1-2. Premali 1. Petrova 4:7, 8, so ka pomožini amen te izdržina o pharipa?

SAR o krajo ando „poslednja dive“ tano sa popaše, amen ka ovel amen sa pobare problemija (2. Tim. 3:1). Na primer, palo izborija ki jekh phuv, ki zapadno Afrika, hine protestija hem nasilje. Prekalo šov masek, amare phraljendže hem e phenjendže hine but pharo sebepi i situacija koja hine odothe. So pomožindža ljen te izdržinen akala pharipa? Disave phralja hem phenja kola živindže ko bezbedna thana phravdže peklje udara odolje phraljendže hem phenjendže. Jekh phral phendža: „Ki asavki situacija, me hijum lje bahtalo sose hijum lje meklje amaljencar. Šajindžam te ohrabrina jekh jekhe.“

² Ked i „bari nevolja“ ka počmini, ka ova bahtalje ako ka ovel amen šukar amala kola mangena amen (Otkr. 7:14). Odoljese, akana tano važno te zorjačera amaro amaljipe amare phraljencar. (Čitinen 1. Petrova 4:7, 8.) Amen šaj but te sikljova ando Jeremija. Hari angljeder te ovel uništimo o Jerusalim, oljese paše amala pomožindže lje te ačhol dživdo. * Sar šaj te oponašina e Jeremija?

3. (a) So šaj hine te čhivel e Jeremija te cidel pe ando manuša? (b) Sostar o Jeremija vačerdža e Varuheja, hem dži soste odova andža?

³ Najhari 40 berš, o Jeremija živindža maškaro neverna manuša. Disave oljendar hine oljese komšije ja šaj hine oljese rođakija andi oljesi diz Anatot (Jer. 11:21; 12:6). Ama,  ov na cidindža pe ando manuša sebepi odova. Ov vačerdža peklje verno pisarese, e Varuhese sar osetini pe. Hem amen avdije džanaja sar osetindža pe sose oljese osećanja tane pisime ki Biblija (Jer. 8:21; 9:1; 20:14-18; 45:1). Dži o Varuh pisindža sa so desindža pe e Jeremijase, tegani solduj sikljilje te mangen hem te poštujinen pobuter jekh jekhe (Jer. 20:1, 2; 26:7-11).

4. So o Jehova phendža e Jeremijase te čerel? Sar akava zadatko zorjačerdža o amaljipe maškaro Jeremija hem o Varuh?

⁴ Beršencar, o Jeremija hrabro upozorindža e Izraelcen so ka ovel e Jerusalimeja (Jer. 25:3). O Jehova manglja o manuša te pokajinen pe. Odoljese phendža e Jeremijase te pisini ko svitak sa o upozorenja kola Ov dindža ljen sa akala berša (Jer. 36:1-4). Ked o Jeremija hem o Varuh zajedno čerdže ko zadatko kova dindža ljen o Devel, a kova šaj trajindža nekobor masekija, on sigurno vačerdže ando buča kola zorjačerdže oljengi vera.

5. Sar o Varuh mothovdža soj tano šukar amal e Jeremijase?

⁵ Ked alo o vreme te vačeri pe odova so hine pisimo ko svitko, o Jeremija morandilo te oslonini pe upro po amal o Varuh, so ov ka vačeri e manušendže e Jehovase lafija (Jer. 36:5, 6). O Varuh hrabro ispunindža odova opasno zadatko. O Jeremija sigurno hine but ponosno ked o Varuh dželo ko hram hem čitindža o lafija ando svitko e manušendže (Jer. 36:8-10). O knezija andi Juda šundže so o Varuh čerdža hem rodindže oljestar te čitini ljendže o svitko ko glaso (Jer. 36:14, 15). O knezija odlučindže te phenen e kraljese, e Joakimese, so o Jeremija phendža. On brinindže pe e Varuhese hem odoljese phendže ljese: „Dža, hem tu hem o Jeremija, garaven tumen niko te na džanel kaj hijen!“ (Jer. 36:16-19). Odova hine šukar savet.

