Ο Ευαγγέλιος σο Γραφιντάς ο Ιωάννης 17:1-26
17 Κάνα βακερντάς-λεν ανταλά ο Ιησούς, βαντιντάς πο γιακχά κο ουρανός ντα βακερντάς: «Ντάντε, αβιλό ο σαάτι. Ντε δόξα τι τσσαβές, ντα αντικάς τι ντελ-τουτ δόξα το τσσαβό,
2 σαρ ντινάν-λες τι τθερέλ ι ζορ οπράλ κο κάθε τζενό, για τι ντελ ζωή για πάντα σαρέ οντουλέντε σο ντινάν-λες.
3 Ανταβά μανγκέλα τι βακερέλ ζωή για πάντα, τι σικλιόν τούκε,* σο σάντε τούι ισινάν ο αληθινός Ντεβέλ, ντα οντουλέσκε σο μπουτσσαντάν, ι Ιησού Χριστόσκε.
4 Με ντινόμ-τουτ δόξα κι πφουβ ντα μπιτισκιαρντόμ ι μπουτί σο ντινάν-μαν τι κεράβ.
5 Ακανά, Ντάντε, δόξανε-μαν τούι πασέ τούτε για τι τθεράβ ι δόξα σο τθεράβας κάνα ισινόμας πασέ τούτε πριν τι κερντιόλ ο ντουνιάς.
6 »Μουτθαντόμ το ναβ* κο τζενέ σο ντινάν-μαν κατά ντουνιάς. Ισινέ τιρέ ντα ντινάν-λεν μάντε ντα κερντέ το λάφια.*
7 Ακανά τζανένα ότι σαρέ οντουλά σο ντινάν-μαν αβένα τούταρ,
8 σόσκε ντινόμ-λεν ο λάφια σο ντινάν-μαν, ντα δεχτιντέ-λεν ντα σικλιλέ μπαγιά ότι αβιλόμ τι ναβέστε ντα πακιαντέ ότι τούι μπουτσσαντάν-μαν.
9 Με λένγκε μολίναβα. Να μολίναβα ι ντουνιάσκε, αλλά οντουλένγκε σο ντινάν-μαν, σόσκε ισί τιρέ.
10 Ντα σαρέ οντουλά σο ισί μιρέ ισί τιρέ ντα οντουλά σο ισί τιρέ ισί μιρέ, ντα δοξάντιλομ λένταρ.
11 »Με να ισινόμ κο ντουνιάς, αλλά βον ισί κο ντουνιάς ντα με αβάβα τούτε. Άγιε Ντάντε, αράκχαβ-λεν μάξους τι ναβέσκε σο ντινάν-μαν, για τι αβέν εκ* σαρ ισινάμ αμέν εκ.*
12 Κάνα ισινόμας λέντζαρ, ντικχάβας λένγκε μάξους τι ναβέσκε σο ντινάν-μαν. Ντα αρακχαντόμ-λεν, ντα καέκ λένταρ να καταστραφισάλο, αλλά σάντε ο τσσαβό ι καταστροφιάκο, για τι νικιόλ μπαγιά ανταβά σο βακερέλα η Γραφή.
13 Ακανά όμως αβάβα τούτε, ντα βακεράβα ανταλά πράγματα αντρέ κο ντουνιάς για τι πφερντιόν μι χαράσαρ.
14 Ντινόμ-λεν το λάφια, αλλά ο ντουνιάς μισιντάς-λεν, σόσκε σαρ με να ισινόμ σαρ ο ντουνιάς, αντικάς βον-ντα νανέ σαρ ο ντουνιάς.
15 »Να μολίναβα-τουτ τι λες-λεν κατά ντουνιάς, αλλά τι αρακχαβές-λεν κατά Μπενγκ.*
16 Σαρ με να ισινόμ σαρ ο ντουνιάς, αντικάς βον-ντα νανέ σαρ ο ντουνιάς.
17 Άγιανε-λεν* αντράλ τι λαφίσταρ. Το λάφι ισί μπαγιά.
18 Σαρ τούι μπουτσσαντάν μαν κο ντουνιάς, αντικάς με-ντα μπουτσσαντόμ λεν κο ντουνιάς.
19 Ντα με αγιάναβα-μαν μάξους λένγκε, για τι αγιάντιβεν βον-ντα αντράλ τι λαφίσταρ σο ισί μπαγιά.
20 »Να μολίναβα-τουτ σάντε λένγκε, αλλά οντουλένγκε-ντα σο πακιάνα μάντε αντράλ λένγκε λαφίνταρ,
21 για τι αβέν σαρέ εκ, σαρ τούι, Ντάντε, ισινάν ενωμέ μάντζαρ ντα με ενωμέ τούσαρ, τι αβέν βον-ντα ενωμέ αμέντζαρ ντα αντικάς τι πακιάλ ο ντουνιάς ότι τούι μπουτσσαντάν-μαν.
22 Ντινόμ-λεν ι δόξα σο ντινάν-μαν, για τι αβέν εκ σαρ ισινάμ αμέν εκ.
23 Με ενωμέ λέντζαρ ντα τούι ενωμέ μάντζαρ, για τι αβέν ντιπ ενωμέ, ντα αντικάς τι τζανέλ ο ντουνιάς ότι τούι μπουτσσαντάν-μαν ντα ότι μανγκλάν-λεν σαρ μανγκλάν μαν.
24 Ντάντε, μανγκάβα μάντζαρ ανταλέν σο ντινάν-μαν, οτθέ σο ισινόμ με-ντα, για τι ντικχέν μι δόξα σο ντινάν-μαν, σόσκε μανγκλάν-μαν πριν τι μπιάντιβεν τζενέ κι πφουβ.
25 Ντάντε σο ισινάν δίκαιος, ο ντουνιάς να τζανέλα-τουτ, αλλά με τζανάβα-τουτ, ντα βον τζανένα ότι τούι μπουτσσαντάν-μαν.
26 Σικλιαρντόμ-λεν τι ναβέσκε ντα να κα τσσιναβάβ τι κεράβ-λες ανταβά, ντα αντικάς η αγάπη σο σικαντάν μάνγκε τι αβέλ αντρέ λέντε ντα με τι αβάβ ενωμέ λέντζαρ».
Υποσημειώσεις
^ Γιαβέρσοϊ «μα τι τσσιναβέν τι σικλιόν τούκε».
^ Γιαβέρσοϊ «Σικλιαρντόμ τι ναβέσκε».
^ Γιαβέρσοϊ «ντινέ καν τι λαφίντε».
^ Γιαβέρσοϊ «ενωμέ».
^ Γιαβέρσοϊ «ενωμέ».
^ Κι Πουρανί Μπαλαμανί βακέρντιβελας «πφιρνό». Γιαβέρσοϊ «γκεραλό, μπίλατσσο».
^ Γιαβέρσοϊ «Τράμπινε-λεν».
