Šaj li te odgovorine ko akala pučiba kola tane ki Stražarsko kula ko 2019. berš?

So značinena e Jehovase lafija: „Nisavo oružje kova tano čerdo protiv tute na ka ovel uspešno“? (Is. 54:17)

Amen šaj te ova uverime so o Jehova ka arakhi amen ando uništenje ked o „nasilno manuš ka avel sar oluja“ (Is. 25:4, 5). Amare dušmanja niked na ka uspinen te čeren amendže trajno šteta (w19.01, str. 6-7).

Sar o Jehova mothovdža pi pravda premalo Hanancija hem premalo Izraelcija?

O Devel osudindža okoljen so čerdže odvratna seksualna buča ja mučindže e romnjen hem e čhaven koljen niko na arakhi. Blagoslovindža okoljen kola hine oljese verna hem ked jekh premalo jekheste hine pravedna (w19.02, str. 22-23).

So valjani te čera ako neko molini pe, a nane e Jehovase svedoko?

Amen šaj te čutina hem te mothova poštovanje, ama na ka phena amin ja te dola amen kotar vasta dži trajini i molitva. Amen šaj tegani te molina amen ano amende (w19.03, str. 31).

Kobor tano o seksualno zlostavljanje ozbiljno greh?

O seksualno zlostavljanje tano greh protiv i žrtva, i skupština, o vlastija hem o Devel. Ko than kuri o zakon phenela so valjani te prijavini pe ko vlastija o seksualno zlostavljanje, o starešine dena sa pestar te poštujinen asavke zakonja (w19.05, str. 9-11).

Sar šaj te menjina amaro način sar razmislinaja?

Najvažna buča tane: Vačer e Jehovaja. Hor razmislin tutar. Puč kokri tut. Razmislin kasa družineja tut (w19.06, str. 11).

Sar šaj akana te pripremine tut aso progonstvo?

Amen valjani te zorjačera amaro amaljipe e Jehovaja. Ov uverimo so o Jehova mangela tut hem so niked na ka mukhel tut. Svako dive čitin i Biblija hem molin tut. Ov uverimo so e Devljeso Kraljevstvo ka avel hem so ka ispuninen pe e Devljese lafija. Sikljov napamet o stihija kola najviše mangeja (w19.07, str. 2-4).

Sar šaj te pomožina amare familijače te pendžaren hem te mangen e Jehova?

Mothov so haljoveja oljenge osećanja. Mothov šukar primer hem ov strpljivo hem ljubazno, ama ma mukh nikase te menjini tiklji odluka (w19.08, str. 15-17).

Sose o zadatko kova o Isus dindža amen ko Matej 11:28 dela amen nevi snaga?

Amen isi amen najšukar nadglednikija, najšukar amala hem najšukar zadatko (w19.09, str. 23).

Sar šaj o Jehova te del amen snaga hem želja te čera oljesi volja? (Fil. 2:13)

Ked čitinaja i Biblija hem hor razmislinaja odoljestar so čitindžam, o Devel šaj te del amen želja hem snaga te čera oljesi volja. Ov šaj te del amen po sveti duh te šaj ko najšukar načinja te koristina amare sposobnostija (w19.10, str. 21).

So valjani te čere angljeder so ka ane i odluka?

Isi pandž buča kola šaj te čere: Razmislin šukar hem istražin o buča. Molin tut asi mudrost. Puč tut sose mangeja te ane odija odluka. Teklje ciljija nek oven jasna. Ma očekujin but tutar (w19.11, str. 27-29).

Da li o Beng vačerdža e Evače o sikljovibe andi besmrtno duša?

Izgleda so na. O Beng na phendža e Evače so ako hala o plod kova o Devel zabranindža, so oj na ka merel, ama so jekh nevidljivo deo ando lako telo (koljese disave manuša avdije phenena soj tani besmrtno duša) ka nastavini te živini ko aver than. Džanaja so sa o manuša kola verujindže ko hovavne sikljoviba hine uništime ko Potop. O sikljovibe andi besmrtno duša verovatno počmindža palo Potop, angljeder so o Devel pomešindža o čhibja ko Vavel, ked o manuša gradindže i vavilonsko kula. (w19.12, str. 15).