Ο Ιησούς σικλιαρντάς ότι ο Χριστιανοί πρέπει τι μπολντιόν. (Διαβάνεν Ματθαίος 28:19, 20) Αλλά σο ισί ο μπολντιπέ; Ντα σο μπορίνελα τι κερέλ εκ τζενό για τι πετυχίνελ ανταβά στόχος;

1. Σο ισί ο μπολντιπέ;

Ο λάφι «μπολάβα» μανγκέλα τι βακερέλ τσσουβάβα σαστό κο πανί. Κάνα μπολντιλό ο Ιησούς, τσσουντάς-πες σαστό αντρέ κο πανί κι Λεν Ιορδάνης, ντα σοράν «νικίστιλο κατά πανί». (Μάρκος 1:9, 10) Αντικάς, ο αληθινοί Χριστιανοί-ντα κάνα μπολντιόνα, τσσουβένα-πες σαστέ αντρέ κο πανί.

2. Σο σικαβέλα εκ τζενό κάνα μπολντιόλα;

Κάνα εκ τζενό μπολντιόλα, σικαβέλα ότι ντινάς πο λάφι κο Ιεχωβά Ντεβέλ τι τζουβντιόλ λέσκε. Σαρ κερέλα-λες ανταβά; Πριν τι μπολντιόλ, ο τζενό κερέλα κορκορό εκ προσευχή κο Ιεχωβά ντα βακερέλα λέσκε ότι μανγκέλα τι υπηρετίνελ-λες για πάντα. Ντέλα πο λάφι κο Ιεχωβά ότι κα ντελ λατρεία σάντε Λες ντα ότι ο πο σημαντικός πράγμας λέσκε ζωγιάτε κα αβέλ ο θέλημας ι Ντεβλέσκο. Τραμπίνελα “τι τσσιναβέλ τι τζουβντιόλ πέσκε ντα τι πφιρέλ” παλάλ κατά Ιησούς ντα τι κερέλ οντουλά σο σικλιαρντάς. (Ματθαίος 16:24) Κάνα εκ τζενό ντέλα πο λάφι τι τζουβντιόλ ι Ιεχωβάσκε ντα μπολντιόλα, τθερέλα ι ευκαιρία τι κερέλ πι φιλία ι Ιεχωβάσαρ ντα πι πφραλέντζαρ πο ζουρανί.

3. Σαρ μπορίνελα εκ τζενό τι ερεσέλ κο μπολντιπέ;

Για τι μπολντιός, πρέπει πρώτα τι σικλιός ι Ιεχωβάσκε ντα τι κερές ζουρανί τι πίστη λέστε. (Διαβάνεν Εβραίους 11:6) Καζόμ σικλιόσα πο μπουτ ντα ζουράνιβελα τι πίστη, κα ζουράνιβελ το μανγκιπέ-ντα, ή γιαβέρτουλους τι αγάπη, ι Ιεχωβάσκε. Κα μανγκές τι μουτθαβές κο τζενέ ο λατσσέ αμπέρια λέσκε ντα τι τζουβντιός σαρ βακερένα λέσκε κανόνες. (2 Τιμόθεο 4:2· 1 Ιωάννη 5:3) Από αζομάν σο εκ τζενό τζουβντιόλα “τροπόσαρ σο ισί σωστός ι Ιεχωβάσκε για τι κερέλ-λες τι χαιρίνελ σαρέ κο πράγματα”, μπορίνελα τι λελ ι απόφαση τι ντελ πο λάφι τι τζουβντιόλ ι Ντεβλέσκε ντα τι μπολντιόλ.—Κολοσσαείς 1:9, 10. a

 ΧΑΝΤΖΟΥΒ ΠΟ ΑΧΟΡΤ

4. Σο σικλιάσα κατά μπολντιπέ ι Ιησούσκο

Για τι σικλιός πο μπουτ ι Ιησούσκε μπολντιμάσκε, διαβάνεν Ματθαίος 3:13-17. Σοράν, συζητίνεν ο ερωτήσεις:

