1. Σόσκε κερντάς ο Ιεχωβά ι ζωή;

ΚΙ ΑΡΧΗ ο Ιεχωβά ισινέ κορκορό. Όμως, να ισινέ στεναχωριμέ. Ο Ιεχωβά να τθερέλα ανάγκη καεκχές για τι αβέλ χαρούμενος. Αλλά μανγκέλας γιαβερά-ντα τι απολαμβάνεν ι ζωή. Η αγάπη ι Ιεχωβάσκι τσσιντιντάς-λες τι αρχίνελ τι κερέλ πράγματα.​—Ψαλμ. 36:9· 1 Ιωάν. 4:19.

2. Σαρ νιωθίνελας ο Ιησούς ντα ο άγγελοι οντουλένγκε σο κερντάς ο Ιεχωβά;

² Κι αρχή, ο Ιεχωβά κερντάς πι Τσσαβές, ι Ιησούς. Σοράν, γιεκ πι Τσσαβέσαρ, ο Ιεχωβά κερντάς «σαρέ ο γιαβερά πράγματα», σαρ ισί ο εκατομμύρια άγγελοι. (Κολ. 1:​16) Ο Ιησούς χαιρίνελας σο τθερέλας ι ευκαιρία τι κερέλ μπουτί γιεκ πι Νταντέσαρ. (Παρ. 8:​30) Ο άγγελοι-ντα σο ισί τσσαβέ ι Ντεβλέσκε χαιρίνενας βον-ντα. Ντικχένας με προσοχή καζόμ ο Ιεχωβά ντα λέσκο Μπουτ Λατσσό Εργάτης, ο Ιησούς, κερένας ο ουρανός ντα ι πφουβ. Σο κερντέ ο άγγελοι; «Πφερντιλέ χαρά» κάνα κερντιλί η πφουβ, ντα σίγουρα χαιρίνενας κάθε πραγμάσαρ σο κερέλας ο Ιεχωβά, ντα ατζέ πιο μπουτ κάνα ντικχλέ τι κερέλ ι τζενέν. (Ιώβ 38:7· Παρ. 8:​31) Ο κάθε πράγμας σο κερντάς ο Ιεχωβά σικαβέλας λέσκι αγάπη ντα λέσκι σοφία.​—Ψαλμ. 104:​24· Ρωμ. 1:20.

3. Σο κερέλα ο λύτρος σαρ βακερένα ο εδάφια 1 Κορινθίους 15:​21, 22;

³ Ο Ιεχωβά μανγκέλας ο τζενέ τι τζουβντιόν για πάντα οπράλ κι σουκάρ πφουβ σο κερντάας. Αλλά ο Αδάμ ντα η Εύα γκιλέ κόντρα πουμαρέ Νταντέσαρ, οτθάρ, ναστί κα  τζουβντιόνας για πάντα. Βον ντα λένγκε τσσαβέ κα μερένας. (Ρωμ. 5:​12) Σο κερντάς ο Ιεχωβά; Χωρίς τι χασαρέλ χρόνος, βακερντάς σαρ κα σώνελας ι τζενέν. (Γέν. 3:​15) Ο Ιεχωβά κα ντέλας πι τσσαβές, ι Ιησούς, σαρ λύτρος για τι λελ ι αμαρτία ντα ο μεριπέ κατά τσσαβέ ι Αδαμίσκε ντα ι Ευάκε. Σοράν, ο Ιεχωβά κα μπορίνελας τι ντελ ζωή για πάντα κο κάθε τζενό σο κα τραμπίνελας τι υπηρετίνελ-λες.​—Ιωάν. 3:​16· Ρωμ. 6:​23· διαβάνεν 1 Κορινθίους 15:​21, 22.

