1-2. Kole problemencar borinena pe but phralja hem phenja?

O APOSTOL Pavle podstakninđa e Timoteje te del poklo najšukar ki služba (2. Tim. 4:5). Sare amen šunaja e Pavleso savet hem daja amaro najšukar ki služba, ama odova nane uvek lokho. Bute amare phraljenđe hem phenjenđe valjani hrabrost te šaj te propovedinen (2. Tim. 4:2). Na primer, razmislin ando phralja kola živinena ko phuvja kaj tane amare aktivnostija ograničime ja amaro delo tano zabranimo. On đana ki služba, iako šaj te oven phanle.

² E Jehovase sluge isi len razna problemija hem odova šaj te lel olengi snaga. Na primer, but phralja hem phenja valjani te ćeren but buti te šaj te obezbedinen o osnovna buća pe porodicaće. On bi mangena te đan pobuter ki služba, ama ko krajo ando kurko nane len snaga. Avera tane but naborme, phure ja čak našti te ikljon ando ćher hem odolese šaj te ćeren but hari ki služba. A disave uvek mislinena so nane vredna anglo e Jehovase jaćha. Amari phen koja vićini pe Meri *, koja živini ko Blisko istok, phenela: „But trudinava man te kontrolišinav me negativna emocije, a odova lela mi snaga. Palo odova, osetinava man krivo sose odova lela mo vreme hem mi snaga asi služba.“

3. So ka dikha ko akava članko?

³ Bizo obzir save problemija isi amen, o Jehova šaj te del amen snaga te borina amen hem nastavina te služina lese najšukar so šaj. Angleder so ka dikha sar o Jehova šaj te pomožini amen, ka dikha sar ov dinđa snaga e Pavlese hem  e Timotejese te ćeren pi služba iako hine len pharipa.

4. Save problemija hine le o Pavle?

⁴ O Pavle hine le but problemija. Posebno valjanđa lese e Jehovasi pomoć ked olese neprijateljija marđe le, ćhivđe le ko phanlipe hem manglje le mudaren le (2. Kor. 11:23-25). Ov na lađandilo te phenel so disavo puti valjanđa te borini pe odoleja soj tano obeshrabrimo (Rimlj. 7:18, 19, 24). Isto ađahar, ov hine le problemi pe sastipaja kova hine lese sar „karo ano telo“ hem molinđa e Devle te cidel lestar odova (2. Kor. 12:7, 8).

5. So ćerđa o Pavle iako hine le pharipa?

⁵ O Jehova dinđa snaga e Pavlese hem ponodri te ćerel pi služba, iako hine le but pharipa. Te dikha so ćerđa o Pavle. Na primer, đi hine ko phanlipe ko jekh ćher ko Rim, ov revno propovedinđa i šukar vest ked bi legarena le anglo okola kola hine ki vlast. (Dela 28:17; Fil. 4:21, 22). Isto ađahar, propovedinđa butenđe andi pretorijansko garda hem sarineneđe kola alje te posetinen le (Dela 28:30, 31; Fil. 1:13). Baš ko odova vreme, o Devel koristinđa e Pavle te pisini o poslanice kola but pomožinena hem amenđe avdije. Uzo odova, e Pavleso primer zorjaćerđa e skupština ko Rim hem odolese o phralja „pana pohrabro, bizi dar“ vaćerđe ando e Devleso lafi (Fil. 1:14). Iako o Pavle disavo puti naštinđa te ćerel sa so manglja, ov uvek dinđa poklo najšukar hem „anđa đi odova te širini pe i šukar vest“ (Fil. 1:12).

6. Premali 2. Korinćanima 12:9, 10, so pomožinđa e Pavlese te ćerel pi služba?

⁶ O Pavle hine svesno so sa so ćerđa ki e Jehovasi služba na ćerđa pe snagaja, nego e Devlese snagaja. Ov phenđa so e Devlesi sila „potpuno mothovđa pe ked hine slabo.“ (Čitin 2. Korinćanima 12:9, 10.) O Jehova prekalo po sveti duh dinđa e Pavlese snaga te ćerel potpuno pi služba, iako hine progonimo, ko phanlipe hem hine le avera problemija kolencar borinđa pe.

7. Kole problemencar o Timotej valjanđa te borini pe te šaj potpuno te ćerel pi služba?

⁷ O Timotej, e Pavleso terno saradniko, isto ađahar uzdajinđa pe ko odova so o Jehova šaj te del le snaga te ćerel pi služba.  Ov hine e Pavleja ko misionarska putovanja. Uzo odova, o Pavle bićhalđa le te posetini hem te ohrabrini e skupštinen (1. Kor. 4:17). O Timotej šaj mislinđa so nane sposobno aso odova zadatko. Odolese šaj o Pavle phenđa lese: „Nijekh manuš ma te mislini so na hijan vredno odolese so hijan terno“ (1. Tim. 4:12). Ko odova vreme, o Timotej hine le hem po problemi. Ov hine „često nabormo“ (1. Tim. 5:23). Ama, đanđa so e Jehovaso sveti duh šaj te del le snaga koja valjanđa lese te propovedini i šukar vest hem te služini pe phralenđe (2. Tim. 1:7).

