ΙΣΙ τέλος Νοεμβρίου κο 1932 κι Πόλη του Μεξικού, σο τζουβντιόνα πιο μπουτ από εκ εκατομμύριος τζενέ. Νακχλί σάντε εκ εβδομάδα από αζομάν σο τσσουντέ για πρώτη φαρ φανάρια ατθέ. Αλλά ακανά ο τζενέ ισί χαρούμενοι εκχέ γιαβερέ πραγμάσκε. Ο δημοσιογράφοι ισί κο τρένα, ετοιμαντέ πουμαρέ κάμερες ντα μπεσένα τι αβέλ εκ σημαντικός τζενό. Κον ισί ανταβά; Ισί ο Ιωσήφ Φ. Ρόδερφορντ, ο πρόεδρος της Εταιρίας Σκοπιά. Ο Μάρτυρες σο ισί ατθάρ μπεσένα τι καλωσορίνεν βον-ντα ι πφραλές Ρόδερφορντ, σο αβέλα κι τρινέ ντιβεσένγκι συνέλευση σο τθερένα.

Ο Χρυσούς Αιών βακερντάς: «Σίγουρα ανταγιά συνέλευση κα ατσσόλ αμαρέ γκοντιάτε σαρ κάτι μπουτ σημαντικός» σο κα βοηθίνελ μπουτ κο προσπάθειες σο αβένα για τι βακέρντιβελ η αλήθεια κο Μεξικός. Αλλά ανταγιά ισινέ εκ χουρντί συνέλευση σο παρακολουθιντέ-λα σάντε περίπου 150 τζενέ. Σόσκε άραγες ισινέ αζόμ σημαντική;

Πριν ανταλέ συνελευσιάταρ, η αλήθεια να ασούντιλιας μπουτ κο Μεξικός. Κατά 1919, αβιλέ χουρντέ συνελεύσεις, αλλά μετά ανταλέ μπρεσέσταρ ο εκκλησίες κι πραγματικότητα αβιλέας πιο χάνικ. Όταν κο 1929 κερντιλό ο γραφείος τμήματος κι Πόλη του Μεξικού, ντικχίντιβελας ότι ο πράγματα κα αβένας πιο λατσσές, αλλά ο εμπόδια συνεχίντιβενας. Η οργάνωση βακερντάς κο βιβλιοπώλες διάκονοι, σαρ βακέρντιβενας αζομάν ο σκαπανείς, μα τι κερέν μπουτί ενώ ισινέ κο έργος. Εκ βιβλιοπώλης διάκονος χολιασάλο αζόμ μπουτ ανταλέσκε, σο νασλό κατά αλήθεια ντα κερντάς πιρί ομάδα για τι διαβάνελ ι Αγία Γραφή. Επίσης, έπρεπε τι αλλάνελ ο επίσκοπος τμήματος, επειδή κερντάας πράγματα σο τζάνας κόντρα οντουλέντζαρ σο βακερέλα η Γραφή. Ο πιστοί Μάρτυρες κο Μεξικός τθερένας ανάγκη τι ενθαρρύνελ-λεν κάποιος.

Όταν αβιλό ο πφραλ Ρόδερφορντ, ενθαρρυντάς μπουτ οντουλέ πιστέ τζενέν ντουέ σουκάρ ομιλιέντζαρ σο κερντάς κι συνέλευση ντα γιαβερέ παντς ομιλιέντζαρ σο κερντάς κατά ραδιόφωνος. Ισινέ η πρώτη φαρ σο ο πφραλά χρησιμοποιηντέ ο ραδιόφωνος για τι βακερέν ο λατσσέ αμπέρια κο Μεξικός. Μετά κατά συνέλευση, εκ νεβό επίσκοπος τμήματος διορισάλο. Ακανά, ο Μάρτυρες ισινέ πφερντέ δύναμη, ντα με την ευλογία ι Ιεχωβάσκι συνεχίνενας τι κερέν ο έργος.

Ο γιαβέρ μπρες, κο 1933, αβιλέ ντούι συνελεύσεις ανταλέ τθεμέστε, εκ τανί κι Βερακρούς ντα η γιαβέρ κι Πόλη του Μεξικού. Ο πφραλά κερένας ο πιο λατσσό σο μπορίνενας κο έργος ντα τθερένας λατσσέ αποτελέσματα. Για παράδειγμας, κο 1931, οτθέ υπαρχίντιβενας 82 ευαγγελιζόμενοι. Μέχρι κο 1941, αβιλέ ντες φαρ πιο μπουτ! Οντουβά μπρες περίπου 1.000 τζενέ γκιλέ κι Πόλη του Μεξικού για τη συνέλευση σο αβιλί-πες.