4. Καλά ερωτήσεις κα ντικχάς ανταλέ μαθημάστε;

⁴ Ο λάφι σο ντινάς ο Ντεβέλ τι τζουβντιαρέλ ι μουλέν ανέλα αμαρέ γκοντιάτε μπουτ ερωτήσεις. Για παράδειγμας, σαρ κα αβέλ η ανάσταση; Κα αγαβάς αμαρέ τζενέν κάνα κα αβέν πάλι κι ζωή; Σαρ κα ανέλ αμένγκε χαρά η ανάσταση; Ντα σαρ μπορίνασα τι σικλιάς ι αγάπη, ι σοφία ντα ι υπομονή ι Ιεχωβάσκι κατά ανάσταση; Για τι ντικχάς ανταλά ερωτήσεις.

5. Σόσκε ισί λογικός τι πακιάς ότι να κα αβέν κι ζωή σαρέ ο μουλέ κι ίδια στιγμή;

⁵ Κάνα ο Ιεχωβά κα ανέλ κι ζωή εκατομμύρια τζενέν αντράλ πι Τσσαβέσταρ, ισί λογικός τι πακιάς ότι να κα αβέν κι ζωή σαρέ κι ίδια στιγμή. Σόσκε; Επειδή άμα κα αβένας ξαφνικά αζόμ μπουτ τζενέ οπράλ κι πφουβ, ανταβά κα ανέλας μπουτ προβλήματα. Αλλά ο Ιεχωβά πάντα κερέλα ο πράγματα εκχέ σειράσαρ. Τζανέλα ότι αντικάς πρέπει τι αβέν ο πράγματα για τι τζουβντιόν ο τζενέ με ειρήνη. (1 Κορ. 14:​33) Ο Ιεχωβά Ντεβέλ σικαβέλας σοφία ντα υπομονή κάνα κερέλας γιεκ ι Ιησούσαρ ι πφουβ για τι τζουβντιόν οπρά-λάτε ο τζενέ. Κα αβέλ ο βακίτι σο ο Ιησούς-ντα κα σικαβέλ ανταλά ιδιότητες κι Βασιλεία σο κα ατσσικιαρέλ χίλια μπρεσά. Αζομάν, ο Ιησούς γιεκ οντουλέντζαρ σο κα σώντιβεν κατά Αρμαγεδδώνας, κα ετοιμάνεν ι πφουβ οντουλένγκε σο κα αβέν πάλι κι ζωή.

6. Καλά τζενέ κα αβέν αντρέ οντουλέντε σο κα αβέν πάλι κι ζωή σαρ βακερέλα ο εδάφιος Πράξεις 24:15;

 ⁶ Ο πιο σημαντικός ισί ότι ο τζενέ σο κα σώντιβεν κατά Αρμαγεδδώνας κα χρειαζίντιβελ τι σικλιαρέν ι Ντεβλέσκε Βασιλειάκε ντα οντουλένγκε σο μανγκέλα ο Ιεχωβά κο τζενέ σο μουλέας. Σόσκε; Επειδή ο πιο μπουτ οντουλένταρ σο κα αβέν πάλι κι ζωή “να κα αβέν δίκαιοι”. (Διαβάνεν Πράξεις 24:​15) Ανταλά τζενέ κα χρειαζίντιβελ τι κερέν μπουτ αλλαγές για τι βοηθίντιβεν κατά λύτρος ι Χριστόσκο. Σκεφτίνεν ο έργος σο πρέπει τι αβέλ-πες για τι σικλιόν ι αλήθεια ι Ιεχωβάσκε εκατομμύρια τζενέ σο να τζανένα τίποτα λέσκε. Κα κερέλ ο κάθε εκ μελέτη εκχέ πφραλέσαρ ή εκχέ πφενιάσαρ, σαρ αβέλα-πες αντιβές; Κα μανγκέν οντουλέ τζενένταρ αζομάν τι τζαν κχανγκιρίντε σαρ ανταλά σο τθεράσα αντιβές; Κα σικλιαράς οντουλέ τζενέν για τι σικλιαρέν βον-ντα οντουλέν σο κα αβέν κι ζωή σοράν λένταρ; Πρέπει τι μπεκλεντίνας τι ντικχάς. Οντουβά σο τζανάσα όμως ισί ότι κάνα κα τελειώνεν ο χίλια μπρεσά ι Χριστόσκε Βασιλειάκε «η πφουβ κα πφερντιόλ κατά σικλιαριπέ ι Ιεχωβάσκο σαρ ο πανιά ιτσσαρένα ι ντεριάβ». (Ησ. 11:9) Ανταλά χίλια μπρεσά κα τθεράς μπουτ μπουτί τι κεράς σο κα ντελ-αμέν χαρά.

