1, 2. Σο μπορίνασα τι κεράς για τι ατσσάς κι Ντεβλέσκι αγάπη;

 ΣΑΡΕ μανγκάσα τι αβάς ζουρανέ ντα υγιείς. Οτθάρ προσπαθίνασα τι χας χαμπίματα σο κερένα αμένγκε λατσσιπέ, τι κεράς γυμναστική ντα τι φροντίνας αμαρό σώμας. Παρόλο σο νανέ εύκολος ανταβά, ο αποτελέσματα ντένα-αμέν χαρά, ντα οτθάρ να τσσιναβάσα τι προσπαθίνας. Χρειαζίντιβελα όμως τι αβάς ζουρανέ ντα υγιείς εκχέ γιαβερέ τροπόσαρ-ντα.

² Παρόλο σο αβιλάμ πασέ κο Ιεχωβά, πρέπει τι συνεχίνας τι κεράς αμαρί φιλία λέσαρ πιο ζουρανί. Κάνα ο Ιούδας βακερντάς κο Χριστιανοί “τι ατσσικιαρέν πουμαρό νεαυτός κι Ντεβλέσκι αγάπη”, βακερντάς λένγκε σαρ κα κερένας-λες ανταβά. Γραφιντάς: «Τι μπαριαρέν τουμαρί άγια πίστη». (Ιούδα 20, 21) Άρα σαρ κα μπαριαράς αμαρί πίστη;

3-5. (α) Σαρ κα μανγκέλας ο Μπενγκ τι ντικχέν ο κανόνες ι Ιεχωβάσκε; (β) Σαρ νιωθίνενα τουμέν για το νόμοι ντα για το αρχές ι Ιεχωβάσκε;

³ Ισί σημαντικός τι αβάς σίγουροι ότι ο ντρομ ι Ιεχωβάσκο ισί ο πιο λατσσό. Ο Μπενγκ μανγκέλα τι αμντίνεν ότι ισί μπουτ πφαρό τι κερέν ο κανόνες ι Ντεβλέσκε τουμαρέ ζωγιάτε ντα ότι κα αβέν πιο ευτυχισμέ άμα τραμπίνενα  τουμέν κορκορέ σο ισί λατσσό ντα σο νανέ. Ο Μπενγκ προσπαθίνελα τι κερέλ-λες ανταβά κατά κήπος της Εδέμ. (Γένεση 3:​1-6) Ντα να τσσιναβέλα τι κερέλ σο νακχέλα λέσκε βαστέσταρ μέχρι αντιβές.

⁴ Τθερέλα δίκιος ο Μπενγκ; Λένα ο κανόνες ι Ιεχωβάσκε σαρί αμαρί ελευθερία; Νάα. Φιρειπείν, βακερέν ότι σαρ πφιρένα εκχέ σουκάρ παρκόστε, ντικχένα εκ βουτσσό φράχτης. Μπορεί τι σκεφτίνεν: “Σόσκε τσσουντέ ανταβά φράχτης ακατέ;” Αλλά αζομάν, ασουνένα εκχέ μποκχαλέ λιονταρίς αντράλ κατά φράχτης. Σαρ νιωθίνενα ακανά σο ντικχένα ο φράχτης; Σίγουρα ισινέν ευτυχισμέ σο αρακχαβέλα-τουμέν κατά μποκχαλό λιοντάρι. Ο λάφια ι Ιεχωβάσκε ισί σαρ ανταβά φράχτης ντα ο Μπενγκ σαρ ο λιοντάρι. Ο Λάφι ι Ντεβλέσκο βακερέλα αμένγκε: «Μα τσσιναβέν τι αβέν γκοντιαβέρ, τι αβέν τζανγκαντέ! Τουμαρό ντουσμάνι, ο Μπενγκ, ισί σαρ μποκχαλό λιοντάρι σο ρόντελα τι χαλ καέκ τζενές».​—1 Πέτρου 5:8.

