1, 2. (α) Σο προβλήματα τθερένα μπουτ τζενέ αντιβές, ντα καβά ισί ο αποτέλεσμας; (β) Καγιά σίγουρη ελπίδα ντένα-αμέν ο εδάφια Ησαΐας 41:​10, 13;

ΕΚ ΠΦΕΝ, σο ισί τακτική σκαπάνισσα ντα παντριμέ εκχέ πρεσβυτερόσαρ, βακερέλα: «Παρόλο σο τθεράβα εκ μπουτ λατσσό πνευματικός πρόγραμμας, μαράβα-μαν μπουτ μπρεσά με το άγχος. Ανταβά χαλαβέλα μι λίντρα, επηρεάνελα μι υγεία ντα ο τρόπος σο συμπεριφερίντιβαβα κο γιαβερά, ντα μερικές φορές μανγκάβα τι παρατίναβ-λεν».

² Μπορίνενα τι αγαβέν σαρ αισθάνελας ανταγιά πφεν; Δυστυχώς, επειδή τζουβντιάσα κο πφιρνό ντουνιάς κι Μπενγκέσκο, νακχάσα μπουτ μπαρέ δυσκολίες. Ντα σαρ εκ άγκυρα ασταρέλα εκ καράβι ντα να μουκχέλα-λες τι νασέλ, αντικάς ο άγχος-ντα μπορεί τι κερέλ-αμέν τι αισθάνας ότι βάντασα εκ μπουτ πφαρό φορτίος ή ότι χασαρντάμ αμαρό κουράγιος. (Παροιμίες 12:​25) Σόσκε μπορεί τι τθερένα άγχος; Μπορεί τι αβέν στεναχωριμέ επειδή μουλό εκ τζενό σο μανγκένας-λες μπουτ, επειδή ισινέν νασφαλέ ή επειδή μερικοί τζάνα τουμέντζαρ κόντρα. Ή μπορεί τι προσπαθίνενα τι ανέν τουμαρέ φαμιλιάτε ο αναγκαία, παρόλο σο ακανά νανέ μπουτί. Καζόμ νακχένα ο μπρεσά, η ντουκχ σο μπορεί τι τθερένα αντρέ τουμαρέ γκίστε μπορεί τι κερέλ-τουμέν τι χασαρέν τουμαρί ζορ ντα τουμαρί χαρά. Όμως μπορίνενα τι αβέν σίγουροι ότι ο Ντεβέλ ισί  έτοιμος τι βοηθίνελ-τουμέν.​—Διαβάνεν Ησαΐας 41:​10, 13.

3, 4. (α) Σαρ χρησιμοποιήνελα η Γραφή ι λέξη «βας»; (β) Σαρ μπορεί τι μουκχάς αμαρέ βαστά τι περέν τελέ;

³ Μερικές φορές, η Αγία Γραφή χρησιμοποιήνελα οντουλά σο τθερέλα αμαρό σώμας για τι σικαβέλ ο ιδιότητες εκχέ τζενέσκε ή ο πράγματα σο κερέλα. Για παράδειγμας, βακερέλα μπουτ φαρ ι βαστέσκε. Όταν η Αγία Γραφή βακερέλα ότι ο βαστά εκχέ τζενέσκε αβιλέ ζουρανέ, μπορεί τι σικαβέλα ότι οντουβά τζενό λιντάς κουράγιος, αβιλό πιο ζουρανό ντα ισί έτοιμος τι κερέλ πράγματα. (1 Σαμουήλ 23:​16· Έσδρας 1:6) Μπορεί επίσης τι σικαβέλα ότι κάποιος τθερέλα σιγουριά αντρά-πέστε ντα ελπίδα οντουλένγκε σο κα αβέν-πες.

