Ατζεχάνικ, κάνα η νεβί κυβέρνηση κο ουρανός κα κερέλ κουμάντος σαρέ ι τζενέν, η πφουβ κα αβέλ εκ τθαν σο ο τζενέ κα αβέν ευτυχισμέ ντα ενωμέ ντα κα κερέν λατσσί μπουτί σο κα πφερέλ-λεν. Ο Ντεβέλ τραμπιντάς ι Ιησού Χριστός τι κερέλ κουμάντος ι πφουβ. Αντιβές, μπουτ τζενέ σο κερένα κουμάντος να αρακχαβένα μπαγιά ι τζενέν. Αλλά ο Ιησούς νανέ σαρ λέντε σόσκε πάντα κα κερέλ ο πο λατσσό ι τζενένγκε. Κα κερέλ κουμάντος μανγκιμάσαρ, ντα κα αβέλ εκ Βασιλιάς σο κα σικαβέλ λατσσιπέ, κα τζιτζίνελ ι γιαβερένγκε ντα κα αβέλ δίκαιος.​—Ησαΐας 11:4.

Ο τζενέ να κα αβέν τρουγιμέ επειδή κα τθερέν γιαβέρ τθεμ ή φυλή. Κα αβέν εκ ενωμέ λαός. (Αποκάλυψη 7:9, 10) Σαρέ ο τζενέ σο κα τζουβντιόν κι πφουβ κα μανγκέν ι Ντεβλές ντα ι γιαβερέ τζενέν ντα κα κερέν μπουτί γιεκ με ειρήνη για τι κερέν τι νικιόλ μπαγιά οντουβά σο τθερέλας ο Ντεβέλ πι γκοντιάτε​—τι φροντίνεν πουμαρό κχερ, ι πφουβ.​—Ψαλμός 115:16.

Κάνα η Βασιλεία ι Ντεβλέσκι κα κερέλ κουμάντος, ο καιρός κα αβέλ κι Ντεβλέσκε βαστά ντα κα αβέλ ισορροπημέ. (Ψαλμός 24:1, 2) Κάνα ο Ιησούς τσσιναντάς εκ μπαρί καταιγίδα, σικαντάς σο μπορίνελα τι κερέλ ι Ντεβλέσκε ζοριάσαρ. (Μάρκος 4:​39, 41) Κάνα κα κερέλ κουμάντος ο Χριστός, καέκ να κα νταρέλ μα τι αβέν-πες φυσικές καταστροφές. Κι Ντεβλέσκι Βασιλεία, κα τζουβντιάς με ειρήνη ι ζωόντζαρ ντα να κα αβέν-πες καταστροφές.​—Ωσηέ 2:18.

Σαρέ κα τθερέν λατσσί υγεία. Καέκ να κα νασφάλιβελ, να κα πφουρίλιβελ ντα να κα μερέλ. (Ησαΐας 35:5, 6) Ο τζενέ κα τθερέν εκ μπουτ σουκάρ ντα πάκι πφουβ, σαρ οντιά σο τθερένας ο πρώτα τζενέ κο κήπο της Εδέμ. Κο νεβό ντουνιάς, σαρ κι Εδέμ-ντα, η πφουβ κα νικαβέλ μπουτ χαμπέ ντα σαρέ ο τζενέ σο κα μπεσέν κι πφουβ κα τθερέν πο μπουτ χαμπέ οντουλέσταρ-ντα σο χρειαζίντιβενα. (Γένεση 2:9) Σαρ ο πουρανό λαός ι Ντεβλέσκο, ο Ισραήλ, σαρέ κο Παράδεισος “κα χαν πουμαρό μαντρό μέχρι τι τσαλιόν”.​—Λευιτικό 26:4, 5.

Κάνα κα κερέλ κουμάντος ι Ντεβλέσκι Βασιλεία σαρί κι πφουβ, σαρέ ο τζενέ κα τθερέν ειρήνη ντα κα σικαβέν λατσσιπέ ντα δικαιοσύνη ο εκ ι γιαβερέσκε. Να κα αβέν τζένγκια, να κα χρησιμοποιήνελ καέκ πι εξουσία λάθος τροπόσαρ ντα καέκ να κα μαρέλ-πες τι τθερέλ οντουλά σο χρειαζίντιβελα. Η Αγία Γραφή, ντέλα πο λάφι: «Κα μπεσέλ ο κάθε εκ τελάλ πι ρεζάταρ ντα τελάλ πι χελινγκινάταρ, ντα καέκ να κα νταραβέλ-λεν».​—Μιχαίας 4:3, 4.

