1. Σόσκε κερντάς εντύπωση ο προφήτης Δανιήλ κο Βαβυλώνιοι;

 Ο ΠΡΟΦΗΤΗΣ Δανιήλ ισινέ τερνό κάνα ο Βαβυλώνιοι λιντέ-λες ντουρ λέσκε τθεμέσταρ σαρ αιχμάλωτος. Αλλά ο Δανιήλ μάλλον κερντάς εντύπωση κο Βαβυλώνιοι. Βον ντικχλέ “οντουβά σο ντικχίντιβελας”​—ότι ο Δανιήλ ισινέ εκ τερνό «χωρίς καέκ ελάττωμας, με λατσσί εμφάνιση» ντα ότι ισινέ σημαντικέ φαμιλιάταρ. (1 Σαμ. 16:7) Οτθάρ, ντινέ-λες εκπαίδευση για τι τθερέλ μπαρί θέση κι κοινωνία.​—Δαν. 1:3, 4, 6.

2. Σαρ ντικχέλας ο Ιεχωβά τον Δανιήλ; (Ιεζεκιήλ 14:14)

² Ο Ιεχωβά μανγκέλας τον Δανιήλ, όχι επειδή ισινέ σουκάρ ή επειδή τθερέλας μπαρί θέση κι κοινωνία, αλλά επειδή ντικχέλας σο τζενό τραμπιντάς τι αβέλ ανταβά τερνό. Μάλιστα, κάνα ο Ιεχωβά βακερντάς ότι ο Δανιήλ μοιάζελας κο Νώε ντα κο Ιώβ, ο Δανιήλ μπέκιμ τι ισινέ περίπου 20 μπρεσένγκο. Άρα, κο γιακχά κι Ιεχωβάσκε, ο Δανιήλ ισινέ αζόμ δίκαιος καζόμ ισινέ ο Νώε ντα ο Ιώβ, σο υπηρετιντέας ι Ντεβλές πιστά για μπουτ μπρεσά. (Γέν. 5:​32· 6:9, 10· Ιώβ 42:​16, 17· διαβάνεν Ιεζεκιήλ 14:​14) Ντα ο Ιεχωβά συνεχίνελας τι μανγκέλ τον Δανιήλ σαρέ ο μπρεσά σο τζουβντιλό ανταβά πιστός τζενό.​—Δαν. 10:​11, 19.

3. Σο κα ντικχάς ανταλέ μαθημάστε;

³ Ανταλέ μαθημάστε, κα ντικχάς ντούι ιδιότητες του Δανιήλ σο κερντέ-λες αγαπητός κο Ιεχωβά. Κι αρχή, κα εξηγίνας ι κάθε ιδιότητα ντα κα ντικχάς καλέ περιπτωσιέντε σικαντάς-λα. Σοράν, κα ντικχάς σο βοηθιντάς τον Δανιήλ τι σικλιόλ τι σικαβέλ ανταλά ιδιότητες. Τέλος, κα ντικχάς σαρ μπορίνασα τι μοιάζας λέστε. Παρόλο σο ανταβά μάθημας γραφισάλο ι τερνένγκε, σαρέ μπορίνασα τι σικλιάς κατά παράδειγμας του Δανιήλ.

4. Σαρ σικαντάς θάρρος ο Δανιήλ; Βακερέν εκ παράδειγμας.