⁴ Γιαβερά φορές, η Αγία Γραφή μπορεί τι βακερέλα ότι εκ τζενό μουκχέλα πο βαστά τι περέν τελέ. Ανταβά βακέρντιβελα ι τζενέσκε σο ισί απογοητευμέ ή χασαρντάς πι ελπίδα. (2 Χρονικών 15:7· Εβραίους 12:​12) Όταν τθερένα άγχος ή ισινέν κχινέ ή νιωθίνενα ότι τουμαρί φιλία ι Ιεχωβάσαρ νανέ αζόμ ζουρανί καζόμ ισινέας, μπορεί τι μανγκένα τι παρατίνεν-λεν. Κατάρ μπορίνενα τι λεν δύναμη; Σο ισί οντουβά σο κα κερέλ-τουμέν τι αβέν πιο ζουρανέ ντα τι προσπαθίνεν πιο μπουτ για τι νταϊντίνεν ντα τι τθερέν χαρά;

5. (α) Σαρ μπορεί τι νιωθίνας όταν τθεράσα προβλήματα, αλλά σο πρέπει τι ντας-αμέν γκοντί; (β) Σο κα ντικχάς;

⁵ Διαβάνεν Σοφονίας 3:​16, 17. Δεν πρέπει τι νταράς ούτε τι χασαράς αμαρό κουράγιος, ή γιαβέρτουλους τι μουκχάς αμαρέ βαστά τι περέν τελέ, κάνα τθεράσα προβλήματα. Αμαρό λατσσό Ντατ, ο Ιεχωβά, μανγκέλα αμένταρ τι μουκχάς οπρά-λέστε σο-ντα πρόβλημας τθεράσα. (1 Πέτρου 5:7) Ο Ιεχωβά πφαμπόλα αμένγκε σαρ πφαμπόλας για το λαός Ισραήλ-ντα. Βοβ βακερντάς λένγκε ότι λέσκο βας «να χουρντιλό αζόμ μπουτ σο να μπορίνελα τι σώνελ». Πάντα ισί έτοιμος τι σώνελ πι πιστέ υπηρετόν. (Ησαΐας 59:1) Ανταλέ μαθημάστε, κα ντικχάς τριν σημαντικά παραδείγματα αντράλ κατά Αγία Γραφή σο σικαβένα ότι ο Ιεχωβά εμ μανγκέλα εμ μπορίνελα τι ντελ δύναμη πι λαόστε για τι κερέλ λέσκο θέλημας ατζέ-ντα όταν ο προβλήματα ισί μπουτ μπαρέ. Για τι ντικχάς σαρ μπορίνενα τι λεν δύναμη ανταλέ παραδειγματένταρ.

6, 7. Σο σικλιαρέλα-αμέν η νίκη σο λιντέ ο Ισραηλίτες κο τζένγκι ι Αμαληκιτέντζαρ;

⁶ Όταν ο Ισραηλίτες ελευθερωσάλε κατά Αίγυπτος, ο Αμαληκίτες κερντέ λέντζαρ τζένγκι. Ο Μωυσής βακερντάς κο Ιησούς του Ναυή, σο ισινέ εκ μπίνταρανο τζενό, τι οδηγίνελ ι Ισραηλιτέν κο τζένγκι. Σοράν, ο Μωυσής γκιλό με τον Ααρών ντα τον Χουρ εκχέ βεσέστε σο ισινέ οτθέ πασέ. Μπορίνενας τι ντικχέν οτθάρ ο τζένγκι σο αβέλας-πες. Μήπως οντουλά τριν μουρσά γκιλέ οτθέ επειδή νταρένας τι πολεμίνεν; Σίγουρα όχι!

⁷ Ο Μωυσής ακολουθιντάς εκ σχέδιος σο βοηθιντάς ι Ισραηλιτέν τι νικίνεν ι Αμαληκιτέν. Ασταρέλας πι ντουέ βαστέντζαρ ι μαγκούρα ι αληθινέ Ντεβλέσκι ντα βάντελας-λα οπρέ. Όταν ο Μωυσής κερντάς-λες ανταβά, ο Ιεχωβά ντέλας ζορ κο Ισραηλίτες ντα νικίνενας ι Αμαληκιτέν. Κάνα όμως αρχισάλε τι περέν λέσκε βαστά επειδή κχινίλοας, αρχισάλε τι νικίνεν ο Αμαληκίτες. Ο Ααρών ντα ο Χουρ βοηθιντέ-λες αμέσως. «Λιντέ εκ μπαρ ντα τσσουντέ-λες τι μπεσέλ. Σοράν ο Ααρών ντα ο Χουρ ασταρένας ο βαστά του Μωυσή, κάθε εκ λένταρ από εκ βας, για τι μπορίνεν τι ατσσόν σταθερά  μέχρι τι αράτιβελ». Βα, ο ζουρανό βας ι Ιεχωβάσκο βοηθιντάς ι Ισραηλιτέν τι νικίνεν.​—Έξοδος 17:​8-13.

