Ο Δεύτερος Γράμμας σο Μπουτσσάντιλο κο Θεσσαλονικείς 2:1-17
2 Πφραλάλεν, τζανένα ότι κα βουρτίνελ αμαρό Κύριος, ο Ιησούς Χριστός, ντα ότι κα γκιντίντιβας γιεκ λέσαρ. Όμως, μανγκάσα τουμένταρ
2 μα τι μπερδίντιβεν άμα αβένα τζενέ σο βακερένα τουμένγκε ότι αβιλό ο ντιβές ι Ιεχωβάσκο.* Μα σαστίνεν ατζέ-ντα άμα βακερένα τουμένγκε ότι ανταλά λάφια ισί κατά Ντεβέλ* ή άμα διαβάνενα-λεν εκχέ γραμμάσταρ σο βακερένα τουμένγκε ότι ισί αμένταρ.
3 Μα τι χουχαβέλ-τουμέν καέκ τζενό, σόσκε ανταβά ντιβές να κα αβέλ άμα να αβιλέ πρώτα οντουλά σο τζάνα κόντρα κο Ντεβέλ* ντα άμα να σικαντάς-πες ο πφιρνό* τζενό, ο τσσαβό ι καταστροφιάκο.
4 Βοβ ισί τζενό σο τζάλα κόντρα ντα κερέλα-πες ότι ισί πο οπρέ κάθε εκχέσταρ σο βακέρντιβελα «ντεβέλ» ή κάθε πραγμάσταρ σο ντένα λατρεία* ο τζενέ. Ντα αντικάς μπεσέλα κο ναός κι Ντεβλέσκο ντα σικαβέλα ανγκλάλ σαριλέντε ότι βοβ ισί ντεβέλ.
5 Να ντένα-τουμέν γκοντί ότι, καζόμ ισινόμας τουμέντζαρ, βακεράβας-λεν τουμένγκε ανταλά;
6 Ντα ακανά τζανένα σο ισί οντουβά σο ατσσικιαρέλα ι πφιρνέ τζενές μα τι σικαβέλ-πες πριν τι αβέλ ο βακίτι.
7 Ισί μπαγιά ότι ο πφιρνιπέ ανταλέ τζενέσκο αβέλα-πες αποτσοράλ, αλλά ανταβά πφιρνιπέ κα ατσσόλ γκεραντό μέχρι τι νασέλ οντουβά σο ατσσικιαρέλα-λες.
8 Αζομάν κα σικαβέλ-πες ο πφιρνό τζενό. Ντα ο Κύριος Ιησούς κα καταστραφίνελ-λες πι ζουρανέ λαφίντζαρ* κάνα κα βουρτίνελ.*
9 Κάνα κα σικαβέλ-πες ανταβά πφιρνό τζενό, κα σικαβέλ-πες ι Μπενγκέσκε ζοριάσαρ ντα κα κερέλ σαβέ τι μανγκές μπαρέ πράγματα, ψεύτικα θαύματα
10 ντα αδικίες για τι χουχαβέλ. Σαρέ ανταλά ισί οντουλένγκε σο κα καταστραφίντιβεν. Ανταγιά κα αβέλ λένγκι τιμωρία επειδή να δεχτιντέ ντα να μανγκλέ ι αλήθεια σο κα σώνελας-λεν.
11 Οτθάρ, ο Ντεβέλ μουκχέλα-λεν τι χουχάντιβεν ψεύτικε λαφίνταρ για τι πακιάν πράγματα σο νανέ μπαγιά.
12 Ντα αντικάς σαρέ τι κρίντιβεν επειδή να πακιαντέ ι αλήθεια αλλά μπεϊντιντέ ι* αδικία.
13 Αμέν όμως, πφραλάλεν, πρέπει πάντα τι βακεράς ευχαριστώ κο Ντεβέλ τουμένγκε, σο μανγκέλα-τουμέν μπουτ ο Ιεχωβά,* σόσκε κατά αρχή ο Ντεβέλ τραμπιντάς-τουμέν για τι σώντιβεν. Βοβ αγιαντάς-τουμέν πι πνευμάσαρ, σόσκε πακιαντέν κι αλήθεια.
14 Τραμπιντάς-τουμέν* για τι σώντιβεν αντράλ κατά λατσσέ αμπέρια σο μουτθαβάσα, ντα αντικάς τι δοξάντιβεν τουμέν-ντα σαρ αμαρό Κύριος, ο Ιησούς Χριστός.
15 Οτθάρ, πφραλάλεν, τι ατσσόν σταθεροί ντα τι κερέν οντουλά σο σικλιλέν είτε λαφίνταρ είτε εκχέ γραμμάσταρ σο μπουτσσαντάμ τουμένγκε αμέν.
16 Ο Ντεβέλ, σο ισί αμαρό Ντατ, μανγκέλα-αμέν, ντα πι μπαρέ λατσσιμάσαρ λοκχιαρέλα αμαρό γκι* εκχέ τροπόσαρ σο ατσσόλα για πάντα ντα ντέλα-αμέν μπουτ σουκάρ ελπίδα. Προσευχίντιβασα βοβ ντα αμαρό Κύριος Ιησούς Χριστός
17 τι λοκχιαρέν τουμαρό γκι* ντα τι κερέν-τουμέν τι αβέν σταθεροί* για τι κερέν ντα τι βακερέν πάντα οντουβά σο ισί λατσσό.
Υποσημειώσεις
^ Γιαβέρσοϊ «Μα σαστίνεν εκχέ πνευμάσταρ».
^ Κι Πουρανί Μπαλαμανί βακέρντιβελας «άμα να αβιλί πρώτα η αποστασία».
^ Γιαβέρσοϊ «γκεραλό, μπίλατσσο».
^ Γιαβέρσοϊ «σο σεβάνενα μπουτ».
^ Κι Πουρανί Μπαλαμανί βακέρντιβελας «πι μουέσκε πνευμάσαρ».
^ Γιαβέρσοϊ «κάνα λέσκο βουρτιπέ κα λιντιόλ αμπέρι».
^ Γιαβέρσοϊ «αλλά αρεσάλι λένγκε η».
^ Γιαβέρσοϊ «Ντινάς-τουμέν βίκος».
^ Γιαβέρσοϊ «κοβλιαρέλα αμαρί ντουκχ».
^ Γιαβέρσοϊ «τι κοβλιαρέν τουμαρί ντουκχ».
^ Γιαβέρσοϊ «ζουρανέ».
