Γράμμας σο Μπουτσσάντιλο κο Ρωμαίοι 3:1-31
3 Άρα, σο κερέλα ι Ιουδαιόν τι αβέν πο οπρέ κατά γιαβερά ή καβά λατσσιπέ ανέλα η περιτομή;
2 Ο Ιουδαίοι ισί πο οπρέ κατά γιαβερά μπουτέ τροπόντζαρ. Ο πο σημαντικός ισί ότι λένγκε βαστέντε μουκχλάς ο Ντεβέλ πο άγια λάφια.
3 Άρα, σο κα βακεράς; Άμα μερικοί να τθερένας πίστη, μανγκέλα τι βακερέλ ανταβά ότι ναστί ντάσα μπέσα κο Ντεβέλ;
4 Σίγουρα όχι! Ατζέ-ντα άμα κα σικάντιβελ ότι σαρέ ο τζενέ χουχαβένα, κα σικάντιβελ ότι ο Ντεβέλ βακερέλα ι αλήθεια, σαρ ισί γραμμέ: «Κα σικάντιβελ ότι ισινάν δίκαιος τι λαφίντε ντα κα νικίνες κάνα κρίντιβεσα».
5 Ο γκεραλέ* πράγματα σο κεράσα σικαβένα ατζέ πο λατσσές ότι ο Ντεβέλ ισί δίκαιος. Άρα, ισί άδικος ο Ντεβέλ κάνα τιμωρίνελα-αμέν; (Αντικάς αμντίνενα μερικά τζενέ.)
6 Σίγουρα όχι! Ο Ντεβέλ ισί δίκαιος. Άμα να ισινέ, σαρ κα κρίνελας ι ντουνιάς;
7 Αλλά άμα με χουχαβάβα, ντα μι λαφίνταρ σικάντιβελα ατζέ πο λατσσές ι αλήθεια ι Ντεβλέσκι ντα αβέλα πο μπουτ δόξα λέστε, σόσκε κρίντιβαβα σαρ αμαρτωλός;
8 Ντα σόσκε μα τι βακεράς: «Κα κεράς γκεραλέ πράγματα για τι αβέν λατσσέ πράγματα»; Ισί τζενέ σο βακερένα χάι ότι αμέν βακεράσα-λες ανταβά. Ανταλά τζενέ κα κρίντιβεν δίκαια.
9 Άρα, ισινάμ αμέν ο Ιουδαίοι πο λατσσέ κατά γιαβερά; Σίγουρα να ισινάμ! Σόσκε πο οπρέ σικαντάμ ότι εμ ο Ιουδαίοι εμ ο Μπαλαμέ ισί σαρέ τελάλ κατά αμαρτία,
10 σαρ ισί γραμμέ: «Νανέ καέκ δίκαιος, ούτε εκ.
11 Νανέ καέκ σο αγαβέλα λατσσές ο πράγματα σο ισί αχόρτ. Νανέ καέκ σο ρόντελα ι Ντεβλέσκε.
12 Νασλέ σαρέ Λέσκε ντρομέσταρ, αβιλέ σαρέ άχρηστοι. Νανέ καέκ σο σικαβέλα λατσσιπέ, ούτε εκ».
13 «Λένγκε λάφια* ισί πουταρντό μεζάρι.* Χουχαβένα ι γιαβερέν πουμαρέ τσσιμπάσαρ». «Δηλητήριος οχιάκο ισί παλάλ λένγκε βουστένταρ».
14 «Λένγκο μούι ισί πφερντό αρμανιά ντα κερκιπέ».
15 «Λένγκε πιντρέ τθάβντενα τι τσσορέν ρατ».
16 «Καταστροφή ντα μπαρί ντουκχ ισί λένγκε ντρομέντε,
17 ντα να τζανένα ο ντρομ σο γκερέλα κι ειρήνη».
18 «Βον να νταρένα κατά Ντεβέλ».
