Ο Πρώτος Γράμμας σο Μπουτσσάντιλο κο Κορίνθιοι 11:1-34
11 Τι μοιάζεν μάντε, σαρ μοιάζαβα με-ντα κο Χριστός.
2 Ισαράβα-τουμέν επειδή σαρέ κο πράγματα ντένα-τουμέν γκοντί μαν ντα κερένα σαρέ οντουλά σο σικλιαρντόμ-τουμέν.
3 Μανγκάβα τι τζανέν ότι ο σορό ι κάθε μουρσέσκο ισί ο Χριστός, ο σορό ι τζουβλιάκο ισί ο μουρς, ο σορό ι Χριστόσκο ισί ο Ντεβέλ.
4 Κάνα εκ μουρς προσευχίντιβελα ή βακερέλα προφητείες ντα ισί ιτσσαρντό λέσκο σορό, ανέλα λατζ πι σορέστε.
5 Αλλά κάνα εκ τζουβέλ προσευχίντιβελα ή βακερέλα προφητείες ντα νανέ ιτσσαρντό λάκο σορό, ανέλα λατζ πι σορέστε, σόσκε ισί σαρ εκ τζουβέλ σο ισί μοραντό λάκο σορό.
6 Άμα εκ τζουβέλ να ιτσσαρέλα πο σορό, πρέπει τι τσσινέλ πο μπαλά-ντα. Αλλά άμα ισί λατζ μπαρί εκχέ τζουβλιάκε τι τσσινέλ πο μπαλά ή τι μοραβέλ-λεν, πρέπει τι ιτσσαρέλ πο σορό.
7 Ο μουρς μα τι ιτσσαρέλ πο σορό, σόσκε λατσσάρντιλο για τι μοιάζελ κο Ντεβέλ ντα ανέλα δόξα Λέστε, αλλά η τζουβέλ ανέλα δόξα κο μουρς.
8 Ο μουρς να αβιλό κατά τζουβέλ, αλλά η τζουβέλ κατά μουρς.
9 Ατζέ, να λατσσάρντιλο ο μουρς ι τζουβλιάκε, αλλά η τζουβέλ ι μουρσέσκε.
10 Οτθάρ, εμ ανταλέσκε εμ ι αγγελόνγκε, η τζουβέλ πρέπει τι ιτσσαρέλ πο σορό για τι σικαβέλ ότι σεβάνελα ο δικαίωμας ι μουρσέσκο τι κερέλ κουμάντος.
11 Κο πράγματα σο τθερένα τι κερέν ι Κυριόσαρ, ο μουρς τθερέλα ανάγκη ι τζουβλιά ντα η τζουβέλ τθερέλα ανάγκη ι μουρσές.
12 Σαρ η τζουβέλ ισί κατά μουρς, αντικάς-ντα ο μουρς ισί αντράλ κατά τζουβέλ, αλλά σαρέ ισί κατά Ντεβέλ.
13 Αγαβέν-λες κορκορέ: Ισί σωστός εκχέ τζουβλιάκε τι προσευχίντιβελ κο Ντεβέλ ντα μα τι αβέλ ιτσσαρντό λάκο σορό;
14 Να σικλιαρέλα-τουμέν ο τρόπος σο λατσσάρντιλε ο τζενέ ότι ο μπαρέ μπαλά ισί λατζ μπαρί εκχέ μουρσέσκε,
15 αλλά άμα εκ τζουβέλ τθερέλα μπαρέ μπαλά ισί κάτι σουκάρ;* Λάκε μπαλά ντιντιλέ λάτε για τι ιτσσαρέλ πο σορό.
16 Όμως, άμα εκ τζενό μανγκέλα τι τζαλ κόντρα ανταλέσαρ, αμέν ντα ο κχανγκιριά ι Ντεβλέσκε να τθεράσα γιαβέρ έθιμος.
17 Αλλά καζόμ ντάβα ανταλά οδηγίες, να ισαράβα-τουμέν, επειδή τουμαρέ συναθροίσεις κερένα τουμένγκε πο μπουτ ζιάνι παρά λατσσιπέ.
18 Ασουνάβα ότι, κάνα γκιντίντιβενα σαρ κχανγκιρί, τθερένα διχόνοια. Ντα πακιάβα ότι μερικά ανταλένταρ σο ασουνάβα αβένα-πες.
19 Σίγουρα κα αβέν τζενέ τουμένταρ σο κα σικλιαρέν λάθος πράγματα, αλλά ανταλέσταρ κα σικάντιβελ κον κερέλα ο γκι ι Ντεβλέσκο.