7. Σόσκε ο υπηρέτες ι Ντεβλέσκε κα αγαβέν σαρ νιωθίνενα οντουλά σο κα αβέν πάλι κι ζωή κάνα κα σικλιαρέν-λεν;

⁷ Κι Βασιλεία κι Χριστόσκι σο κα ατσσικιαρέλ χίλια μπρεσά, σαρέ ο τσσαβέ ι Ιεχωβάσκε κι πφουβ πρέπει τι κερέν αλλαγές για τι κερέν ι Ιεχωβάσκο γκι. Οτθάρ, σαρέ κα μπορίνεν τι αγαβέν σαρ νιωθίνενα οντουλά σο κα αβέν πάλι κι ζωή καζόμ κα σικλιαρέν-λεν τι νασκιαρέν ο μπέτι σκέψεις ντα επιθυμίες ντα τι τζουβντιόν αντικάς σαρ μανγκέλα ο Ιεχωβά. (1 Πέτρ. 3:8) Σίγουρα, οντουλά σο κα αβέν πάλι κι ζωή κα ντικχέν ότι ι Ιεχωβάσκε υπηρέτες ισί ταπεινοί ντα κερένα αλλαγές για τι κερέν ι Ιεχωβάσκο γκι ντα κα μανγκέν τι ντεν λατρεία ι Ιεχωβάς γιεκ λέντζαρ.​—Φιλιπ. 2:12.

8. Σόσκε ισί λογικός τι πακιάς ότι κα αγαβάς αμαρέ τζενέν κάνα κα αβέν πάλι κι ζωή;

⁸ Μπουτ πράγματα κερένα-αμέν τι πακιάς ότι κα αγαβάς αμαρέ τζενέν κάνα κα αβέν πάλι κι ζωή. Για παράδειγμας, κατά αναστάσεις σο αβιλέ-πες, ντικχίντιβελα ότι ο Ιεχωβά κα κερέλ ι τζενέν τι τθερέν πάλι ο λάφι ντα ι γκοντί σο τθερένας χάνικ πριν τι μερέν ντα τι αβέν ίδιοι αβριάλ. Ο Ιησούς βακερντάς ότι κάνα μερέλα εκ τζενό ισί σαρ τι σοβέλα ντα κάνα αβέλα πάλι κι ζωή ισί σαρ τι τζανγκάντιβελα. (Ματθ. 9:​18, 24· Ιωάν. 11:​11-13) Κάνα ο τζενέ τζανγκάντιβενα κατά σοϊπέ, ισί ίδιοι αβριάλ ντα τθερένα πάλι ο λάφι ντα ι γκοντί σο τθερένας πριν τι σοβέν. Ντικχέν σο αβιλό-πες ι Λαζαρόσαρ. Ισινέ μουλό σταρ ντιβεσά, ντα λέσκο σώμας αρχισάλοας τι κερνιόλ. Αλλά κάνα τζουβντιαρντάς-λες ο Ιησούς, ο πφενιά λέσκε αμέσως αγαντέ-λες, ντα ο Λάζαρος σίγουρα να μπισταρντάας-λεν.​—Ιωάν. 11:​38-44· 12:1, 2.

