1. Sar šaj o obeshrabrenje te utičini upro amende?

SVAKO dive isi amen problemija hem borinaja amen olencar kobor god šaj. Ama, but tano pharo te ikljova ko krajo amare problemencar ked hijam obeshrabrime. Odolese, ko obeshrabrenje valjani te dikha sar upro ćor kova mangela te lel amaro samopouzdanje, amari hrabrost hem radost. Ko Poslovice 24:10 pisini: „Ako obeshrabrineja tut ko dive andi nevolja, ka našale ti snaga.“ Sebepi odova, ked hijam obeshrabrime, amen hijam slaba hem but tano pharo te ikljova ko krajo amare problemencar.

2. So sa šaj te obeshrabrini amen hem so ka dikha ko akava članko?

² But buća šaj te obeshrabrinen amen – disavo puti šaj kokri amen te ova kriva, a disavo puti šaj na zavisini amendar. Disave ando odola buća tane amare mane, o greške kola ćeraja ja amaro sastipe. Ja šaj te ova obeshrabrime odolese so na dobinđam disavo zaduženje ki organizacija ja odolese so propovedinaja ko područje kuri but manuša na šunena i šukar vest. Ko akava članko, ka dikha so šaj te ćera ked hijam obeshrabrime.

3. So šaj te pomožini amen te ovel amen ispravno stav premalo amende hem amare greške?

³ Šaj but lokho te ovel amen pogrešno stav premalo amare greške hem mane. Odolese šaj te mislina so sebepi so ćeraja greške, o Jehova na ka mukhel amen te živina ko raj. Asavko stav šaj te ovel but opasno. Sar valjani te dikha ko amare greške? I Biblija mothovi so, osim o Isus Hrist, sa avera manuša „grešinđe“ (Rimlj. 3:23). Ama, o Jehova na rodela amare greške niti očekujini amendar te ova savršena. Umesto odova, ov tano brižno Dad kova mangela te pomožini  amen. Isto ađahar, ov tano strpljivo. Ov dikhela soj tano amenđe pharo te ćera okova soj tano ispravno hem te na mislina so na vredinaja but, hem odolese mangela te pomožini amen (Rimlj. 7:18, 19).

4-5. Sar odova so pisini ki 1. Jovanova 3:19, 20, pomožinđa duje phenjenđe te borinen pe protiv o obeshrabrenje?

⁴ Te dikha o primer andi Debora hem i Marija. * E Deboraki porodica na mothovđa laće mangipe hem sebepi odova sar ponašinđa pe premalo late oj lošno mislinđa pestar. Retko ked olaki porodica pohvalinđa la. Odolese ked barilji, hine la but lošno mišljenje kokri pestar. Ked bi ćerela tikne greške, oj bi mislini so nane sposobno te ćerel ništa sar so valjani. I Marija hine la slično problemi. Olaki porodica marđa laće muj. Sebepi odova, oj mislinđa so ništa na vredini. Čak hem ked krstinđa pe, mislinđa so nane dovoljno šukar manuš te ovel e Jehovaso svedoko.

⁵ Ama, akala duj phenja na ćhinavđe te služinen e Jehovase. Sose? Sebepi so on molinđe pe e Jehovase hem phenđe lese sar osetinena pe (Ps. 55:22). On haljilje so amaro nebesko Dad đanela so sebepi o lošna buća kola desinđe pe amenđe angleder amen šaj lošno te mislina amendar. Ama, ov dikhela odova soj tano šukar ko amaro vilo, čak iako amen mislinaja so nane amen nijekh šukar osobina. (Čitin 1. Jovanova 3:19, 20.)

6. So šaj neko te ćerel ako palem ćerela isto greška?

⁶ Neko šaj dela sa pestar te ćhinavi te ćerel diso lošno. Ama, ov šaj palem ćerđa isto greška hem sebepi odova tano obeshrabrimo. Naravno, normalno tano te osetina amen lošno ked grešinaja (2. Kor. 7:10). Ama, na valjani te osetina amen odobor lošno hem te phena kokri amenđe: „Me na hijum nisose. O Jehova niked na ka oprostini maje.“ Odova nane tačno hem odova šaj te ćhivel amen te ćhinava te služina e Jehovase. Setin tut so čitinđam ko Poslovice 24:10. Odothe vaćeri so ako ka obeshrabrina amen, ka našala amari snaga. Umesto odova, valjani te „raščistina o buća“ e Jehovaja ađahar so ka molina le te oprostini amenđe (Is. 1:18). Ked o Jehova ka dikhel so tu iskreno kajineja tut, ov ka oprostini tuće. Uzo odova, vaćer e starešinencar. On strpljivo ka pomožinen tut te oporavine tut ko duhovno pogledi (Jak. 5:14, 15).