19 Τζανάσα ότι σαρέ οντουλά σο βακερέλα ο Νόμος βακερέλα-λεν οντουλένγκε σο ισί τελάλ κατά Νόμος, ντα αντικάς κάθε μούι κα πφαντιόλ ντα κα σικάντιβελ ότι σαρό ο ντουνιάς αξίνελα τι τιμωρίντιβελ κατά Ντεβέλ.
20 Άρα, καέκ να κα βακέρντιβελ δίκαιος κατά Ντεβέλ επειδή κερέλα σο βακερέλα ο Νόμος, σόσκε αντράλ κατά Νόμος σικλιάσα ντιπ λατσσές σο ισί αμαρτία.
21 Αλλά ακανά η δικαιοσύνη ι Ντεβλέσκι σικάντιλι χωρίς Νόμος, αντικάς σαρ μουτθαβέλα ο Νόμος ντα ο Προφήτες.
22 Βα, σαρέ οντουλά σο τθερένα πίστη κο Ιησούς Χριστός, μπορίνενα τι αβέν δίκαιοι κο γιακχά κι Ντεβλέσκε, κατάρ-ντα τι αβέν.
23 Σαρέ τθερένα αμαρτιντό ντα ναστί αβένα τέλειοι σαρ ο Ντεβέλ.
24 Ο Ντεβέλ βακερέλα ότι ισί δίκαιοι αντράλ κατά λύτρος σο ποκιντάς ο Χριστός Ιησούς για τι σώνελ-λεν. Ανταβά ισί εκ δώρος σο ντινάς ο Ντεβέλ πι μπαρέ λατσσιμάσαρ.*
25 Ο Ντεβέλ ντινάς ι Ιησούς σαρ θυσία για τι αβέν ο τζενέ πάλι αμαλά* Λέσαρ αντράλ κατά πίστη κι Ιησούσκο ρατ. Κερντάς-λες ανταβά για τι σικαβέλ πι δικαιοσύνη, σόσκε ο Ντεβέλ κερέλας υπομονή καζόμ συγχωρίνελας ο αμαρτίες σο αβιλέ-πες κο πουρανέ μπρεσά.
26 Ανταβά αβιλό-πες για τι σικαβέλ πι δικαιοσύνη εμ ανταλέ βακιτίστε, ντα αντικάς τι αβέλ δίκαιος ατζέ-ντα κάνα βακερέλα ότι ισί δίκαιος ο τζενό σο τθερέλα πίστη κο Ιησούς.
27 Άρα, σόσκε τι ισαράς-αμέν; Να τθεράσα καέκ λόγος τι κεράς-λες ανταβά. Πρέπει τι ισαράς-αμέν άμα ντάσα καν κο Νόμος κι Μωυσίσκο; Νάα, αλλά ισαράσα-αμέν επειδή ντάσα καν κο νόμος σο βακερέλα τι τθεράς πίστη.
28 Σόσκε τζανάσα ότι ο τζενό να βακέρντιβελα δίκαιος επειδή κερέλα οντουλά σο βακερέλα ο Νόμος, αλλά αντράλ κατά πίστη.
29 Μα τι ισί ο Ντεβέλ σάντε Ντεβέλ ι Ιουδαιόνγκο; Νανέ Ντεβέλ ι τζενένγκο-ντα σο ισί γιαβερέ τθεμένταρ; Βα, λένγκο-ντα ισί.
30 Αφού ο Ντεβέλ ισί εκ, κα βακερέλ ότι εμ οντουλά σο κερντέ περιτομή εμ οντουλά σο να κερντέ ισί δίκαιοι αντράλ κατά πίστη σο τθερένα.
31 Μήπως αντράλ κατά πίστη σο τθεράσα σικαβάσα ότι ο Νόμος να τθερέλα καέκ αξία; Σίγουρα όχι! Οκιά μπάνταρ, αμέν σικαβάσα ότι ο Νόμος ισί σωστός.
Υποσημειώσεις
^ Γιαβέρσοϊ «μπίλατσσε, κακά».
^ Κι Πουρανί Μπαλαμανί βακέρντιβελας «Λένγκο κουρλό αντράλ».
^ Γιαβέρσοϊ «λιμόρι».
^ Γιαβέρσοϊ «φίλοι».