⁵ Ο Ιεχωβά μανγκέλα τι τθεράς ι πιο λατσσί ζωή. Να μανγκέλα τι χουχαβέλ-αμέν ο Μπενγκ. Άκ’ σόσκε ντινάς-αμέν νόμους ντα αρχές σο αρακχαβένα-αμέν ντα κερένα-αμέν ευτυχισμέ. (Εφεσίους 6:​11) Ο Ιάκωβος γραφιντάς: «Οντουβά σο ρόντελα ντιπ αντρέ κο τέλειος νόμος σο ανέλα ελευθερία ντα ατσσόλα λέστε . . . κα αβέλ ευτυχισμέ οντουλέσαρ σο κερέλα».​—Ιακώβου 1:25.

6. Σαρ κα αβάς σίγουροι ότι ο ντρομ ι Ντεβλέσκο ισί ο πιο λατσσό;

⁶ Κάνα κεράσα οντουλά σο βακερέλα αμένγκε ο Ιεχωβά, αμαρί ζωή αβέλα πιο λατσσί ντα αμαρί φιλία λέσαρ ζουράνιβελα. Για παράδειγμας, κερέλα αμένγκε λατσσιπέ κάνα προσευχίντιβασα συνέχεια λέστε, σαρ μανγκέλα βοβ. (Ματθαίος 6:​5-8· 1 Θεσσαλονικείς 5:​17) Ισινάμ μπουτ χαρούμενοι κάνα ντάσα-λες καν ντα τζάσα κο συναθροίσεις για τι ντας-λες λατρεία ντα τι ντας ζορ ο εκ κο γιαβέρ ντα  κάνα κεράσα ο πιο λατσσό για τι κεράς λάφι ι Ιεχωβάσκε ντα τι σικλιαράς ι τζενέν. (Ματθαίος 28:​19, 20· Γαλάτες 6:2· Εβραίους 10:​24, 25) Κάνα ανάσα αμαρέ γκοντιάτε καζόμ μπουτ βοηθιντέ-αμέν σαρέ ανταλά τι ατσσικιαράς αμαρί πίστη ζουρανί, αβάσα ατζέ πιο σίγουροι ότι ο ντρομ ι Ιεχωβάσκο ισί ο πιο λατσσό.

7, 8. Σο κα βοηθίνελ-αμέν μα τι ανησυχίνας για το δοκιμασίες σο μπορεί τι αβέν κο μέλλον;

⁷ Μπορεί τι νακχέλ αμαρέ γκοντιάταρ ότι κο μέλλον κα αβέν δυσκολίες σο κα δοκιμάνεν αμαρί πίστη ντα ναστί κα νταϊντίνας-λεν. Άμα νιωθίνενα καέκ φαρ αντικάς, ανέν τουμαρέ γκοντιάτε ο λάφια ι Ιεχωβάσκε: «Με, ο Ιεχωβά, ισινόμ το Ντεβέλ, Οντουβά σο σικλιαρέλα-τουτ τι λατσσιμάσκε, Οντουβά σο οδηγίνελα-τουτ κο ντρομ σο πρέπει τι πφιρές. Μακάρι τι προσοχίνεας μο εντολές! Αζομάν τι ειρήνη  κα αβέλας σαρ εκ λεν ντα τι δικαιοσύνη σαρ ο κύματα ι ντεριαβάκε».​—Ησαΐας 48:​17, 18.

⁸ Άμα ντάσα καν ι Ιεχωβάς, αμαρί ειρήνη κα αβέλ σαρ λεν σο να σουκιόλα, ντα αμαρί δικαιοσύνη σαρ ο κύματα ι ντεριαβάκε σο να τσσιναβένα τι αβέν αβρί κο κούμι. Σο-ντα τι αβέλ αμαρέ ζωγιάτε, μπορίνασα τι ατσσάς πιστοί. Η Αγία Γραφή βακερέλα: «Μουκχ κο Ιεχωβά ο βάρος σο βάντεσα, ντα βοβ κα ντελ-τουτ ζορ. Ποτές να κα μουκχέλ τι περέλ ο δίκαιος».​—Ψαλμός 55:22.

