1. Soj tani amari najbari želja?

AMARI phen i Paulina *, phenela: „Ked haljiljum soj tano o čačipe, mi želja hine celo miklji familija te ovel mancar ko raj. Ama, mi najbari želja hine mo rom, o Vejn, hem amaro čhavo zajedno te služina e Jehovase“. Da li hem ki ti familija isi neko ko pana na služini e Jehovase? Sar i Paulina, šaj hem tu mangeja celo ti familija te služini e Devljese.

2. Kotar kola pučiba ka vačera ko akava članko?

² Amen našti zorjeja te čhiva amare familija te prihvatinen o šukar haberi. Ama, šaj te podstaknina ljen te razmislinen odoljestar so sikavi i Biblija (2. Tim. 3:14, 15). Sose valjani te svedočina amare familijače? Sose valjani te haljova sar osetinena pe? Sar šaj te pomožina amare familijače te pendžaren hem te mangen e Jehova? Sar šaj amare phralja hem phenja te pomožinen amendže?

3. Premali 2. Petrova 3:9, sose valjani te svedočina amare familijače?

³ Pana hari, ka avel o krajo akalje svetoso. Samo okola kola „ispravno [dikhena] ko večno dživdipe“ ka oven spasime (Dela 13:48). Amen odobor trudinaja amen te propovedina e manušendže kas na pendžaraja, hem normalno tano so mangaja te svedočina hem amare familijače te šaj hem on te služinen e Jehovase. Amaro Dad, o Jehova, „na mangela nijekh te merel, nego sare te kajinen pe“. (Čitinen 2. Petrova 3:9.)

4. Sar šaj ko lošno način te svedočina amare familijače?

 ⁴ Na valjani te bistra so šaj te svedočina hem ko šukar hem ko lošno način. Na primer, ked svedočinaja nekase kas na pendžaraja šaj but trudinaja amen te ova ljubazna, ama šaj hijam but direktna ked svedočinaja amare familijače.

5. So valjani te ičera ki godi ked mangaja te svedočina amare familijače?

⁵ Disave amendar ked setinčerena pe sar prvo puti svedočindže pe familijače hem avdije osetinena pe lošno sebepi odova, sose tegani na čerdže averčhane. O apostol Pavle savetujindža e hrišćanen: „Sar o lon so čerela o habe ukusno, adžahar tumaro lafi uvek nek ovel ljubazno, te šaj te džanen svakonese te odgovorinen sar so valjani“ (Kol. 4:5, 6). Šukar tano te ičera ki godi akava savet ked svedočinaja amare familijače. Amaro cilj tano te šunen amen, a na te uvredina ljen.

6-7. Sose tano važno te haljova sar osetini pe o bračno drug kova nane e Jehovaso svedoko? Vačer jekh primer.

⁶ Mothov so haljoveja oljenge osećanja. Amari phen i Paulina, kolatar vačerdžam angljeder, phenela: „Ko početko, me romeja vačerdžum samo ando Devel hem andi Biblija. Na vačerdžam kotar o buča kola desinena pe svako dive.“ Ama, e Paulinako rom, o Vejn, na džandža but andi Biblija hem na haljilo sostar i Paulina vačeri. Oljese dičhilo so oj jedino mislini kotar olaki vera. Brinindža pe so oj khuvdža ki opasno sekta hem so hovavdže la.

⁷ I Paulina priznajindža so jekh vreme but hine e phraljencar hem e phenjencar prekalo vikendija hem uveče – ko sastankija, ki služba ja ko druženje. I Paulina  phenela: „Disavo puti, ked o Vejn avela hine čhere niko na hine odothe hem ov osetindža pe soj tano kokri“. Haljola pe so o Vejn manglja oljesi romni hem o čhavo te oven oljeja. Ov na džandža e manušen koljencar oj hine hem mislindža so on tane e Paulinače považna nego li ov. Sebepi sa odova, o Vejn phendža so ka mukhel e Paulina. So mislineja tu, sar i Paulina šajindža te mothovi so haljola pe romese osećanja?

