1-2. Sose tano šukar te mothova verno mangipe jekh jekhese?

SOSE tano šukar te mothova verno mangipe jekh jekhese? Ko odova pućibe ka odgovorinen amenđe o lafija ando Poslovice. Odothe pisini: „Niked ma ćhinav te mothove mangipe hem vernost... Tegani hem o Devel hem o manuša ka mangen tut hem ka ove penđarutno sar razborito manuš“... „O šukar manuš ćerela šukaripe kokri pese“... „Ko god dela sa pestar te ćerel odova soj tano šukar hem te mothovi verno mangipe... ov ka dobini večno životi“ (Posl. 3:3, 4; 11:17, fusn.; 21:21).

² Ando akala lafija dikhaja trin razlogija sose valjani te mothova verno mangipe. Sar prvo, ked mothovaja verno mangipe, anglo e Devlese jaćha hijam but vredna. Sar dujto, ked mothovaja verno mangipe, odova tano aso amaro šukaripe. Na primer, isi amen but šukar amala. Sar trito, sebepi so mothovaja verno mangipe, amen ka ovel amen bare blagoslovija. Jekh olendar tano so ka živina večno. Ćaće isi amen but šukar razlogija „jekh jekhese te mothova verno mangipe hem milosrđe“ (Zah. 7:9).

3. Sostar ka vaćera ko akava članko?

³ Ko akava članko, ka dobina odgovor ko štar pućiba: Kase valjani te mothova verno mangipe? So šaj te sikljova andi biblijaki knjiga Ruta kotar verno mangipe? Sar šaj avdije te mothova verno mangipe? Sose tano šukar te mothova verno mangipe jekh jekhese?

4. Sar šaj hem amen sar o Jehova te mothova verno mangipe? (Marko 10:29, 30)

⁴ Okova članko pomožinđa amenđe te haljova so o Jehova mothovi po verno mangipe samo okolenđe kola mangena le hem kola služinena olese (Dan. 9:4). Amen mangaja te „oponašina e Devle sar olese mangle ćhave“ (Ef. 5:1). Odolese hem amen mangaja te mothova verno mangipe amare phralenđe hem phenjenđe. (Čitin Marko 10:29, 30.)

5-6. Sar šaj te objasnina o lafi „vernost“?

⁵ Ked pošukar ka haljova so značini o verno mangipe, amen ka đana sar odova mangipe te mothova premalo amare phralja hem phenja. Te šaj pošukar te haljova so značini o verno mangipe, akana ka dikha so značini o lafi vernost. Te dikha jekh primer.

 ⁶ Ako jekh manuš beršencar ćerela buti ki jekh firma, tegani olese šaj te phena soj tano verno radniko. Ama, iako beršencar ćerela buti odothe, šaj niked na hine le prilika te penđari pe direktore. Šaj na slažini pe uvek odoleja kola odluke anena pe ki odija firma hem šaj na mangela odija firma. Ama tano bahtalo sose isi le buti hem so ko krajo ando masek ka lel pi plata. Ov ka ćerel buti odothe sa đi na ikljola ki penzija ja na arakhi pese aver buti.

7-8. (a) So podstaknini nekas te mothovi verno mangipe? (b) So ka sikljova andi biblijaki knjiga Ruta?

⁷ Savi razlika isi maškari vernost andi koja vaćerđam ko  šovto odlomko hem o verno mangipe? I razlika tani ko odova sose neko mothovi verno mangipe. Sose e Devlese sluge ko purano vreme mothovđe asavko mangipe? On na ćerđe odova sebepi so morandilje, već sebepi so olengo vilo podstakninđa len te ćeren odova. Te dikha e Davideso primer. Oleso vilo podstakninđa le te mothovi verno mangipe pe amalese e Jonatanese, iako oleso dad, o Saul, manglja te mudari le. Beršencar palo odova so o Jonatan mulo, o David hem ponodri mothovđa verno mangipe e Jonatanese ćhavese, e Mefivostejese (1. Sam. 20:9, 14, 15; 2. Sam. 4:4; 8:15; 9:1, 6, 7).

