1. So o Jehova dozvolindža svakonese ando pe verna sluge?

O JEHOVA mothovdža mangipe ked pe verno slugendže dozvolindža te oven deo andi skupština. Iako sare amen čeraja različita buča ki skupština, sare amen hijam vredna hem potrebna hijam jekh jekhese. Sar o apostol Pavle pomožini amen te haljova akija važno pouka?

2. Premalo Efešanima 4:16, sose valjani te cenina jekh jekhe hem te sarađujina jekh jekheja?

² Sar so vačeri pe ko stiho ko kova temeljini pe akava članko, o Pavle jasno mothovdža so nijekh e Jehovaso sluga našti te phenel averese: „Na valjaneja maje“ (1. Kor. 12:21). Ako mangaja te ovel mir ki skupština, mora te cenina jekh jekhe hem te sarađujina jekh jekheja. (Čitin Efešanima 4:16.) Ked sarađujinaja jekh jekheja, ki skupština ka ovel jekhipe, sare ka osetinen o mangipe hem i skupština ka ovel zorali.

3. So ka dikha ko akava članko?

³ Ko kola načinija šaj te mothova so poštujinaja jekh jekhe ki skupština? Ko akava članko ka dikha sar o starešine šaj te mothoven poštovanje premalo avera starešine ki pi skupština. Palo odova, ka dikha sar šaj svako amendar te mothovi so poštujini e phraljen hem e phenjen kola nane ko brako. Hem ko krajo, ka dikha sar šaj te mothova poštovanje premalo okola kola šaj na vačerena šukar amari čhib.

4. Ko kova e Pavleso savet ando Rimljanima 12:10, o starešine valjani te ičeren pe?

⁴ Sa o starešine ki skupština tane naimenujime e Jehovase sveto duhoja. Ama, svako olendar isi le averčhane sposobnostija (1. Kor. 12:17, 18). Disave akana sigende ulje starešine hem odolese nane len baro iskustvo sar avera starešine. Avera starešine sebepi pe berša ja po sastipe, možda našti te čeren but buča ki skupština. Ama, nijekh starešina na valjani te mislini so aver starešina tano beskorisno. Odova bi ovela sar da samći phenela lese: „Na valjaneja maje.“ Umesto odova, svako starešina valjani te ičeri pe ko e Pavleso savet kova tano pisimo ko Rimljanima 12:10. (Čitin.)

5. Sar o starešine mothovena so poštujinena avere starešinen hem sose tano važno odova te čeren?

⁵ O starešine mothovena so poštujinena avere starešinen adžahar so pažljivo šunena jekh jekhe. Odova tano posebno važno ked o starešinstvo sastajini pe te vačeri ando važna pučiba. Sose? Zapazin so pisini ki Stražarsko kula ando 1. februar 1989. berš: „O starešine valjani te oven svesna, so o Isus prekalo sveti duh, šaj te pomožini svakone starešinase te razmislini ando e biblijake načelija, kola ka pomožinen e starešinendže te džanen so te čeren ki bilo koja situacija ja te anen disave važna odluke (Dela 15:6-15). O sveti duh pomožini sa e starešinendže ki skupština, a na samo jekhese.“

6. Sar šaj o starešine te oven ko jekhipe hem sar odova ka koristini e skupštinače?

⁶ Ked o starešinstvo sastajini pe, o starešina kova poštujini avere starešinen na ka mangel uvek prvo te vačeri. Ov nane glavno ko razgovor hem na mislini so samo oleso mišljenje tano ispravno. Umesto odova, ov vačeri po mišljenje ko jekh ponizno hem skromno način. Ov pažljivo šunela ked avera vačerena po mišljenje. Soj tano pana považno, ov koristini e biblijake načelija hem šunela o smernice ando „verno hem razborito robo“ (Mat. 24:45-47). Ked o starešine mothovena mangipe hem poštovanje jekh  jekhese dži vačerena, tegani e Devleso sveti duh ka ovel odothe hem ka pomožini len te anen o odluke sebepi kola i skupština ka ovel pozorali (Jak. 3:17, 18).