9, 10. Σο μανγκέλα τι βακερέλ τι αβέλ εκ τζενό ζουρανό κι πίστη;

⁹ Καζόμ κερένα τουμαρί φιλία ι Ιεχωβάσαρ πιο ζουρανί, κα “ερεσέν κο σημείος τι αβέν ζουρανέ κι πίστη”. (Εβραίους 6:1) Σο μανγκέλα τι βακερέλ τι αβέλ εκ τζενό ζουρανό κι πίστη;

¹⁰ Να αβάσα ζουρανέ κι πίστη σάντε επειδή νακχένα ο μπρεσά. Για τι αβέλ-πες ανταβά, πρέπει τι κεράς ι Ιεχωβάς αμαρό πιο λατσσό Αμάλ ντα τι ντικχάς ο πράγματα σαρ ντικχέλα-λεν Βοβ. (Ιωάννης 4:​23) Ο Παύλος γραφιντάς: «Οντουλά σο τζουβντιόνα σαρ μανγκέλα ο σώμας τθερένα συνέχεια πουμαρέ γκοντιάτε ο πράγματα σο μπεϊντίνελα ο σώμας, αλλά οντουλά σο τζουβντιόνα σαρ μανγκέλα ο πνεύμας, ο πράγματα σο μπεϊντίνελα ο πνεύμας». (Ρωμαίους 8:5) Ο τζενό σο ισί ζουρανό κι πίστη να ντικχέλα σάντε σαρ κα νακχέλ λατσσές ή σαρ κα τθερέλ μπουτ πράγματα. Οκιά μπάνταρ, τσσουβέλα ανγκλάλ ι υπηρεσία ι Ιεχωβάσκι ντα τραμπίνελα τι κερέλ λατσσέ πράγματα πι ζωγιάτε. (Παροιμίες 27:​11· διάβανε Ιακώβου 1:2, 3) Να μουκχέλα πο νεαυτός τι κερέλ κάτι σο ισί λάθος. Τζανέλα σο ισί σωστός ντα μανγκέλα τι κερέλ-λες.

11, 12. (α) Σο βακερντάς ο Παύλος ι Χριστιανόνγκε σο «ισί σικλέ τι τσσουβέν πουμαρί γκοντί τι κχελέλ»; (β) Σαρ μοιάζελα εκ Χριστιανός σο μανγκέλα τι αβέλ ζουρανό κι πίστη εκχέ τζενέσαρ σο μανγκέλα τι αβέλ αθλητής;

 ¹¹ Πρέπει τι μαράς-αμέν για τι αβάς ζουρανέ κι πίστη. Ο απόστολος Παύλος γραφιντάς: «Ο χαμπέ ισί τζενένγκε σο ισί ζουρανέ κι πίστη, οντουλένγκε σο ισί σικλέ τι τσσουβέν πουμαρί γκοντί τι κχελέλ ντα αντικάς αγαβένα σο ισί σωστός ντα σο ισί λάθος». (Εβραίους 5:​14) Ο λάφια ανταλέ εδαφιόσκε κι πουρανί μπαλαμανί τσσιπ ανένα αμαρέ γκοντιάτε εκχέ τζενές σο κερέλα γυμναστική.

¹² Κάνα ντικχάσα εκχέ μπουτ λατσσέ αθλητής σε εκ αγώνας, αγαβάσα ότι κερντάς μπουτ σαάτια γυμναστική για τι αβέλ αζόμ λατσσό. Να μπιάντιλο αθλητής. Κάνα μπιάντιβελα εκ μαξίμι, να αγαβέλα ακριβώς σαρ τι χρησιμοποιήνελ πο βαστά ντα πο τσανγκά. Σιγά σιγά όμως, σικλιόλα τι ασταρέλ πράγματα ντα τι πφιρέλ. Άμα κα κερέλ γυμναστική, κα μπορίνελ τι αβέλ αθλητής. Αντικάς, χρειαζίντιβελα χρόνος ντα προσπάθεια για τι αβάς ζουρανέ κι πίστη.

