1. Σο ισί ο πνευματικός παράδεισος, ντα σο πρέπει τι αβάς αποφασισμέ τι κεράς;

 ΥΠΑΡΧΙΝΤΙΒΕΛΑ εκ συμβολικός παράδεισος κι πφουβ σο ισί πφερντό τζενέντζαρ σο κερένα λατσσέ πράγματα. Ισί αντρέ εκατομμύρια τζενέ σο απολαμβάνενα ειρήνη ο εκ ι γιαβερέσαρ. Ο τζενέ σο ισί αντρέ κο παράδεισος ανταβά ισί αποφασισμέ μα τι νασέν ποτές. Μανγκένα επίσης τι αβέν πασέ λέντε, αντρέ κο σουκάρ περιβάλλον ανταβά, καζόμ πο μπουτ τζενέ αβέλα-πες. Καβά ισί ανταβά σουκάρ περιβάλλον; Ο πνευματικός παράδεισος! a

2. Καβά πράγμας σο τθερέλα τι κερέλ με το πνευματικός παράδεισος ισί μπουτ μπαρό;

² Ισί μπουτ μπαρό πράγμας σο ο Ιεχωβά τθερέλα κερντό εκ ήρεμος περιβάλλον σο λέσκε υπηρέτες απολαμβάνενα ειρήνη ντα ενότητα. Ανταβά αβέλα-πες παρόλο σο τζουβντιόνα αντρέ κο πφιρνό ντα επικίνδυνος ντουνιάς κι Μπενγκέσκο, σο ο τζενέ μισίνενα ο εκ ι γιαβερές. (1 Ιωάν. 5:19· Αποκ. 12:12) Αμαρό λατσσό Ντατ ντικχέλα ότι ανταβά ντουνιάς ντουκχαβέλα ο γκι ι τζενένγκο. Βοβ όμως, κερέλα πι υπηρετόν τι νιωθίνεν αρακχαντέ για τι μπορίνεν τι υπηρετίνεν-λες χαράσαρ. Λέσκο Λάφι βακερέλα ότι ο πνευματικός παράδεισος ισί σαρ εκ τθαν σο «αρακχαβέλα» ντα σαρ «εκ κήπος σο λέσκε φυτά ισί λατσσές ποτισμέ». (Ησ. 4:6· 58:11) Με την ευλογία ι Ιεχωβάσκι, οντουλά σο ισί αντρέ ανταλέ παραδεισόστε νιωθίνενα χαρούμενοι ντα αρακχαντέ ανταλέ δύσκολε τελευταίε ντιβεσέντε.—Ησ. 54:14· 2 Τιμ. 3:1.

3. Σαρ νικίστιλι μπαγιά η προφητεία σο ισί κο κεφάλαιος 65 του Ησαΐα κο πουρανό Ισραήλ;

³ Αντράλ κατά προφήτης Ησαΐας, ο Ιεχωβά σικαντάς σαρ κα αβέλας η ζωή οντουλένγκε σο κα μπεσένας κο πνευματικός παράδεισος. Μπορίνενα τι αρακχέν ανταγιά προφητεία κο Ησαΐας, κεφάλαιος 65, σο νικίστιλι μπαγιά για πρώτη φαρ κο 537 Π.Κ.Χ.  Αζομάν, ο Ιουδαίοι σο μετανιωσάλεας ελευθερωσάλε κατά Βαβυλώνα σο ισινέ αιχμάλωτοι ντα βουρτισάλε πουμαρέ τθεμέστε. Ο Ιεχωβά ευλογιντάς πι λαός ντα βοηθιντάς-λεν τι κερέν πάλι σουκάρ ι Ιερουσαλήμ παρόλο σο καταστραφισάλιας. Βοηθιντάς-λεν επίσης τι κερέν πάλι ο ναός τι αβέλ ο μοναδικός τθαν σο κα ντένας λατρεία κο Ιεχωβά.—Ησ. 51:11· Ζαχ. 8:3.

