1. Sar o trin e Jehovase svedokija ko akala primerija ačhilje verna e Jehovase?

ZAMISLIN akala trin situacije. (1) Jekh phen tani ki škola hem olako nastavniko vačeri sa e učenikondže te učestvujinen ko jekh prazniko. I phen džanela so o Jehova na mangela odova prazniko hem odoljese ljubazno objasnini sose na učestvujini ko odova. (2) Jekh ladžutno terno phral propovedini kotar čher ko čher. Ov džanela so ko aver čher živini oljeso školsko amal kova nekobor puča asandilo e Jehovase svedokonendže. Ama o terno phral na čhinavi i služba, nego džala hem ko odova čher. (3) Jekh phral čerela but buti te šaj te brinini pe andi pi porodica. Jekh dive, o šefi rodela oljestar te čerel diso so nane pošteno hem soj tano protiv o zakon. Iako šaj te našalji pi buti, o phral objasnini pe šefese so mangela te ovel pošteno hem te šunel o zakoni, sose odova o Devel očekujini okoljendar so služinena oljese (Rim. 13:1-4; Jevr. 13:18).

2. Ando kola pučiba ka vačera hem sose?

² Kola osobine šaj te dikhe ko akala trin svedokija? Šaj dikhljan soj tane hrabra hem poštena. Ama jekh osobina tani but važno, a odija tani i besprekornost. Sa on ačhilje verna e Jehovase. Niko oljendar na čerdža diso soj tano protiv e Devljese merilija. I besprekornost podstaknindža ljen te čeren odova. O Jehova sigurno tano ponosno upro peklje sluge kola mothovena akija osobina. Hem amen bi mangaja amaro Dad kova tano ko nebo te ovel ponosno upro amende. Odoljese, te vačera ando akala trin pučiba: Soj tani i besprekornost? Sose valjani amendže akija osobina? Hem sar šaj te ova pana poodlučna te ačhova besprekorna ko akava pharo vreme?

3. (a) Sar e Devljese sluge mothovena besprekornost? (b) Kola primerija šaj te pomožinen amen te haljova soj tani i besprekornost?

³ Sar amen sar e Devljese sluge mothovaja besprekornost? Adžahar so mangaja e Devlje celone viljeja hem so na mukaja ništa te čhinavi amen te ova oljese odana. A odova podstaknini amen uvek te čera odova so ov mangela. Te dikha sar o lafi „besprekornost“ koristini pe ki Biblija. Jekh osnovno značenje ando lafi besprekornost tano potpuno, sasto ja bizo mane. Na primer, premalo e Mojsijeso zakon o Izraelcija valjandže te den sar žrtva e Jehovase životinje kola hine saste hem bizo mane * (3. Moj. 22:21, 22). E Devljeso narodo na ismindža sar žrtve te del životinje koljendže diso hine phago, falindža kan, jakh, pro ja hine naborme. E Jehovase hine važno o životinje te oven potpuna, saste hem bizo mane (Mal. 1:6-9). Nane pharo te haljova sose hine oljese važno odova. Ked amen činaja diso, bilo te ovel voće, knjiga ja alati, sigurno ne bi činaja i voćka koja tani kicimi, i knjiga koja nane la stranice ja o alati kase diso falini. Isto adžahar, o Jehova mangela celone viljeja te manga lje hem te ova oljese potpuno odana.

4. (a) Sar jekh nesavršeno manuš šaj te ovel besprekorno? (b) Premalo lafija kotar Psalam 103:12-14, so o Jehova očekujini amendar?

⁴ Da li odova značini so valjani te ova savršena te šaj te ova besprekorna? Šaj mislinaja so isi amen but mane. Te dikha kola duj razlogija mothovena so na valjani te ova savršena te šaj te mothova akija osobina. Sar prvo, o Jehova na dikhela samo ko amare mane. Ko oljeso Lafi pisini: „Ako ka dikhe ko greške, o Jah, o Jehova, ko ka ačhol?“ (Ps. 130:3). Ov džanela so hijam nesavršena, grešna manuša hem odoljese tano spremno te oprostini amendže (Ps. 86:5). Sar dujto, o Jehova džanela kola tane amare granice hem na očekujini amendar te čera diso pobuter ando odova so šaj. (Čitinen Psalam 103:12-14.) Tegani, so značini anglo oljese jačha te ova besprekorna ja bizo mane?