8. Sar o Jehova avdije zorjaćeri pe slugen?

⁸ Avdije, o Jehova dela pe slugenđe „but bari snaga“ te šaj hem ponodri verno te služinen lese (2. Kor. 4:7). Te dikha prekalo kola štar buća o Jehova zorjaćeri amen hem pomožini amenđe te aćhova lese verna. Odola tane i molitva, i Biblija, o phralja hem o phenja hem i služba.

9. Sar šaj i molitva te pomožini amen?

⁹ I molitva dela amen snaga. Ko Efešanima 6:18 o Pavle phenđa te molina amen e Devlese „ki svako prilika.“ Ov ka odgovorini ko amare molitve ađahar so ka zorjaćeri amen. O Džoni, kova živini ki Bolivija, osetinđa sar o Jehova pomožinđa lese ked hine ko bare problemija. Olesi romni hem olese roditeljija ko isto vreme hine but naborme. E Džonese hine but pharo te brinini pe olendar. Olesi daj muli, a olese romnjaće hem olese dadese valjanđa but vreme te oporavinen pe. Ked razmislini ando odova vreme, o Džoni phenela: „Ked hine maje najpharo, molinđum man e Jehovase hem objasninđum lese sar osetinava man. Odova but pomožinđa man.“ O Jehova dinđa le snaga koja valjanđa lese te istrajini. O Ronald, jekh starešina andi Bolivija, saznajinđa so olesi daj isi la rak. Jekh masek palo odova, oj mulji. So pomožinđa lese ko akava pharo vreme? Ov phenela: „Ked molinava man e Jehovase, phravava lese mo vilo hem phenava lese sar osetinava man. Ðanava so ov najšukar haljola man, čak pošukar nego so me kokri man haljovava.“ Disavo puti, šaj mislinaja so našti te istrajina ko amare problemija hem so na đanaja aso so te molina amen. Ama, o Jehova phenela amenđe te molina amen lese čak hem ako tano amenđe pharo te objasnina lese sar osetinaja amen (Rimlj. 8:26, 27).

10. Premalo Jevrejima 4:12, sose tano odobor važno te čitina i Biblija hem hor te razmislina ando odova so čitinđam?

¹⁰ I Biblija dela amen snaga. O Pavle čitinđa o spisija te šaj te dobini snaga hem uteha. Odova valjani hem amen te ćera (Rimlj. 15:4). Ði čitinaja e Devleso Lafi hem hor razmislinaja ando odova so čitinaja, o Jehova prekalo po sveti duh pomožini amen pošukar te haljova sar šaj odova te primenina. (Čitin Jevrejima 4:12.) O Ronald phenela: „Hijum but bahtalo so isi man navika svako rat te čitinav i Biblija. Hor razmislinava ando e Jehovase osobine hem sar ov brininđa pe ando po narodo. Odova dela man snaga.“

11. Sar i Biblija dinđa snaga jekha phenjaće koja hine la bari dukh?

¹¹ Ked hor razmislinaja ando e Devleso Lafi odova pomožini amen te ovel amen ispravno stav premalo amare problemija. Te dikha sar i Biblija pomožinđa jekha phenjaće koja hine la bari dukh sebepi so našalđa  pe rome. Jekh starešina phenđa laće so ki Knjiga ando Jov ka arakhi but šukar buća kola ka pomožinen laće. Ði čitinđa la, ki početka oj kritikujinđa e Jove sebepi so hine le pogrešno razmišljanje. Ki pi godi, oj phenđa: „Jov! Ma ov odobor negativno!“ Ama, palo odova haljilji so hem oj razmislinđa sar o Jov. Odova pomožinđa laće te menjini po način sar dikhela ki pi situacija hem dinđa la snaga te borini pe odoleja so našalđa pe rome.

12. Sar o Jehova zorjaćeri amen prekalo amare phralja hem phenja?

¹² Amare phralja hem phenja dena amen snaga. Pana jekh način sar o Jehova pomožini amenđe tano prekalo amare phralja hem phenja. O apostol Pavle jedva ađićerđa te ohrabrini pe pekle phraljencar hem phenjencar (Rimlj. 1:11, 12). I Meri, kolatar angleder vaćerđam, volini te ovel pe phraljencar hem pe phenjecar. Oj phenela: „O Jehova pomožinđa man prekalo phenja hem phralja kola na đanđe ništa ando mo problemi. Disavo puti on bi phenena ja pisinena diso so hine baš odova so valjanđa manđe. Isto ađahar, but pomožini man ked vaćerava avere phenjencar kola isi len slična problemija hem ked dikhava so olenđe pomožini. O starešine but putija phenena maje so sare ki skupština but mangena man.“