4. Σαρ νικιόλα μπαγιά η προφητεία κο κεφάλαιος 65 του Ησαΐα αμαρέ ντιβεσέντε;

⁴ Η δεύτερη φαρ σο νικίστιλι μπαγιά η προφητεία του Ησαΐα αρχισάλι κο 1919 Κ.Χ., κάνα ο υπηρέτες ι Ιεχωβάσκε αμαρέ ντιβεσέντε ελευθερωσάλε κατά Μπαρί Βαβυλώνα σο ισινέ αιχμάλωτοι. Σοράν ανταλέσταρ, ο πνευματικός παράδεισος αρχισάλο τι αβέλ σιγά σιγά σαρί κι πφουβ. Τζενέ σο κερένας έργος αντράλ πουμαρέ γκίσταρ κερντέ μπουτ νεβέ κχανγκιριά ντα αρχισάλε τι σικαβέν λατσσέ ιδιότητες. Μουρσά ντα τζουβλιά σο ανγκλέ τζουβντιόνας βίαιε ντα μπίλατζανε τροπόσαρ “ιριαντέ ο νεβό χαρακτήρας σο κερντιλό αντικάς σαρ μανγκέλα ο Ντεβέλ”. (Εφεσ. 4:24) Σίγουρα, μπουτ κατά ευλογίες σο βακερντάς ο Ησαΐας κα νικιόν μπαγιά κο νεβό ντουνιάς, όχι σάντε συμβολικέ τροπόσαρ, αλλά κι πραγματικότητα. Αλλά αντιβές-ντα τθεράσα ευλογίες. Για τι ντικχάς σαρ βοηθίντιβασα ντα σόσκε δεν πρέπει ποτές τι νασάς κατά πνευματικός παράδεισος.

ΣΑΡ ΙΣΙ Ο ΤΖΕΝΕ ΑΝΤΡΕ ΚΟ ΠΝΕΥΜΑΤΙΚΟΣ ΠΑΡΑΔΕΙΣΟΣ

5. Σαρ βακερέλα η υπόσχεση κο εδάφιος Ησαΐας 65:13, σο απολαμβάνασα αντρέ κο πνευματικός παράδεισος;

⁵ Ισί πνευματικά τσαλέ ντα λένγκο γκι ισί λοκχό. Η προφητεία του Ησαΐα σικαβέλα ι μπαρί διαφορά σο τθερένα ο τζενέ σο ισί αντρέ κο πνευματικός παράδεισος κατά τζενέ σο νανέ. (Διαβάνεν Ησαΐας 65:13) Ο Ιεχωβά ντέλα πουταρντέ βαστέσαρ σο-ντα χρειαζίντιβενα λέσκε υπηρέτες για τι ατσσόν πασέ λέστε. Τθεράσα λέσκο άγιος πνεύμας, λέσκο Λάφι ντα μπουτ πνευματικός χαμπέ, για τι μπορίνας “τι χας, . . . τι πιας . . . ντα τι χαιρίνας”. (Ντικχέν Αποκάλυψη 22:17) Κατά γιαβέρ μπάντα, οντουλά σο ισί αβρί κατά πνευματικός παράδεισος “μποκχάλιβενα . . . , μερένα πανίσκε . . . ντα λατζάντιβενα”. Να τζανένα ιτς ι Ντεβλές.—Αμώς 8:11.

6. Σαρ σικαβένα ο εδάφια Ιωήλ 2:21-24 μερικά κατά πνευματικά δώρα σο ντέλα-αμέν ο Ιεχωβά, ντα σαρ βοηθίνενα-αμέν;

⁶ Ο Ιωήλ χρησιμοποιηντάς πι προφητειάτε βασικά πράγματα αμαρέ ζωγιάκε σαρ ισί ο γκιβά, η μολ ντα ο λάδι για τι σικαβέλ ότι ο Ιεχωβά ντέλα σο-ντα τθερέλα ανάγκη Λέσκο λαός, σαρ ισί ο πνευματικός χαμπέ. (Ιωήλ 2:21-24) Για παράδειγμας, ντέλα-αμέν ι Αγία Γραφή, αμαρέ έντυπα, αμαρό ιστότοπος ντα αμαρέ συναθροίσεις ντα συνελεύσεις. Μπορίνασα τι βοηθίντιβας κατά πνευματικά δώρα ανταλά κάθε ντιβές, ντα αντικάς κα νιωθίνας πνευματικά τσαλέ ντα αμαρό γκι κα αβέλ πο λοκχό.

