Ο ΤΖΕΝΕ

Σο βακερέλα η Γραφή: Ο Ντεβέλ “να κερντάς ι πφουβ χωρίς λόγος, αλλά λατσσαρντάς-λα για τι μπορίνας τι μπεσάς λάτε”.​—ΗΣΑΪΑΣ 45:18.

Η ΠΦΟΥΒ

Σο βακερέλα η Γραφή: «Γενιά νασέλα ντα γενιά αβέλα, αλλά η πφουβ ατσσόλα για πάντα».​—ΕΚΚΛΗΣΙΑΣΤΗΣ 1:4.

ΣΟ ΜΑΝΓΚΕΛΑ ΤΙ ΒΑΚΕΡΕΛ ΑΝΤΑΒΑ: Σαρ βακερέλα η Γραφή, η πφουβ να κα αβέλ ποτές καταστροφή ντα κα μπεσάς πάντα λάτε. Άρα, σο ισί ο τέλος ανταλέ ντουνιάσκο;

ΣΚΕΦΤΙΝΕΝ: Η Γραφή βακερέλα ότι ο τέλος ι ντουνιάσκο σο κα αβέλ-πες ισί σαρ ο τέλος σο αβιλό-πες κο ντιβεσά κι Νωέσκε. Η πφουβ αζομάν ισινέ “πφερντί βία”. (Γένεση 6:​13) Ο Νώε όμως ισινέ δίκαιος τζενό. Οτθάρ, ο Ντεβέλ αρακχαντάς ι ζωή ι Νωέσκι ντα λέσκι φαμιλιάκι αλλά αντάς εκ Κατακλυσμός σο κερντάς καταστροφή ι πφιρνέ τζενέν. Η Γραφή βακερέλα οντουλέσκε σο αβιλόας-πες αζομάν: «Ο ντουνιάς οντουλά μπρεσά αβιλό καταστροφή κάνα πφερντιλό πανίσαρ». (2 Πέτρου 3:6) Ανταβά ισινέ ο τέλος εκχέ ντουνιάσκο. Αλλά σο ισινέ οντουβά σο αβιλό καταστροφή; Να ισινέ η πφουβ, αλλά ο πφιρνέ τζενέ σο τζουβντιόνας οπράλ κι πφουβ. Οτθάρ, κάνα η Γραφή κερέλα λάφι για το τέλος ι ντουνιάσκο, να μανγκέλα τι βακερέλ ότι κα καταστραφίντιβελ η πφουβ, μανγκέλα τι βακερέλ ότι κα αβέν καταστροφή ο πφιρνέ τζενέ σο τζουβντιόνα κι πφουβ ντα ανταβά ντουνιάς σο κερντιλό λένταρ.

Ο ΠΡΟΒΛΗΜΑΤΑ ΝΤΑ Ο ΠΦΙΡΝΙΠΕ

Σο βακερέλα η Γραφή: «Χάνικ ατζέ, ντα ο πφιρνέ να κα υπαρχίντιβεν· κα ντικχές οτθέ σο ισινέ, ντα βον να κα υπαρχίντιβεν. Ο τζενέ σο ισί κοβλέ γκίσκε όμως κα τθερέν πουμένγκε ι πφουβ ντα κα αβέν ευτυχισμέ επειδή κα τθερέν μπουτ ειρήνη». ​—ΨΑΛΜΟΣ 37:​10, 11.

ΣΟ ΜΑΝΓΚΕΛΑ ΤΙ ΒΑΚΕΡΕΛ ΑΝΤΑΒΑ: Ο Κατακλυσμός σο αβιλό-πες κο ντιβεσά κι Νωέσκε να νασκιαρντάς για πάντα ο πφιρνιπέ. Σοράν κατά Κατακλυσμός, αβιλέ πάλι πφιρνέ τζενέ κι πφουβ σο τσσιντικιαρντέ μπουτ ι γιαβερέν. Ατζεχάνικ όμως, ο Ντεβέλ κα νασκιαρέλ για πάντα ο πφιρνιπέ. Σαρ βακερντάς ο ψαλμωδός: «Ο πφιρνέ να κα υπαρχίντιβεν». Ο Ντεβέλ κα νασκιαρέλ ο πφιρνιπέ αντράλ πι Βασιλειάταρ​—εκ κυβέρνηση σο κα κερέλ κουμάντος κατά ουρανός σαρί κι πφουβ σο κα αβέλ πφερντί τζενέντζαρ σο ντένα καν ι Ντεβλές.