8. (α) Σο κερντάς ο Ασά όταν ο Αιθίοπες γκιλέ τι πολεμίνεν με τον Ιούδα; (β) Σαρ μπορίνασα τι μοιάζας κο Ασά;

⁸ Επίσης, ο Ιεχωβά ισινέ έτοιμος τι χρησιμοποιήνελ πο ζουρανό βας για τι βοηθίνελ πι λαός κο ντιβεσά του Βασιλιά Ασά. Η Γραφή κερέλα λάφι για μπουτ στρατούς, αλλά ο πιο μπαρό στρατός ισινέ του Ζερά του Αιθίοπα, σο τθερέλας 1.000.000 εκπαιδευμέ στρατιωτέν. Ο στρατός της Αιθιοπίας ισινέ ντούι φαρ πιο μπαρό κατά στρατός του Ασά. Μήπως ο Ασά αγχωσάλο, νταρασάλο ή χασαρντάς πο κουράγιος; Μήπως μουκχλάς πο βαστά τι περέν τελέ; Να! Ο Ασά αμέσως μανγκλάς βοήθεια κατά Ιεχωβά. Σίγουρα ντικχίντιβελας ότι να κα μπορίνενας τι νικίνεν ο τζένγκι με τους Αιθίοπες. «Αλλά ο Ντεβέλ σαρέ μπορίνελα τι κερέλ-λεν». (Ματθαίος 19:​26) Ο Ντεβέλ χρησιμοποιηντάς πι μπαρί ζορ ντα «κερντάς τους Αιθίοπες τι χασαρέν κατά Ασά», σο «τθερέλας σαστί πι καρδιά ι Ιεχωβάσαρ σαρέ πι ζωγιάτε».​—2 Χρονικών 14:​8-13· 1 Βασιλέων 15:14.

9. (α) Καβά πράγμας να σταματιντάς τον Νεεμία τι χτίνελ πάλι ο βουτσσέ ντουβάρια της Ιερουσαλήμ; (β) Σαρ απαντιντάς ο Ντεβέλ κι προσευχή του Νεεμία;

⁹ Όταν ο Νεεμίας γκιλό κι Ιερουσαλήμ, σο ντικχλάς; Ντικχλάς ότι ο Ιουδαίοι σταματισάλε τι χτίνεν ο βουτσσέ ντουβάρια της Ιερουσαλήμ επειδή ο ντουσμάνια κατά γιαβερά τθεμά νταραβένας-λεν. Επειδή να μπορίνενας τι αρακχαβέν ι Ιερουσαλήμ, ο Ιουδαίοι χασαρντέας πουμαρό κουράγιος. Σαρ νιωσάλο ο Νεεμίας; Μήπως βοβ-ντα χασαρντάς πο κουράγιος ντα μουκχλάς πο βαστά τι περέν τελέ; Να! Σαρ κερντάς ο Μωυσής, ο Ασά ντα γιαβερά πιστοί υπηρέτες ι Ιεχωβάσκε, αντικάς ο Νεεμίας-ντα πάντα μανγκέλας βοήθεια κατά Ιεχωβά. Αζομάν, πάλι ο Νεεμίας προσευχισάλο κο Ιεχωβά για τι βοηθίνελ-λες, ντα ο Ιεχωβά απαντιντάς λέσκε. Ο Ντεβέλ χρησιμοποιηντάς “πι μπαρί ζορ” ντα “πο ζουρανό βας” για τι ντελ δύναμη κο Ιουδαίοι. (Διαβάνεν Νεεμίας 1:​10· 2:​17-20· 6:9) Τουμέν πακιάνα ότι ο Ιεχωβά χρησιμοποιήνελα αντιβές-ντα “πι μπαρί ζορ” ντα “πο ζουρανό βας” για τι ντελ δύναμη πι υπηρετόν;

10, 11. (α) Σαρ προσπαθίνελα ο Σατανάς τι κερέλ αμαρέ βαστά τι περέν τελέ; (β) Σο ντέλα-αμέν ο Ιεχωβά για τι λας κουράγιος ντα ζορ; (γ) Σαρ βοηθίντιλεν οντουλένταρ σο σικλιαρέλα-τουμέν ο Ιεχωβά;