7. Σο κερέλα “αμαρό γκι τι αβέλ πφερντό ευτυχία”; (Ησαΐας 65:14)

⁷ Ισί ευτυχισμέ ντα ικανοποιημέ. Ο υπηρέτες ι Ντεβλέσκε μπορίνενα τι «ντεν βίκος από χαρά» επειδή λένγκο γκι ισί πφερντό εκτίμηση. (Διαβάνεν Ησαΐας 65:​14) Χάρη κο αλήθειες κι Γραφιάκε σο ντένα-αμέν ζορ, κο υποσχέσεις κι Γραφιάκε σο ντένα-αμέν παρηγοριά ντα κι ελπίδα σο βασίντιβελα κι θυσία κι Χριστόσκι, “αμαρό γκι ισί πφερντό ευτυχία”. Κάνα κεράσα λάφι ανταλέ πραγματένγκε αμαρέ πφραλέντζαρ ντα πφενίντζαρ, νιωθίνασα μπαγιά ευτυχισμέ!—Ψαλμ. 34:8· 133:1-3.

8. Καλά ισί ντούι μπαρέ χαρακτηριστικά σο τθερέλα ο πνευματικός παράδεισος;

⁸ Η αγάπη ντα η ενότητα αντρέ κο λαός κι Ιεχωβάσκο ισί ντούι μπαρέ χαρακτηριστικά σο τθερέλα ο πνευματικός παράδεισος. Ανταβά ανέλα αμαρέ γκοντιάτε σαρ κα αβέλ η ζωή κο νεβό ντουνιάς, κάνα ο υπηρέτες ι Ιεχωβάσκε κα απολαμβάνεν ατζέ πο μπαρί αγάπη ντα ενότητα από ό,τι αντιβές. (Κολ. 3:14) Εκ πφεν βακερέλα σο ντικχλάς κάνα γνωριντάς ι Ιεχωβάσκε λαός πρώτη φαρ: «Να τζανάβας σαρ τι  αβάβ ευτυχισμέ, ατζέ-ντα αντρέ μι φαμιλιάτε. Η πρώτη φαρ σο ντικχλόμ τζενέν τι σικαβέν μπαγιά αγάπη ο εκ ι γιαβερέστε ισινέ κάνα γνωριντόμ ι Ιεχωβάσκε Μαρτυρέν». Κον μανγκέλα τι αβέλ μπαγιά ευτυχισμέ ντα ικανοποιημέ χρειαζίντιβελα τι αβέλ αμαρέ πνευματικέ παραδεισόστε. Σο-ντα τι αμντίνελα ανταβά ντουνιάς για το υπηρέτες ι Ιεχωβάσκε, βον τθερένα μπουτ λατσσό ναβ εμ κο γιακχά κι Ιεχωβάσκε εμ σαρέ λέσκε φαμιλιάτε.—Ησ. 65:15.

9. Καγιά υπόσχεση ντένα ο εδάφια Ησαΐας 65:16, 17 για το στεναχώριες σο νακχάσα;

⁹ Ισί ήρεμοι αντρέ πουμέντε. Ο εδάφιος Ησαΐας 65:14 βακερέλα ότι οντουλά σο τραμπίνενα τι αβέν αβρί κατά πνευματικός παράδεισος “ντένα βίκος επειδή λένγκο γκι ντουκχάλα ντα ροβένα γκίσαρ επειδή τθερένα μπουτ μπαρί στεναχώρια”. Αλλά σο κα αβέλ σαρέ ι πραγματέντζαρ σο ανένα ντουκχ ντα στεναχώρια κο λαός κι Ντεβλέσκο; Τελικά, σαρέ ανταλά «κα μπιστάρντιβεν [ντα] κα γκεράντιβεν [ι Ντεβλέσκε] γιακχίνταρ». (Διαβάνεν Ησαΐας 65:16, 17) Ο Ιεχωβά κα νασκιαρέλ αμαρέ προβλήματα ντα, καζόμ νακχέλα ο βακίτι, ούτε κα ντας-αμέν γκοντί ι ντουκχ σο νιωθίναας ανταλέ προβληματένταρ.