⁸ Kotar biblijaki knjiga Ruta šaj but te sikljova ando verno mangipe. So šaj te sikljova ando manuša kola pominena pe ki odija knjiga? Sar šaj te ićera amen ko odova so ka sikljova olendar? * Akana ka dikha.

9. Sose i Nojemina mislinđa so o Jehova aćhavđa la?

⁹ E biblijaki knjiga Ruta vaćeri andi Nojemina, andi olaki bori i Ruta hem ando Voz. Odova manuš manglja e Devle hem hine familija e Nojeminake romeja. Odolese so hine bari bokh ko Izrael, i Nojemina, olako rom hem olenge duj ćhave đelje te živinen ko Moav. Đi hine uduri, e Nojeminako rom mulo, a olake duj ćhave ženinđe pe e ćhajencar ando Moav. Ama, hari palo odova hem olake ćhave mulje (Ruta 1:3-5; 2:1). Sebepi sa odova so ulo, i Nojemina hine la but bari dukh ko vilo. Oj hine odobor obeshrabrimi so mislinđa so o Jehova aćhavđa la. Aće, so phenđa ando Devel: „O Jehova uštindilo protiv mande... O Svemoćno mukhlja mo životi te ovel but ćerko.“ Isto ađahar phenđa: „O Jehova irinđa  pe protiv mande... o Svemoćno ćerđa maje pharipa“ (Ruta 1:13, 20, 21).

10. Sar o Jehova dikhlja ko Nojeminake lafija?

¹⁰ Sar o Jehova dikhlja ko Nojeminake lafija? Ov na aćhavđa la već mothovđa laće so haljola la. O Jehova haljola so „o pharipa šaj e mudro manuše te našalen andi godi“ (Prop. 7:7). Ama, e Nojeminaće hine potrebno te dikhel so o Jehova na aćhavđa la. So ćerđa o Jehova? (1. Sam. 2:8). Ov podstakninđa e Ruta te mothovi laće verno mangipe. I Ruta hine spremno te mothovi laće verno mangipe, te pomožini laće te na ovel odobor obeshrabrimi hem te haljol so o Jehova tano uzo late. So sikljovaja ando Rutako primer?

11. Sose but phralja hem phenja tane spremna te pomožinen okolenđe kola tane obeshrabrime?

¹¹ O verno mangipe podstaknini amen te pomožina okolenđe kola tane obeshrabrime. Sar so i Ruta pomožinđa e Nojeminaće, ađahar hem o phralja hem o phenja pomožinena okolenđe kola tane obeshrabrime. On mangena pe phralen hem pe phenjen hem spremna tane te ćeren sa so šaj te pomožinen lenđe (Posl. 12:25; 24:10). O apostol Pavle ohrabrinđa amen te ćera odova. Ov phenđa: „Tešinen okolen soj tane obeshrabrime, pomožinen okolenđe soj tane slaba hem oven strpljiva sarinencar“ (1. Sol. 5:14).

12. Kova tano najšukar način te pomožina okolenđe kola tane obeshrabrime?

¹² But putija šaj te pomožina nekase koj tano obeshrabrimo ađahar so ka šuna le hem ađahar so ka mothova lese so mangaja le. O Jehova na ka bistrel odova so tu ćereja (Ps. 41:1). Ko Poslovice 19:17 pisini: „Ko mothovi milost e ćororenđe, e Jehovase pozajmini, hem Ov ka irini olese aso olese delija.“

13. Sar i Ruta hine averćhane andi Orfa hem sar i Ruta mothovđa verno mangipe? (Dikh i slika andi naslovno strana.)

¹³ Amen šaj pošukar te haljova so značini o verno mangipe ako razmislinaja ando odova so ulo e Nojeminaja palo odova so mulo olako rom hem olake ćhave. Ked i Nojemina šunđa so „o Jehova blagoslovinđa pe narodo hem dinđa len maro, oj odlučinđa te irini pe ćhere“ (Ruta 1:6). O solduj olake borja odlučinđe te đan olaja. Ama, drumal i Nojemina trin putija phenđa lenđe te irinen pe ćhere ko Moav. So ćerđe o borja? Ki Biblija pisini: „I Orfa ćumudinđa pe sasa hem đelji pese, a i Ruta aćhilji olaja“ (Ruta 1:7-14). I Orfa ćerđa odova so i Nojemina phenđa laće hem irinđa pe ćhere. Ama, i Ruta na ćerđa odova. Oj šaj hine te đal pese ćhere, ama odlučinđa te aćhol e Nojeminaja hem te pomožini laće (Ruta 1:16, 17). I Ruta aćhilji e Nojeminaja,  na sebepi so morandilji, već sebepi so manglja. Odoleja, i Ruta mothovđa verno mangipe. So sikljovaja ando odova so ćerđa i Ruta?