5. Sose e Jehovase sluge mora te ovel ljen mangipe te šaj te oven besprekorna?

⁵ Te šaj te oven besprekorna, e Jehovase sluge mora te ovel ljen mangipe. Amen valjani te manga amare Dade kova tano ko nebo celone viljeja hem valjani te ova oljese potpuno odana. Ked mothovaja asavko mangipe čak hem ked isi amen kušnje, tegani hijam besprekorna (1. Let. 28:9; Mat. 22:37). Te razmislina palje ando trin Svedokija koljendar vačerdžam poupre. Da li i phen na manglja te nakhel pese šukar ki škola? Da li o terno phral manglja te asan ljese ked propovedindža? Da li o phral kova isi lje porodica manglja te našalji pi buti? Sigurno na! Svako dive, e Devljese sluge ko celo sveto ovena ko slična situacije hem anena slična odluke. Sose? Odoljese so šukar pendžarena e Jehovase pravedna merilija hem odlučna tane te radujinen pe nebesko Dade. O mangipe premalo Devel podstaknini ljen uvek te ovel ljendže ov ko prvo than ked valjani te anen disavi odluka. Odoljeja mothovena soj tane besprekorna.

6. (a) Sose valjani te ova besprekorna anglo Jehova? (b) Sar o Adam hem i Eva na mothodže soj tane besprekorna?

⁶ Sose tano odoborkha važno svako amendar te ovel besprekorno anglo Jehova? Odoljese so o Satana krivindža e Jehova hem amen. Odova buntovno anđeo pana ko edensko vrt ulo Satana, so  ki hebrejsko čhib značini „protivniko“. Ov meljačerdža e Jehovaso nav odoljeja so vačerdža soj tano o Devel lošno, sebično hem nepošteno Vladari. Nažalost, o Adam hem i Eva dželje ki Satanasi strana hem bunindže pe protiv o Jehova (1. Moj. 3:1-6). Dži živindže ko edensko vrt hine ljen but prilike te barjačeren po mangipe premalo Jehova. Ama, ked o Satana iskušindža ljen, tegani mothodža pe so na manglje e Jehova celone viljeja. Odoljese pojavindža pe pana jekh pučibe: Da li dijekh manuš ka ačhol verno e Jehovase sose mangela lje? Avere lafenca, da li o manuša šaj te oven besprekorna anglo Devel? Odova pučibe ulo but važno ko e Joveso vreme.

7. (a) Premalo lafija kotar Jov 1:8-11, sar dikhlja o Jehova ko Jov odoljese so hine besprekorno? (b) So vačerdža o Satana ando Jov?

⁷ O Jov živindža ko vreme ked o Izraelcija hine ko Egipat. Nijekh manuš ko odova vreme na hine adžahar besprekorno anglo Jehova sar o Jov. Sar amen, hem ov hine nesavršeno hem čerdža greške. Ama, o Jehova manglja lje sose hine besprekorno. Verovatno o Satana već angljeder mardža muj e Jehovase odoljeja so vačerdža so o manuša na ka ačhon ljese verna. Odoljese o Jehova vačerdža e Satanase te dikhel e Jove. Akava manuš pe dživdipaja mothodža so o Satana tano hovavno! O Satana rodindža te iskušini e Jove. O Jehova muklja lje te čerel odova, sose hine lje poverenje upro poklo amal o Jov. (Čitinen Jov 1:8-11.)

8. Sar o Satana napadindža e Jove?

⁸ O Satana tano grubo hem mudari. Ov ljelja e Jovestar sa so hine lje, mudardža oljese slugen hem rumindža oljeso ugled anglo avera. Ov napadindža oljese porodica adžahar so mudardža sa oljese dešen  čhaven. Palo odova čerdža lje te ovel nabormo, adžahar so ko celo telo hine lje čirija kola but dukhana. E Jovesi romni hine la bari dukh ano vilo hem odoljese vačerdža ljese te vazdel pe vasta ando sa, te del arman e Devlje hem te merel. Kokri o Jov manglja te merel, ama hem ponodri ačhilo besprekorno. Tegani o Satana probindža ko aver način te napadini lje. Ov koristindža e Jovese trinen amaljen. On dželje ko Jov hem divenca ačhilje koro oljeste. Ama, hič na utešindže lje, nego napadindže lje hem grubo kritikujindže lje. On vačerdže so o Devel kaznini lje hem so na cenini oljesi besprekornost. On čak vačerdže so o Jov tano lošno manuš kova zaslužini te ovel lje sa odola strašna buča! (Jov 1:13-22; 2:7-11; 15:4, 5; 22:3-6; 25:4-6).