10. Σόσκε πακιάνα ότι ισί ευλογία τι αβέν γιεκ τουμαρέ πφραλέντζαρ ντα πφενίντζαρ; (Ντικχέν ι φωτογραφία-ντα)

¹⁰ Ατζέ-ντα ακανά, νιωθίνασα πο ήρεμοι αντρ’ αμέντε κάνα ισινάμ αμαρέ συναθροισιέντε, σόσκε οτθέ μπορίνασα τι ηρεμίνας ντα τι μπιστράς ο πράγματα σο πιένενα-αμέν ανταλέ πφιρνέ ντουνιάστε. Επίσης, βοηθίνασα αμαρέ πφραλέν ντα πφενίν τι νιωθίνεν ήρεμοι κάνα σικαβάσα ι αγάπη, ι χαρά, ι ειρήνη, ο λατσσιπέ ντα ι πραότητα σο ισί αντρέ κο καρπός κι Ντεβλέσκε πνευμάσκο. (Γαλ. 5:22, 23) Σο μπαρί ευλογία ισί τι αβάς αντρέ κι οργάνωση κι Ντεβλέσκι! Οντουλά σο κα ατσσόν αντρέ κο πνευματικός παράδεισος κα ντικχέν ο βακίτι σο ο Ντεβέλ κα κερέλ τι νικιόλ ντιπ μπαγιά ι υπόσχεση σο ντινάς τι κερέλ «νεβό ουρανός ντα νεβί πφουβ».

11. Σαρ βακερένα ο εδάφια Ησαΐας 65:18, 19, σαρ πρέπει τι νιωθίνας επειδή ισινάμ αντρέ κο πνευματικός παράδεισος;

¹¹ Σικαβένα εκτίμηση ντα ισί μπουτ ευτυχισμέ. Σοράν, ο Ησαΐας εξηγίνελα σόσκε τθεράσα μπουτ λόγους “τι αβάς πφερντέ χαρά” για το πνευματικός παράδεισος. Ισί εκ περιβάλλον σο δημιουργιντάς-λες ο Ιεχωβά. (Διαβάνεν Ησαΐας 65:18, 19) Οτθάρ, να κερέλα αμένγκε εντύπωση σο ο Ιεχωβά χρησιμοποιήνελα-αμέν για τι λελ τζενέν κατά οργανώσεις ανταλέ ντουνιάσκε, σο να σικλιαρένα-λεν ι αλήθεια ι Ντεβλέσκε, ντα τι οδηγίνελ-λεν αντρέ κο σουκάρ πνευματικός περιβάλλον σο τθεράσα! Ισινάμ μπουτ ευτυχισμέ ι ευλογιένγκε σο απολαμβάνασα επειδή ισινάμ κι αλήθεια, ντα μανγκάσα μπουτ τι κεράς λάφι ι γιαβερένγκε ανταλέ ευλογιένγκε.—Ιερ. 31:12.