7. Sar o Isus dikhlja ko samaštvo?

⁷ Avdije, ko amare skupštine isi amen porodice hem bračna parija. Isto adžahar, isi amen but phralja hem phenja kola nane ko brako. Sar valjani te dikha upro okola kola nane ko brako? Akana ka dikha sar o Isus dikhlja ko samaštvo. Dži hine ki phuv, o Isus na ženindža pe. Ov ačhilo kokri hem koristindža po vreme hem pi snaga te čerel po zadatko. O Isus niked na phendža so jekh hrišćanin mora te ovel ko brako ja so mora te ovel kokri. Ama, ov phendža so disave hrišćanija na ka ženinen pe (Mat. 19:11, 12). O Isus poštujindža okolen kola na hine ko brako. Ov na mislindža so okola soj tane ko brako tane pošukar ando okola so nane ko brako, niti so diso falini olendže.

8. Premali 1. Korinćanima 7:7-9, ko so o Pavle podstaknindža e hrišćanen?

⁸ Sar o Isus, hem o apostol Pavle na ženindža pe. Ama, ov niked na phendža so bi ovela pogrešno jekh hrišćanin te ženini pe. Ov džandža so odija tani lično odluka. Ama, o Pavle podstaknindža e hrišćanen te razmislinen da li šaj te ačhon kokri hem adžahar te služinen e Jehovase. (Čitin 1. Korinćanima 7:7-9.) Sigurno o Pavle na mislindža so o hrišćanija kola nane ko brako tane manje vredna ando okola soj tane ko brako. U stvari, ov birindža e terne Timoteje, kova hine kokri, * te čerel razna zaduženja (Fil. 2:19-22). Bi ovela pogrešno te mislina so jekh phral tano sposobno te čerel disave buča samo odolese so tano ko brako. A ki aver strana, bi ovela pogrešno te mislina so jekh phral nane sposobno te čerel ista odola buča samo odolese so nane ko brako (1. Kor. 7:32-35, 38).

9. So šaj te phena ando brako hem ando samaštvo?

⁹ Ni o Isus, a ni o Pavle na phendže e hrišćanendže so mora te ženinen pe ja so mora te ačhon kokri. Odolese, so šaj te phena ando brak hem ando samaštvo? I Stražarsko kula kotar 1. oktobar 2012. berš dela šukar odgovor ko akava pučibe. Ano late pisini: „Čače šaj te phena so o brako hem o samaštvo tane poklon ando Devel... O Jehova na mislini so  okola kola nane ko brako valjani te ladžan ja te oven tužna sebepi odova.“ Odolese, valjani te poštujina e phraljen hem e phenjen kola nane ko brako.

10. Sar šaj te mothova so poštujinaja amare phraljen hem e phenjen kola tane kokri?

¹⁰ Sar šaj te mothova so poštujinaja o osećanja kotar o phralja hem o phenja kola nane ko brako hem so haljovaja olenge okolnostija? Šukar tano te na bistra so disave olendar čhivdže pese cilj te ačhon kokri. Avera bi mangena te ženinen pe, ama šaj pana na arakhlje e pravo osoba. A avera tane kokri sose olengo bračno drug mulo. Kova god razlog te ovel, da li o phralja hem o phenja ki skupština, valjani te pučen okolen soj tane kokri sose pana na ženindže pe ja on te roden lendže nekas? Naravno, disave phralja hem phenja kola tane kokri šaj ka roden pomoć te bi arakhena nekas. Ama, ako on na rodena pomoć, a amen nudinaja amen te arakha lendže nekas, sar šaj te osetinen pe sebepi odova? (1. Sol. 4:11; 1. Tim. 5:13). Akana ka dikha sar osetinena pe disave amare verna phralja hem phenja kola tane kokri.

11-12. Sar šaj te obeshrabrina okolen kola nane ko brako?