8. Premali 1. Petrova 3:1, 2, so šaj više te utičini ki amari porodica?

⁸ Mothov šukar primer. But putija, odova so amen čeraja, pobuter utičini ki amari porodica, nego odova so phenaja. (Čitinen 1. Petrova 3:1, 2.) Ko krajo, i Paulina odova haljilji. Oj phenela: „Džandžum so o Vejn mangela amen hem na mangljum te mukhel man. Ked phendža maje so ka mukhel man, haljiljum so valjani te primeninav odova so o Jehova phenela kotar o brak. Považno hine te čerav odova soj tano šukar, hem adžahar te mothovav ljese šukar primer, a na te svedočinav ljese.“ Palo odova, i Paulina čhinavdža te vačeri pe romeja andi Biblija hem počmindža te vačeri oljeja kotar o buča so desinena pe svako dive. O Vejn dikhlja so oj akana više trudini pe te ovel mir ko čher hem so oljengo čhavo ulo pošukar hem više šunela oljen (Posl. 31:18, 27, 28). Ked o Vejn dikhlja sar i Biblija utičini upri oljesi porodica, ov menindža poklo stav premalo e Devljeso Lafi (1. Kor. 7:12-14, 16).

9. Sose valjani te ova istrajna dži pomožinaja amare porodicače?

⁹ Ov istrajno dži pomožineja teklje porodicače. O Jehova tano najbaro primer  amendže. But putija, paljem dela e manušendže i prilika te šunen o šukar haberi hem te dobinen o dživdipe (Jer. 44:4). Hem o apostol Pavle phendža e Timotejese soj tano važno te ovel istrajno dži pomožini averendže. Sose? Odoljese so, adžahar ka spasini hem pes hem okoljen so šunena lje (1. Tim. 4:16). Sebepi so mangaja amare porodica, amen mangaja hem on te džanen o čačipe andi Biblija. Palo disavo vreme, odova so i Paulina vačerdža hem so čerdža, šukar utičindža ki olaki porodica. Akana oj tani bahtalji sose zajedno pe romeja služini e Jehovase. Solduj tane pionirija hem o Vejn služini sar starešina.

10. Sose valjani te ova strpljiva?

¹⁰ Ov strpljivo. Ked odlučindžam te šuna e Devlje, amen menindžam amaro dživdipe hem odova ko so verujinaja. Odoljese, amare porodicače šaj te ovel but pharo te prihvatinen odola promene. Odova so prvo dikhena tano so amen više na slavinaja o praznikija oljencar hem so na mešinaja amen ki politika. Sebepi odova, ko početko šaj te holjanen upro amende (Mat. 10:35, 36). Ama, na valjani te mislina so on niked na ka meninen pe. Ako amen na trudinaja amen te pomožina ljen te haljon odova ko so amen verujinaja, tegani šaj te dičhol so amen andžam i odluka so o večno dživdipe nane oljendže. O Jehova e Isusese dindža te ovel sudija, a na amendže (Jov. 5:22). Ako hijam strpljiva, neko kotar amari familija šaj ka šunel o šukar haberi. (Dikh o okvir „ Koristin amaro veb-sajt te sikave e manušen“.)

11-13. So šaj te sikljove kotar e Alisako primer?

¹¹ Ov ljubazno, ama ma mukh nikase te menini tiklji odluka. (Posl. 15:2). Te dikha o primer kotar amari phen i Alisa. Olake roditeljija na verujindže ko Devel hem bavindže pe e politikaja. Oj na živindža oljencar ked upoznajindža o čačipe. Haljilji so valjani so posig te phenel pe porodicače kola šukar hem neve buča sikljilji. Amari phen i Alisa phenela: „So pobuter adžičereja te phene te porodicače ko so akana verujineja, pobaro šok ka ovel oljendže“. Oj razmislindža pe roditeljendar hem odoljestar so oljen interesini. Ked bičhaldža ljendže ljila, oj pisindža so i Biblija vačeri ando buča so oljen interesinena, sar soj tano o mangipe, hem pučlja ljen so on mislinena odoljestar (1. Kor. 13:1-13). Oj hine zahvalno pe roditeljendže so barjačerdže la hem so brinindže pe olatar hem ked god šajindža, bičhaldža ljendže poklonija. Ked dželji te posetini ljen, but pomožindža pe dajače ko čher. Ko početko olake roditeljija, na hine bahtalje ked i Alisa phendža ljendže ko so verujini akana.

¹² Ked dželji te posetini pe roditeljen, i Alisa hem odothe svako dive čitindža i Biblija. Oj phenela: „Odova pomožindža me dajače te haljol kobor i Biblija tani važno maje“. Palo disavo vreme, e Alisako dad odlučindža te dikhel sostar vačeri i Biblija te šaj te haljol sose menindža pe oljesi čhaj. Isto adžahar, manglja te arakhel o greške ki Biblija. I Alisa phenela: „Dindžum lje i Biblija hem andre pisindžum ljese diso“. So ulo ko krajo? E Alisako dad, na samo so na arakhlja o greške ko e Devljeso Lafi, nego dži čitindža but buča hor utičindže ko oljeso vilo.