12. Σαρ κερένα-τουμέν τι νιωθίνεν ο υποσχέσεις σο ισί κο εδάφια Ησαΐας 65:20-24, ντα σόσκε;

 ¹² Ισινάμ επίσης μπουτ ευτυχισμέ ντα σικαβάσα εκτίμηση για την ελπίδα σο τθεράσα επειδή τζουβντιάσα κο πνευματικός παράδεισος. Σκεφτίνεν σαρέ οντουλά σο κα ντικχάς ντα κα κεράς κο νεβό ντουνιάς κι Ντεβλέσκο! Η Αγία Γραφή ντέλα ακαγιά υπόσχεση: «Να κα υπαρχίντιβελ οτθέ μαξίμι σο τζουβντιόλα χάνικ ντιβεσά, ούτε πφουρό σο μερέλα σουγκό πριν τι μπιτίνεν λέσκε ντιβεσά». “Κα κεράς κχερά ντα κα μπεσάς λέντε, ντα κα τσσουβάς ρεζά ντα κα χας λένταρ”. “Να κα μαράς-αμέν σινανέ” επειδή κα αβάς “ευλογημέ κατά Ιεχωβά”. Βοβ ντέλα πο λάφι ότι κα τθεράς εκ αρακχαντί ζωή με πραγματικός σκοπός σο κα πφερέλ-αμέν ικανοποίηση. Ο Ντεβέλ κα τζανέλ ο ανάγκες σαρέ ι τζενένγκε «πριν τι ντεν βίκος» ντα κα “τσαλιαρέλ ι επιθυμία σαρέ οντουλένγκι σο τζουβντιόνα”.—Ησ. 65:20-24· Ψαλμ. 145:16.

13. Σαρ σικαβέλα ο εδάφιος Ησαΐας 65:25 ο αλλαγές σο κερένα ο τζενέ πουμαρέ ζωγιάτε κάνα αρχίνενα τι υπηρετίνεν ι Ιεχωβάς;

¹³ Σικαβένα ειρήνη ντα ισί αρακχαντέ. Με τη βοήθεια σο ντέλα-λεν ο πνεύμας ι Ντεβλέσκο, μπουτ τζενέ σο ανγκλέ ισινέ βίαια ντα χάνας-πες ι γιαβερέντζαρ κερντέ μπαρέ αλλαγές πουμαρέ ζωγιάτε. (Διαβάνεν Ησαΐας 65:25) Μαρντέ-πες μπουτ για τι νασκιαρέν ο μπέτι πράγματα σο τθερένας κο χαρακτήρας. (Ρωμ. 12:2· Εφεσ. 4:22-24) Σίγουρα, ο υπηρέτες ι Ντεβλέσκε συνεχίνενα τι αβέν ατελείς, οτθάρ κα συνεχίνας τι κεράς λάθη. Όμως, ο Ιεχωβά αντάς πασέ «σαβέ τι μανγκές τζενέν» σο μανγκένα-λες ντα μανγκένα ο εκ ι γιαβερές. Οτθάρ, τθερένα αληθινή ειρήνη ντα ισί ενωμέ. (Τίτο 2:11) Ανταβά ισί εκ θαύμας σο σάντε ο παντοδύναμος Ντεβέλ κα μπορίνελας τι κερέλ-λες!

14. Σαρ νικίστιλο μπαγιά ο εδάφιος Ησαΐας 65:25 κι ζωή εκχέ πφραλέσκι;

¹⁴ Μπορίνενα μπαγιά ο τζενέ τι αλλάνεν πουμαρό χαρακτήρας; Ντικχέν ακαγιά εμπειρία. Εκ τερνό, σο πφαντέ-λες μπουτ φαρ κι φυλακή πριν τι αβέλ 20 μπρεσένγκο, τζουβντιόλας μπίλατζανε ντα βίαιε τροπόσαρ. Πφαντιλόας κι φυλακή επειδή τσορέλας αυτοκίνητα, ντέλας κο κχερά ντα κερέλας γιαβερά-ντα μπέτι πράγματα. Ισινέ πάντα έτοιμος τι αστάρντιβελ κο βαστά ντα τι χαλ-πες ι γιαβερέντζαρ. Κάνα ασουντάς ι αλήθεια κατά Αγία Γραφή ντα αρχισάλο τι τζαλ κο συναθροίσεις κι Ιεχωβάσκε Μαρτυρένγκε, αβιλό σίγουρος ότι αρακχλάς εκ λόγος για τι τζουβντιόλ—ο πνευματικός παράδεισος. Κάνα μπολντιλό, σκεφτίνελας μπουτ φαρ σαρ νικίστιλο μπαγιά λέσκε ζωγιάτε ο εδάφιος Ησαΐας 65:25. Αλλαξάλοας, ντα ενώ ανγκλέ ισινέ βίαιος σαρ εκ λιοντάρι, αβιλό τζενό σο σικαβέλα ειρήνη, σαρ εκ μπρακό.