13. Σο κα βοηθίνελ-αμέν τι σικλιάς τι σκεφτίνας σαρ ο Ιεχωβά;

¹³ Ανταλέ βιβλιόστε ντικχλάμ σαρ τι σκεφτίνας σαρ ο Ιεχωβά ντα τι ντικχάς ο πράγματα σαρ ντικχέλα-λεν βοβ. Σικλιλάμ τι εκτιμίνας ντα τι μανγκάς ο κανόνες ι Ιεχωβάσκε. Κάνα λάσα αποφάσεις, πουτσάσα αμαρό νεαυτός: “Καλά νόμοι ή αρχές ι Γραφιάκε μπορίναβα τι κεράβ ανταλέ περιπτωσιάτε; Σαρ κα κεράβ-λεν; Σο κα μανγκέλας ο Ιεχωβά τι κεράβ;”​—Διάβανε Παροιμίες 3:5, 6· Ιακώβου 1:5.

14. Σο πρέπει τι κεράς για τι μπαριαράς αμαρί πίστη;

¹⁴ Να τσσιναβάσα ποτές τι μπαριαράς αμαρί πίστη ι Ιεχωβάσκε. Ακριβώς σαρ χάσα χαμπίματα σο κερένα αμένγκε λατσσιπέ για τι τθεράς εκ ζουρανό σώμας, αντικάς πρέπει τι σικλιάς ι Ιεχωβάσκε για τι μπαριαράς αμαρί πίστη. Κάνα αρχισάλαμ τι κεράς μελέτη κατά Γραφή, σικλιλάμ  ο βασικές αλήθειες ι Ιεχωβάσκε ντα λέσκε ντρομέσκε. Αλλά καζόμ νακχένα ο ντιβεσά, πρέπει τι αγαβάς ο πράγματα σο ισί πιο αχόρτ. Ανταβά μανγκέλας τι σικαβέλ ο Παύλος κάνα βακερντάς: «Ο χαμπέ ισί τζενένγκε σο ισί ζουρανέ κι πίστη». Κάνα κεράσα οντουλά σο σικλιάσα, τθεράσα σοφία. Η Γραφή βακερέλα: «Η σοφία ισί ο πιο σημαντικός πράγμας».​—Παροιμίες 4:​5-7· 1 Πέτρου 2:2.

15. Καζόμ σημαντικός ισί τι μανγκάς μπαγιά ι Ιεχωβάς ντα αμαρέ πφραλέν;

¹⁵ Εκ τζενό μπορεί τι αβέλ ζουρανό ντα υγιής, αλλά τζανέλα ότι για τι ατσσόλ αντικάς πρέπει τι συνεχίνελ τι φροντίνελ πο νεαυτός. Αντικάς, εκ τζενό σο ισί ζουρανό κι πίστη τζανέλα ότι πρέπει τι μαρέλ-πες για τι ατσσικιαρέλ πι φιλία ι Ιεχωβάσαρ ζουρανί. Ο Παύλος βακερέλα αμένγκε: «Τι δοκιμάνεν τουμαρό νεαυτός για τι ντικχέν άμα ισινέν κι πίστη· τι σικαβέν τουμαρέ νεαυτόσκε σο ισινέν». (2 Κορινθίους 13:5) Όμως, να ερεσέλα αμαρί πίστη τι αβέλ ζουρανί. Πρέπει τι συνεχίνελ τι μπαριόλ αμαρί αγάπη-ντα ι Ιεχωβάσκε ντα αμαρέ πφραλένγκε. Ο Παύλος βακερντάς: «Άμα τθεράβα . . . γνώση, ντα άμα τθεράβα αζόμ μπαρί πίστη για τι κουνιαβάβ βεσά, αλλά να τθεράβα αγάπη, να ισινόμ τίποτα».​—1 Κορινθίους 13:​1-3.