14. (a) Sar avdije but phralja hem phenja ćerena odova so ćerđa i Ruta? (b) Premalo Jevrejima 13:16, sar šaj te ćera e Jehova bahtalo?

¹⁴ Sebepi o verno mangipe amen ćeraja pobuter nego so valjani. Avdije, sar angleder, but phralja hem phenja mothovena verno mangipe pe phralenđe, čak hem okolenđe kolen na penđarena. Na primer, ked šunena so ulji disavi prirodno katastrofa, on odmah pućena sar te pomožinen. Isto ađahar, ked neko ki skupština isi le finansijska problemija, o phralja mangena te pomožinen odola osobaće. Sar o Makedoncija ando prvo veko, on ćerena pobuter nego so rodela pe olendar. Te šaj te pomožinen pe phralenđe, on „dena pobuter ando odova so šaj te den“ (2. Kor. 8:3). O Jehova tano but bahtalo ked dikhela sar amen mothovaja mangipe jekh jekhese. (Čitin Jevrejima 13:16.)

15-16. Sar i Ruta mothovđa so na vazdinđa pe vasta andi Nojemina?

¹⁵ Amen šaj te sikljova but buća kotar priča andi Nojemina hem i Ruta. Akana ka dikha disave olendar.

¹⁶ Ma vazde te vasta olendar. Ked i Ruta pođinđa pe sasaja ki Juda, i Nojemina but putija phenđa laće te irini pe ćhere. Ama, i Ruta na manglja te irini pe ćhere. So hine palo odova? „Ked i Nojemina dikhlja so i Ruta odlučinđa te đal olaja, više na manglja te phenel laće te irini pe ćhere“ (Ruta 1:15-18).

17. So ka pomožini amenđe te na vazda amare vasta ando amare phralja hem phenja?

¹⁷ So sikljovaja? Đi pomožinaja nekase koj tano obeshrabrimo, valjani te ova strpljiva hem te na vazda amare vasta olestar. Ki početka, jekh phen šaj na ka prihvatini amari pomoć. * Ama, o verno mangipe ka podstaknini amen te da sa amendar te pomožina laće (Gal. 6:2). Amen nadinaja amen so oj ka mukhel amen te pomožina laće.

18. Sar osetinđa pe i Ruta sebepi e Nojeminake lafija?

¹⁸ Ma uvredin tut. Ked i Nojemina hem i Ruta reslje ko Vitlejem, i Nojemina reslja pe komšijen hem phenđa lenđe: „Đeljum pherde vastencar, a o Jehova ćerđa te irinav man ćuće vastencar“ (Ruta 1:21). Zamislin samo sar hine e Rutaće ked šunđa odova! I Ruta ćerđa sa so šaj te pomožini e Nojeminaće. Runđa olaja, utešinđa la hem phirindoj đelji olaja sa odova drumo. Iako i Ruta ćerđa sa odova, i Nojemina phenđa: „O Jehova ćerđa te irinav man ćuće vastencar.“ Odoleja so phenđa, i Nojemina na mothovđa soj tani zahvalno aso sa odova so ćerđa i Ruta. Odova sigurno dukhavđa e Ruta, ama oj ipak aćhilji e Nojeminaja.

19. So ka pomožini amen te aćhova uzo nekaste koj tano obeshrabrimo?

¹⁹ So sikljovaja? Na primer, jekh phen koja tani obeshrabrimi šaj te phenel diso so šaj te dukhavi amen, iako daja sa amendar te pomožina la. Ama, amen na mangaja te ćhiva odola lafija ko amaro vilo. Amen hem ponodri ka aćhova uzo  late hem ka molina e Jehova te pomožini amen te đana sar te utešina la (Posl. 17:17).

