1. So vačerdža o Jehova ando odova so ka ovel ko amaro vreme?

O JEHOVA vačerdža odolestar so ka ovel ko amaro vreme: „Deš manuša kotar sa o čhibja kola vačerena o narodija ka dolen jekhe Judejco kotar fistani hem ka phenen: ’Amen mangaja te dža tumencar, sose šundžam soj tano o Devel tumencar‘“(Zah. 8:23). Ko akava stiho o lafi „Judejco“ odnosini pe ko okola kas o Devel pomazindža pe sveto duhoja. On tane vičime hem „Izrael e Devleso“ (Gal. 6:16). O „deš manuša“ predstavinena okolen kola isi len nada so ka živinen večno ki phuv. On džanena so o Jehova birindža e pomazanikonen hem on tane bahtale so šaj te služinen e Jehovase zajedno olencar.

2. Sar o „deš manuša“ džana okolencar soj tane pomazime?

² Iako avdije našti te džana o nav ando svako pomazaniko ki phuv, * okola kola isi len nada te živinen večno ki phuv šaj te „džan“ okolencar soj tane pomazime. Sar odova? I Biblija phenela so o „deš manuša“ ka „dolen jekhe Judejco kotar fistani hem ka phenen: ’Amen mangaja te dža tumencar, sose šundžam soj tano o Devel tumencar.‘“ I Biblija akate vačeri ando jekh Judejco. Ama, o lafi „tumencar“ na odnosini pe ko jekh manuš nego ko but džene. Odova mothovi so akava Judejco na predstavini samo jekhe manuše nego predstavini i grupa ando pomazime  hrišćanja. Okola kola nane pomazime sveto duhoja služenena e Jehovase zajedno okolencar kola tane pomazime. O baro mnoštvo na dikhela upro pomazanikija sar upro vođe, sose on haljona so jedino o Isus tano olengo Vođa (Mat. 23:10).

3. Sostar ka vačera ko akava članko?

³ Sebepi so avdije o pomazanikija tane maškaro amende, šaj pučaja amen: (1) Sar o pomazanikija valjani te dikhen kokri pes? (2) Sar amen valjani te dikha upro okola so ljena o simbolija? (3) Da li valjani te brinina amen so o broj okolendar kola ljena o simbolija barjola? Ko akava članko ka dikha o odgovorija ko akala pučiba.

4. Kova upozorenje o pomazanikija šaj te arakhen ki 1. Korinćanima 11:27-29 hem sose valjani ozbiljno te razmislinen odolestar?

⁴ Sa o pomazanikija valjani ozbiljno te razmislinen ando upozorenje kova tano pisimo ki 1. Korinćanima 11:27-29. (Čitinen.) Sar šaj te neko te ljel o simbolija, a te na ovel „vredno odolese“? Odova šaj te ovel ako jekh pomazimo hrišćanin  ljela o maro hem o vino, a na šunela e Jehovase zakonja (Jevr. 6:4-6; 10:26-29). Ako o pomazanikija mangena te dobinen pikli „nagrada asi koja o nebesko Devel vičindža [len] prekalo Hrist Isus“, on valjani te ačhon verna (Fil. 3:13-16).

5. Sar valjani o pomazanikija te dikhen kokri pes?

⁵ E Jehovaso sveti duh pomožini olese slugendže te oven ponizna, a na ponosna manuša (Ef. 4:1-3; Kol. 3:10, 12). O pomazanikija na mislinena soj tane on pošukar averendar. On džanena so odova soj tane pomazime na značini so o Jehova dela len poklo sveti duh pobuter nego averendže. O pomazanikija na mislinena so on pošukar averendar haljona e Devleso Lafi. On niked na ka phenen nekase so hem ov tano pomazimo hem so valjani te ljel o simbolija ki Spomen-svečanost. On tane ponizna manuša kola priznajinena so samo o Jehova isi lje pravo te birini okolen so ka džan ko nebo.