15. Σόσκε μανγκάσα τι καλίνας γιαβερέν αντρέ κο πνευματικός παράδεισος, ντα σαρ μπορίνασα τι κεράς-λες ανταβά;

¹⁵ Ο εδάφιος Ησαΐας 65:13 αρχίνελα ακαλέ λαφίντζαρ: «Ακαβά βακερέλα ο πο Μπαρό Κύριος, ο Ιεχωβά». Ο εδάφιος 25 μπιτίνελα ι λαφίντζαρ «βακερέλα ο Ιεχωβά». Σο-ντα βακερέλα ο Ιεχωβά, νικιόλα πάντα μπαγιά. (Ησ. 55:10, 11) Ο πνευματικός παράδεισος ήδη υπαρχίντιβελα αντιβές. Ο Ιεχωβά τθερέλα κερντό εκ φαμιλί σο ισί μπαγιά ξεχωριστή. Αντρέ λέσκε λαόστε, μπορίνασα τι αρακχάς ειρήνη ντα τι νιωθίνας αρακχαντέ αντρέ εκχέ βίαιε ντουνιάστε. (Ψαλμ. 72:7) Ανταλέσκε, μανγκάσα τι βοηθίνας καζόμ πο μπουτ τζενέν αβέλα-πες τι αβέν αντρέ αμαρέ Χριστιανικέ φαμιλιάτε. Μπορίνασα τι κεράς-λες ανταβά κάνα προσπαθίνασα μπουτ τι κεράς μαθητέν.—Ματθ. 28:19, 20.

ΣΑΡ ΤΙ ΚΕΡΑΣ ΓΙΑΒΕΡΕΝ ΤΙ ΜΑΝΓΚΕΝ ΤΙ ΑΒΕΝ ΚΟ ΠΝΕΥΜΑΤΙΚΟΣ ΠΑΡΑΔΕΙΣΟΣ

16. Σο κα βοηθίνελ ι τζενέν τι μανγκέν τι αβέν κο πνευματικός παράδεισος;

¹⁶ Ο κάθε εκ αμένταρ τθερέλα εκ σημαντική μπουτί τι κερέλ για τι ντικχίντιβελ ο πνευματικός παράδεισος σουκάρ κο γιαβερά. Μπορίνασα τι κεράς-λες ανταβά κάνα μοιάζασα κο Ιεχωβά. Βοβ να ανέλα ζορίσαρ ι τζενέν αντρέ  πι οργανωσιάτε. Οκιά μπάνταρ, “ταρτίνελα-λεν” λατσσιμάσαρ πασέ πέστε. (Ιωάν. 6:44· Ιερ. 31:3) Ο λατσσέ τζενέ σο σικλιόνα ο σουκάρ ιδιότητες ντα ο σουκάρ χαρακτήρας ι Ιεχωβάσκο μανγκένα αντράλ πουμαρέ γκίσταρ τι τζαν πασέ κο Ντεβέλ. Σαρ μπορίνενα αμαρέ λατσσέ ιδιότητες ντα αμαρί σουκάρ συμπεριφορά τι κερέν ι τζενέν τι μανγκέν τι αβέν κο πνευματικός παράδεισος;

17. Σαρ μπορίνασα τι κεράς ι γιαβερέν τι μανγκέν τι αβέν κο πνευματικός παράδεισος;

