Sose o Isus hari angleder te merel citirinđa e Davidese lafija ando Psalam 22:1?

Maškaro e Isusese poslednja lafija kola phenđa angleder te merel hine o lafija ando Matej 27:46: „Devla moklo, Devla moklo, sose mukhljan man?“ Ađahar ispuninđe pe e Davidese proročanska lafija kola phenđa ko Psalam 22:1 (Mar. 15:34). O Isus na phenđa akala lafija sose hine razočarimo ja sose ko odova trenutko oslabinđa olesi vera. Ov potpuno haljilo o razlog sose valjani te merel hem hine spremno te ćerel odova (Mat. 16:21; 20:28). Isto ađahar, đanđa so o Jehova na ka zaštitini le angleder te merel (Jov 1:10). O Jehova odova dozvolinđa te šaj o Isus te mothovi so ka aćhol verno olese bizo obzir kobor pharo meribe ka ovel le (Mar. 14:35, 36).

Sose tegani o Isus phenđa akala lafija? Iako na hijam sigurna so đanaja o tačno odgovor, akana ka razmotrina disave ando moguća razlogija. *

Ked phenđa akala lafija, o Isus šaj naglasinđa so o Jehova na ka sprečini oleso meribe. O Isus valjanđa te platini i otkupnina bizi e Jehovasi pomoć. Ađahar so dinđa po životi, ov „okusinđa o meribe aso sare“ (Jevr. 2:9).

Ked citirinđa o lafija ando akava psalam, o Isus šaj manglja ađahar te ćhivel e manušen te razmislinen ando celo psalam. Ko odova vreme hine uobičajeno o Jevreja te  đanen but psalmija napamet. Ked bi šunena jekh stih ando disavo psalam, odova bi setinćeri len ko celo odova psalam. Ako o Isus manglja te ćerel odova, ađahar bi pomožini pe sledbenikonenđe kola hine Jevreja te setinen pe ko but proročanstvija kola pisinena ko odova psalam, a kola vaćerena ando događaja kola desinđe pe ko vreme ked mulo (Ps. 22:7, 8, 15, 16, 18, 24). Isto ađahar, o zadnja stihija ando akava psalam hvalinena e Jehova hem opisujinena le sar kralj upri celo Phuv (Ps. 22:27-31).

Ked citirinđa akala e Davidese lafija, o Isus šaj manglja ađahar te naglasini so nane krivo. Angleder o Isus te ovel mudardo, o Sinedrion ićerđa jekh suđenje kova na hine premalo zakon hem osudinđe e Isuse so vaćeri protiv o Devel (Mat. 26:65, 66). O članija ando Sinedrion sigate hem raćate ćedinđe pe hem ađahar prekršinđe sa o zakonska procedure (Mat. 26:59; Mar. 14:56-59). Ked citirinđa o lafija ando Psalam 22:1, o Isus šaj ađahar manglja o manuša te obratinen pažnja ko odova so ov ništa na ćerđa sova bi zaslužini asavki kazna.

O Isus šaj manglja te setinćeri averen so čak hem o David, kova pisinđa akava psalam, patinđa ama odova na značinđa so ov na hine pali e Jehovasi volja. E Davideso pućibe na mothovđa so ov našalđa pi vera upro Devel. Palo akava pućibe, ov phenđa so uzdajini pe ko odova so o Jehova šaj te spasini pe narodo. O Jehova hem ponodri blagoslovinđa e Davide (Ps. 22:23, 24, 27). Isto ađahar, iako o Isus „e Davideso Ćhavo“ patinđa đi hine ko mučeničko stubo, odova na značinđa so na hine pali e Jehovasi volja (Mat. 21:9).

Ked o Isus phenđa akala lafija, ov šaj ađahar mothovđa kobor tano olese pharo sebepi so o Jehova aćhavđa le bizi zaštita te šaj ov te mothovi soj tano potpuno verno e Jehovase. E Jehovasi namera na hine oleso Ćhavo te patini hem te merel. Odova hine potrebno tek palo odova so o Adam hem i Eva pobuninđe pe. O Isus na ćerđa ništa lošno, ama hine neophodno te patini hem te merel te šaj te odgovorini ko e Bengese optužbe hem te platini i otkupnina aso sa o manuša (Mar. 8:31; 1. Petr. 2:21-24). Odova bi ovela moguće samo ako bi prvo puti ko oleso životi o Jehova kratko aćhavi le bizi pi zaštita.

Ked phenđa akala lafija o Isus šaj ađahar manglja te pomožini pe sledbenikonenđe te razmislinen ando odova sose o Jehova dozvolinđa te merel ko mučeničko stub. * Ov đanđa so but manuša ka spotakninen pe odolese so ov ka merel sar zločinco (1. Kor. 1:23). Ako bi olese sledbenikija razmislinena ando pravo razlog kotar oleso meribe, tegani on bi haljona sose odova hine potrebno (Gal. 3:13, 14). On bi haljona so ov na hine mudardo sebepi so ćerđa disavo zločin, već te šaj te spasini e manušen.

Bizo obzir sose o Isus vaćerđa akala lafija, ov đanđa so odoleja so ka merel ko mučeničko stubo ka ćerel e Jehovasi volja. Hari palo odova so citirinđa akava psalam, o Isus phenđa: „Ćerđum sa so rodinđan mandar!“ (Jov. 19:30; Luka 22:37). Odolese so o Jehova kratko aćhavđa e Isuse bizi pi zaštita, o Isus šaj hine te ispunini po zadatko sebepi kova hine bićhaldo ki phuv. Isto ađahar, šajinđa te ispunini sa o buća kola olestar hine pisime „ko e Mojsijeso zakon, ko Prorocija hem ko Psalmija“ (Luka 24:44).