6. Premali 1. Korinćanima 4:7, 8, sar valjani o pomazanikija te ponašinen pe?

⁶ Iako o pomazanikija ceninena o poziv kova dobindže, on na očekujinena averendar te ponašinen pe olencar ko posebno način (Fil. 2:2, 3). Isto adžahar, on džanena so ked o Jehova pomazindža len, ov pe duhoja odova mothovdža samo olendže, a na averendže. Odolese, okova soj tano pomazimo nane iznenadimo ked disave na verujinena olese soj tano pomazimo. Ov džanela so i Biblija phenela so na valjani sig te verujina ked neko phenela so o Devel dindža le disavi posebno odgovornost (Otkr. 2:2). Sebepi so jekh pomazaniko na mangela te ovel diso posebno anglo averenge jačha, ked upoznajini pe averencar ov na ka phenel soj tano ov pomazanik. Ov na ka hvalini pe odoleja anglo avera. (Čitinen 1. Korinćanima 4:7, 8.)

7. So o pomazanikija na valjani te čeren hem sose?

⁷ O pomazanikija na mislinena so valjani te družinen pe samo okolencar soj tane pomazime, sar da tane dijekh posebno grupa. On na rodena avere pomazanikonen te šaj te vačeren olencar ando poklo pomazanje, niti formirinena disave grupe te šaj zajedno te proučinen i Biblija (Gal. 1:15-17). Ked bi o pomazanikija čerena diso adžahar, ki skupština bi ovena bare podele. Ko asavko način, bi čerena protiv o sveti duh, kova pomožini e Devlese narodose te ovel ko mir hem ko jekhipe (Rimlj. 16:17, 18).

8. Sose valjani te pazina ko odova sar ponašinaja amen premalo okola so ljena o simbolija? (Dikh i fusnota).

⁸ Sar valjani te ponašina amen premalo phralja hem phenja kola tane pomazanikija? Nane ispravno te vazda jekhe manuše, čak iako ov tano jekh ando e Hristese pomazime phralja (Mat. 23:8-12). Ked i Biblija vačeri ando starešine, oj podstaknini amen te „oponašina olengi vera“, ama nigde koro late na pisini so jekh manuš valjani te ovel amaro vođa (Jevr. 13:7). Ki Biblija pisini so disavendže valjani te „mothova baro poštovanje“. Ama, on odova zaslužinena sose „predvodinena ko šukar način“ hem „trudinena pe te vačeren hem te sikaven e Devleso lafi“, a na sebepi soj tane pomazime (1. Tim. 5:17). Ako amen dikhaja upro pomazanikija sar da on tane diso posebno, ja ako but hvalinaja len, olendže šaj te ovel but neprijatno.  * Isto adžahar, na pomožinaja len te ačhon ponizna (Rimlj. 12:3). Sigurno niko amendar na bi mangela sebepi oleso neko ando e Hristese pomazime phralja te perel andi vera (Luka 17:2).

9. Sar šaj te mothova so poštujinaja e pomazano hrišćanen?

⁹ Sar šaj te mothova so poštujinaja okolen kas o Jehova pomazindža pe sveto duhoja? Adžahar so na ka puča len sar ulje pomazanikija. Odova tano diso maškaro lende hem o Jehova hem nane amaro odova te džana (1. Sol. 4:11; 2. Sol. 3:11). Odova so on tane pomazime na značini soj tane pomazime hem olenge roditeljija, olengo rom ja i romni, ja neko aver kotar olengi porodica. I nada te živini pe ko nebo na nasledini pe. Odija nada dobini pe kotar o Devel (1. Sol. 2:12). Odolese, šukar tano te pazina te na dukhava averen amare pučibencar. Na primer, na bi ovela šukar te puča jekha phenja sar osetini pe sebepi so olako rom tano pomazimo hem so oj ka živini ki phuv bizo oleste. Amen šaj te ova sigurna so ko nevo sveto o Jehova ka ispunini svakonese želje (Ps. 145:16).

10. Sose tano amare šukaripase ako na vazdaja e manušen?

¹⁰ Amare šukaripase tano ked na mislinaja so o pomazanikija tane považna hem pobare averendar. Sose phenaja odova? Sose i Biblija mothovi so disave pomazanikija šaj na ka ačhon verna (Mat. 25:10-12; 2. Petr. 2:20, 21). Ako na vazdaja e manušen, na ka pera ki zamka te sledina e manušen, bilo on te oven pomazanikija ja phralja kola tane but pendžarde ki amari organizacija ja kola but berša služinena e Jehovase (Jud. 16). Tegani, ako on ovena neverna ja mukhena i skupština, amen hem ponodri ka služina e Jehovase hem na ka našala amari vera.