⁴ Ο τζενέ σο τθερένα θάρρος μπέκιμ τι νιωθίνεν νταρ, αλλά να μουκχένα-λα τι σταματίνελ-λεν τι κερέν ο σωστός. Ο Δανιήλ ισινέ εκ τερνό σο σικαβέλας μπουτ μπαρό θάρρος. Ντικχέν ντούι  περιπτώσεις σο σικαντάς θάρρος. Η πρώτη περίπτωση μάλλον ισινέ περίπου ντούι μπρεσά σοράν κατά καταστροφή της Ιερουσαλήμ κατά Βαβυλώνιοι. Ο βασιλιάς ι Βαβυλωνάκο, ο Ναβουχοδονόσορ, νταρασάλο επειδή ντικχλάς εκ σουνό με εκ μπουτ μπαρό άγαλμας. Βακερντάς ότι κα μουνταρέλας σαρέ ι σοφόν, εμ τον Δανιήλ, άμα να κα μπορίνενας τι βακερέν λέσκε σο ντικχλάας πι σουνέστε ντα τι εξηγίνεν ανταβά σουνό. (Δαν. 2:​3-5) Ο Δανιήλ έπρεπε τι σιγκιαρέλ. Αλλιώς, κα μερένας μπουτ τζενέ. Ο Δανιήλ «γκιλό ντα μανγκλάς κατά βασιλιάς χρόνος για τι βακερέλ λέσκε ι εξήγηση». (Δαν. 2:​16) Ανταβά μανγκέλας θάρρος ντα πίστη. Η Γραφή να βακερέλα ότι, ανγκλέ, ο Δανιήλ ντινάας πάλι εξήγηση σουνέντε. Μανγκλάς πι αμαλένταρ​—σο λένγκε Βαβυλωνιακά ναβά ισινέ Σεδράχ, Μισάχ ντα Αβδενεγώ—​«τι προσευχίντιβεν τι τζιτζίνελ λένγκε ο Ντεβέλ σο ισί κο ουρανός για τι μουτθαβέλ λένγκε ο μυστικός». (Δαν. 2:​18) Ο Ιεχωβά απαντιντάς οντουλέ προσευχιέντε. Ι Ντεβλέσκε βοηθειάσαρ, ο Δανιήλ εξηγιντάς ο σουνό του Ναβουχοδονόσορα. Η ζωή του Δανιήλ ντα λέσκε αμαλένγκι σωσάλι.

5. Σαρ δοκιμασάλο πάλι ο θάρρος του Δανιήλ;

⁵ Σοράν από κάποιο βακίτι από αζομάν σο ο Δανιήλ εξηγιντάς ο σουνό με το μπουτ μπαρό άγαλμας, λέσκο θάρρος δοκιμασάλο πάλι. Ο Ναβουχοδονόσορ ντικχλάς ατζέκ εκ νταρανικανό σουνό. Ανταβά σουνό τθερέλας εκ μπουτ μπαρό δέντρος. Ο Δανιήλ εξηγιντάς με θάρρος κο βασιλιάς σο μανγκέλας τι βακερέλ ανταβά σουνό. Βακερντάς λέσκε ατζέ-ντα ότι κα ντιλίντιβελας ντα ότι να κα αβέλας βασιλιάς για κάποιο βακίτι. (Δαν. 4:​25) Ο βασιλιάς κα μπορίνελας εύκολα τι πακιάλ ότι ο Δανιήλ ισινέ λέσκο ντουσμάνι, ντα τι ντελ εντολή τι μουνταρέν-λες. Αλλά ο Δανιήλ σικαντάς θάρρος ντα εξηγιντάς οντουβά σουνό.

6. Σο μπέκιμ τι βοηθιντάς τον Δανιήλ τι τθερέλ θάρρος;

⁶ Σο μπέκιμ τι βοηθιντάς τον Δανιήλ τι τθερέλ θάρρος σαρί πι ζωή; Κάνα ισινέ χουρντό, ο Δανιήλ σίγουρα σικλιλό κατά παράδειγμας πι νταγιάκο ντα πι νταντέσκο. Να υπαρχίντιβελα καέκ αμφιβολία ότι βον ντένας καν κο οδηγίες σο ντινάς ο Ιεχωβά κο Ισραηλίτες νταντά ντα νταγιά, ντα σικλιαρένας ο Νόμος ι Ντεβλέσκο πουμαρέ τσσαβέστε. (Δευτ. 6:​6-9) Ο Δανιήλ να τζανέλας σάντε ο βασικά πράγματα κατά Νόμος, σαρ ισινέ ο Ντες Εντολές, αλλά ο λεπτομέρειες-ντα σο τθερένας τι κερέν οντουλέντζαρ σο μπορίνελας τι χαλ εκ Ισραηλίτης  ντα οντουλέντζαρ σο να μπορίνελας. b (Λευιτ. 11:​4-8· Δαν. 1:8, 11-13) Ο Δανιήλ σικλιλό επίσης ι ιστορία ι Ντεβλέσκε λαόσκι ντα τζανέλας σο αβέλας-πες κάνα να κερένας ο κανόνες ι Ιεχωβάσκε. (Δαν. 9:​10, 11) Χάρη οντουλένταρ σο νακχλάς σαρέ πι ζωγιάτε, ο Δανιήλ ισινέ σίγουρος ότι ο Ιεχωβά ντα ο ζουρανέ άγγελοι Λέσκε στηρίνενας-λες.​—Δαν. 2:​19-24· 10:​12, 18, 19.