7. Sose na valjani te ova obeshrabrime ako tano amenđe pharo te ćera okova soj tano ispravno?

⁷ O Žan Lik, jekh starešina kotar i Francuska, okolenđe kola isi len disavi slabost hem borinena pe olaja, phenela: „O pravedno  manuš anglo e Jehovase jaćha, nane neko ko niked na grešini, već okova kova kajini pe sebepi pe grehija hem dela sa pestar te menjini pe“ (Rimlj. 7:21-25). Odolese, ma mislin so na hijan vredno ako isi tut disavi slabost hem borineja tut olaja. Sebepi so sare grešinaja, sarinenđe amenđe valjani e Jehovaso nezaslužimo šukaripe, kova ov mothovi amenđe prekali otkupnina (Ef. 1:7; 1. Jov. 4:10).

8. Kastar valjani te roda pomoć ako hijam obeshrabrime?

⁸ Amare phralja hem phenja andi skupština ka ohrabrinen amen. On šaj te šunen amen ked valjani amenđe hem šaj te ohrabrinen amen pe lafencar (Posl. 12:25; 1. Sol. 5:14). Jekh phen andi Nigerija, koja vićini pe Džoj kolaće hine but pharo sebepi so hine obeshrabrimi, phenela: „Kaj bi me ovava akana bizo me phralja hem me phenja? On tane maje dokaz so o Jehova odgovorini ko me molitve. On čak sikavđe man sar me te ohrabrinav averen kola tane obeshrabrime.“ Ama, na valjani te bistra so amare phralja hem phenja šaj na ka đanen uvek ked valjani amenđe ohrabrenje. Odolese, amen valjani te vaćera dijekhe iskusno phraleja ja phenjaja hem te phena lenđe so valjani amenđe pomoć.

9. Sar ohrabrinena amen o lafija ando Psalam 41:3 hem 94:19?

⁹ Rode pomoć ando Jehova. Šaj te ovel amenđe but pharo te razmislina pozitivno, ako hijam već but vreme naborme. Iako o Jehova akana na saćari amen ko disavo čudesno način, ov utešini amen hem dela amen snaga koja valjani amenđe te šaj te istrajina. (Čitin Psalam 41:3; 94:19.) Na primer, ov šaj te podstaknini amare phrale ja phenja te pomožini amen diso ko ćher ja te đal te ćinel odova so valjani amenđe. Isto ađahar, šaj te podstaknini len te molinen pe amencar. Ja šaj te pomožini amen te setina amen ko disave utešna mislija ando oleso Lafi, sar soj tani amari šuži nada so ka ovel amen savršeno đivdipe bizo nabormipe hem dukha ko nevo sveto kova avela (Rimlj. 15:4).

10. Sose o Isang na aćhilo obeshrabrimo pali nesreća koja hine le?

¹⁰ O Isang, kova živini ki Nigerija, doživinđa jekh nesreća, sebepi koja aćhilo paralizovano. O doktori phenđa lese so više niked na ka phirel. O Isang phenela: „Mo vilo hine phago hem hijum le but obeshrabrimo.“ Ama, da li mukhlja odova te peravi le? Na! So pomožinđa lese? O Isang phenela: „Mi romni hem me niked na ćhinavđam te molina amen e Jehovase hem te proučina oleso Lafi. Dinđam sa amendar te ova zahvalna aso šukar buća kola isi amen, sar soj tani amari nada so večno ka živina ko e Devleso nevo sveto.“

