Ked o Mojsije hine ki planina Sinaj, o Jehova phendža ljese te čerel jekh posebno šator, kova vičindža pe sveto šator. Odothe o Izraelcija šaj hine te služinen ljese. On valjandže te ljen odova šator peja kuri god te džan.

O Jehova phendža: „Vačer e manušendže svako te del kobor šaj hem odoljeja te čerel pe o šator.“ O Izraelcija dindže zlato, srebro, bakar, skupocena bara hem nakit. On isto adžahar dindže vuna, lan, životinjsko koža hem but avera buča. Odobor but buča dindže so o Mojsije morandilo te phenel: „Čedindžam dovoljno! Ma anen ništa više.“

But murša hem džuvlja kola džandže šukar te čeren odija buti, pomožindže te čerel pe o šator. O Jehova dindža ljen mudrost te šaj šukar te čeren i buti. Nesave tkajindže ja vezindže, a avera redindže o bara hem čerdže razna buča ando zlato hem ando kaš.

O manuša čerdže o šator baš adžahar sar so phendža ljendže o Jehova. On čerdže jekh but šuži zavesa koja delindža o šator ko duj delija. Jekh deo vičindža pe Svetinja, a aver Svetinja upro svetinje. Ki Svetinja upro svetinje, hine čhivdo o kovčeg ando savez. Ov hine čerdo ando kaš, akacija hem ando zlato. A ki Svetinja hine zlatno svećnjako, astalji hem oltari kaj tharela pe hine o kad. Ko dvoro hine bakarno posuda panjese hem baro oltari. O kovčeg ando savez setinčerdža e Izraelcen ko oljengo obećanje so ka oven poslušna e Jehovase. Džaneja li so  značini o lafi savez? Odova tano jekh posebno obećanje.

O Jehova birindža e Arone hem oljese čhaven te služinen ko šator sar sveštenikija. On valjandže te brininen pe ando šator hem te den žrtva e Jehovase. Samo o Aron hine prvosvešteniko hem samo ov šaj hine te khuvel ki Svetinja upro svetinje. Odova čerdža jekh puti ko berš, ked dindža žrtva aso pe grehija, aso pe familijake grehija hem aso grehija kotar celo izraelsko narodo.

O Izraelcija završindže o šator jekh berš palo odova so ikljilje ando Egipat. Akana hine ljen than kuri šaj hine te služinen e Devljese.

E Jehovasi slava hine ko sveto šator hem ov čhivdža jekh oblako upro šator. Sa dži o oblako hine upro šator, o Izraelcija ačhilje ko isto than. Ama, ked o oblako vazdindža pe, odova hine ljendže znak so valjandže te džan ando odova than. Tegani, valjandže te čeden o sveto šator hem te džan kuri o oblako igari ljen.