9. Iako hine lje pharipa, so o Jov na manglja te čerel?

⁹ Sar reagujindža o Jov ko sa odola pharipa? Ov na hine savršeno manuš. Dži ukorindža pe hovavne utešiteljen hine but holjamo hem palo odova priznajindža so vačerdža disave buča bizo te razmislini. Ov pobuter branindža piklji pravednost, nego e Devljesi (Jov 6:3; 13:4, 5; 32:2; 34:5). Ama, čak ked hine oljese najpharo, o Jov na manglja te irini po dumo e Jehovase. Ov na verujindža ko hovajba kola oljese hovavne amala vačerdže. O Jov vačerdža: „Našti te zamislinav te phenav so tumen hijen pravedna! Sa dži na merava, na ka čhinavav te ovav besprekorno!“ (Jov 27:5). Akala lafija tane but važna amendže. Sose? Ako o Jov ačhilo besprekorno, tegani šaj hem amen te ačhova besprekorna.

10. Sar o lafija kola o Satana vačerdža protiv o Jov odnosinena pe hem upro amende?

¹⁰ O lafija kola o Satana vačerdža protiv o Jov odnosinena pe hem upro amende. Sar? O Satana vačeri so tu na mangeja čače e Jehova, so ka čhinave te služine oljese samo te šaj te spasine tut hem so na ka ačhove besprekorno! (Jov 2:4, 5; Puč. 12:10). Sar osetineja tut ked šuneja odola lafija? Sigurno but dukhavena tut. Ama, razmislin kotar akava: o Jehova mukela e Satanase te ispitini tiklji besprekornost. Ov isi lje but poverenje upro tute so šaj te ačhove besprekorno hem odoljeja te mothove so o Satana tano hovavno. Uzo odova, o Jehova dela lafi so ka pomožini tut (Jevr. 13:6). Čače tani bari čast o Vladari ando celo svemir te ovel lje asavko poverenje upro tute! Da li haljoveja sose tani odobor važno i besprekornost? I besprekornost pomožini amendže te mothova so e Satanase lafija tane hovajbe, te branina amare Dadeso nav ando odova so meljačeri lje hem te podržina oljeso način sar vladini. Sar šaj te ačhova besprekorna?

11. So šaj te sikljova ando Jov?

¹¹ Ko akala „poslednja dive“, o Satana sa pobuter napadini e Devljese slugen (2. Tim. 3:1). Iako živinaja ko odobor pharo vreme, sar šaj te ova pana poodlučna te ačhova besprekorna? Hem akaljestar šaj but te sikljova ando Jov. Pana angljeder so počmindže oljese pharipa, o Jov but puča mothodža soj tano besprekorno anglo Jehova. Te dikha trin buča kola sikljovaja ando oljeso primer.

12. (a) Premalo lafija kotar Jov 26:7, 8, 14, so pomožindža e Jovese te ovel oduševimo ando Jehova? (b) Sar šaj hem amen odova te čera?

¹² O Jov hine oduševimo sa odoljeja so stvorindža o Jehova hem odoljese oljeso mangipe premalo Devel barilo. O Jov odvindža vreme te razmislini ando šukar buča kola stvorindža o Devel. (Čitinen  Jov 26:7, 8, 14.) Hine oduševimo dži razmislindža andi Phuv, ando nebo, ando oblakija hem ando gromija. Ama, hine svesno so but hari džanela ando sa odova so stvorindža o Jehova. Isto adžahar, but cenindža e Devljese lafija. Odoljese vačerdža: „Oljese lafija hine maje but vredna“ (Jov 23:12). Ov hine oduševimo ando Jehova hem but poštujindža lje. O Jov manglja pe Dade soj tano ko nebo hem manglja te čerel lje bahtalo. Odoljese, o Jov hine sa poodlučno te ačhol besprekorno. Hem amen odova valjani te čera. Avdije amen džanaja but pobuter ando šuže buča so stvorindža o Jehova, nego o manuša so živindže ko e Joveso vreme. Isto adžahar, isi amen celo Biblija koja pomožini amendže šukar te pendžara e Jehova. Sa so sikljovaja šaj te čerel amen te ova but oduševime ando Jehova hem hor te poštujina lje. A odova ka podstaknini amen te manga lje, te šuna lje hem te ova pana poodlučna te ačhova besprekorna (Jov 28:28).