Κάθε φαμιλί κα τθερέλ πο κχερ ντα να κα νταρέλ ότι κα χασαρέλ-λες, ντα σαρί η μπουτί σο κα κεράς κα πφερέλ-αμέν. Σαρ βακερέλα η Γραφή, σαρέ οντουλά σο κα τζουβντιόν κο νεβό ντουνιάς κι Ντεβλέσκο «να κα μαρέν-πες σινανέ».​—Ησαΐας 65:​21-23.

Η Γραφή ντέλα πο λάφι: «Η πφουβ κα πφερντιόλ κατά σικλιαριπέ ι Ιεχωβάσκο». (Ησαΐας 11:9) Ο τζενέ σο κα τζουβντιόν τελάλ κατά Βασιλεία ι Ντεβλέσκι κα σικλιόν κατά μπαρί σοφία Οντουλέσκι σο κερντάς-λεν, ι Ιεχωβάσκι, ντα ι μπουτ σουκάρ πραγματένγκε σο κερντάς. Να κα χρησιμοποιήνεν οντουλά σο τζανένα για τι κερέν όπλα ή για τι κερέν ζιάνι κο γιαβερά τζενέ. (Ησαΐας 2:4) Οκιά μπάνταρ, κα σικλιόν σαρ τι τθερέν ειρήνη ο εκ ι γιαβερέσαρ ντα σαρ τι φροντίνεν ι πφουβ.​—Ψαλμός 37:11.

Ο Ντεβέλ κερντάς μανγκιμάσαρ ι πφουβ για τι χαιρίνας μπουτ ι ζωή κάθε ντιβές. Οντουβά σο τθερέλα πι γκοντιάτε ισί τι τζουβντιόν ο τζενέ κι πφουβ για πάντα. (Ψαλμός 37:​29· Ησαΐας 45:​18) Για τι κερέλ-λες ανταβά, ο Ντεβέλ «κα μπιλιαβέλ ο μεριπέ για πάντα». (Ησαΐας 25:8) «Ο μεριπέ να κα αβέλ πάλι, ούτε λύπη ούτε βίκος ούτε ντουκχ να κα αβέν πάλι», ντέλα πο λάφι η Γραφή. (Αποκάλυψη 21:4) Ο Ντεβέλ κα ντελ σαρέ κο τζενέ, εμ οντουλέντε σο κα σώνελ-λεν κάνα κα κερέλ καταστροφή ανταλέ πφιρνέ ντουνιάς εμ σαρέ κο μουλέ σο κα τζουβντιαρέλ κο νεβό ντουνιάς, ι ευκαιρία τι τζουβντιόν για πάντα.​—Ιωάννης 5:​28, 29· Πράξεις 24:15.

 Εκατομμύρια τζενέ ετοιμάνενα-πες από ακανά τι τζουβντιόν τελάλ κατά Βασιλεία ι Ντεβλέσκι σο ισί αζόμ μπουτ πασέ. Παρόλο σο ισί ατελείς, κερένα ο πο λατσσό από ακανά για τι αβέν ο τζενέ σο κα μανγκέλας τι τθερέλ ο Ντεβέλ πι νεβέ ντουνιάστε. Σαρ; Σικλιόνα ι Ιεχωβά Ντεβλέσκε ντα οντουλέσκε σο μπουτσσαντάς, ι Ιησού Χριστόσκε.​—Ιωάννης 17:3.

Σικλιόν πο μπουτ οντουλένγκε σο μπορίνενα τι κερέν για τι σώντιβεν κατά τέλος ανταλέ ντουνιάσκο ντα τι τζουβντιόν κο πο λατσσό ντουνιάς σο κα αβέλ ατζεχάνικ. Μανγκέν τι κερέν μελέτη κατά Αγία Γραφή εκχέ τζενέσαρ σο ισί Μάρτυρας ι Ιεχωβάσκο χωρίς τι ποκινέν κατά βιβλίος Μπουτ Σουκάρ Ζωή για Πάντα!