O Isus hem o apostolija nakhlje andi dolina Kedron hem dželje ki Maslinsko gora. Nakhlja ekvaš i rat, hem ko nebo i mesečina hine pherdi. Ked reslje ko getsimansko vrt, o Isus phendža ljendže: „Oven akate hem adžičeren man.“ Palo odova, dželo hari podur ko vrt hem bešlja ko kočija. Hine ljese but pharo hem molindža pe e Jehovase: „Nek ovel sar so tu mangeja.“ Tegani, o Jehova bičhaldža jekhe anđele te ohrabrini lje. Ked o Isus irindža pe ko apostolija, dikhlja ljen sar sovena. Ov phendža: „Ušten! Akana nane vreme te soven! Alo o vreme te ovav predajimo meklje dušmanendže.“

Sigate palo odova alo o Juda, hem oljeja hine but manuša kola hine ljen mačija hem kašta. O Juda džandža soj tano o Isus ko vrt sose ov hem avera apostolija stalno alje oljeja odothe. O Juda phendža e vojnikonendže so ov ka mothovi ljendže koj tano o Isus. Odoljese, dželo koro ljeste hem phendža: „Zdravo, Učitelju“, hem palo odova čumudindža lje. O Isus phendža ljese: „Judo, da li izdajineja man jekhe čumibaja?“

O Isus ikljilo anglo sa odola manuša hem pučlja ljen: „Kas rodena?“ On odgovorindže: „E Isuse ando Nazaret.“ Tegani o Isus phendža: „Me hijum odova.“ Tegani o manuša cidindže pe napalal hem pelje telje. O Isus paljem pučlja ljen: „Kas rodena?“ On odgovorindže isto lafencar: „E Isuse ando Nazaret.“ Tegani phendža ljendže: „Phendžum tumendže so me hijum odova. Mukhen me učenikonen te džan.“

Ked o Petar haljilo so desini pe, ikaldža o mač hem čhindža e prvosveštenikoso roboso kan. Ama, o Isus pipindža oljeso kan hem sačardža lje. Palo odova, phendža e Petarese: „Mukh o mač. Ako borineja tut mačeja, ando mač ka mere.“ O vojnikija astardže e Isuse hem phanlje ljese  vasta, a o apostolija našlje. Palo odova, o manuša igardže e Isuse ko glavno svešteniko, ko Ana. O Ana ispitindža lje hem bičhaldža lje ko e prvosveštenikoso čher, ko Kajafa. Ama, so ulo e apostolencar?