¹⁷ Εκ τρόπος για τι κεράς ι τζενέν τι μανγκέν τι αβέν κο πνευματικός παράδεισος ισί τι σικαβάς αγάπη ντα λατσσιπέ αμαρέ πφραλέντε. Κι πουρανί Κόρινθος, υπαρχίντιβενας μερικά τζενέ σο να τθερένας πίστη αλλά μάλλον τζάνας κο συναθροίσεις. Ανταλά τζενέ βακερντέ: «Ο Ντεβέλ ισί μπαγιά τουμέντζαρ». (1 Κορ. 14:24, 25· Ζαχ. 8:23) Κάνα αβένα αμαρέ συναθροισιέντε νεβέ τζενέ, μανγκάσα τι νιωθίνεν ο ίδιος πράγμας ανταλέ τζενέντζαρ κι πουρανί Κόρινθος. Οτθάρ, πρέπει τι κεράς πάντα ι συμβουλή “τι τθεράς ειρήνη ο εκ ι γιαβερέσαρ”.—1 Θεσ. 5:13.

18. Σο μπορεί τι κερέλ μερικέ τζενέν τι μανγκέν τι αβέν αντρέ αμαρέ οργανωσιάτε;

¹⁸ Πρέπει πάντα τι προσπαθίνας τι ντικχάς αμαρέ πφραλέν ντα πφενίν σαρ ντικχέλα-λεν ο Ιεχωβά. Κεράσα-λες ανταβά κάνα ντάσα πο μπουτ προσοχή κο λατσσέ ιδιότητες σο τθερένα, όχι κο ατέλειες λένγκε, σο εκ ντιβές να κα υπαρχίντιβεν. Μπορίνασα τι λύνας αμαρέ παρεξηγήσεις σουκάρ τροπόσαρ άμα πάντα “σικαβάσα λατσσιπέ ντα τζιτζίνασα ο εκ ι γιαβερέσκε μανγκιμάσαρ, ντα συγχωρίνασα ο εκ ι γιαβερές αντράλ αμαρέ γκίσταρ”. (Εφεσ. 4:32) Αζομάν, ο τζενέ σο μανγκένα τι συμπεριφερίντιβεν λένγκε ο γιαβερά ανταλέ σουκάρ τροπόσαρ κα μανγκέν τι αβέν αντρέ κο πνευματικός παράδεισος. b

 ΑΤΣΣΟΝ ΑΝΤΡΕ ΚΟ ΠΝΕΥΜΑΤΙΚΟΣ ΠΑΡΑΔΕΙΣΟΣ

19. (α) Σαρ ντικχάσα κο πλαίσιος « Νασλέ Αλλά Βουρτισάλε Παλάλ», σο βακερντέ μερικοί κάνα βουρτισάλε κο πνευματικός παράδεισος; (β) Σο πρέπει τι αβάς αποφασισμέ τι κεράς; (Ντικχέν ι φωτογραφία-ντα)

¹⁹ Καζόμ μπουτ εκτιμίνασα αμαρό πνευματικός παράδεισος! Ποτές να ισινέ πο σουκάρ, ντα αντιβές τθερέλα πο μπουτ υπηρετόν ι Ιεχωβάσκε από ποτές. Τι σικαβάς για πάντα εκτίμηση κο Ιεχωβά σο κερντάς αμένγκε ανταβά παράδεισος. Κον μανγκέλα τι αβέλ λέσκο γκι λοκχό, τι αβέλ ικανοποιημέ, ήρεμος ντα αρακχαντό πρέπει τι τσσουβέλ-πες αντρέ κο πνευματικός παράδεισος ντα μα τι νασέλ ποτές! Τι προσοχίνεν όμως σόσκε ο Μπενγκ κερέλα σο νακχέλα λέσκε βαστέσταρ για τι χουχαβέλ-αμέν ντα τι κερέλ-αμέν τι νασάς. (1 Πέτρ. 5:8· Αποκ. 12:9) Δεν πρέπει τι μουκχάς-λες τι καταφερίνελ-λες. Αμαρό πνευματικός παράδεισος ισί αζόμ σουκάρ, αζόμ πάκι ντα πφερντό ειρήνη. Οτθάρ, τι μαράς-αμέν για τι αρακχαβάς-λες.