¹⁰ Μπορίνασα τι αβάς σίγουροι ότι ο Μπενγκ ποτές να κα μουκχέλ πο βαστά τι περέν τελέ. Κα συνεχίνελ τι τζαλ αμέντζαρ κόντρα για τι τσσιναβέλ-αμέν οντουλένταρ σο κεράσα ι Ντεβλέσκε. Χρησιμοποιήνελα κυβερνήσεις, παπαζίν ντα αποστάτες για τι βακερέλ ψέματα ντα τι νταραβέλ-αμέν. Σο μανγκέλα τι καταφερίνελ; Μανγκέλα τι τσσιναβάς τι βακεράς ο λατσσέ αμπέρια ι Βασιλειάκε. Αλλά ο Ιεχωβά εμ μπορίνελα εμ μανγκέλα τι βοηθίνελ-αμέν, ντα ντέλα-αμέν πο άγιος πνεύμας για τι λας δύναμη. (1 Χρονικών 29:​12) Ισί μπουτ σημαντικός  τι μανγκάς ο πνεύμας ι Ντεβλέσκο για τι αντιμετωπίνας ι Σατανάς ντα λέσκε πφιρνέ ντουνιάς. (Ψαλμός 18:​39· 1 Κορινθίους 10:​13) Επίσης, εκτιμίνασα μπουτ ι βοήθεια σο λάσα κατά Λάφι ι Ντεβλέσκο. Ντα σκεφτίνεν καζόμ πράγματα σικλιάσα κατά έντυπα σο τθεράσα κάθε μάσεκ. Ο λάφια σο αρακχάσα κο εδάφια Ζαχαρίας 8:9, 13 (διαβάνεν) βακέρντιλε κάνα ο Ισραηλίτες χτίνενας πάλι ο ναός κι Ιερουσαλήμ, αλλά μπορίνενα τι βοηθίνεν αμέν-ντα αντιβές.

¹¹ Εκ γιαβέρ τρόπος σο ο Ιεχωβά ντέλα-αμέν ζορ ισί οντουλένταρ σο σικλιάσα κο Χριστιανικές συναθροίσεις, κο συνελεύσεις ντα κο θεοκρατικές σχολές. Ανταλά σο σικλιάσα μπορίνενα τι βοηθίνεν-αμέν τι υπηρετίνας ι Ντεβλές επειδή μανγκάσα-λες, τι τσσουβάς στόχους ντα τι κεράς αντρέ κι εκκλησία ο μπουτ ευθύνες σο τθεράσα. (Ψαλμός 119:​32) Τουμέν κερένα μπαρέ προσπάθειες για τι λεν δύναμη οντουλένταρ σο σικλιαρέλα-τουμέν ο Ιεχωβά;

12. Σο πρέπει τι κεράς για τι ατσσάς ζουρανέ;

¹² Ο Ιεχωβά βοηθιντάς πι λαός τι νικίνεν ι Αμαληκιτέν ντα τους Αιθίοπες, ντα ντινάς κο Νεεμίας ντα κο Ιουδαίοι ι ζορ τι χτίνεν ο βουτσσέ ντουβάρια κι Ιερουσαλήμ. Αντικάς, ο Ντεβέλ κα ντελ αμέντε-ντα ι ζορ τι συνεχίνας τι κεράς λάφι λέσκε, παρόλο σο τθεράσα άγχος ντα παρόλο σο τζάνα αμέντζαρ κόντρα ο τζενέ ντα να ασουνένα-αμέν. (1 Πέτρου 5:​10) Ο Ιεχωβά να κα κερέλ θαύματα για τι νασκιαρέλ αμαρέ προβλήματα. Αμέν πρέπει τι κεράς μερικά πράγματα. Σο πρέπει τι κεράς; Πρέπει τι διαβάνας κάθε ντιβές ο Λάφι ι Ντεβλέσκο, τι κεράς προετοιμασία ντα τι τζας κο συναθροίσεις κάθε εβδομάδα, τι συνεχίνας αμαρί προσωπική μελέτη ντα αμαρί φαμιλιάκι λατρεία, ντα τι στηρίντιβας κο Ιεχωβά με προσευχή. Ποτές δεν πρέπει τι μουκχάς τίποτα τι ταρτίνελ αμαρί προσοχή κατά πράγματα σο ντέλα-αμέν ο Ιεχωβά για τι τθεράς κουράγιος ντα ζορ. Άμα νιωθίνενα ότι περένα τουμαρέ βαστά τελέ επειδή να κερένα κάτι ανταλέ πραγματένταρ, μανγκέν βοήθεια κατά Ντεβέλ. Σοράν, ντικχέν σαρ ο πνεύμας ι Ντεβλέσκο «κερέλα-τουμέν εμ τι μανγκέν εμ τι τθερέν δύναμη για τι κερέν πράγματα». (Φιλιππησίους 2:​13) Σο μπορίνενα τι κερέν όμως για τι ντεν ζορ κο βαστά κι γιαβερένγκε;