16. Σαρ κα μανγκέλας ο Μπενγκ τι νιωθίνας;

¹⁶ Ο Μπενγκ μανγκέλα τι αμντίνας ότι σο-ντα τι κεράς ναστί ντάσα χαρά κο Ιεχωβά. Κα μανγκέλας τι χασαράς αμαρί ζορ ντα τι πακιάς ότι να κα νασέν αμαρέ προβλήματα. Να μανγκέλα τι ντας μπέσα αμαρέ πφραλένγκε ντα να μανγκέλα τι αβάς ευτυχισμέ. (Εφεσίους 2:2) Ο Μπενγκ τζανέλα ότι άμα σκεφτίνασα αντικάς, ανταβά κα κερέλ ζιάνι εμ αμένγκε εμ κι φιλία σο τθεράσα ι Ντεβλέσαρ.  Αλλά ο Ιεχωβά ντινάς-αμέν κάτι για τι βοηθίνελ-αμέν τι νασκιαράς ανταλά λάθος σκέψεις. Ντινάς-αμέν ελπίδα.

17. Καζόμ σημαντική ισί η ελπίδα;

¹⁷ Κο εδάφιος 1 Θεσσαλονικείς 5:8, η Γραφή βακερέλα ότι αμαρί ελπίδα ισί σαρ η περικεφαλαία σο αρακχαβέλας ι στρατιωτίσκο σορό κο τζένγκι, ντα βακερέλα ότι ισί «ελπίδα τι σώντιβας». Η ελπίδα σο τθεράσα ότι κα αβέν-πες οντουλά σο βακερντάς ο Ιεχωβά αρακχαβέλα αμαρί γκοντί ντα βοηθίνελα-αμέν τι νασκιαράς ο μπέτι σκέψεις.

18, 19. Σαρ ντέλας ζορ ι Ιησούς η ελπίδα;

¹⁸ Ο Ιησούς λέλας ζορ κατά ελπίδα σο τθερέλας. Η τελευταία ιράτ πριν τι μερέλ, αβιλί λέσκε η εκ δυσκολία παλάλ κατά γιαβέρ. Εκ λατσσό αμάλ λέσκο προδοντάς-λες. Εκ γιαβέρ βακερντάς ότι ούτε σο τζανέλας-λες. Γιαβερά μουκχλέ-λες ντα νασλέ. Οντουλά σο ισινέ λέσκε τθεμέσταρ γκιλέ λέσαρ κόντρα ντα μανγκένας τι τσσίντελ μπουτ ντα τι μερέλ. Σο βοηθιντάς ι Ιησούς τι νταϊντίνελ  σαρέ ανταλά δυσκολίες; «Για τη χαρά σο τθερέλας ανγκλά-πέστε νταϊντιντάς ο κας σο βασανιντέ-λες, ντα να χάλας-λες ανάγκη η λατζ, ντα μπεσλό κο δεξιά κατά θρόνος ι Ντεβλέσκο».​—Εβραίους 12:2.

¹⁹ Ο Ιησούς τζανέλας ότι, άμα κα ατσσόλας πιστός, κα ντέλας δόξα πι Νταντέστε ντα κα σικαβέλας ότι ο Μπενγκ ισί ψεύτης. Ανταγιά ελπίδα ντέλας-λες μπαρί χαρά. Τζανέλας επίσης ότι ατζεχάνικ κα αβέλας πάλι πασέ πι Νταντέστε κο ουρανός. Ανταγιά ελπίδα βοηθίνελας-λες τι νταϊντίνελ. Σαρ ο Ιησούς, αντικάς αμέν-ντα πρέπει τι τθεράς αμαρέ γιακχά κι ελπίδα σο τθεράσα. Ανταγιά ελπίδα κα βοηθίνελ-αμέν τι νταϊντίνας σο-ντα τι αβέλ-πες.