9. Σόσκε οντουλά σο κα αβέν πάλι κι ζωή να κα τθερέν τέλεια γκοντί ντα τέλειος σώμας;

⁹ Ο Ιεχωβά ντέλα πο λάφι ότι καέκ τζενό κι Βασιλεία κι Χριστόσκι να κα βακερέλ: «Ισινόμ νασφαλό». (Ησ. 33:​24· Ρωμ. 6:7) Οτθάρ, οντουλά σο κα αβέν πάλι κι ζωή κα τθερέν υγιή σώματα. Αλλά να κα αβέν από την αρχή τέλειοι. Άμα κα αβένας, μπορεί μα τι αγαβένας-λεν λένγκε τζενέ. Ντικχίντιβελα ότι σαρέ ο τζενέ κα αβέν τέλειοι σιγά σιγά κι Βασιλεία κι Χριστόσκι σο κα ατσσικιαρέλ χίλια μπρεσά. Σάντε κάνα κα τελειώνεν ο χίλια μπρεσά κα ντελ ο Ιησούς ι Βασιλεία παλάλ πι Νταντέστε. Αζομάν η Βασιλεία κα κερέλ σαρέ οντουλά σο μανγκέλας ο Ιεχωβά τι κερέλ, σαρ ισί τι αβέν  ο τζενέ τέλειοι.​—1 Κορ. 15:​24-28· Αποκ. 20:​1-3.

10. Σαρ κα νιωθίνεν κάνα κα ντικχέν πάλι τουμαρέ τζενέν;

¹⁰ Σκεφτίνεν σαρ κα αβέλ τι ντικχέν πάλι τουμαρέ τζενέν. Κα ασάν ή κα ροβέν κατά χαρά; Κα βακερέν ύμνοι σο κα δοξάνεν ι Ιεχωβάς χαράσαρ; Εκ πράγμας ισί σίγουρος: Η ανάσταση, σο ισί εκ μπουτ σουκάρ δώρος, κα πφερέλ τουμαρό γκι αγάπη τουμαρέ λατσσέ Νταντέσκε ντα λέσκε Τσσαβέσκε.

11. Σο κα αβέλ-πες οντουλέντε σο τζουβντιόνα αντικάς σαρ μανγκέλα ο Ντεβέλ σαρ βακερένα ο εδάφια Ιωάννης 5:​28, 29;

¹¹ Σκεφτίνεν ι χαρά σο κα τθερέν οντουλά σο κα αβέν πάλι κι ζωή καζόμ κα νικαβέν οπρά-πουμένταρ ο πουρανό χαρακτήρας ντα κα τζουβντιόν αντικάς σαρ μανγκέλα ο Ντεβέλ. Οντουλά σο κερένα ανταλά αλλαγές κα τζουβντιόν για πάντα κο Παράδεισος. Αλλά ο Ντεβέλ να κα μουκχέλ οντουλέν σο τζάνα λέσαρ κόντρα τι τζουβντιόν κο Παράδεισος ντα τι χαλαβέν ι ειρήνη σο κα αβέλ οτθέ.​—Ησ. 65:​20· διαβάνεν Ιωάννης 5:​28, 29.

12. Σαρ κα ευλογίντιβεν κατά Ιεχωβά σαρέ οντουλά σο κα τζουβντιόν κι πφουβ;

¹² Κι Βασιλεία, σαρέ ο υπηρέτες ι Ντεβλέσκε κα ντικχέν πουμαρέ γιακχίντζαρ καζόμ μπαγιά ισί ο λάφια ι εδαφιόσκε Παροιμίες 10:​22: «Ανταβά σο κερέλα εκχέ τζενές χουλανό ισί η ευλογία ι Ιεχωβάσκι, ντα Βοβ να ανέλα ντουκχ γιεκ λάσαρ». Ο Ιεχωβά πι πνευμάσαρ, κα βοηθίνελ πι υπηρετόν τι μοιάζεν πιο μπουτ κο Χριστός καζόμ τζάλα ντα τι ερεσέν κο σημείος τι αβέν τέλειοι. (Ιωάν. 13:​15-17· Εφεσ. 4:​23, 24) Κάθε ντιβές, κα αβέν πιο ζουρανέ ντα πιο λατσσέ. Η ζωή αζομάν κα αβέλ μπαγιά μπουτ σουκάρ! (Ιώβ 33:​25) Σαρ όμως βοηθίντιβασα ακανά κάνα σκεφτίνασα ανταλά πράγματα οντουλένγκε σο κα αβέν πάλι κι ζωή;

