Ο Πρώτος Γράμμας σο Μπουτσσάντιλο κο Κορίνθιοι 10:1-33
-
Παραδείγματα κατά ιστορία ι Ισραηλιτένγκι για τι τθεράς αμαρί γκοντί αμέν (1-13)
-
Τι νασάς κατά λατρεία σο ντιντιόλα κο είδωλα (14-22)
-
Ο τραπέζι ι Ιεχωβάσκο ντα ο τραπέζι ι δαιμονένγκο (21)
-
-
Παρόλο σο μπορίνενα τι κερέν σο μανγκένα, τι σκεφτίνεν ι γιαβερέν (23-33)
-
«Τι κερέν-λεν σαρέ για τι ντιντιόλ δόξα κο Ντεβέλ» (31)
-
10 Μανγκάβα τι τζανέν, πφραλάλεν, ότι σαρέ αμαρέ παππούδες ισινέ τελάλ κατά σύννεφος, σαρέ νακχλέ αντράλ κατά ντεριάβ,
2 σαρέ μπολντιλέ κο Μωυσής αντράλ κατά σύννεφος ντα κατά ντεριάβ,
3 σαρέ χαλέ ο ίδιος πνευματικός χαμπέ
4 ντα σαρέ πιλέ ο ίδιος πνευματικός πανί. Πίνας κατά πνευματικός μπαρ σο τζάλας παλά-λέντε, ντα οντουβά μπαρ μανγκέλας τι σικαβέλ ι Χριστός.*
5 Όμως, ο πο μπουτ λένταρ να κερντέ ι Ντεβλέσκο γκι, ντα οτθάρ μουλέ κι έρημος.
6 Ανταλά πράγματα αβιλέ παραδείγματα αμένγκε, για μα τι μανγκάς γκεραλέ* πράγματα, σαρ μανγκλέ βον.
7 Ούτε τι ντας λατρεία κο είδωλα, σαρ κερντέ μερικοί λένταρ. Ισί γραμμέ: «Ο λαός χαλάς ντα πιλάς, ντα νακχλέ λατσσές».
8 Ούτε τι κεράς λουμνιπέ,* σαρ κερντέ λουμνιπέ* μερικοί λένταρ ντα μουλέ 23 χιλιάδες τζενέ αντρέ εκχέ ντιβεσέστε.
9 Ούτε τι δοκιμάνας μπέτι τροπόσαρ ι Ιεχωβάς,* σαρ δοκιμαντέ-λες μερικοί λένταρ ντα μουλέ κατά σαπά.
10 Ούτε τι αβάς τζενέ σο γκρινιάνενα, σαρ ισινέ μερικοί λένταρ, σο μουνταρντάς-λεν ο άγγελος ι Ντεβλέσκο.
11 Ανταλά πράγματα σο αβιλέ-πες λένγκε ισί παραδείγματα αμένγκε ντα γραφισάλε για τι τθεράς αμαρί γκοντί αμέν,* σο τζουβντιάσα κο τέλος κι ντουνιάσκο.
12 Οτθάρ, οντουβά σο πακιάλα ότι ατσσόλα πι πιντρέντε τι προσοχίνελ μα τι περέλ.
13 Γιαβερά-ντα τζενέ νακχλέ σο-ντα δοκιμασία* νακχένα τουμέν. Αλλά ο Ντεβέλ ισί πιστός ντα να κα μουκχέλ-τουμέν τι δοκιμάντιβεν πο μπουτ οντουλέσταρ σο μπορίνενα. Κα πουτρέλ τουμένγκε ο ντρομ για τι νταϊντίνεν ι δοκιμασία.
14 Οτθάρ, πφραλάλεν, νασέν κατά λατρεία σο ντιντιόλα κο είδωλα.
15 Ανταλά βακεράβα-λεν τουμένγκε σο ισινέν γκοντιαβέρ τζενέ. Αγαβέν κορκορέ σο βακεράβα.
16 Ο ποτήρι σο βακεράσα ευχαριστώ ανταλέσκε κο Ντεβέλ, να μανγκέλα τι σικαβέλ ο ρατ ι Χριστόσκο; Ο μαντρό σο πφανγκάσα να μανγκέλα τι σικαβέλ ο σώμας ι Χριστόσκο;
17 Ο μαντρό ισί εκ, οτθάρ παρόλο σο ισινάμ μπουτ, ισινάμ εκ σώμας, σόσκε σαρέ χάσα ανταλέ εκχέ μαντρέσταρ.
