DEŠUDUJTO ŠERO
Sar šaj te ove e Devljeso amal?
1, 2. Kola manuša hine e Jehovase amala?
KASA bi mangeja te ove amal? Džikasa so nakheja šukar hem kas mangeja. Džikasa koj tano šukar manuš hem kase osobine cenineja.
2 O Jehova birini disave manušen te oven oljese amala. Na primer, o Avraham hine jekh ando Jehovase amala (Isaija 41:8; Jakoveso 2:23). O Jehova hem e Davide manglja. Oljese pheja soj tano manuš premalo oljeso vilo (Čeriba e apostolengo 13:22). Isto adžahar, o prorok Danijel hine but manglo e Jehovase (Danijel 9:23).
3. Sose o Avraham, o David hem o Danijel hine e Jehovase amala?
3 Sose o Avraham, o David hem o Danijel hine e Jehovase amala? O Jehova pheja e Avrahamese: „Šujan mo glaso“ (1. Mojsieso 22:18). O Jehova ovela amal okoljenca soj tane ponizna hem so šunena olje. Čak jekh celo narodo šaj hine te oven oljese amala. O Jehova pheja e Izraelcendže: „Šunen mo glaso hem ka ovav tumaro Devel, a tumen ka oven mo narodo“ (Jeremija 7:23). Ako čače mangeja te ove e Jehovaso amal hem tu valjani te šunelje.
O JEHOVA ARAKHI PE AMALJEN
4, 5. Sar o Jehova arakhi pe amaljen?
4 I Biblija phenela so o Jehova mangela „te mothovi po zoraljipe te arakhi okoljen so celone viljeja služinena oljese“ (2. Letopisa 16:9). Ko Psalam 32:8 o Jehova dela po lafi pe amaljendže: „Ka pomožinavtu te haljove o buča hem ka sikavavtu kolje drumoa valjani te dža. Ka davtu savet, mi jakh ka ovel upro tute.“
5 Jekh zoralo dušmani mangela te čhinavi amen te ova e Devljese amala. Ama, o Jehova mangela te arakhimen oljestar (Čitinen Psalam 55:22). Sar e Jehovase amala, amen služina oljese celone viljeja. Amen hijam verna oljese čak ked isimen bare pharipa. Amen mukamen upro Jehova isto sar so o psalmisti čerdža. Ov pisija kotar Jehova: „Ov tano ki miklji desno strana, niked na te perav“ (Psalam 16:8; 63:8). Sar o Beng mangela te čhinavimen te ova e Devljese amala?
O BENG KRIVINI E MANUŠEN
6. So o Beng pheja ando manuša?
6 Ko 11. šero sikljiljam so o Beng krivija e Devlje soj tano hovavno. Isto adžahar, pheja so o Devel nane pravedno sose na muklja e Adame hem e Eva kokri te birinen soj tano šukar a soj tano lošno. E biblijaki knjiga ando Jov sikavimen so o Beng krivini hem e manušen kola mangena te oven e Devljese amala. O Beng phenela so o manuša služinena e Devljese sebepi so isiljen diso oljestar, a na sose mangenalje. O Beng čak phenela so šaj svakone manuše te cidel kotar Devel. Akana ka dikha so šaj te sikljova kotar Jov hem sar o Jehova arakhljalje.
7, 8. (a) Sar o Jehova dikhlja upro Jov? (b) So o Beng pheja ando Jov?
7 Ko hine o Jov? Ov hine šukar manuš kova živija koro 3 600 berša angljeder. O Jehova pheja so ko odova vakti ki Phuv na hine nijekh manuš sar oljeste. O Jov but poštujia e Devlje hem mrzija okova soj tano lošno (Jov 1:8). O Jov čače hine e Jehovaso amal.
8 O Beng pheja so o Jov služija e Devljese sebepi so hinelje diso oljestar. O Beng pheja e Jehovase: „Na čhidžan lji ograda so arakhi olje, oljeso čher hem sa so isilje? Berečetijan sa o buča so čerdža pe vastenca hem oljesi stoka ulji but ki Phuv. Ama, moljinavatu, muk to vas hem lje oljestar sa so isilje, hem ka dikhe so ka akošitu anglo jačha“ (Jov 1:10, 11).
9. So o Jehova muklja e Benge te čerel?
9 O Beng pheja so o Jov služini e Jehovase samo sebepi so šaj te ovelje diso oljestar. Isto adžahar, o Beng pheja so šaj te čhinavi e Jove te služini e Jehovase. O Jehova na dikhlja ko odova sar o Beng. Ama, muklja e Bengese te iskušini e Jove te dikhelpe da lji tano ov e Jehovaso amal sebepi so mangelalje.