13, 14. (α) Σαρ λιντάς δύναμη εκ πφραλ αφού μουλί λέσκι ρομνί; (β) Σαρ μπορίνασα τι ντας δύναμη ι γιαβερέν;

¹³ Ο Ιεχωβά ντέλα-αμέν σαρό κο ντουνιάς πφραλέν ντα πφενίν σο μανγκένα-αμέν ντα μπορίνενα τι ντεν-αμέν δύναμη. Ο απόστολος Παύλος βακερντάς: «Κερέν ζουρανέ ο βαστά σο ιμπλάντιβενα ντα ο κοτσά σο να τθερένα ζορ, ντα συνεχίνεν τι κερέν ίσια ο ντρομά τουμαρέ πιντρένγκε». (Εβραίους 12:​12, 13) Μπουτ Χριστιανοί κο πουρανέ μπρεσά λιντέ ασακί βοήθεια πουμαρέ πφραλένταρ ντα πουμαρέ πφενίνταρ. Ο ίδιος αβέλα-πες αντιβές-ντα. Σκεφτίνεν εκ παράδειγμας. Εκ πφραλ σο μουλί λέσκι ρομνί ντα νακχλάς γιαβερά-ντα μπαρέ προβλήματα βακερντάς: «Σικλιλόμ ότι να μπορίνασα τι τραμπίνας κάνα, καζόμ φαρ ντα σο προβλήματα κα αβέν. Η προσευχή ντα η προσωπική μελέτη ισινέ σαρ εκ σωσίβιος σο να μουκχλάς-μαν τι βουλιάναβ. Επίσης, λιντόμ μπαρί παρηγοριά κατά βοήθεια σο ντινέ-μαν μο πνευματικά πφραλά ντα πφενιά. Αγαντόμ καζόμ σημαντικός ισί τι τθεράβ εκ λατσσί φιλία ι Ιεχωβάσαρ πριν τι αβέν προβλήματα».

¹⁴ Ο Ααρών ντα ο Χουρ, κο τζένγκι ι Αμαληκιτέντζαρ, ασταρένας ο βαστά του Μωυσή για τι ντεν-λες ζορ. Αντιβές, αμέν-ντα  μπορίνασα τι αρακχάς τρόπους για τι βοηθίνας ι γιαβερέν. Μερικά πφραλά ισί πφουρέ, νασφαλέ, κορκορέ, η φαμιλί λένγκι τζάλα λέντζαρ κόντρα ή μουλό λένταρ εκ τζενό. Μπορίνασα επίσης τι ντας δύναμη κο τσσαβέ ντα κο τσσαγιά σο πιένενα-λεν ο γιαβερά τι κερέν μπέτι πράγματα ή τι αβέν επιτυχιμέ ανταλέ ντουνιάστε. (1 Θεσσαλονικείς 3:​1-3· 5:​11, 14) Ρόντεν τρόπους για τι σικαβέν καζόμ μπουτ ενδιαφερίντιβενα ι γιαβερένγκε όταν ισινέν κι Αίθουσα Βασιλείας, κο έργος κι Ντεβλέσκο, όταν χάνα λέντζαρ ή όταν κερένα λέντζαρ λάφι κο τηλέφωνος.