¹¹ Jekh pokrajinsko nadglednik kova nane ko brako, a kova but šukar čerela pi služba, phenela so but buča šaj te čere ked hijan kokri. Ama, ov phendža so podijekh puti obeshrabrini pe ked o phralja hem o phenja pučena le: „Sose na hijan ženimo?“ Jekh phral kova nane ženimo, a kova služini ki podružnica phendža: „Podijekh puti, o phralja hem o phenja žalinena okolen soj tane kokri. Sebepi odova, o samaštvo šaj te dičhol sar pharipe, a na sar dar.“

¹² Jekh phen koja tani kokri, a koja služini ko Betel, phenela: „Disave objaviteljija mislinena so sa okola kola nane ko brako rodena nekas ja so svako baro skup dikhena sar prilika te arakhen pese nekas. Jekhvar, sebepi mo betelsko zaduženje, valjandžum te džav ko aver deo kotar i phuv. Resljum isto odija rat ked hine o sastanko. I phen ki koja valjandžum te sovav phendža maje so ki skupština isi duj phralja kola tane me berša. Iako phendža maje so nane olako cilj te arakhel maje nekas, čim resljam ki dvorana, oj ljegardža man dži odola duj phralja hem upoznajindža man olencar. Nane potrebno te phenav kobor hine neprijatno hem olendže hem maje.“

13. So ohrabrindža jekha phenja koja tani kokri?

¹³ Jekh aver phen koja nane ko brako, a koja služini ko Betel phenela: „Džanava disave pioniren kola tane kokri. On tane uravnotežena manuša, isi len jasna ciljija, spremna tane te pomožinen averendže hem bahtale tane. Odola pionirija tane but bari pomoć e skupštinače. On isi len uravnoteženo stav premalo samaštvo, na mislinena soj tane pošukar averendar sebepi so nane ko brako, niti mislinena so našti te oven bahtale ako nane ko brako hem ako nane len čhave.“ Kobor tano šukar te ove deo andi skupština kuri svako osetini pe soj tano poštujimo hem cenimo. Tu na osetineja so avera žalinena tut, soj tane ljubomorna upro tute, so zapostavinena tut, niti so vazdena tut. Umesto odova, tu osetineja so on mangena tut.

14. Sar šaj te mothova so poštujinaja okolen kola tane kokri?

¹⁴ Amare phralja hem phenja kola tane kokri ka oven zahvalna ako ceninaja len sebepi olenge šukar osobine, a na sebepi odova da li tane ko brako ja na. Umesto te žalina len, šukar tano te cenina olengi vernost. Odolese, amare phralja hem phenja niked na ka osetinen pe so amen samči phenaja lendže: „Na valjanena maje“ (1. Kor. 12:21). Umesto  odova, on ka osetinen so amen poštujinaja len hem so hijam bahtale sebepi so on tane deo andi skupština.

15. Kola promene disave čerdže te šaj te proširinen pi služba?

¹⁵ Avdije, but objaviteljija čhivdže pese cilj te sikljon nevi čhib te šaj te proširinen pi služba. Te šaj te čeren odova, on morandilje te čeren disave promene ko po dživdipe. Te bi služinena odothe kaj tani pobari potreba, odola phralja hem phenja dželje kotar pi skupština, ki aver skupština kuri vačeri pe aver čhib (Dela 16:9). Odija tani olengi lično odluka koja andže te šaj pana pobuter te služinen e Jehovase. Iako šaj valjani olendže but berša te šaj šukar te vačeren odija nevi čhib, on pomožinena e skupštinače ko but načinija. Olenge šukar osobine hem olengo iskustvo zorjačeri e phraljen hem e phenjen ki odija skupština. But ceninaja odole samopožrtvovano phraljen hem e phenjen!

16. Ko so temeljinena pe o uslovija kola jekh phral valjani te ispunini te bi ovela naimenujimo sar starešina ja sluga pomoćnik?

¹⁶ Odova so jekh phral pana na vačeri šukar i nevi čhib, na značini so o starešinstvo našti te preporučini odole phralje te služini sar starešina ja sar sluga pomoćnik. Da li neko šaj te služini sar starešina ja sar sluga pomoćnik, o starešine ka proceninen premalo e biblijake uslovija, a na premalo odova kobor šukar vačeri odija nevi čhib (1. Tim. 3:1-10, 12, 13; Titu 1:5-9).

