43. PRIČA
O greh kova čerdža o David
Ked o Saul mulo, o David ulo kralj. Tegani hine lje 30 berš. Nakhlje nekobor berša sar ulo kralj. Jekh dive, ikljilo ko krov andi piklji palata hem odothar dikhlja jekha šuže romnja. O David šundža so olako nav tano Vitsaveja hem soj tani ženimi jekhe vojnikoja kova vičini pe Urija. O David phendža te anen la ki palata. Ov suča olaja hem oj ačhilji khamni. O David manglja te garavi odova so čerdža. Ov phendža e zapovednikose andi pi vojska te čhivel e Urija ko prva redija ked ka džan ko mariba hem palo odova sarine te ciden pe palal, te mukhen lje kokri. Palo odova so mudardže e Urija ko maribe, o David ženindža pe e Vitsavejaja.
Ama, o Jehova dikhlja sa o lošna buča kola ov čerdža. So čerdža o Jehova? Ov bičhaldža pe proroko, e Natane, ko David. O Natan phendža ljese: „Jekh barvalo manuš hine lje but bakre, a jekh čororo manuš hine lje samo jekh bakro kas but manglja. Ama, o barvalo manuš ljelja e čororese bakre.“ O David holjandža hem phendža: „Odova barvalo manuš valjani te merel!“ Tegani o Natan phendža e Davidese: „Tu hijan odova barvalo manuš!“ Akava hine but pharo e Davidese hem odoljese priznajindža e Natanese: „Grešindžum e Jehovase.“ Sebepi odova greh o David hem oljesi porodica hine ljen but problemija. O Jehova kaznindža lje, ama mukhlja lje te živini odoljese so hine iskreno hem ponizno.
O David manglja te čerel o hram e Jehovase, ama o Jehova birindža oljese čhave e Solomone te čerel odova. O David počmindža te spremini o materijali e Solomonese te šaj te čerel o hram. O David phendža: „E Jehovaso hram mora te ovel but šužo. O Solomon tano pana terno, ama me ka pomožinav ljese te spremini sa so valjani.“ O David dindža but pare, arakhlja šukar majstorija hem čedindža but zlato hem srebro. Isto adžahar, ov andža jekh posebno vrsta ando kaš, kova vičindža pe kedar kotar Tir hem kotar Sidon. Angljeder te merel, o David dindža e Solomonese o planija sar te čerel o hram. Ov phendža: „O Jehova phendža maje te pisinav akala buča te šaj te dav ljen tuče. O Jehova ka pomožini tut. Ma dara, ov hrabro hem počmin te čere o hram.“
„Ko garavi pe grehija na ka ovel lje uspeh, a ko priznajini ljen hem na čerela ljen više, ka mothovi pe oljese milosrđe“ (Poslovice 28:13)