11. Sose šaj hine i Sindi te aćhol radosno iako hine but nabormi?

¹¹ Amare phenjaće, koja vićini pe Sindi hem živini ko Meksiko, o doktorija phenđe so isi la jekh nabormipe kolestar šaj te merel. So pomožinđa laće te šaj te istrajini ko odova problemi? Ði hine ki bolnica, olako cilj hine svako dive te svedočini nekase. Oj pisini: „Akava pomožinđa maje te razmislinav ando avera, a na andi mi operacija, mi dukh ja ando odova kobor hijum nabormi. Aće so ćerđum: Ði vaćerđum e doktorencar hem e sestrencar, obično bi pućava len sar tane olenge porodice. Palo odova bi pućava len sose birinđe te ćeren akija phari buti. Sebepi odova hine maje lokho te dikhav koja tema zanimini len. Nekobor olendar phenđe so retko ked disavo pacijenti pućlja len sar tane on. But olendar hine zahvalna sebepi so mothovđum  so brininava man olendar. Disave čak dinđe man pi adresa ja poklo broj ando telefoni. Ðanđum so o Jehova ka pomožini man te istrajinav ko odova pharo vreme. Ama, hijum le iznenadimi kobor bari radost dinđa man“ (Posl. 15:15).

12-13. Sar disave kola tane naborme ja phure svedočinena hem đi soste odova legari?

¹² Disave kola tane naborme ja phure šaj tane obeshrabrime sebepi so našti te đan ki služba odobor kobor bi mangena. Ama, iako tane naborme but olendar dena šukar svedočanstvo. Ki Amerika, amari phen koja vićini pe Lorel, hine phanli ko čelična pluća 37 berš. Uzo odova, oj hine la rak, nekobor operacije hem disave nabormipa ki koža. Ama, iako hine la odobor bare problemija sastipaja, odova na ćhinavđa la te propovedini. Oj svedočinđa e medicinsko sestrenđe hem averenđe kola avena hine koro late ćhere. Sebepi odova, oj šajinđa te pomožini najhari 17 manušenđe te penđaren o ćaćipe andi Biblija. *

¹³ O Rišar, jekh starešina andi Francuska, isi le šukar predlog okolenđe kola našti te ikljon ando ćher ja okolenđe kola tane ko starački dom. „Predložinava lenđe te ćhiven nekobor knjige ja časopisija ko jekh astali te šaj avera te dikhen odova. Ked o manuša nakhena uzo odova astali, on dikhena i literatura hem mangena te đanen diso pobuter odolestar. Odova so šaj te vaćeren odole manušencar, ohrabrini amare phralen hem phenjen kola više našti te đan kotar ćher ko ćher.“ Isto ađahar, okola so našti te ikljon ando po ćher, učestvujinena ki služba ađahar so pisinena lila ja svedočinena prekalo telefoni.

14. Sose tano o kralj David but šukar primer amenđe?

¹⁴ Isi but razlogija sose našti te dobina disavo zaduženje kova mangljam ki e Jehovasi organizacija. Odova šaj te ovel sebepi so hijam but phure, naborme ja sebepi avera okolnostija. Ako hijam ki asavki situacija, but šaj te sikljova ando primer kotar o kralj David. Ov but manglja te gradini e Devleso hram. Ama, ked hine lese phendo so ov na hine birimo te ćerel odova, ov pomožinđa okolese kas o Jehova birinđa te ćerel odova zadatko. O David čak dinđa baro prilog te šaj te ćerel pe o hram. Ćaće tano o David but šukar primer amenđe! (2. Sam. 7:12, 13; 1. Let. 29:1, 3-5).

15. Sar o Ig pobedinđa o obeshrabrenje?

¹⁵ Sebepi o nabormipe, o Ig, jekh phral kotar i Francuska, ćhinavđa te služini sar starešina hem čak naštinđa više te ćerel disave  jednostavna buća ko ćher. Ov pisinđa: „Ki početka, mislinđum so ništa na vredinava hem hijum le but obeshrabrimo. Ama, sar đelo o vreme, haljiljum so na valjani te ovav tužno sebepi o buća kola više našti te ćerav. Sebepi odova, šajinđum te ovav bahtalo sose isi pana buća kola šaj te ćerav ki služba e Jehovase. Odlučno hijum te na odustajinav. Sar o Gedeon hem olese 300 manuša, kola nastavinđe te borinen pe iako hine umorna, hem me ka nastavinav te borinav man“ (Sud. 8:4).