18 Ντικχέν ι Ισραηλιτέν: Να ντένα λατρεία ι Ντεβλές κο θυσιαστήριος οντουλά σο χάνα ο θυσίες;
19 Σο μανγκάβα τι βακεράβ; Ότι ισί σημαντικός ο πράγμας σο θυσιασάλο εκχέ ειδωλόστε; Ότι ισί σημαντικός ο είδωλος;
20 Νάα. Οντουβά σο μανγκάβα τι βακεράβ ισί ότι ο πράγματα σο θυσιάνενα ο τζενέ σο ισί γιαβερέ τθεμένταρ να θυσιάνενα-λεν κο Ντεβέλ αλλά κο δαίμονες. Ντα να μανγκάβα τι τθερέν καέκ μπουτί τουμέν ι δαιμονέντζαρ.
21 Ναστί πίνα εμ κατά ποτήρι ι Ιεχωβάσκο* εμ κατά ποτήρι ι δαιμονένγκο. Ναστί χάνα εμ κατά «τραπέζι ι Ιεχωβάσκο»* εμ κατά τραπέζι ι δαιμονένγκο.
22 Σο τζάσα τι κεράς; “Τι χολιασκιαράς ι Ιεχωβάς”;* Ισινάμ πο ζουρανέ λέσταρ;
23 Σαρέ ο πράγματα ισί σωστά, αλλά να κερένα σαρέ λατσσιπέ. Σαρέ ο πράγματα ισί σωστά, αλλά να ντένα ζορ ι γιαβερέν σαρέ ο πράγματα.
24 Ο κάθε εκ μα τι ντικχέλ σάντε πιρό λατσσιπέ, αλλά ι γιαβερέσκο-ντα.
25 Χαν με πάκι συνείδηση* σο-ντα μας μπικίντιβελα κι αγορά. Να χρειαζίντιβελα τι πουτσέν κατάρ ισί οντουβά μας,
26 σόσκε «η πφουβ ντα σαρέ οντουλά σο ισί λάτε ισί ι Ιεχωβάσκε».*
27 Άμα εκ τζενό σο να πακιάλα κο Χριστός κα βακερέλ τουμένγκε τι τζαν τι χαν, ντα μανγκένα τι τζαν, χαν με πάκι συνείδηση σο-ντα ντέλα-τουμέν. Να χρειαζίντιβελα τι πουτσέν κατάρ λιντάς-λες.
28 Αλλά άμα εκ τζενό κα βακερέλ τουμένγκε: «Ακαβά μας ντιντιλό σαρ θυσία», μα χαν-λες ιτιρί ανταλέ τζενέσταρ ντα για μα τι αβέλ-πες ζιάνι κι συνείδηση καεκχέσκι.
29 Να μανγκάβα τι βακεράβ κι συνείδηση τιρί, αλλά κι γιαβερέσκι. Παρόλο σο μπορίναβα τι κεράβ σο μανγκάβα, σόσκε τι κεράβ κάτι ντα σοράν τι κρίνελ-μαν ι γιαβερέσκι συνείδηση;
30 Ατζέ-ντα άμα με βακεράβα ευχαριστώ κο Ντεβέλ ι χαμπέσκε ντα τθεράβα ο δικαίωμας τι χαβ-λες, σόσκε τι χαβ-λες άμα σοράν ο γιαβερά κα κρίνεν-μαν ανταλέσκε;
31 Άρα τουμέν, είτε χάνα είτε πίνα ή σο-ντα γιαβέρ κερένα, τι κερέν-λεν σαρέ για τι ντιντιόλ δόξα κο Ντεβέλ.
32 Μα κερέν ι γιαβερέν τι περέν, είτε ισί Ιουδαίοι είτε Μπαλαμέ είτε κατά κχανγκιρί ι Ντεβλέσκι,
33 σαρ κεράβα με-ντα σο νακχέλα μι βαστέσταρ για τι κεράβ ο γκι σαριλένγκο σαρέ κο πράγματα. Να ντικχάβα μιρό λατσσιπέ αλλά ο λατσσιπέ μπουτέ τζενένγκο για τι σώνελ-λεν ο Ντεβέλ.
Υποσημειώσεις
^ Γιαβέρσοϊ «ισινέ ο Χριστός».
^ Γιαβέρσοϊ «μπίλατσσε, κακά».
^ Γιαβέρσοϊ «για τι ντεν τεμπί, δηλαδή προειδοποίηση αμέντε».
^ Γιαβέρσοϊ «πειρασμός».