20. So zorjaćerđa e Ruta te šaj hem ponodri te pomožini e Nojeminaće?

²⁰ Zorjaćer averen. I Ruta mothovđa e Nojeminaće verno mangipe, ama akana valjanđa neko te ohrabrini e Ruta. O Jehova podstakninđa e Voze te ohrabrini la. Ov phenđa laće: „Nek o Jehova nagradini tut aso tekle delija hem nek del tut celo plata o Jehova, e Izraeleso Devel, talo kase phakha aljan te garave tut.“ Akala lafija but ohrabrinđe e Ruta. Odolese, oj phenđa e Vozese: „Utešinđan man hem te lafencar smirinđan te sluškinja, iako na hijum jekh andi ti sluškinja“ (Ruta 2:12, 13). E Vozese lafija but ohrabrinđe e Ruta hem dinđe la snaga hem ponodri te brinini pe andi Nojemina.

21. Premalo Isaija 32:1, 2, sar šaj o starešine te pomožinen averenđe?

²¹ So sikljovaja? But amare phralja hem phenja mothovena verno mangipe averenđe. Ama, disavo puti hem olen valjani neko te ohrabrini. O Voz pohvalinđa e Ruta ked dikhlja kobor tani šukar premali Nojemina. Isto ađahar, hem o starešine pohvalinena e phralen hem e phenjen ked dikhena sar pomožinena averenđe ki skupština. Asavki pohvala šaj te del len snaga hem ponodri te pomožinen averenđe. (Čitin Isaija 32:1, 2.)

22-23. Sar i Nojemina menjinđa pe hem sose? (Psalam 136:23, 26)

²² Palo disavo vreme, o Voz dinđa e Nojeminaće hem e Rutaće sa so valjani lenđe (Ruta 2:14-18). Sar i Nojemina reagujinđa  ked dikhlja sa odova? Oj phenđa: „Nek o Jehova blagoslovini le, sose na ćhinavđa te mothovi po verno mangipe ni e đivdenđe ni e mulenđe“ (Ruta 2:20a). Kobor samo menjinđa pe i Nojemina. Angleder, oj rovindoj phenđa: „O Jehova... uštilo protiv mande.“ Ama, akana oj phenela: „O Jehova... na ćhinavđa te mothovi po verno mangipe.“ Sose i Nojemina odobor menjinđa pe?

²³ Ko krajo, i Nojemina haljilji so o Jehova niked na aćhavđa la. Ov prekali Ruta pomožinđa laće te resel ki Juda (Ruta 1:16). Isto ađahar, dikhlja so o Jehova prekalo Voz, kova hine jekh ando olenge otkupiteljija, pomožinđa olaće hem e Rutaće te ovel len sa so valjani lenđe * (Ruta 2:19, 20b). Oj sigurno mislinđa: „Akana haljovava so o Jehova niked na aćhavđa man. Ov uvek hine uzo mande.“ (Čitin Psalam 136:23, 26.) Kobor samo i Nojemina hine zahvalno so i Ruta hem o Voz na aćhavđe la. Ko krajo, sare hine bahtale so i Nojemina hine pošukar hem so hine la snaga te služini e Jehovase.

24. Sose hem ponodri valjani te mothova verno mangipe e phralenđe hem e phenjenđe?

²⁴ So ando verno mangipe sikljiljam andi knjiga Ruta? O verno mangipe podstaknini amen te na vazda amare vasta ando phralja hem phenja kola tane obeshrabrime. Isto ađahar, podstaknini amen te da sa amendar te pomožina lenđe. O starešine valjani te pohvalinen hem te ohrabrinen okolen kola mothovena verno mangipe averenđe. Ked dikhaja so okola kola hine obeshrabrime akana tane bahtale hem isi len snaga te služinen e Jehovase, tegani hem amen hijam bahtale (Dela 20:35). Najvažno razlog sose mothovaja verno mangipe tano sose mangaja te oponašina e Jehova kova tano „pherdo verno mangipaja“ (Izl. 34:6; Ps. 33:22).