13. Σαρ κα σικαβέλ η ανάσταση καζόμ μπουτ πράγματα τζανέλα ο Ιεχωβά αμένγκε σαρ βακερένα ο εδάφια Ψαλμός 139:​1-4;

¹³ Σαρ ντικχλάμ πιο τζανγκλέ, κάνα ο Ιεχωβά κα τζουβντιαρέλ ι τζενέν, κα ντεν-πες γκοντί ο ίδια πράγματα σο ντένας-πες γκοντί ντα κα τθερέν ο ίδιος χαρακτήρας. Σκεφτίνεν σο μανγκέλα τι βακερέλ ανταβά. Ο Ιεχωβά μανγκέλα-τουμέν αζόμ μπουτ σο ντικχέλα ντα ντέλα-πες γκοντί οντουλά σο τθερένα τουμαρέ γκοντιάτε ντα τουμαρέ γκίστε ντα οντουλά σο βακερένα ντα κερένα. Οτθάρ, άμα κα χρειαζίντιβελας τι ανέλ εκχέ τζενές πάλι κι ζωή, κα αβέλας ακριβώς αντικάς σαρ ισινέ πριν τι μερέλ. Ο βασιλιάς Δαβίδ τζανέλας καζόμ μπουτ πφαμπόλα ο Ιεχωβά ι κάθε εκχέσκε αμένταρ. (Διαβάνεν Ψαλμός 139:​1-4) Σαρ νιωθίνασα σο αγαβάσα καζόμ λατσσές τζανέλα-αμέν ο Ιεχωβά;

14. Σαρ πρέπει τι νιωθίνας κάνα σκεφτίνασα καζόμ λατσσές τζανέλα-αμέν ο Ιεχωβά;

¹⁴ Κάνα σκεφτίνασα καζόμ λατσσές τζανέλα-αμέν ο Ιεχωβά, δεν πρέπει τι τσσουβάς αμαρέ γκίστε. Σόσκε; Τι ντεν-τουμέν γκοντί ότι ο Ιεχωβά πφαμπόλα μπουτ αμένγκε. Τθερένα μπαρί αξία λέσκε ο χαρακτηριστικά σο κερένα ι κάθε εκχές αμένταρ ξεχωριστός. Ντικχέλα προσεκτικά οντουλά σο νακχάσα αμαρέ ζωγιάτε. Καζόμ λοκχιόλα αμαρό γκι σο τζανάσα-λες ανταβά! Ποτές δεν πρέπει τι νιωθίνας ότι ισινάμ κορκορέ. Κάθε λεπτός, ντα κάθε ντιβές, ο Ιεχωβά ισί πασέ αμέντε ντα μανγκέλα τι βοηθίνελ-αμέν.​—2 Χρον. 16:9.

15. Σαρ σικαβέλα η ανάσταση ι σοφία ι Ιεχωβάσκι;

¹⁵ Ο τζενέ κο ντουνιάς νταρένα κατά μεριπέ. Οντουλά σο ισί κι Μπενγκέσκο βας  χρησιμοποιήνενα ανταγιά νταρ για τι κερέν ι τζενέν τι μουκχέν πουμαρέ αμαλέν ντα ο πράγματα σο πακιάνα. Αμέν όμως να νταράσα λένταρ. Τζανάσα ότι, άμα αμαρέ ντουσμάνια κα μουνταρέν-αμέν, ο Ιεχωβά κα ανέλ-αμέν πάλι κι ζωή. (Αποκ. 2:​10) Ισινάμ σίγουροι ότι, σο-ντα τι κερέν, ναστί κα χωρίνεν-αμέν κατά αγάπη ι Ιεχωβάσκι. (Ρωμ. 8:​35-39) Σο μπαρί σοφία σικαντάς ο Ιεχωβά κάνα ντινάς πο λάφι τι τζουβντιαρέλ ι μουλέν! Επειδή τζανάσα-λες ανταβά, να νταράσα οντουλένταρ σο μανγκένα τι μουνταρέν-αμέν ντα τθεράσα μπαρό θάρρος τι ατσσάς πιστοί κο Ιεχωβά.

