Jekh dive, ked i Eva hine kokri, jekh sap počmindža te vačeri olaja. Ov phendža lače: „Čače li o Devel na mukhela tumen te han ando sa o kašta?“ I Eva odgovorindža ljese: „Amen šaj te ha ando sa o kašta, samo ando jekh kaš na isminaja. Ako haja oljestar, ka mera.“ O sap phendža lače: „Tumen na ka meren. Ako ka han ando odova kaš, ka oven sar o Devel.“ Da li čače hine adžahar? Na, odova hine hovajbe. Ama, i Eva verujindža ko odova hovajbe. So pobuter dikhlja o plod, odobor pobuter manglja te probini lje. Oj halja ando plod hem dindža e Adamese te hal. Iako o Adam džandža so ka meren ako na šunena e Devlje, ov halja o plod.

Pokasno odova dive, o Jehova vačerdža e Adameja hem e Evaja hem pučlja ljen sose na šundže lje. O Adam phendža soj tani i Eva krivo, a i Eva phendža soj tano o sap krivo. Odoljese so o Adam hem i Eva na šundže e Jehova, ov paldindža ljen ando vrt. Te ne bi irinena pe palal, o Jehova ko ulaz ando vrt čhivdža e anđelen hem mač andi jag.

O Jehova phendža so ka ovel kaznimo hem okova kova hovavdža e Eva. Da li odova hine o sap? Ked o Jehova čerdža e sapen, na čerdža ljen te šaj te vačeren. Odova hine jekh lošno anđeo so čerdža te izgledini samči o sap vačeri hem adžahar hovavdža e Eva. Odova anđeo vičini pe Satana o Beng. Ki budućnost, o Jehova ka uništini e Satana hem ov više na ka hovavi e manušen te čeren lošna buča.