6. So o Jeremija hem o Varuh čerdže ked hine ljen protivljenje?

 ⁶ O kralj Joakim hine holjamo ked šundža o lafija kola phendža o Jeremija. Odoljese ov thardža o svitko hem naredindža te phanen e Jeremija hem e Varuhe. Ama, o Jeremija na darandilo. Ov ljelja jekh aver svitak, dindža lje e Varuhese hem ked o Jeremija phendža ljese e Jehovasi poruka, o Varuh pisindža „sa o lafija ando svitko kova o Joakim, o kralj andi Juda, thardža ki jag“ (Jer. 36:26-28, 32).

7. So ulo dži o Varuh hem o Jeremija čerdže o nevo svitko?

⁷ O manuša kola zajedno nakhena disavo pharipe, često palo odova ovena paše amala. Ked o lošno kralj Joakim uništindža o svitko, šaj samo te zamislina kobor buti hine ljen o Jeremija hem o Varuh te šaj te čeren nevo svitko. Dži čerdže odova, o Jeremija hem o Varuh pana pošukar pendžardže jekh jekhe hem ulje pana popaše amala. Kobor šukar primer mothovdže amendže akala duj verna manuša!

8. (a) Sose šaj te ovel pharo te ova nekasa paše amala? (b) Sose valjani te trudina amen te zorjačera amaro amaljipe averencar?

⁸ Šaj te ovel pharo te vačera averendže sar osetinaja amen ako angljeder neko uvredindža amen (Posl. 18:19, 24). Ja šaj mislinaja so nane amen vreme ja snaga te ova paše amala nekasa. Ama, na valjani te mislina so odova našti te ovel. Ako mangaja amare phralja te pomožinen amen ked nakhaja disavo pharipe, amen akana valjani te zorjačera amaro amaljipe oljencar. Jekh način sar šaj te čera odova, tano te vačera ljendže sostar razmislinaja hem sar osetinaja amen (1. Petr. 1:22).

9. (a) Sar o Isus mothovdža so isi lje poverenje ko pe amala? (b) Sar odova so phravde vačereja averencar ka pomožini tut te ovel tut paše amala? Vačer jekh primer.

⁹ O Isus mothovdža so isi lje poverenje ko pe amala adžahar so phravde vačerdža oljencar (Jov. 15:15). Amen šaj te oponašina lje ked vačeraja averendže ando buča kola čerena amen te ova bahtalje, zabrinime ja razočarime. Odoljese, šun pažljivo ked neko vačeri tuvaja hem tegani šaj ka dikhe so isi tumen but slična razmišljanja, osećanja ja ciljija. Hajde te dikha o primer andi amari phen, i Sindi. Oj isi la 29 berš hem ulji amaljin jekha pionirkaja koja vičini pe Meri-Luis, koja isi la 67 berš. I Sindi hem i Meri-Luis, svako četvrtak sabalje džana zajedno ki služba hem on phravde vačerena jekh jekhaja ando razna buča. I  Sindi phenela: „Me uživinava te vačerav ando važna buča me amaljencar, sose odova pomožini man te pendžarav ljen hem te haljovav ljen pošukar.“ O amaljipe ovela pozoralo ked phravde vačeraja jekh jekheja. Ako hem tu sar i Sindi, phravde vačereja averencar ando teklje razmišljanja hem osećanja, to amaljipe oljencar verovatno ka ovel pozoralo (Posl. 27:9).

10. Premalo Poslovice 27:17, kola šukar buča šaj te oven ked džaja ki služba amare phraljencar hem phenjencar?

¹⁰ Sar so vačerdžam, o Jeremija hem o Varuh ulje but paše amala dži zajedno čerdže i buti koja o Jehova dindža ljen. Isto adžahar, ked amen džaja ki služba amare phraljencar hem phenjencar, tegani šaj te dikha oljenge šukar osobine, te sikljova oljendar hem te ova oljencar popaše. (Čitinen Poslovice 27:17.) Na primer, sar osetineja tut ked hijan ki služba hem šuneja sar to amal hrabro branini pi vera ja kotar vilo vačeri ando Jehova hem ando odova ko so verujini? Tegani tu ka ove pana popaše oljeja.