O BENG NAPADINI E JOVE
10. So čerdža o Beng e Jovese hem so čerdža o Jov?
10 Najangljeder, o Beng čerdža te čoren hem te mudaren e Jovese stoka. Palo odova, o Beng mudardža pobuter ando Jovese sluge. O Jov sa našaldža. Ko krajo, o Beng ki jekh bari bavlal mudardža e Jovese dešen čhaven. Ama, o Jov ačhilo verno e Jehovase. „Ko sa odova o Jov na grešija ni na vačerdža diso lošno e Devljestar“ (Jov 1:12-19, 22).
O Jehova berečetija e Jove sebepi so mothodža soj tano verno amal
11. (a) So pana čerdža o Beng e Jovese? (b) So čerdža o Jov?
11 Ama o Beng na čerdža samo odova. Ov pheja e Devljese: „Takin oljese kokala hem oljeso mas, hem ka dikhe sar ka akošitu anglo jačha.“ O Beng čerdža o Jov te ovelje jekh but pharo nabormipe (Jov 2:5, 7). Ama, o Jov palje ačhilo verno e Devljese. Ov pheja: „Sa dži na merava, na ka čhinavav te ovav verno!“ (Jov 27:5).
12. Sar o Jov mothodža soj tano o Beng hovavno?
12 O Jov na džandža so o Beng vačerdža oljestar hem sose hinelje sa odola muke. Ov mislija so o Jehova čerela te ovelje odola pharipa (Jov 6:4; 16:11-14). Ama, uzo sa odova o Jov ačhilo verno e Jehovase. Odoljeja čače mothodžape so o Jov na služija e Devljese sebepi so hinelje diso oljestar. Ov hine e Devljeso amal sose manglja olje. Sa o lafija kola o Beng vačerdža hine hovavne.
13. So ulo sebepi so o Jov ačhilo verno?
13 Iako o Jov na džandža so ulo upre ko nebo, ov ačhilo verno e Devljese hem odoljeja mothodža so o Beng tano lošno. O Jehova berečetija e Jove sebepi so ačhilo verno (Jov 42:12-17).
SAR O BENG KRIVINI TUT
14, 15. So o Beng vačerdža sa e manušendže?
14 Tu šaj but te sikljove odoljestar so ulo e Jovese. Avdije o Beng krivini amen adžahar so phenela so služina e Jehovase sebepi so isimen diso oljestar. Ko Jov 2:4 o Beng pheja: „O manuš ka del sa so isilje pe dživdipase“. Akala lafija na hine vačerde samo e Jovese. O Beng vačerdža so sa o manuša služinena e Devljese sebepi so isiljen diso oljestar. But berša palo Joveso meribe, o Beng pana marela muj e Devljese hem krivini oljese slugen. Na primer, ko Godžalje lafija 27:11 pisini: „Mo čhavo ov godžalo hem čer mo vilo te ovel bahtalo te šaj te vačerav okoljese kova marela maje muj.“
15 Tu šaj te birine te šune e Jehova hem te ove oljeso verno amal hem odoljeja te mothove so o Beng tano hovavno. Čak ako valjani te čere bare promene ko to dživdipe te šaj te ove e Devljeso amal, odova tano diso najšukar so šaj te čere. Odova so ka čere tano but važno. O Beng phenela so tu na ka ačhove verno e Devljese ked ka oventu pharipa. Ov mangela te čhiveltu te na ačhove verno e Devljese. Sar čerela odova?
16. (a) Kola buča o Beng koristini te čhinavimen te služina e Jehovase? (b) Sar šaj o Beng te čhinavi tut te služine e Jehovase?
16 O Beng koristini razna buča te čhinavimen te ova e Devljese amala. Ov napadini „sar bokhalo lav hem rodela kas te hal“ (1. Petareso 5:8). Ma te čudinetu ked te amala, ti familjija ja avera ka mangen te čhinaventu te sikljove andi Biblija hem te čere okova soj tano šukar. Tegani šaj te dičholče so hijan napadimo * (Jovan 15:19, 20). Isto adžahar, o Beng čerelape soj tano „o anđeo e svetloso.“ Odoljese ov šaj te čhivelmen te na šuna e Jehova (2. Korintskonendže 11:14). Jekh aver buti koja o Beng koristini te čhinavimen te služina e Jehovase tani so mangela te mislina so na hijam odobor šukar manuša te služina oljese (Godžalje lafija 24:10).