11. Da li o broj ando okola so lena o simbolija ačhilo isto?

¹¹ Beršencar, o broj ando okola so lena o simbolija hine sa potikno. Ama, već nekobor berša odova broj barjola. Da li valjani te brinina amen sebepi odova? Na. Akana ka dikha sose na valjani te brinina amen.

12. Sose na valjani te brinina amen ako o broj ando okola so lena o simbolija barjola?

¹² „O Jehova džanela okolen soj tane olese“ (2. Tim. 2:19). O phralja kola brojinena  okolen so lena o simbolija ki Spomen-svečanost, na džanena koj tano čače pomazimo. Odova samo o Jehova džanela. Maškaro okola so lena o simbolija isi disave kola mislinena soj tane pomazanikija, ama nane. Disave kola počmindže te len o simbolija kasnije čhinavdže. Avera isi len mentalna ja emocionalna problemija hem odolese mislinena so on ka vladinen e Hristeja ko nebo. Jasno tano so amen na džanaja čače kobor pomazanikija ačhilje ki phuv.

13. Da li i Biblija phenela kobor pomazanikija ka oven ki phuv ked ka počmini i bari nevolja?

¹³ Ked o Isus ka avel te čedel e pomazanikonen te džan ko nebo, on ka oven ko but thana ki phuv (Mat. 24:31). I Biblija phenela so ko poslednja dive jekh tikno broj ando pomazanikija ka oven ki phuv (Otkr. 12:17). Ama, ki Biblija na pisini kobor olendar ka oven ki phuv ked ka počmini i bari nevolja.

14. Premalo Rimljanima 9:11, 16, so valjani te haljova ando odova sar birinena pe o pomazanikija?

¹⁴ O Jehova odlučini ked ka birini e pomazanikonen (Rimlj. 8:28-30). Palo odova so o Isus hine uskrsnimo, o Jehova počmindža te birini e pomazanikonen. Izgleda so ko prvo veko, sa o hrišćanja hine pomazanikija. Sar nakhlje o berša, but okolendar so phendže soj tane hrišćanja na živindže adžahar sar so o Isus sikavdža. Ama, čak hem tegani, o Jehova disaven pomazindža pe sveto duhoja sose on hine prava hrišćanja. Sar so o Isus vačerdža, on hine sar o dživ maškaro kukolj (Mat. 13:24-30). O Jehova hem ko poslednja dive nastavindža te birini  e manušen kola ka oven deo ando 144 000. * Odolese, ako o Devel odlučini te birini nekas hari angleder te avel o krajo, nane amaro te puča amen da li tani ispravno odija odluka. (Čitinen Rimljanima 9:11, 16.) * Valjani te pazina te na reagujina sar o radnikija andi e Isusesi priča. On žalindže pe sose olengo gospodari dindža isto plata hem olendže hem okolendže kola alje ko krajo te čeren buti (Mat. 20:8-15).

15. Objasnin da li tane sa o pomazanikija „o verno hem o razborito robo“, kastar vačeri pe ko Matej 24:45-47.

¹⁵ Nane sa o pomazanikija „o verno hem o razborito robo“. (Čitinen Matej 24:45-47.) Sar hem ko prvo veko, o Jehova hem o Isus avdije prekali jekh tikni grupa ando phralja parvarena ja sikavena bute manušen. Ko prvo veko, samo nekobor hrišćanja kola hine pomazime pisindže o Grčko deo andi Biblija. Avdije, samo nekobor pomazime hrišćanja isi len odgovornost te den i „hrana ko pravo vreme“ e Devlese narodose.

16. So sikljiljan ando akava članko?

¹⁶ So sikljiljam ando akava članko? O Jehova odlučindža te del o večno dživdipe ki phuv bute manušendže. Isto adžahar, ov odlučindža te del o dživdipe ko nebo disavendže kola ka vladinen e Isuseja. Sa e Jehovase sluge, hem o „Judejco“ hem o „deš manuša“, ka dobinen pikli nagrada. Ama, solduj grupe valjani te šunen ista zakonja, te oven verna hem te oven ponizna. Isto adžahar, valjani te služinen lese hem te oven ko jekhipe. Sare valjani te trudinen pe te oven ko mir pekle phraljencar hem e phenjencar ki skupština. Sar o krajo akale svetoso avela sa popaše, hem ponodri služin e Jehovase hem sledin e Hriste sar deo ando „jekh stado“ (Jov. 10:16).