¹³ Amen valjani te ova ljubazna, ama na mangaja te mukha nikase te menini amari odluka, čak ked hijam ko pharipa (1. Kor. 4:12b). E Alisaki daj but protivindža pe. So čerdža i Alisa? Oj phenela: „Ked krstindžum man, mi daj phendža so hijum lošno  čhaj. Na mangljum te našav kotar odova te vačerav andi mi religija. Iako but poštujindžum me daja, objasnindžum lače so me andžum mi odluka hem so na ka meninav la. But trudindžum man te uverinav me daja so but mangava la. Solduj but rundžam. Palo odova, čerdžum lače jekh šužo habe. Kotar tegani, mi daj phenela so i Biblija čerdža te ovav pošukar manuš“.

14. Sose na valjani te mukha amare porodicače te menini amari odluka te služina e Jehovase?

¹⁴ Valjani vreme te šaj amari porodica te haljol kobor tano amendže važno te služina e Jehovase. Ked amari phen i Alisa odlučindža te ovel pionir, a na te čerel odova so olake roditeljija manglje oj te čerel, olake dajače hine but pharo hem paljem rundža. Ama, i Alisa ačhilji zoralji. Oj phenela: „Ako jekh puti mukheja te meninen ti odluka, on ka mangen hem ko avera buča te meninen odova so tu odlučindžan. Ako hijan ljubazno, ama na mukheja te meninen teklje odluke, ko krajo disave oljendar šaj ka prihvatinen o čačipe“. Adžahar ulo ki Alisaki porodica. Olake roditeljija akana tane pionirija hem olako dad služini sar starešina.

15. Premalo Matej 5:14-16 hem 1. Petrova 2:12, sar averenge „šukar delija“ šaj te utičinen ki amari porodica?

¹⁵ Prekalo amare „šukar delija“ o Jehova šaj te pašačeri e manušen pese. (Čitinen Matej 5:14-16; 1. Petrova 2:12.) Ako toklo bračni drug nane e Jehovaso svedoko, da li džanela nekas andi skupština? Amari phen i Paulina, vičindža e phraljen hem e phenjen koro peste te šaj olako  rom, o Vejn, te upoznajini ljen. O Vejn setinčeri pe sar jekh amaro phral pomožindža lje te haljol save amen hijam. Ov phenela: „Jekh phral, ljelja slobodno dive te šaj mancar te dikhel i utakmica ki televizija. Tegani haljiljum so ov tano normalno manuš sar sa avera“.

16. Sose valjani te vičina amare porodica te avel ko sastankija?

¹⁶ Jekh način sar šaj te pomožina amare porodicače, tano te vičina ljen te aven ko jekh sastanak amencar (1. Kor. 14:24, 25). Prvo sastanak ko kova o Vejn alo hine i Spomen-svečanost. Odova sastanko ičerdža pe palji buti hem o program na trajindža but. Ov phenela: „Na haljiljum odobor sostar vačerdža pe, ama setinava man sar o manuša ponašindže pe. On alje mancar te pozdravinen pe. Šaj te phenav so hine iskrena“. Angljeder, jekh bračno par but pomožindža e Paulinače, ked hine ko sastankija ja ki služba pe čhaveja. Odoljese ked o Vejn odlučindža hari pobuter te istražujini ko so i Paulina verujini, ov pučlja odolje phralje te proučini oljeja.

17. (a) Sose na valjani te krivina amen hem te mislina so amari familija niked na ka menini pe?

¹⁷ Amen na našalaja amari nada so celo amari familija jekh dive ka služini e Jehovase. Iako but trudinaja amen te pomožina amare familijače te služinen e Devljese, šaj na ka prihvatinen sare o čačipe. Ako tano adžahar, amen na valjani te krivina amen sose on andže asavki odluka. Amen našti nikas te čhiva zorjeja te prihvatini amari vera. Ama, niked ma te misline so upro ljende na utičini ked dikhena kobor hijan bahtalo dži služineja e Jehovase. Molin tut oljendže. Ma mukh te meninen tiklji odluka hem uvek trudin tut te pomožine ljendže (Dela 20:20). Ov uverimo so o Jehova ka blagoslovini toklo trud. Hem ako tiklji familija ka šunel tut, on ka oven spasime!