13-14. (a) Premalo lafija kotar Jov 31:1, sar o Jov mothodža soj tano poslušno e Jehovase? (b) Sar šaj te ova sar oljeste?

¹³ O Jov hine poslušno e Jehovase ko sa hem odova pomožindža lje te ačhol besprekorno. O Jov džandža so ako mangela te ačhol besprekorno valjani te ovel poslušno. U stvari, uvek ked hijam poslušna e Jehovase, odova čerela amen te ova pana poodlučna te ačhova besprekorna. O Jov dindža sa pestar te ovel poslušno e Jehovase svako dive. Na primer, pazindža sar ponašini pe e džuvljenca. (Čitinen Jov 31:1.) Sar ženimo manuš, ov džandža so nane šukar te ovel lje romantična osećanja premalo avera džuvlja. Avdije živinaja ko sveto kova pherela amari godi bučenca kola šaj te čhiven amen te čera nemoral. Da li hem amen isto sar o Jov hijam odlučna te na mothova neprikladno pažnja džikase kova nane amaro rom ja romni? Isto adžahar, da li ka odbina te dikha nepristojna ja pornografska slike kuri god arakhena pe? (Mat. 5:28). Ako svako dive  mothovaja asavki samokontrola, ka ova pana poodlučna te ačhova besprekorna.

¹⁴ O Jov isto adžahar hine poslušno e Jehovase ko odova sar dikhlja ko materijalna buča. Ov hine svesno so ako ovela lje poverenje ko materijalna buča, ka čerel ozbiljno greška koja zaslužini kazna (Jov 31:24, 25, 28). Avdije živinaja ko sveto kuri e manušendže o barvaljipe tano but važno. Ako isi amen ispravno stav premalo pare hem premalo materijalna buča, sar so podstakninena amen e biblijake načelija, tegani ka ova pana poodlučna te ačhova besprekorna (Godž. 30:8, 9; Mat. 6:19-21).

15. (a) So pana pomožindža e Jovese te ačhol besprekorno? (b) Sose tano šukar uvek te razmislina andi nagrada so obećindža amendže o Jehova?

¹⁵ O Jov ačhilo besprekorno sose hine sigurno so o Devel ka nagradini lje. Ov verujindža so e Devljese tani važno oljesi besprekornost (Jov 31:6). Iako hine lje but kušnje, o Jov hine uverimo so o Jehova ko krajo ka nagradini lje. Odova pomožindža lje te ačhol besprekorno. O Jehova hine but bahtalo so o Jov hine besprekorno. Odoljese pana tegani but nagradindža lje (Jov 42:12-17; Jak. 5:11). A ki budućnost, o Jov ka dobini pana pobare blagoslovija. Da li hijan sigurno so o Jehova ka nagradini tut sose hijan besprekorno? Amaro Devel na menini pe (Mal. 3:6). Ako uvek razmislinaja so o Jehova cenini odova so daja sa amendar te ačhova besprekorna, tegani amari nada so ka ovel amen pošuži budućnost hem ponodri ka ovel zoralji (1. Sol. 5:8, 9).

16. So valjani te ova odlučna te čera?

¹⁶ Ov odlučno uvek te ačhove besprekorno! Dijekh puti šaj ka misline so samo tu trudineja tut te ačhove besprekorno. Ama, ma bistri so na hijan kokri. Tuvaja tane milionja avera verna e Devljese sluge. Isto adžahar, hem tu ka ove maškaro but murša hem džuvlja kotar purano vreme kola ačhilje besprekorna, čak ked oljengo dživdipe hine ki opasnost (Jevr. 11:36-38; 12:1). Ov odlučno te ačhove besprekorno sar so hine o Jov, kova vačerdža: „Na ka čhinavav te ovav besprekorno!“ Nek amari besprekornost večno hvalini e Jehova!