ΣΚΕΦΤΙΝΕΝ: Κα μανγκέν τι ντεν καν κι Βασιλεία κι Ντεβλέσκι οντουλά σο κερένα κουμάντος ακανά; Η Γραφή σικαβέλα ότι να κα μανγκέν. Κα κερέν ο μπαρό λάθος τι τζαν κόντρα κι Βασιλεία κι Ντεβλέσκι. (Ψαλμός 2:2) Σο κα αβέλ-πες; Η Βασιλεία ι Ντεβλέσκι κα νασκιαρέλ σαρέ ι τζενένγκε κυβερνήσεις ντα «σάντε βόι κα ατσσόλ για πάντα». (Δανιήλ 2:​44) Αλλά σόσκε πρέπει τι νασέλ ι τζενένγκι κυβέρνηση;

Σο βακερέλα η Γραφή: «Ο τζενό σο πφιρέλα να τθερέλα ο δικαίωμας τι αποφασίνελ κορκορό κατέ κα τζαλ».​—ΙΕΡΕΜΙΑΣ 10:​23.

ΣΟ ΜΑΝΓΚΕΛΑ ΤΙ ΒΑΚΕΡΕΛ ΑΝΤΑΒΑ: Ο τζενέ να κερντιλέ για τι κερέν-πες κουμάντος. Ναστί κερένα κουμάντος γιαβέρ τζενέν ντα ναστί νασκιαρένα λένγκε προβλήματα.

ΣΚΕΦΤΙΝΕΝ: Η Μπριτάνικα Ακαντέμικ (Britannica Academic) βακερέλα ότι κάθε κυβέρνηση κορκορί ντικχίντιβελα ότι ναστί «νασκιαρέλα ο προβλήματα σαρ ισί ο τσοροριπέ, η μποκχ, ο νασφαλίματα, ο φυσικές καταστροφές, ο τζένγκι ντα γιαβερά άγρια πράγματα». Ντα σοράν βακερέλα: «Μερικοί . . . πακιάνα ότι σάντε εκ κυβέρνηση σο κα κερέλ κουμάντος σαρί ι πφουβ μπορίνελα τι νασκιαρέλ ανταλά προβλήματα». Όμως, ατζέ-ντα άμα κα αβένας σαρέ ο κυβερνήσεις ι τζενένγκε γιεκ, ο ντουνιάς κα συνεχίνελας τι κερντιόλ κουμάντος ατελείς τζενένταρ σο ναστί νακχαβένα ο δυσκολίες σο βακερντάμ πο οπρέ. Σάντε η Βασιλεία ι Ντεβλέσκι τθερέλα ι ζορ τι νασκιαρέλ σαρέ ο προβλήματα ι τζενένγκε κι πφουβ.

Οτθάρ, σαρ βακερέλα η Γραφή, ο λατσσέ τζενέ δεν πρέπει τι νταρέν κατά τέλος ανταλέ πφιρνέ ντουνιάσκο. Οκιά μπάνταρ, πρέπει τι μπεκλεντίνεν λέσκε σαρ σαρ, επειδή ανταβά πφιρνό ντουνιάς κα καταστραφίντιβελ ντα κα αβέλ εκ σουκάρ νεβό ντουνιάς ι Ντεβλέσκο!

Κάνα κα αβέν-πες σαρέ ανταλά; Ο γιαβέρ θέμας κα σικαβέλ σο βακερέλα η Γραφή.