ŠUN SO PHENELA O JEHOVA
17. Sose amen šuna e Jehova?
17 Ked šuna e Jehova amen mothova soj tano o Beng hovavno. So ka pomožinimen te šuna e Jehova? I Biblija phenela: „Mang e Jehova, te Devlje, sa te viljeja, sa te duša hem sa te snaga“ (5. Mojsieso 6:5). Amen šuna e Jehova sebepi so mangalje. So pobuter barjola amaro mangipe premalo Jehova, amen ka manga te čera sa so rodela amendar. O apostol Jovan pisija: „O mangipe premalo Devel značini te ičeramen ko oljese zapovestija, a oljese zapovestija nane phare“ (1. Jovaneso 5:3).
18, 19. (a) Kola tane disave lošna buča koljendar vačeri amendže o Jehova? (b) Sar amen džana so o Jehova na rodela amendar diso so našti te čera?
18 Ama, kola tane disave lošna buča koljendar vačeri amendže o Jehova? Ko okvir „ Mrzin odova so o Jehova mrzini“ isimen nekobor primerija. Ked dikheja akava okvir, šaj te perelče ki godi so disave kotar akala buča nane odobor lošna. Ama, ked čitineja e biblijake stihija hem ked hor razmislineja oljendar, tegani ka haljove kobor tano mudro te šune odova so o Jehova vačeri. Isto adžahar, ka haljove so valjani te promine disave buča ko to dživdipe. Podijekh puti šaj te ovelče pharo, ama ked prominejatu ka oveltu rahati hem bahtaljipe sebepi so hijan e Devljeso verno amal (Isaija 48:17, 18). Sar džana so šaj te prominamen?
19 O Jehova niked na rodela amendar diso so našti te čera (5. Mojsieso 30:11-14). Sar amaro čačutno amal, ov pendžarimen but pošukar amendar. Ov džanela kuri hijam zoralje, a kuri hijam slaba (Psalam 103:14). O apostol Pavle pheja amendže: „O Devel tano verno, hem na ka mukel te oven iskušime pobuter odoljestar so šaj te izdržinen, nego ka arakhi o drumo ked ka avel o iskušenje, te šaj te izdržinen“ (1. Korintskonendže 10:13). Amen šaj te verujina so o Jehova uvek ka delmen zoraljipe te čera okova soj tano šukar. Ov ka delmen „baro zoraljipe“ kova nijekh manuš našti te delmen, te šaj te nakhava o pharipa (2. Korintskonendže 4:7). O Pavle dikhlja sar o Jehova pomožijalje ked hinelje pharipa, odoljese vačerdža: „Sa šaj te čerav prekalo okoljeste kova delama zoraljipe“ (Filipskonendže 4:13).
SIKLJOV TE MANGE ODOVA SO O JEHOVA MANGELA
20. Save osobine valjani te mothova hem sose?
20 Ako manga te ova e Jehovase amala, amen valjani te čhinava te čera o lošna buča koljendar vačeri o Jehova. Ama, odova nane sa (Rimskonendže 12:9). E Devljese amala mangena odova so ov mangela. Ko Psalam 15:1-5 tane pisime disave buča kola o Jehova mangela (Čitinen). E Jehovase amala isiljen ista osobine sar oljeste hem mothovena mangipe, bahtaljipe, rahati hem strpljenje. Isto adžahar mothovena šukaripe, vera, manglje tane, krotka tane hem isiljen kontrola upro peste (Galatskonendže 5:22, 23).
21. Sar šaj te sikljove te mothove osobine kola o Devel mangela?
21 Sar šaj te sikljove te mothove asavke šukar osobine? Sikljov te mange odova so o Jehova mangela adžahar so ka čitine hem so ka sikljove andi Biblija (Isaija 30:20, 21). Ked ka čere akava, to mangipe premalo Jehova ka barjol hem ka mange te šunelje.
22. So ka ovel ako šuneja e Jehova?
22 O buča kola valjani te promine ko to dživdipe tane sar ked huljaveja o purane šeja, a uraveja o neve šeja. Ki Biblija pisini: „Huljaven e purane manuše, a uraven e neve manuše“ (Koloskonendže 3:9, 10). Šaj podijekh puti nane lokho te čere odova, ama ked prominejatu hem ked šuneja e Jehova, ov dela po lafi so ka anelče bare berečetija (Psalam 19:11). Birin te šune e Jehova hem mothov soj tano o Beng hovavno. Služin e Jehovase, na sebepi o berečetija kola ka oventu ko vakti so avela, nego odoljese so mangeja olje. Tegani čače ka ove e Jehovaso amal!
^ odl. 16 Akava na značini so o Beng isilje kontrola upro manuša kola mangena te čhinaventu te sikljove andi Biblija. Ama, o Beng tano „o devel akalje svetoso“ hem „celo sveto tano ko Lošnonese vasta.“ Odoljese ma čudintu ked disave manuša mangena te čhinaventu te služine e Jehovase (2. Korintskonendže 4:4; 1. Jovaneso 5:19).