16. Καλά ερωτήσεις πρέπει τι κερέν τουμαρέ νεαυτόσκε, ντα σαρ κα βοηθίνεν-τουμέν ο απαντήσεις τι αγαβέν καζόμ μπέσα ντένα κο Ιεχωβά;

¹⁶ Άμα ο ντουσμάνια ι Ιεχωβάσκε κα βακερέν ότι κα μουνταρέν-τουμέν, κα ντεν μπέσα κο Ιεχωβά ότι κα ανέλ-τουμέν πάλι κι ζωή; Σαρ κα αβέν σίγουροι ότι κα ντεν λέσκε μπέσα οντιά στιγμή; Εκ τρόπος ισί τι πουτσέν-τουμέν: “Σικαβένα ο χουρντέ αποφάσεις σο λάβα κάθε ντιβές ότι ντάβα μπέσα ι Ιεχωβάσκε;” (Λουκ. 16:​10) Εκ γιαβέρ ερώτηση ισί: “Σικαβέλα ο τρόπος σο τζουβντιάβα ότι ντάβα μπέσα κο λάφι κι Ιεχωβάσκο ότι κα ντελ-μαν ο αναγκαία άμα κα τσσουβάβ πρώτα λέσκι Βασιλεία;” (Ματθ. 6:​31-33) Άμα τουμαρέ απαντήσεις ισί «βα», σικαβένα ότι ντένα μπέσα ι Ιεχωβάσκε ντα κα αβέν έτοιμοι τι ντεν-λεν πέρα σο-ντα τι νακχέν.​—Παρ. 3:5, 6.

17. (α) Σαρ σικαβέλα η ανάσταση ότι ο Ιεχωβά τθερέλα υπομονή; (β) Σαρ κα σικαβάς ότι εκτιμίνασα ι Ιεχωβάσκι υπομονή;

¹⁷ Ο Ιεχωβά αποφασιντάς κάνα κα ανέλ ο τέλος ανταλέ πφιρνέ ντουνιάσκο. (Ματθ. 24:​36) Να κα χασαρέλ πι υπομονή ντα να κα ανέλ πο ντιβές πιο τζανγκλέ. Μπεσέλα σαρ σαρ τι τζουβντιαρέλ ι μουλέν, αλλά τθερέλα υπομονή. (Ιώβ 14:​14, 15) Μπεκλεντίνελα τι αβέλ ο βακίτι για τι ανέλ-λεν πάλι κι ζωή. (Ιωάν. 5:​28) Τθεράσα μπουτ λόγους τι εκτιμίνας ι υπομονή ι Ιεχωβάσκι. Σκεφτίνεν: Επειδή ο Ιεχωβά τθερέλα υπομονή, μπουτ τζενέ, αντρέ οντουλέντε αμέν-ντα, ερεσαντέ «τι μετανιώνεν». (2 Πέτρ. 3:9) Ο Ιεχωβά μανγκέλα τι τθερέν καζόμ αβέλα-πες πιο μπουτ τζενέ ι ευκαιρία τι λεν ζωή για πάντα. Οτθάρ, τι σικαβάς ότι εκτιμίνασα λέσκι υπομονή. Σαρ; Τι κεράς σο νακχέλα αμαρέ βαστένταρ για τι αρακχάς οντουλέν “σο λένγκο γκι μανγκέλα τι σικλιόλ ι αλήθεια σο ντέλα ζωή για πάντα”, τι βοηθίνας-λεν τι μανγκέν ι Ιεχωβάς ντα τι υπηρετίνεν-λες. (Πράξ. 13:​48) Αζομάν, κα βοηθίντιβεν βον-ντα κατά υπομονή ι Ιεχωβάσκι, σαρ αμέν.

