Ο Ευαγγέλιος σο Γραφιντάς ο Ματθαίος 4:1-25
4 Σοράν ο πνεύμας ι Ντεβλέσκο γκερντάς ι Ιησούς κι έρημος ντα οτθέ ο Μπενγκ τσσουντάς λέσκε πειρασμός.
2 Να χαλάς 40 σαστέ ντιβεσά* ντα σοράν μποκχάλιλο.
3 Ντα ο Μπενγκ αβιλό τι τσσουβέλ λέσκε πειρασμός ι λαφίντζαρ: «Άμα ισινάν τσσαβό ι Ντεβλέσκο, βάκερ τι αβέν μαντρέ ακαλά μπαρά».
4 Αλλά βοβ βακερντάς: «Ισί γραμμέ: “Ο τζενό δεν πρέπει τι τζουβντιόλ σάντε μαντρέσαρ, αλλά ι κάθε λαφίσαρ σο νικιόλα κατά Ιεχωβάσκο* μούι”».
5 Αζομάν ο Μπενγκ γκερντάς-λες κι άγια πόλη ντα τσσουντάς-λες οπράλ κο βουτσσέ ντουβάρια κι ναόσκε
6 ντα βακερντάς λέσκε: «Άμα ισινάν τσσαβό ι Ντεβλέσκο, περ ακατάρ, σόσκε ισί γραμμέ: “Κα μπουτσσαβέλ τούκε πι αγγελόν” ντα “Βον κα λεν-τουτ πουμαρέ βαστέντε για μα τι ντες το πιντρό κο μπαρ”».
7 Ο Ιησούς βακερντάς λέσκε: «Πάλι ισί γραμμέ: “Μα δοκίμανε ι Ιεχωβάς* τι Ντεβλές μπέτι τροπόσαρ”».
8 Σοράν ο Μπενγκ γκερντάς-λες εκχέ μπουτ βουτσσέ βεσέστε ντα σικαντάς λέσκε σαρέ ο βασιλείες ι ντουνιάσκε ντα λένγκο χουλανιπέ.*
9 Ντα βακερντάς λέσκε: «Σαρέ ανταλά κα νταβ-λεν τούτε, άμα κα περές τελέ κοτσίντζαρ ανγκλά-μάντε».*
10 Αζομάν ο Ιησούς βακερντάς λέσκε: «Νας, Μπενγκ! Σόσκε ισί γραμμέ: “Ανγκλάλ κο Ιεχωβά* τι Ντεβλέστε πρέπει τι περές κοτσίντζαρ ντα σάντε λες πρέπει τι ντες λατρεία”».*
11 Αζομάν ο Μπενγκ μουκχλάς-λες, ντα αβιλέ άγγελοι ντα αρχισάλε τι υπηρετίνεν-λες.
12 Κάνα ο Ιησούς ασουντάς ότι τσσουντέας φυλακή ι Ιωαννής, γκιλό κι Γαλιλαία.
13 Ντα αφού νασλό κατά Ναζαρέτ, αβιλό ντα μπεσλό κι Καπερναούμ σο ισί πασέ κι ντεριάβ, κο τθεμά Ζαβουλών ντα Νεφθαλί,
14 για τι νικιόλ μπαγιά οντουβά σο βακέρντιλοας αντράλ κατά προφήτης Ησαΐας:
15 «Τθεμ Ζαβουλών ντα τθεμ Νεφθαλί, κο ντρομ κι ντεριαβάκο, κι γιαβέρ μπάντα κατά Ιορδάνης, Γαλιλαία σο τούτε μπεσένα τζενέ γιαβερέ τθεμένταρ!
16 Ο λαός σο μπεσέλας κο καρανίκι ντικχλάς ζουρανό φως, ντα φως πελό οπράλ οντουλέντε σο μπεσένας κο τθαν κι μεριμάσκε βουτσσαλιάκο».
17 Οτθάρ μπερί ο Ιησούς αρχισάλο τι μουτθαβέλ ι Ντεβλέσκε λάφια ντα τι βακερέλ: «Μετανιώνεν, σόσκε η Βασιλεία ι ουρανόσκι ισί πασέ».
18 Καζόμ πφιρέλας πασέ κι Ντεριάβ κι Γαλιλαία, ντικχλάς ντουέ πφραλέν (ι Σιμωνάς, σο βακέρντιβελα Πέτρος, ντα λέσκε πφραλές ι Ανδρεάς) τι τσσουβέν πουμαρέ δίχτυα κι ντεριάβ, σόσκε ισινέ ψαράδες.
19 Ντα βακερντάς λένγκε: «Ελάν μάντζαρ ντα με κα κεράβ-τουμέν ψαράδες τζενένγκε».
20 Βον μουκχλέ σουγκό πουμαρέ δίχτυα ντα γκιλέ παλά-λέστε.
21 Γκιλό χάνικ πο τελέ ντα ντικχλάς ατζέ ντουέ πφραλέν: ι Ιακωβός ντα ι Ιωαννής, σο λένγκο ντατ ισινέ ο Ζεβεδαίος. Βον ισινέ κι βάρκα πουμαρέ νταντέσαρ ι Ζεβεδαιόσαρ ντα λατσσαρένας πουμαρέ δίχτυα. Ντινάς-λεν βίκος
22 ντα βον μουκχλέ σουγκό ι βάρκα ντα πουμαρέ νταντές ντα γκιλέ παλά-λέστε.
23 Αζομάν γκιλό σαρί κι Γαλιλαία ντα σικλιαρέλας κο συναγωγές ντα μουτθαβέλας ο λατσσέ αμπέρια ι Βασιλειάκερε ντα κερέλας λατσσές τζενέν κάθε νασφαλιμάσταρ.*
24 Λιντέ αμπέρι λέσκε σαρί κι Συρία, ντα αντέ λέσκε σαρέ οντουλέν σο τσσίντενας μπουτ σαβέ τι μανγκές νασφαλιματένταρ ντα μπαρέ ντουκχένταρ, ι δαιμονισμέ τζενέν, οντουλέν σο τθερένας επιληψία ντα ι μπανγκέν, ντα βοβ κερντάς-λεν λατσσές.
25 Οντουλέσκε-ντα, γκιλέ παλά-λέστε μπουτ τζενέ κατά Γαλιλαία, κατά Δεκάπολη,* κατά Ιερουσαλήμ, κατά Ιουδαία ντα κατά γιαβέρ μπάντα κατά Ιορδάνης.
Υποσημειώσεις
^ Κι Πουρανί Μπαλαμανί βακέρντιβελας «40 ντιβεσά ντα 40 αρατιά».
^ Κι Πουρανί Μπαλαμανί βακέρντιβελας «δόξα».
^ Γιαβέρσοϊ «άμα κα ντες-μαν λατρεία εκ φαρ».
^ Γιαβέρσοϊ «άγια υπηρεσία».
^ Ο λάφι «νασφαλιπέ» βακέρντιβελα εμ «πασλιπέ» εμ «αμπόρια».
^ Γιαβέρσοϊ «κατά Ντες Πόλεις».