11-12. Vačer jekh primer sar šaj amaro amaljipe te ovel pana pozoralo ked propovedinaja amare amaljencar.

¹¹ Hajde te dikha duj iskustvija kola mothovena amendže sar i služba pomožini amen te manga pobuter jekh jekhe. I Adelajn, koja isi la 23 berš, pučlja jekha pe amaljinja, koja vičini pe Kendis, te džan te propovedinen ko područje kova na čerdža pe but putija. Oj phendža: „Amen mangljam pobuter te dža hem te uživina ki služba. Hem olače hem maje valjandža ohrabrenje te šaj hem pana ponodri te da e Jehovase amaro najšukar.“ Sar koristindža ljendže odova so zajedno propovedindže? I Adelajn phenela: „Ko krajo ando svako dive amen vačerdžam sar osetindžam amen, kola šukar razgovorija hine amen ki služba hem sar osetindžam so o Jehova vodini amen ki amari služba. Amen o solduj uživindžam dži vačerdžam odoljestar hem adžahar pana pošukar pendžardžam jekh jekha.“

 ¹² I Lejla hem i Merijen, duj phenja andi Francuska, dželje te propovedinen pandž kurče ko Bangi, ki glavno diz andi Centralnoafričko Republika. I Lejla phenela: „I Merijen hem me nakhljam disave pharipa. Ama, sebepi so phravde vačerdžam hem so mangljam jekh jekha, amaro amaljipe ulo pana pozoralo. Me dikhljum sar i Merijen tani spremno te prilagodini pe ko neve okolnostija, kobor mangela e manušen hem kobor tani revno ki služba. Odoljese, poštujindžum la pana pobuter.“ Na valjani te dža ki aver phuv te šaj te ovel tut asavke blagoslovija. Svako puti ked džaja ki služba e phraljencar hem e phenjencar kotar tiklji skupština, isi tut prilika te pendžare ljen pošukar hem te zorjačere to amaljipe oljencar.

13. So šaj te ovel ked paše sarađujinaja amare amaljencar?

¹³ Ked paše sarađujinaja amare amaljencar, amen dikhaja oljenge šukar osobine, ama isto adžahar hem oljenge greške. So šaj te pomožini amen te ačhova paše amare amaljencar, iako čerena greške? Hajde paljem te dikha so šaj te sikljova ando Jeremija. So pomožindža ljese te dikhel ko pe amaljenge šukar osobine hem te oprostini oljenge greške?

14. So o Jeremija sikljilo ando Jehova hem sar odova pomožindža lje?

¹⁴ O Jehova dindža e Jeremijase te pisini i knjiga koja akhari oljeso nav hem verovatno ov pisindža o knjige 1. hem 2. Kraljevima. Odova zadatko pomožindža ljese te dikhel kobor tano baro e Jehovaso milosrđe premalo nesavršena manuša. Na primer, o Jeremija džandža so ked o kralj Ahav pokajindža pe sebepi o lošna buča kola čerdža, o Jehova phendža so ov na ka dikhel i nevolja koja ka avel upro ljeso čher (1. Kralj. 21:27-29). Isto adžahar, o Jeremija džandža so o Manasija grešindža e Jehovase pobuter ando Ahav. Ama, o Jehova oprostindža e Manasijase sose pokajindža pe (2. Kralj. 21:16, 17; 2. Let. 33:10-13). Akala primerija sigurno pomožindže e Jeremijase hem ov te ovel strpljivo sar o Jehova hem te mothovi milosrđe premalo peklje paše amala (Ps. 103:8, 9).