16. So šaj te sikljova ando e anđelengo primer?

¹⁶ Šukar primer tane amenđe hem o verna anđelija. Ði vladinđa o kralj Ahav, o Jehova vićinđa e anđelen te phenen sar te prevarini pe odova lošno kralj. Disave anđelija phenđe po mišljenje. Ama, o Devel birinđa jekhe anđele hem phenđa lese so oleso predlog ka uspini (1. Kralj. 22:19-22). Da li avera verna anđelija obeshrabrinđe pe hem da li mislinđe: „Sose našalđum mo vreme te dav disavo predlog?“ Naravno so na. O anđelija tane ćaće ponizna hem mangena sa i čast te den e Jehovase (Sud. 13:16-18; Otkr. 19:10).

17. So valjani te ćera ako tano amenđe pharo sose nane amen disavo zaduženje ki e Jehovasi organizacija?

¹⁷ Ićer ki godi so i najbari čast tani te akhare e Devleso anav hem te vaćere ando oleso Kraljevstvo. O zaduženja šaj te dobina ja te našala, ama on na ćerena amen te ova vredna e Devlese. Ako hijam skromna hem ponizna, amen ka ova vredna e Jehovase hem amare phralenđe hem e phenjenđe. Odolese, molin tut e Jehovase te pomožini tut te aćhove skromno hem ponizno. Razmislin ando šukar primerija kola pominena pe ki Biblija, kola mothovđe skromnost hem poniznost. Spremno služin te phralenđe ko kova god način šaj (Ps. 138:6; 1. Petr. 5:5).

18-19. Sar šaj te aćhove radosno iako e manušen ko to područje na zanimini i šukar vest?

¹⁸ Da li disavo puti obeshrabrinđan tut sebepi so ko toklo područje e manušen na zanimini i šukar vest ja sebepi so retko ked arakheja len ćhere? Ki asavki situacija, sar šaj te aćhove radosno ja te ovel tut pana pobari radost? Disave praktična savetija tane dinde ko okvir „ Sar šaj te ovel tut pana pobari radost ki služba?“ Isto ađahar, važno tano te ovel amen ispravno stav premali služba. So odova značini?

¹⁹ Ićer ki godi so to cilj tano te vaćere ando e Devleso anav hem ando oleso Kraljevstvo.  O Isus jasno phenđa so samo hari manuša ka đan ko drumo kova legari ko đivdipe (Mat. 7:13, 14). Ked hijam ki služba, amen isi amen čast te sarađujina e Jehovaja, e Isuseja hem e anđelencar (Mat. 28:19, 20; 1. Kor. 3:9; Otkr. 14:6, 7). O Jehova privucini okolen kola tane dostojna (Jov. 6:44). Odolese, ako i osoba na mangela te šunel i šukar vest akana, šaj ka šunel aver puti.

20. Sar šaj o lafija ando Jeremija 20:8, 9 te pomožinen amen te na ova više obeshrabrime?

²⁰ Amen šaj but buća te sikljova ando prorok Jeremija. Ov valjanđa te propovedini ko područje kova hine but pharo. O manuša vređinđe le hem marđe lese muj „po celo dive.“ (Čitin Jeremija 20:8, 9.) Jekhvar, ov hine odobor obeshrabrimo so manglja te ćhinavi te propovedini. Ama, na ćerđa odova. Sose? „E Jehovaso lafi“ hine sar jag ano Jeremija hem ov naštinđa, a te na vaćeri! Amen šaj te ova sar oleste ako svako dive čitinaja i Biblija hem hor razmislinaja odolestar so čitinđam. Odolese, amen ka ova pana pobuter radosna ki služba hem šaj pana pobuter manuša ka šunen amen (Jer. 15:16).

21. So šaj te pomožini tut te borine tut protiv o obeshrabrenje?

²¹ „O obeshrabrenje šaj te ovel sar jekh moćno oružje kova o Beng koristini“, phenela i Debora, kolatar vaćerđam angleder. Ama, o Jehova, tano pozoralo ando Beng hem ando oleso oružje. Odolese ked ando bilo kova razlog hijan obeshrabrimo, molin tut e Jehovase te pomožini tut. Ov ka pomožini tut te ikljove krajo te manencar hem te greškencar. Isto ađahar, ka del tut snaga ked hijan nabormo. Ov ka pomožini tut hem ponodri te ovel tut ispravno stav premalo zaduženja ki e Jehovasi organizacija. Hem ka pomožini tut te ovel tut ispravno stav premali služba. Molin tut te nebesko Dadese hem phen lese sa so isi tut ko vilo. Uzi olesi pomoć, tu šaj te borine tut protiv o obeshrabrenje.