Κο 1943, ο Μάρτυρες αρχισάλε τι διαφημίνεν ι συνέλευση «Ελεύθερον Έθνος», σο κα αβέλας-πες σε  12 τθεμά κο Μεξικός. * (Ντικχ ι υποσημείωση.) Για τι κερέν-λες ανταβά, ιρίνας πινακίδες-σάντουιτς, σο ισινέ κερντέ από ντούι μπαρέ πινακίδες σο στηρίντιβενας λένγκε πλατιέντε. Η εκ ιμπλάντιβελας ανγκλάλ ντα η γιαβέρ παλάλ κο ντουμό. Ο Μάρτυρες χρησιμοποιήνενας κατά 1936 ασακέ πινακίδες για τι διαφημίνεν πουμαρέ συνελεύσεις.

Ο έργος σο κερντέ οντουλέ πινακιδέντζαρ γκιλό αζόμ λατσσές κι Πόλη του Μεξικού, σο ο περιοδικός La Nación βακερντάς για τους Μάρτυρες σο παρακολουθιντέ ι συνέλευση: «Ο πρώτος ντιβές, μανγκλέ λένταρ τι καλίνεν πιο μπουτ τζενέν. Ο γιαβέρ ντιβές, αβιλέ αζόμ μπουτ σο να ερεσένας». Η Καθολική Εκκλησία να χαιρισάλι ιτς ανταλέσαρ, ντα οτθάρ γκιλί κόντρα κο Μάρτυρες. Αλλά ο πφραλά ντα ο πφενιά να νταρασάλε. Συνεχιντέ τι διαφημίνεν ι συνέλευση. Εκ γιαβέρ άρθρος κο περιοδικός La Nación βακερέλας: «Σαρί η πόλη ντικχλάς-λεν». Βακερντάς ότι ο πφραλά ντα ο πφενιά οντουλέ πινακιδέντζαρ σο ιρίνας για τι διαφημίνεν ι συνέλευση «μοιάζενας σαρ “σάντουιτς”». Ο άρθρος επίσης σικαβέλας εκ φωτογραφία πφραλέντζαρ σο ισινέ κο ντρομά κι Πόλη του Μεξικού ντα τελάλ η λεζάντα βακερέλας: «Πφερντιλέ ο ντρομά».

Οντουλά μπρεσά, ο πιο μπουτ Μάρτυρες έπρεπε τι κερέν μπαρέ θυσίες για τι τζαν κο χάνικ συνελεύσεις σο αβένας-πες κο Μεξικός. Μπουτ πφραλά ντα πφενιά αβένας γκαβένταρ σο ισινέ μπουτ ντουρ ντα οτθέ να τθερένας ούτε τρένα ούτε ντρομά. Εκ εκκλησία γραφιντάς: «Ο μόνος πράγμας σο αβέλα ανταλέ γκαβέστε ισί ο μηνύματα κατά τηλέγραφος». Οτθάρ, ο υπεύθυνοι έπρεπε τι κερέν ταξίδι χχερέντζαρ ή τι πφιρέν μπουτ ντιβεσά για τι λεν ο τρένος σο κα γκερέλας-λεν κι πόλη σο κα αβέλας η συνέλευση.

Ο πιο μπουτ Μάρτυρες ισινέ αζόμ τσορορέ, σο ζορίσαρ μπορίνενας τι ποκινέν ο εισιτήριος για τι τζαν κι συνέλευση. Όταν ερεσένας, μπουτ λένταρ μπεσένας πφραλέντε σο ισινέ οτθάρ ντα οντουλά πφραλά σικαβένας λένγκε αγάπη ντα φιλοξενία. Κάποια γιαβερά σοβένας κο Αίθουσες Βασιλείας. Εκ φαρ, περίπου 90 πφραλά μπεσλέ κο γραφείος τμήματος ντα σοτέ οπράλ σε κούτες σο τθερένας βιβλία. Ο Βιβλίο Έτους βακερντάς ότι ο πφραλά εκτιμιντέ-λες ανταβά, επειδή ο κούτες ισινέ «πιο κοβλέ ντα πιο τατέ κατά τσιμέντος».

Οντουλέ Μαρτυρένγκε, η ευκαιρία τι γκιντίντιβεν πουμαρέ πφραλέντζαρ ντα πουμαρέ πφενίντζαρ αξίνελας σαρέ ο θυσίες σο κερντέας. Αντιβές, υπαρχίντιβενα πιο μπουτ από 850.000 Μάρτυρες κο Μεξικός σο σικαβένα βον-ντα ι ίδια εκτίμηση. * (Ντικχ ι υποσημείωση.) Εκ έκθεση κο Βιβλίο Έτους 1949 βακερντάς ότι ο θυσίες σο έπρεπε τι κερέν ο πφραλά να κερντέ-λεν τι χασαρέν πουμαρί χαρά για τη λατρεία ι Ιεχωβάσκι. Κάθε συνέλευση σο αβέλας-πες ισινέ «εκ κατά βασικά θέματα σο συζητίνενας για μπουτ καιρός». Η ερώτηση σο κερένας συνέχεια ο πφραλά ισινέ: «Κάνα κα τθεράς πάλι συνέλευση;»​—Κατά αρχείος σο τθεράσα κι Κεντρική Αμερική.