17. Kola odluke disave porodice valjani te anen ked preselinena pe ki aver phuv?

¹⁷ Disave porodice preselindže pe ki aver phuv sose hine lendže but pharo ki olengi phuv ja naštindže te arakhen buti. Sebepi odova, olenge čhave džana ki škola ki čhib koja vačeri pe ki odija phuv. Isto adžahar, hem o roditeljija šaj valjani te sikljon odija čhib te bi šaj te arakhen buti. Ama, so ako odothe isi skupština ja grupa ki olengi čhib? Ki koja skupština on valjani te džan? Da li ki skupština ki koja vačeri pe olengi čhib ja ki skupština kuri vačeri pe i čhib kotar odija phuv?

18. Premalo Galatima 6:5, sar šaj te mothova so poštujinaja i odluka koja o poglavari andža?

¹⁸ O poglavari isi le odgovornost te odlučini ki koja skupština on ka džan sar porodica. Ov mora kokri te odlučini soj tano najšukar olese porodicače. (Čitin Galatima 6:5.) Odolese so odija tani lično odluka, amen valjani te poštujina la. Koja god odluka ov te anel, amen valjani te prihvatina la hem te mothova odole porodicače so mangaja len hem so hijam bahtale soj tane deo andi amari skupština (Rimlj. 15:7).

19. Sostar o poglavari ki molitva valjani te razmislini?

¹⁹ Disave porodice šaj služinena ki skupština ki koja vačeri pe i čhib koja o roditeljija  džanena, ama o čhave šaj na džanena šukar te vačeren odija čhib. Ako odija skupština nalazini pe ko područje kuri vačeri pe i čhib koja o čhave koristinena ki škola, šaj e čhavendže tano pharo te haljon o sastankija hem duhovno te napredujinen. Sose? Odolese so o čhave džana ki škola ki koja koristini pe i čhib koja vačeri pe ki odija phuv, a na i čhib koja olenge roditeljija vačerena. Ki asavki situacija, o poglavari valjani ki molitva te razmislini so te čerel te bi pomožini pe čhavendže te oven popaše e Jehovaja hem olese narodoja. O roditeljija šaj ka valjani te pomožinen pe čhavendže pošukar te vačeren olengi čhib ja šaj valjani te razmislinen te nakhen ki skupština ki čhib koja olenge čhave šukar haljona. Koja god odluka o poglavari te anel, o phralja hem o phenja ki skupština ki koja ov birindža te služinen, valjani te čeren sa te šaj ov hem olesi porodica te osetinen pe so avera poštujinena len hem ceninena len.

20. Sar šaj te mothova so poštujinaja amare phraljen hem phenjen kola sikljona nevi čhib?

²⁰ Kova god razlog te ovel ando okola kolendar vačerdžam ko akava članko, ko but skupštine ka oven phralja hem phenja kola trudinena pe te sikljon nevi čhib. Šaj olendže tano pharo te den komentari hem te phenen sa so bi mangena. Ako na obratinaja pažnja ko način ko kova vačerena, amen ka dikha kobor on mangena e Jehova hem kobor mangena te služinen olese. Ako dikhaja olenge šukar osobine, amen pana pobuter ka cenina hem ka poštujina akale phraljen hem e phenjen. Amen na ka phena lendže: „Na valjanena maje“, samo sebepi odova so na vačerena amari čhib šukar.

21-22. Koja čast sare amen isi amen?

²¹ O Jehova svakonese amendar dindža čast te služina ki skupština. Bilo te ova murša ja džuvlja, kokri ja ko brako, terne ja phure, ja bilo te vačera disavi čhib šukar ja na, amen hijam vredna Jehovase hem jekh jekhese (Rimlj. 12:4, 5; Kol. 3:10, 11).

²² Mangaja hem ponodri te da sa amendar te ičera amen ko odova so sikljiljam andi e Pavlesi ilustracija kotar o manušikano telo. Ko asavko način amen ka roda o načinija ko kola šaj te mothova so ceninaja amaro hem averengo than ki skupština.