15. Sar o Jeremija oponašindža e Jehovaso strpljenje ked avera buča e Varuhese ulje považna ando oljeso zadatko?

¹⁵ Hajde te dikha sar o Jeremija pomožindža e Varuhese ked jekh vreme avera buča hine ljese považna ando oljeso zadatko. O Jeremija na vazdindža sigate pe vasta ando Varuh, niti mislindža so ov našti te menjini pe. Ov pomožindža lje adžahar so vačerdža ljese e Devljeso ljubazno, ama direktno savet (Jer. 45:1-5). So sikljovaja akaljestar?

16. Premalo Poslovice 17:9, so valjani te čera te šaj te ačhova amala averencar?

¹⁶ Amen našti te očekujina ando amare phralja hem phenja te oven savršena. Odoljese, ked uljam nekasa amala, valjani but te trudina amen odova amaljipe te ačhol. Ako amare amala grešinena, amen šaj ka valjani te da ljen ljubazno, ama direktno savet ando e Devljeso Lafi (Ps. 141:5). Hem ako on povredinena amen, valjani te oprostina ljendže. Ked jekh puti oprostindžam ljendže, na valjani te vačera ando odova sar povredindže amen, ni oljencar ni averencar. (Čitinen Poslovice 17:9.) But tano važno ko akala phare dive te dikha oljenge šukar osobine, a na oljenge greške. Ako čeraja adžahar, ka zorjačera amaro amaljipe oljencar. Odova tano but važno akana te čera sose ki bari nevolja ka valjanen amendže paše amala.

17. Sose šaj te phena so o Jeremija hine pravo amal ko pharipa?

¹⁷ E Jeremijase delija mothovdže soj tano ov pravo amal ko pharipa. Na primer, jekh puti, o Avdemeleh, kova hine službenik ko dvor, ikaldža e Jeremija andi hor jama ki koja hine but čik. Palo odova, o Avdemeleh darandilo so o knezija sebepi odova ka povredinen lje. Ked o Jeremija šundža odova, ov na mukhlja pe amalje te borini pe kokri. Iako o Jeremija hine ko phanljipe, ov čerdža sa so šaj te ohrabrini pe amalje, e Avdemelehe, adžahar so phendža ljese e Jehovase utešna lafija (Jer. 38:7-13; 39:15-18).

18. Premalo Poslovice 17:17, so šaj te čera ked amare amaljese tano but pharo?

¹⁸ Avdije, amare phralja hem phenja isi ljen razna pharipa. Na primer, but oljendar doživindže zemljotresija, poplave ja mariba. Ked odova desini pe, disave amendar šaj te vičinen akalje phraljen hem phenjen te bešen amencar ko amaro čher. Avera šaj te pomožinen ljen finansijski. Ama, sare amen šaj te molina amen e Jehovase te pomožini amare phraljen hem phenjen. Šaj tane obeshrabrime hem tegani amen na džanaja so te vačera ja so te čera. Ama, sarine amendar šaj te pomožinen. Na primer, amare amaljendže šaj te da amaro vreme. Šaj te ova saosećajna dži šunaja ljen. Isto adžahar, šaj te vačera ljendže kova stih amen utešini (Is. 50:4). Ma bistri, te amaljendže tano najvažno te ove oljencar ked tano ljendže but pharo. (Čitinen Poslovice 17:17.)

19. Sar odova so akana zorjačeraja amaro amaljipe ka pomožini amen ki budućnost?

¹⁹ Akana valjani te da sa amendar te zorjačera amaro amaljipe amare phraljencar hem phenjencar. Sose? Odoljese so amare dušmanja ka probinen te odvojinen amen adžahar so ka koristinen razna hovajba. Oljengo cilj ka ovel amen te na verujina amare phraljendže hem te na podržina ljen. Ama, on na ka uspinen. On našti te čhinaven amen te manga amare phraljen. Ništa so on čerena na ka rumini amaro amaljipe kova isi amen. Amaro amaljipe na ka trajini dži o krajo ando akava sveto nego ka trajini večno!