20 Κάνα γκιντίντιβενα σαρέ γιεκ για τι χαν ο Δείπνος ι Κυριόσκο, να κερένα-λες ανταβά σωστέ τροπόσαρ.
21 Κάνα αβέλα ο σαάτι τι χαν-λες, ο κάθε εκ χάλα πο τζανγκλέ πιρό δείπνος, ντα αντικάς ο εκ μποκχάλιβελα ντα ο γιαβέρ ισί ματό.
22 Να τθερένα κχερ για τι χαν ντα τι πιν; Ή πακιάνα ότι η κχανγκιρί ι Ντεβλέσκι νανέ σημαντική ντα κερένα οντουλέν σο να τθερένα τίποτα τι λατζάν; Σο τι βακεράβ τουμένγκε; Τι ισαράβ-τουμέν; Να ισαράβα-τουμέν ανταλέσκε.
23 Σικλιαρντόμ-τουμέν οντουβά σο σικλιλόμ κατά Κύριος. Ι ιράτ σο κα ντιντιόλας ο Κύριος Ιησούς πι ντουσμανίνγκε* βαστέντε λιντάς εκ μαντρό,
24 κερντάς εκ προσευχή για τι βακερέλ ευχαριστώ κο Ντεβέλ ντα σοράν πφανγκλάς-λες ντα βακερντάς: «Ακαβά μαντρό μανγκέλα τι σικαβέλ μο σώμας σο ισί τουμένγκε. Συνεχίνεν τι κερέν-λες ανταβά για τι ντεν-τουμέν γκοντί μαν».
25 Αντικάς κερντάς ι ποτηρίσαρ-ντα, κάνα χαλέας, ντα βακερντάς: «Ακαβά ποτήρι μανγκέλα τι σικαβέλ ι νεβί συμφωνία σο βασίντιβελα μι ρατέστε. Συνεχίνεν τι κερέν-λες ανταβά για τι ντεν-τουμέν γκοντί μαν κάθε φαρ σο πίνα ανταλέσταρ».
26 Κάθε φαρ σο χάνα ανταβά μαντρό ντα πίνα ανταλέ ποτηρίσταρ, βακερένα κο τζενέ ι Κυριόσκε μεριμάσκε, μέχρι τι αβέλ βοβ.
27 Οτθάρ, κον χάλα κατά μαντρό ή πίλα κατά ποτήρι ι Κυριόσκο χωρίς τι αξίνελ-λες αμαρτίνελα κόντρα κο σώμας ντα κο ρατ κι Κυριόσκο.
28 Κάθε τζενό πρέπει πρώτα τι εξετάνελ λατσσές πο γκι, ντα σάντε αζομάν τι χαλ κατά μαντρό ντα τι πιλ κατά ποτήρι.
29 Άμα εκ τζενό να αγαβέλα ότι ανταλά σο χάλα ντα πίλα μανγκένα τι σικαβέν ο σώμας, ανέλα τιμωρία πι νεαυτόσκε κάνα χάλα ντα πίλα.
30 Άκ’ σόσκε μπουτ τουμένταρ ισί μπίζουρανε ντα νασφαλέ,* ντα μπερεκέτι τζενέ σοβένα ο σοϊπέ ι μεριμάσκο.*
31 Άμα όμως κα αγαβάας σο ισινάμ, να κα κρίντιβαας.
32 Αλλά κάνα κρίντιβασα, διορθώντιβασα κατά Ιεχωβά* για μα τι τιμωρίντιβας γιεκ ι ντουνιάσαρ.
33 Οτθάρ, πφραλάλεν, κάνα γκιντίντιβενα για τι χαν ο Δείπνος ι Κυριόσκο, τι μπεσέν ο εκ ι γιαβερέσκε.
34 Άμα εκ τζενό μποκχάλιβελα, τι χαλ πι κχερέστε για μα τι κρίντιβεν κάνα κα γκιντίντιβεν γιεκ. Ο γιαβερά θέματα κα λύναβ-λεν κάνα κα αβάβ οτθέ.
Υποσημειώσεις
^ Κι Πουρανί Μπαλαμανί ισινέ ο λάφι «δόξα».
^ Γιαβέρσοϊ «εχθρόνγκε».
^ Γιαβέρσοϊ «πασλέ, αμπορεμέ».
^ Ντικχίντιβελα ότι κερέλα λάφι ι πνευματικέ μεριμάσκε.