15. Σαρ μπορίνενα αμαρέ λατσσέ λάφια τι επηρεάνεν αμαρέ πφραλέν ντα αμαρέ πφενίν;

¹⁵ Αφού ο Ασά νικιντάς ι μπαρέ στρατός κατά Αιθιοπία, ο προφήτης Αζαρίας ντινάς κουράγιος λέστε ντα λέσκε λαόστε όταν βακερντάς: «Αλλά τουμέν τι τθερέν θάρρος ντα μα τι μουκχέν τουμαρέ βαστά τι περέν τελέ, ντα κα ευλογίντιβεν οντουλένγκε σο κερένα». (2 Χρονικών 15:7) Ανταβά κερντάς τον Ασά τι κερέλ μπουτ αλλαγές για τι ανέλ πάλι ι αληθινή λατρεία. Αντικάς, τουμαρέ-ντα λατσσέ λάφια μπορίνενα τι ντεν κουράγιος ι γιαβερέν ντα τι βοηθίνεν-λεν τι συνεχίνεν τι υπηρετίνεν ι Ιεχωβάς. (Παροιμίες 15:​23) Ποτές μα τι μπιστρέν καζόμ μπαρί δύναμη λένα τουμαρέ πφραλά κάνα ασουνένα τουμαρέ λατσσέ απαντήσεις κο συναθροίσεις.

16. Σαρ μπορίνενα ο πρεσβύτεροι τι μοιάζεν κο Νεεμίας; Βακερέν σαρ μερικά πφραλά ντα πφενιά βοηθιντέ-τουμέν.

¹⁶ Ο Νεεμίας ντα ο Ιουδαίοι κερντέ ζουρανέ πουμαρέ βαστά επειδή ο Ιεχωβά  βοηθιντάς-λεν. Βον κερντέ ο βουτσσέ ντουβάρια της Ιερουσαλήμ σε 52 ντιβεσά! (Νεεμίας 2:​18· 6:​15, 16) Ο Νεεμίας να ντικχέλας απλά ι γιαβερέν τι κερέν μπουτί. Βοβ-ντα βοηθιντάς τι κερντιόν ο βουτσσέ ντουβάρια της Ιερουσαλήμ. (Νεεμίας 5:​16) Αντιβές-ντα, μπουτ πρεσβύτεροι μοιάζενα κο Νεεμίας όταν βοηθίνενα τι χτίντιβεν ο Αίθουσες Βασιλείας ή όταν καθαρίνενα-λεν ντα περιποιήνενα-λεν. Ανταλά πφραλά, σο μανγκένα-αμέν μπουτ, τζάνα τι ντικχέν ντα τι ντεν δύναμη ι πφραλέν ντα ι πφενίν σο «ανησυχίνενα αντρέ πουμαρέ γκίστε» ντα νικιόνα λέντζαρ κο έργος κι Ντεβλέσκο.​—Διαβάνεν Ησαΐας 35:​3, 4.

17, 18. Κάνα τθεράσα προβλήματα ή άγχος, καλέ πραγμάσκε πρέπει τι αβάς σίγουροι;

¹⁷ Όταν υπηρετίνασα γιεκ αμαρέ πφραλέντζαρ ντα αμαρέ πφενίντζαρ, αβάσα πιο ενωμέ αντρέ κι εκκλησία. Επίσης, ανταβά βοηθίνελα-αμέν τι τθεράς λατσσέ αμαλέν ντα κερέλα-αμέν τι αβάς πιο σίγουροι ότι η Βασιλεία ι Ντεβλέσκι κα ανέλ μπαρέ ευλογίες μπουτ σουγκό. Όταν κεράσα πιο ζουρανέ ο βαστά ι γιαβερένγκε, βοηθίνασα-λεν τι νταϊντίνεν ο δυσκολίες σο νακχένα ντα τι ατσσικιαρέν ι ελπίδα σο τθερένα. Ντα όταν βοηθίνασα ι γιαβερέν, αμαρέ βαστά αβένα πιο ζουρανέ ντα ισινάμ πιο σίγουροι οντουλένγκε σο κα ανέλ ο Ντεβέλ.

¹⁸ Όταν σκεφτίνασα σαρ ο Ιεχωβά βοηθίνελας ντα αρακχαβέλας πι πιστέ υπηρετόν κο πουρανέ μπρεσά, η πίστη ντα η εμπιστοσύνη σο τθεράσα λέστε αβένα πιο ζουρανέ. Άρα, όταν τθερένα προβλήματα ντα άγχος, “μα μουκχέν τουμαρέ βαστά τι περέν τελέ”! Μπορίνενα τι αβέν σίγουροι ότι, άμα προσευχίντιβενα κο Ιεχωβά για τι βοηθίνελ-τουμέν, λέσκο ζουρανό βας κα ντελ-τουμέν ζορ ντα κα γκερέλ-τουμέν κο ευλογίες σο κα ανέλ η Βασιλεία ατζεχάνικ.​—Ψαλμός 73:​23, 24.