13. Sar šaj te zorjaćera jekh jekhe ko sastankija?

¹³ Amare sastankija tane but šukar prilika kuri šaj te ohrabrina jekh jekhe. Ked aveja ko sastankija, šaj te zorjaćere averen ađahar so ka phene lenđe so mangeja len hem so cenineja odova so ćerena. Na primer, angleder so počminđa o sastanak, jekh starešina kova vićini pe Petar, alo ki jekh phen kaso rom nane ko ćaćipe hem phenđa laće: „But hijam ohrabrime ked dikhaja tut ki dvorana. Tu redovno aveja te šove ćhavencar hem on uvek tane šukar uravde, čista hem uvek isi len pripremime komentarija.“ Olake jaćha pherdile asvencar hem phenđa: „Našti te zamisline kobor značini maje so akava šunava baš avdije.“

14. Sar i služba pomožini amen?

¹⁴ I služba dela amen snaga. Ked đaja ki služba, bizo obzir da li o manuša šunena ja na, amen hijam bahtale (Posl. 11:25). Jekh amari phen koja vićini pe Stejsi ki pi koža osetinđa kobor i služba šaj te zorajćeri. Ked jekh član andi olaki porodica hine isključimo, olaće hine but pharo hem uvek pućlja pe: „Da li šajinđum te ćerav diso pobuter te pomožinav lese?“ Hine laće but pharo te na mislini ando odova problemi. So pomožinđa laće te osetini pe pošukar? I služba, sose tegani razmislinđa sar šaj te pomožini e manušenđe. Oj phenela: „Ko odova vreme, o Jehova pomožinđa maje te arakhav jekha osoba koja sigate napredujinđa. Odova but zorjaćerđa man. I služba hine jekh buti koja but pomožinđa man.“

15. So šaj te sikljova ando odova so phenđa i Meri?

¹⁵ Disave šaj mislinena so sebepi pe okolnostija našti te ćeren odobor but ki služba. Ako hem tu osetineja tut ađahar, ma bistri so o Jehova tano zadovoljno ked deja toklo najšukar. Razmislin pana jekh puti andi Meri. Ked preselinđa pe ko područje kaj vaćeri pe aver ćhib, oj mislinđa so nane odobor korisno. Oj phenela: „Jekh vreme, sa so šajinđum te ćerav hine te dav jekh jednostavno komentari, te čitinav jekh stih ja te dav disavo traktati ki služba.“ Oj mislinđa so olaki služba nane vredno, sose uporedinđa pe okolencar kola šukar vaćerena odija ćhib. Ama, oj menjinđa po način sar  razmislini. Oj haljilji so o Jehova šaj te koristini la, iako na vaćeri šukar odija ćhib. Oj phenela: „Odova so i Biblija sikavi tano jednostavno hem odova menjini e manušengo životi.“

16. So šaj te zorjaćeri okolen kola našti te ikljon ando ćher?

¹⁶ O Jehova dikhela so disave amendar isi len želja te propovedinen, ama našti te ikljon ando ćher. Odolese o Jehova pomožini lenđe te propovedinen okolenđe kola brininena pe olendar ja e doktorenđe hem e medicinsko sestrenđe. Ako uporedinaja odova so ćerđam angleder odoleja so ćeraja akana, odova šaj te obeshrabrini amen. Ama, ako haljovaja sar o Jehova pomožini amenđe akana, odova šaj te zorajćeri amen hem te pomožini amenđe te istrajina ko amare problemija hem te ovel amen radost.

17. Premalo Propovednik 11:6, sose valjani te istrajina ki amari služba iako na dikhaja odmah o rezultatija?

¹⁷ Amen na đanaja kuri o seme ando ćaćipe kova sadinđam ka astari koreno hem ka barjol. (Čitin Propovednik 11:6.) Na primer, amari phen i Barbara, koja isi la pobuter ando 80 berš, redovno svedočini prekalo telefoni hem pisini lila. Ko jekh lil, oj ćhivđa o časopis Stražarska kula ando 1. mart 2014. berš, kuri hine o članko „Šta je Bog učinio za nas?“ Oj ni na đanđa so odova lil bićhalđa aso jekh bračno par kova hine isključimo. Odova par but putija čitinđa odova časopis. O rom osetinđa samći o Jehova direktno vaćeri oleja. On počminđe te aven ko sastankija hem palo pobuter ando 27 berš, palem počminđe te služinen e Jehovase. Zamislin samo kobor ohrabrinđa hem zorjaćerđa e Barbara ked dikhlja o rezultatija ando samo jekh lil kova bićhalđa!

18. So šaj te ćera te šaj o Devel te del amen snaga?

¹⁸ O Jehova dela amen but buća kola šaj te den amen snaga, sar soj tane i molitva, i Biblija, amare phralja hem phenja hem i služba. Ked koristinaja akala buća, amen mothovaja so ov šaj te pomožini amen hem so mangela te ćerel odova. Odolese, valjani te ovel amen pouzdanje upro amaro nebesko Dad kova „mothovi pi snaga hem te bi zaštitini okolen kola tane celone vileja verna olese“ (2. Let. 16:9).