20. Σο κα βοηθίνελ-τουμέν τι σκεφτίνεν σαρ μανγκέλα ο Ιεχωβά;

²⁰ Ο Ιεχωβά ντικχέλα τουμαρί πίστη ντα τουμαρί υπομονή. (Ησαΐας 30:​18· διάβανε Μαλαχίας 3:​10) Βακερέλα ότι “κα ντελ-τουμέν οντουλά σο μανγκέλα τουμαρό γκι”. (Ψαλμός 37:4) Οτθάρ, τι τθερέν τουμαρέ γκοντιάτε  τουμαρί ελπίδα. Ο Μπενγκ μανγκέλα τι καλιαρέλ τουμαρό γκι ντα τι αμντίνεν ότι οντουλά σο βακερντάς ο Ιεχωβά να κα νικιόν ποτές μπαγιά. Τουμέν όμως μα μουκχέν ο μπέτι σκέψεις τι τασαβέν-τουμέν! Άμα αγαντέν ότι τουμαρί ελπίδα αβέλα μπίζουρανι, μανγκέν βοήθεια κατά Ιεχωβά. Ντεν-τουμέν γκοντί σο βακερένα ο εδάφια Φιλιππησίους 4:6, 7: «Μα ανησυχίνεν καέκ πραγμάσκε, αλλά σο-ντα τι αβέλ-πες, για τι βακερέν ι Ντεβλέσκε οντουλά σο μανγκένα λέσταρ, κερέν προσευχή, μολίνεν-λες ντα βακερέν λέσκε ευχαριστώ· ντα η ειρήνη ι Ντεβλέσκι σο ισί πιο οπρέ σαρέ οντουλένταρ σο αγαβένα κα αρακχαβέλ τουμαρό γκι ντα τουμαρί γκοντί αντράλ κατά Χριστός Ιησούς».

21, 22. (α) Σο τθερέλα πι γκοντιάτε ο Ιεχωβά τι κερέλ κι πφουβ; (β) Σο μανγκένα τι κερέν τουμέν;

²¹ Τι αρακχέν σαάτι για τι σκεφτίνεν ο λατσσέ πράγματα σο ισί ανγκλ’ αμέντε. Ατζεχάνικ, σαρέ κα ντεν λατρεία ι Ιεχωβάς. (Αποκάλυψη 7:9, 14) Ανέν χάνικ τουμαρέ γκοντιάτε σαρ κα αβέλ η ζωή κο νεβό ντουνιάς. Να νακχέλα αμαρέ γκοντιάταρ! Ο Μπενγκ, λέσκε δαίμονες ντα σαρό ο γκεραλιπέ κα χασάρντιβεν. Να κα νασφάλιβας ντα να κα μεράς. Αλλά κα ιστιάς κάθε ντιβές πφερντέ ζορ, χαρούμενοι σο ισινάμ τζουβντέ. Σαρέ κα κερέν μπουτί γιεκ για τι αβέλ η πφουβ παράδεισος. Σαρέ κα τθερέν λατσσό χαμπέ ντα εκ σουκάρ τθαν για τι μπεσέν. Ο τζενέ να κα αβέν γκεραλέ ούτε κα χαν-πες, αλλά κα σικαβέν λατσσιπέ ο εκ κο γιαβέρ. Τελικά, σαρέ ο τζενέ κι πφουβ κα χαιρίνεν «ι ελευθερία σο τθερένα με δόξα ο τσσαβέ ι Ντεβλέσκε».​—Ρωμαίους 8:21.

²² Ο Ιεχωβά μανγκέλα τι κερέν-λες τουμαρό πιο λατσσό Αμάλ. Τι μαρέν-τουμέν τι ντεν καν ι Ιεχωβάς ντα τι αβέν κάθε ντιβές ατζέ πιο πασέ λέστε. Μακάρι τι ατσσάς σαρέ αμέν κι Ντεβλέσκι αγάπη για πάντα!​—Ιούδα 21.