18. Σόσκε πρέπει τι τθεράς υπομονή ι γιαβερέντζαρ;

 ¹⁸ Ο Ιεχωβά κα μπεκλεντίνελ με υπομονή μέχρι κο τέλος κι χίλιε μπρεσένγκο σόσκε σάντε αζομάν κα αβάς τέλειοι. Μέχρι τι αβέλ-πες ανταβά, συγχωρίνελα αμαρέ αμαρτίες. Σίγουρα τθεράσα λόγους τι ρόντας ο λατσσιπέ κο γιαβερά ντα τι τθεράς υπομονή λέντζαρ. Ντικχέν σο αβιλό-πες εκχέ πφενιάκε σο λάκο ρομ αρχισάλο τι τθερέλ κρίσεις κατά άγχος ντα τσσιναντάς τι τζαλ κο συναθροίσεις. «Ανταβά ανέλας μάνγκε μπουτ ντουκχ», βακερέλα βόι. «Αμαρί ζωή αλλαξάλι ξαφνικά ντα ναστί κεράας σαρέ οντουλά σο μανγκάας». Σαρέ ανταλέ δύσκολε ντιβεσέντε όμως, οντιά λατσσί ρομνί τθερέλας υπομονή πι ρομέσαρ. Μουκχέλας πο πρόβλημας κο Ιεχωβά ντα ποτές να τσσιναντάς τι κερέλ προσπάθειες. Σαρ ο Ιεχωβά, αντικάς βόι-ντα να ντικχέλας ο πρόβλημας αλλά ο λατσσέ χαρακτηριστικά πι ρομέσκε. Βόι βακερέλα: «Μο ρομ τθερέλα μπουτ σουκάρ ιδιότητες ντα μαρέλα-πες για τι νακχαβέλ πο πρόβλημας». Καζόμ σημαντικός ισί τι τθεράς υπομονή αμαρέ φαμιλιάσαρ ή ι πφραλέντζαρ σο προσπαθίνενα τι νταϊντίνεν ο δύσκολα προβλήματα!

19. Σο πρέπει τι αβάς αποφασισμέ τι κεράς;

¹⁹ Ο Ιησούς ντα ο άγγελοι ισινέ χαρούμενοι κάνα κερντιλί η πφουβ. Σκεφτίνεν όμως καζόμ ευτυχισμέ κα αβέν κάνα κα ντικχέν ι πφουβ πφερντί τέλειε τζενέντζαρ σο μανγκένα ι Ιεχωβάς ντα υπηρετίνενα-λες. Σκεφτίνεν καζόμ χαρούμενοι κα αβέν οντουλά σο κα τζαν κο ουρανός για τι κυβερνίνεν γιεκ ι Ιησούσαρ καζόμ κα ντικχέν ι τζενέν τι βοηθίντιβεν οντουλένταρ σο κα κερέν λένγκε. (Αποκ. 4:4, 9-11· 5:9, 10) Ντα σκεφτίνεν τι τζουβντιόν αζομάν σο να κα ροβάς επειδή ντουκχάσα αλλά επειδή ισινάμ χαρούμενοι, κάνα ο νασφαλιπέ, η στεναχώρια ντα ο μεριπέ κα χασάρντιβεν για πάντα. (Αποκ. 21:4) Μέχρι αζομάν, τι αβέν αποφασισμέ τι σικαβέν αγάπη, σοφία ντα υπομονή σαρ σικαβέλα τουμαρό Ντατ. Άμα κερένα-λες ανταβά, κα ατσσικιαρέν τουμαρί χαρά, σο-ντα τι νακχέν. (Ιακ. 1:​2-4) Καζόμ μπαρί εκτίμηση τθεράσα ι Ιεχωβάσκε σο ντινάς πο λάφι τι «τζουβντιόν πάλι» ο μουλέ!​—Πράξ. 24:15.