Andi pi palata ko Jezrael, o Ahav dikhlja e Navutejeso vinograd. O Ahav manglja te ljel odova vinograd hem odoljese manglja te činel lje oljestar. Ama, premalo e Jehovaso zakon hine zabranimo te biknel pe i phuv koja neko dobindža ko nasledstvo hem odoljese o Navutej na manglja te biknel la. Da li o Ahav poštujindža e Navutejesi ispravno odluka? Na. O Ahav hine but holjamo, odobor so na ikljilo andi pi soba hem na manglja te hal maro.

E Ahavesi romni, i lošno kraljica i Jezavelja, phendža ljese: „Tu hijan kralj ko Izrael. Šaj te ovel tut sa so mangeja. Me ka čerav te dobine odova vinograd.“ Oj pisindža ljil e dizjake starešinendže, te vačeren so o Navutej vačerdža protiv o Devel hem odoljese valjani te mudaren lje barencar. O starešine čerdže odova so vačerdža ljendže i Jezavelja, a e Ahavese phendža: „O Navutej mulo. O vinograd tano akana toklo.“

I Jezavelja na mudardža samo e Navuteje, oj mudardža hem averen manušen kola manglje e Jehova. Oj služindža e hovavne devljendže hem čerdža avera lošna buča. O Jehova dikhlja sa o lošna buča so čerdža i Jezavelja. Da li ov čerdža diso sebepi odova?

Ked mulo o Ahav, oljeso čhavo o Joram ulo kralj. O Jehova bičhaldža jekhe manuše kaso nav hine Juj, te kaznini e Jezavelja hem olake porodica.

O Juj ukljindža ki kočija, hem dželo ko Jezrael, kuri živindža i Jezavelja. O Joram ikljilo pe kočijaja anglo Juj hem pučlja lje: „Isi li mir maškaro amende?“ O Juj phendža: „Našti te ovel mir sa dži ti daj, i Jezavelja,  čerela lošna buča.“ Tegani o Joram manglja te irini pi kočija hem te našel. Ama, o Juj pogodindža lje e strelaja hem ov mulo.

Palo odova, o Juj dželo ki Jezaveljaki palata. Ked šundža ko avela, i Jezavelja šminkindža pe, čerdža pese frizura hem adžičerdža lje ki pendžera. Ked o Juj reslja, oj počmindža te vačeri ljese lošna lafija. Tegani, o Juj vačerdža glasno olake slugendže kola hine uzo late: „Forden la telje!“ On fordindže la andi pendžera hem oj mulji.

Palo akava, o Juj mudardža e Ahavese 70 čhaven hem uništindža sa so hine povezimo odoljeja te služini pe e Valese. Da li akava uverini tut so o Jehova sa dikhela hem so ko pravo vreme ka kaznini okoljen kola čerena lošna buča?