10 ΙΟΥΝΙΟΥ 2023, ο πφραλ Τζέφρι Τζάκσον κατά Κυβερνών Σώμας βακερντάς ότι νικίστιλι Η Αγία Γραφή—Ο Ευαγγέλιος σο Γραφιντάς ο Ματθαίος κι τσσιπ ρομανί (νότια Ελλάδα). Ανταβά βιβλίος νικίστιλο σε εκ ειδική συνάθροιση σο αβιλί-πες κο Μπέθελ κο Πειραιάς. Πο μπουτ από 29.000 τζενέ ντικχλέ ο πρόγραμμας σαρέ κατά κχανγκιριά κι Ελλάδα ντα κι Κύπρος. Κάνα μπιτισάλο ο πρόγραμμας, ο πφραλά μπορίνενας τι γουλιαρέν ο βιβλίος κατά Ίντερνετ. Κο μασεκά σο κα αβέν, ο κχανγκιριά κα τθερέν-λες τυπωμέ-ντα.

Η ρομανί (νότια Ελλάδα) ισί εκ τσσιπ σο να σικλιαρένα-λα κο σχολεία, ντα ανταβά κερέλα ι μετάφραση ατζέ πο δύσκολη. Κο Μπέθελ κι Ελλάδα ισί ντες πφραλά ντα πφενιά σο μεταφράνενα κι τσσιπ ρομανί (νότια Ελλάδα). Κι μετάφραση ντένα μπαρί βοήθεια γιαβερά-ντα πφραλά ντα πφενιά σο κερένα μπουτί αβρί κατά Μπέθελ.

Κάνα διαβαντάς ο Ματθαίος κι ρομανί, εκ πφεν βακερντάς: «Σικλιλόμ ι Ιεχωβάσκε κατά μελέτη σο κερντόμ κο μπαλαμανές. Παρόλο σο αγαβάβας οντουλά σο διαβάναβας ντα ασουνάβας, ακανά σο διαβάναβα ι Γραφή μιρέ τσσιμπάτε ερεσέλα ντιπ αντρέ μι γκίστε ντα τσσίντελα-μαν τι κεράβ ατζέ πο μπουτ πράγματα».

Εκ γιαβέρ πφεν βακερντάς: «Αντικάς σαρ μεταφρασάλε ο λάφια ι εδαφιόνγκε Ματθαίος 26:38, 39 κι ρομανί ερεσλέ αντρέ μι γκίστε. Ο Ιησούς βακερντάς πι μαθητένγκε ότι “τθερέλας αζόμ μπαρί ντουκχ αντρέ πι γκίστε σαρ τι μερέλας”. Αλλά προσευχίντιλο κο Ιεχωβά τι ντελ-λες ζορ για τι κερέλ οντουβά σο μανγκέλα. Ακανά αγαβάβα ντιπ λατσσές ανταλέ λαφίνταρ ότι νανέ λάθος τι αβάς μπάζιμα στεναχωριμέ. Ανταλά λάφια ανένα μι γκοντιάτε τι προσευχίντιβαβ αντράλ μι γκίσταρ κο Ιεχωβά για τι ντελ-μαν ζορ τι νταϊντίναβ ο δυσκολίες ντα τι πουτράβ μο γκι κο πφραλά ντα κο πφενιά».

Χαιρίνασα γιεκ ι πφραλέντζαρ ντα ι πφενίντζαρ σο κερένα λάφι ρομανές σόσκε ακανά κα κερέλ λένγκε λατσσιπέ ανταβά μπαρό δώρος ντα κα βοηθίνελ-λεν τι τζαν ατζέ πο πασέ κο Ιεχωβά.—Ιακώβου 4:8.