• Ισινέ μαξίμι ο Ιησούς κάνα μπολντιλό;

• Σαρ μπολντιλό; Τσσουντέ οπρά-λέστε σάντε χάνικ πανί;

Κάνα ο Ιησούς μπολντιλό, αρχισάλο τι κερέλ κι πφουβ ο σημαντικός έργος σο βακερντάας λέσκε ο Ντεβέλ. Διαβάνεν Λουκάς 3:21-23 ντα Ιωάννης 6:38 ντα σοράν συζητίνεν ι ερώτηση:

• Καβά έργος τσσουβέλας ο Ιησούς πρώτα πι ζωγιάτε σοράν πι μπολντιμάσταρ;

5. Ο μπολντιπέ ισί εκ στόχος σο αβέλα-πες τι κερές-λες

Κι αρχή, σάντε σο σκεφτίνεσα ότι κα ντες το λάφι κο Ιεχωβά για τι τζουβντιός λέσκε ντα ότι κα μπολντιός, μπέκιμ τι λέλα-τουτ νταρ. Άμα αβέλα-πες ανταβά, κερ πο ζουρανί τι φιλία ι Ντεβλέσαρ μέχρι τι αβές ντιπ σίγουρος ι μπολντιμάσκε. Σαρ κερντέ-λες ανταβά μερικά τζενέ; Ντικχέν ο ΒΙΝΤΕΟΣ.

Διαβάνεν Ιωάννης 17:3 ντα Ιακώβου 1:5 ντα σοράν συζητίνεν ι ερώτηση:

• Σο μπορίνελα τι βοηθίνελ εκχέ τζενές τι προετοιμάντιβελ ι μπολντιμάσκε;

1. (Α) Κάνα ντάσα αμαρό λάφι κο Ιεχωβά τι τζουβντιάς λέσκε, βακεράσα ότι μανγκάσα τι υπηρετίνας-λες για πάντα

2. (Β) Αμαρέ μπολντιμάσαρ, σικαβάσα οντουλένγκε σο ντικχένα-αμέν ότι ντινάμ αμαρό λάφι κο Ντεβέλ τι τζουβντιάς λέσκε

 6. Κάνα μπολντιάσα, νταλντίνασα αντρέ κι φαμιλί κι Ιεχωβάσκι

Κάνα μπολντιάσα, νταλντίνασα εκχέ ενωμέ φαμιλιάτε σο ισί σαρό κο ντουνιάς. Παρόλο σο να ισινάμ κατά ίδιος τθεμ ντα μπαριλάμ γιαβέρτουλους, πακιάσα σαρέ ο ίδια πράγματα ντα ντάσα καν κο ίδιοι κανόνες. Διαβάνεν Ψαλμός 25:14 ντα 1 Πέτρου 2:17 ντα σοράν συζητίνεν ι ερώτηση:

• Σαρ επηρεάνελα ο μπολντιπέ ι φιλία εκχέ τζενέσκι ι Ιεχωβάσαρ ντα ι τζενέντζαρ σο ντένα-Λες λατρεία;

 ΧΑΝΙΚ ΛΑΦΙΝΤΖΑΡ

Ο Ιησούς σικλιαρντάς ότι ο Χριστιανοί πρέπει τι μπολντιόν. Για τι πετυχίνελ εκ τζενό ανταβά στόχος, χρειαζίντιβελα τι τθερέλ ζουρανί πίστη κο Ιεχωβά, τι κερέλ οντουλά σο βακερέλα Βοβ ντα τι ντελ πο λάφι τι τζουβντιόλ Λέσκε.

Σο Σικλιλάν;

• Σο ισί ο μπολντιπέ, ντα σόσκε ισί σημαντικός;

• Σόσκε πρέπει εκ τζενό εμ τι ντελ πο λάφι κο Ιεχωβά τι τζουβντιόλ Λέσκε εμ τι μπολντιόλ;

• Σαρ μπορίνελα εκ τζενό τι κερέλ ανταλά ντούι πράγματα;