7. Σο γιαβέρ βοηθιντάς τον Δανιήλ τι τθερέλ θάρρος; (Ντικχέν ι φωτογραφία-ντα)

⁷ Ο Δανιήλ σικλιαρέλας-πες κατά λάφια σο γραφιντέ ο προφήτες ι Ντεβλέσκε, εμ κατά προφητείες του Ιερεμία. Πο σοράν, οντουλέ σικλιαριμάσταρ ο Δανιήλ αγαντάς ότι ο μπερεκέτι μπρεσά σο ισινέ ο Ιουδαίοι αιχμάλωτοι κι Βαβυλώνα ατζεχάνικ κα μπιτίνενας. (Δαν. 9:2) Καζόμ ο Δανιήλ ντικχέλας ο προφητείες ι Γραφιάκε τι νικιόν μπαγιά, σίγουρα ντέλας ατζέ πο μπουτ μπέσα κο Ιεχωβά, ντα οντουλά σο ντένα μπουτ μπέσα κο Ντεβέλ μπορίνενα τι σικαβέν μπαρό θάρρος. (Ντικχέν Ρωμαίους 8:​31, 32, 37-39) Ο πο σημαντικός ισί ότι ο Δανιήλ προσευχίντιβελας μπουτ φαρ πι Νταντέστε σο ισί κο ουρανός. (Δαν. 6:​10) Μουτθαβέλας κο Ιεχωβά πο αμαρτίες ντα βακερέλας λέσκε σαρ νιωθίνελας. Επίσης, ο Δανιήλ μανγκέλας λέσταρ βοήθεια. (Δαν. 9:4, 5, 19) Ισινέ τζενό σαρ αμέν, οτθάρ να τθερέλας θάρρος πι μπιανιμάσταρ. Οκιά μπάνταρ, σικλιλό τι σικαβέλ ανταγιά ιδιότητα επειδή σικλιαρέλας-πες κατά λάφια ι προφητένγκε, προσευχίντιβελας ντα ντέλας μπέσα κο Ιεχωβά.

8. Σαρ μπορίνασα τι σικλιάς τι σικαβάς θάρρος;

⁸ Σο χρειαζίντιβελα τι κεράς για τι σικλιάς τι σικαβάς θάρρος; Αμαρό ντατ ντα αμαρί ντάι μπέκιμ βακερένα αμένγκε τι τθεράς θάρρος, αλλά ναστί ντένα-αμέν ανταγιά ιδιότητα σαρ τι αβέλας κληρονομιά. Κάνα σικλιάσα τι τθεράς θάρρος, ισί σαρ τι σικλιάς εκ νεβό πράγμας. Εκ τρόπος σο μπορίνενα τι αβέν λατσσέ εκχέ πραγμάστε ισί τι ντικχέν προσεκτικά σο κερέλα τουμαρό δάσκαλος ντα σοράν τι μοιάζεν λέστε. Αντικάς-ντα, σικλιάσα τι τθεράς θάρρος κάνα ντικχάσα προσεκτικά σαρ σικαβένα ο γιαβερά ανταγιά ιδιότητα ντα σοράν μοιάζασα λέντε. Άρα, σο σικλιλάμ κατά Δανιήλ; Σαρ βοβ, αντικάς αμέν-ντα χρειαζίντιβελα τι τζανάς λατσσές ο Λάφι ι Ντεβλέσκο. Πρέπει τι κεράς πο ζουρανί αμαρί φιλία ι Ιεχωβάσαρ. Ανταβά αβέλα-πες κάνα πουτράσα λέσκε αμαρό γκι μπουτ φαρ. Χρειαζίντιβελα επίσης τι ντας μπέσα κο Ιεχωβά ντα τι αβάς σίγουροι ότι κα βοηθίνελ-αμέν. Αντικάς, κάνα αμαρί πίστη κα δοκιμάντιβελ, κα σικαβάς θάρρος.

