Ο Δεύτερος Γράμμας σο Μπουτσσάντιλο κο Κορίνθιοι 10:1-18
10 Με ο Παύλος, μολίναβα-τουμέν τι κερέν οντουλά σο βακεράβα τουμένγκε. Κάνα κεράβα τουμέντζαρ λάφι μοιάζαβα κο Χριστός σο τθερέλα κοβλό γκι ντα σικαβέλα λατσσιπέ. Όμως, ισί τζενέ τουμένταρ σο βακερένα ότι ισινόμ μπίζουρανο κάνα ισινόμ τουμέντζαρ, αλλά μπίνταρανο κάνα γραφίναβα τουμένγκε γράμματα.
2 Κα μανγκάβας μπουτ κάνα κα αβάβ τουμέντε, κον πακιάλα ότι οδηγίντιβασα κατά πράγματα σο μανγκέλα αμαρό γκι τι αλλάνελ, για μα τι χρειαζίντιβελ τι νταβ-λεν πφαρί συμβουλή.
3 Παρόλο σο τζουβντιάσα σαρ ο γιαβερά τζενέ, να πολεμίνασα σαρ κερένα ο τζενέ.
4 Ο όπλα σο τθεράσα για τι πολεμίνας νανέ κατά τζενέ, αλλά κατά Ντεβέλ. Τθερένα αζόμ μπαρί ζορ σο μπορίνενα τι καταστραφίνεν πράγματα σο ισί ζουρανέ σαρ πύργοι.
5 Καταστραφίνασα σκέψεις ντα κάθε εμπόδιος σο τσσιναβέλα ι τζενέν τι σικλιόν ι Ντεβλέσκε, ντα κεράσα κουμάντος κάθε σκέψη για τι ντελ καν κο Χριστός.
6 Ντα ισινάμ έτοιμοι τι τιμωρίνας κάθε τζενές σο συνεχίνελα μα τι ντελ καν, αφού πρώτα τουμέν κα σικαβέν ότι ντένα καν σαρέ κο πράγματα.
7 Τουμέν ντικχένα ο πράγματα αντικάς σαρ ισί αβριάλ. Άμα εκ τζενό τθερέλα ι σιγουριά ότι ισί ι Χριστόσκο, τι ανέλ πάλι πι γκοντιάτε ακαβά: Σαρ ισί βοβ ι Χριστόσκο, αντικάς ισινάμ αμέν-ντα ι Χριστόσκε.
8 Ο Κύριος ντινάς-αμέν ο δικαίωμας τι ντας-τουμέν ζορ ντα όχι τι κεράς-τουμέν τι χασαρέν τουμαρί ζορ. Άμα κα ισαράβας-μαν ατζέ-ντα χάνικ ανταλέσκε, να κα λατζάβας.
9 Να μανγκάβα τι ντικχίντιβελ ότι προσπαθίναβα τι νταραβάβ-τουμέν μι γραμματέντζαρ.
10 Ισί τζενέ σο βακερένα: «Λέσκε γράμματα τθερένα σημαντικά ντα ζουρανέ λάφια, αλλά βοβ κάνα ισί ατθέ αμέντζαρ ισί μπίζουρανο ντα λέσκε λάφια να τθερένα καέκ αξία».
11 Κον βακερέλα ασακέ λάφια τι τζανέλ ότι οντουλά σο γραφίνασα αμαρέ γραμματέντε, κα κεράς-λεν κάνα κα αβάς-ντα οτθέ.
12 Αμέν να κοτίνασα τι βακεράς ότι ισινάμ ίδιοι οντουλέντζαρ σο ισαρένα-πες ούτε συγκρίνασα αμαρό νεαυτός λέντζαρ. Βον κρίνενα πουμαρό νεαυτός οντουλέσαρ σο βακερένα βον ότι ισί λατσσό, ντα αντικάς σικαβένα ότι να αγαβένα.
13 Αμέν να κα ισαράς-αμέν καεκχέ πραγμάσκε εκτός κατά έργος σο ντινάς-αμέν ο Ντεβέλ τι κεράς. Ντα αντρέ ανταλέ εργόστε ισινέν τουμέν-ντα.
14 Κάνα αβιλάμ τουμέντε να κερντάμ κάτι σο να βακερντάς αμένγκε ο Ντεβέλ τι κεράς, αλλά αμέν ισινάμας ο πρώτοι σο μουτθαντάμ τουμένγκε ο λατσσέ αμπέρια ι Χριστόσκε.
15 Να ισαράσα-αμέν ι εργόσκε σο να ντιντιλό αμέντε, δηλαδή ι εργόσκε σο μαρντάς-πες τι κερέλ εκ γιαβέρ τζενό. Αλλά μπεσάσα τι τθερέν πο μπουτ πίστη για τι μπορίνελ τι αβέλ πο μπουτ ο έργος-ντα σο κεράσα. Αντικάς κα μπορίνας τι κεράς ατζέ πο μπουτ πράγματα,
16 σόσκε μανγκάσα τι τζας τι μουτθαβάς ο λατσσέ αμπέρια τθεμέντε σο ισί πο ντουρ τουμένταρ. Ντα αντικάς μα τι ισαράς-αμέν οντουλένγκε σο κερντέ ο γιαβερά πουμαρέ τθεμέστε.
17 «Οντουβά όμως σο ισαρέλα-πες τι ισαρέλ-πες ι Ιεχωβάσκε».*
18 Να κερέλα ο γκι ι Ντεβλέσκο οντουβά σο βακερέλα λατσσέ πράγματα πέσκε, αλλά οντουβά σο ο Ιεχωβά* βακερέλα λατσσέ πράγματα λέσκε.
