1. Jovanova 3:19, 20.) Ked počminaja ađahar te razmislina, valjani te setina amen soj tano „o Devel pobaro ando amaro vilo.“ Amare Dadeso mangipe hem olesi spremnost te oprostini amenđe tane pobare andi bilo koja negativno misao koja šaj te pojavini pe ko amaro vilo. Valjani te uverina kokri amen so o Devel mangela amen. Te šaj te ćera odova, valjani redovno te proučina oleso Lafi, uvek te molina amen hem te družina amen e Devlese narodoja. Sose tano važno te ćera akala buća?

13. Sar šaj te pomožini amen odova so proučinaja e Devleso Lafi? (Dikh o okvir „ Sar e Devleso Lafi pomožini amen?“)

¹³ Proučin e Devleso Lafi svako dive, hem ađahar sa pošukar ka penđare e Jehovase šuže osobine. Isto ađahar, ka haljove kobor o Jehova mangela tut. Ked svako dive hor proučinaja e Devleso Lafi, odova ka pomožini amen te ispravina o pogrešna buća kola isi amen ki amari godi hem ko amaro vilo (2. Tim. 3:16). O Kevin, jekh starešina kova mislinđa so ništa na vredini, phenela: „Ði čitinđum hem hor razmislinđum ando 103. psalam, odova pomožinđa man te ispravinav o način sar razmislinava hem te haljovav so o Jehova ćaće mislini mandar.“ I Eva, kolatar angleder vaćerđam, phenela: „Ko krajo ando svako dive, odvojinava vreme te razmislinav ando odova soj tano e Jehovase važno. Odova pomožini man te ovel man mir ko vilo hem mi vera te ovel pana pobari.“

14. Sar i molitva šaj te pomožini amen?

¹⁴ Uvek molin tut (1. Sol. 5:17). Ked mangeja nekasa te ove amal tu često vaćereja oleja hem pheneja lese sostar razmislineja. Ađahar tano hem ked mangeja te ove amal e Jehovaja. Ked ki molitva vaćereja lese sar osetineja tut, sostar razmislineja hem so brinini tut ađahar mothoveja so isi tut poverenje upro leste hem so đaneja so ov mangela tut (Ps. 94:17-19; 1. Jov. 5:14, 15). I Jua, kolatar angleder vaćerđam, phenela: „Ked molinava man me na phenava e Jehovase samo so desinđa pe maje ko odova dive, već phravava lese mo vilo hem phenava lese sar ćaće osetinava man. Hari pohari haljiljum so o Jehova nane sar šef ki jekh bari firma nego tano sar jekh dad kova ćaće mangela pe ćhaven.“ (Dikh o okvir „ Da li čitinđan akija knjiga?“)

15. Sar o Jehova mothovi so brinini pe tuće?

¹⁵ Družin tut te zrelo amalencar, sose on tane sar poklon ando Jehova (Jak. 1:17). Amaro nebesko Dad mothovi so ćaće brinini pe amendar sose dinđa amen phralen hem  phenjen ki skupština kola „uvek mothovena mangipe“ (Posl. 17:17). Ko lil kova pisinđa e Koloskonenđe o Pavle pominđa disave hrišćanen kola pomožinđe lese, odolese phenđa so but utešinđe le (Kol. 4:10, 11). Čak hem e Isusese valjanđa pomoć, odolese hine zahvalno asi pomoć koja dobinđa hem ando anđelija hem ando manuša (Luka 22:28, 43).

16. Sar šaj o zrela amala te pomožinen amen te ova pana popaše e Jehovaja?

¹⁶ Da li rodeja hem prihvatineja pomoć kotar te amala andi skupština? Ked amen vaćeraja jekhe zrelo amaleja ando amare problemija, odova na značini so amari vera nane zorali. Odova šaj but te zaštitini amen. O Džejms, kolestar angleder vaćerđam, phenela: „O šukar amalipe e zrelo hrišćanencar but pomožini man. Ked o negativna mislija but mučinena man, akala šukar amala strpljivo šunena man hem phenena maje so mangena man. Prekalo lende šaj te dikhav kobor o Jehova mangela man hem brinini pe mandar.“ But tano važno te ova amala amare phralencar hem phenjencar!

17-18. Kas valjani te šuna hem sose?

¹⁷ O Satana mangela amen te odustajina andi amari borba te ćera odova soj tano ispravno. Ov mangela amen te verujina so o Jehova na mangela amen hem so na hijam vredna ov te spasini amen. Ama, sar so dikhljam odova nane ađahar.

¹⁸ O Jehova mangela tut. Tu hijan vredno anglo lese jaćha. Ako šuneja le, tu ka aćhove zauvek ko oleso mangipe sar so o Isus ćerđa (Jov. 15:10). Odolese, ma šun ked o Beng ja to vilo phenena tuće so o Jehova na mangela tut. Umesto odova, šun e Jehova kova koro svakoneste amende dikhela odova soj tano šukar. Ov uverimo so „o Jehova radujini pe pekle narodose“, kuri hem tu hijan.