9. Σαρ βοηθίντιβασα κάνα σικαβάσα θάρρος;

⁹ Βοηθίντιβασα μπουτέ τροπόντζαρ κάνα σικαβάσα θάρρος. Ντικχέν ι εμπειρία του Μπεν. Τζάλας εκχέ σχολειόστε κι Γερμανία σο σαρέ πακιάνας κι εξέλιξη ντα αμντίνενας ότι οντουλά σο βακερέλα η Αγία Γραφή για τη δημιουργία ισί μασάλι. Εκ ντιβές, ντιντιλί κο Μπεν η ευκαιρία τι βακερέλ ανγκλάλ κι τάξη σόσκε πακιάλας ότι η ζωή δημιουργισάλι. Κερντάς λάφι με θάρρος οντουλένγκε σο πακιάλας. Καβά ισινέ ο αποτέλεσμας; Ο Μπεν βακερέλα: «Μο καθηγητής ασουντάς προσεκτικά ντα νικαντάς φωτοτυπίες ο πληροφορίες σο χρησιμοποιηντόμ, ντα ντινάς-λεν σαρί κι τάξη». Σο κερντέ ο συμμαθητές του Μπεν; «Μπουτ λένταρ μανγκένας τι ασουνέν-μαν», βακερέλα ο Μπεν, «ντα βακερντέ ότι θαυμάνενα-μαν». Σαρ σικαβέλα η εμπειρία του Μπεν, κάνα σικαβάσα θάρρος, ο γιαβερά σεβάνενα-αμέν. Μπορεί επίσης τι ταρτίνας ι λατσσέ τζενέν κο Ιεχωβά. Σίγουρα, τθεράσα σημαντικούς λόγους τι σικλιάς τι σικαβάς θάρρος.

10. Σο ισί αφοσίωση;

¹⁰ Κι Αγία Γραφή, ο εβραϊκός λάφι σο μεταφράντιβελα «αφοσίωση», ή «αφοσιωμέ αγάπη», μανγκέλα τι βακερέλ ότι εκ τζενό ισί ντιπ πασέ εκχέ γιαβερέστε. Μπουτ φαρ, ανταβά λάφι χρησιμοποιήντιβελα για τι σικαβέλ ι αγάπη σο τθερέλα ο Ντεβέλ πι υπηρετόνγκε. Ο ίδιος λάφι χρησιμοποιήντιβελα επίσης για τι σικαβέλ ι αγάπη σο τθερένα ο υπηρέτες ι Ντεβλέσκε ο εκ ι γιαβερέσαρ. (2 Σαμ. 9:6, 7) Αμαρί αφοσίωση μπορίνελα τι αβέλ πο ζουρανί καζόμ νακχένα ο μπρεσά. Ντικχέν σαρ αβιλό-πες ανταβά κο Δανιήλ.

11. Σαρ δοκιμασάλι η αφοσίωση του Δανιήλ κάνα ισινέ πφουρό; (Ντικχέν ι φωτογραφία κι ανγκλαϊνί σελίδα)

¹¹ Η αφοσίωση σο σικαντάς ο Δανιήλ κο Ιεχωβά δοκιμασάλι μπουτ φαρ σαρέ λέσκε ζωγιάτε. Αλλά εκ κατά πο μπαρέ δοκιμασίες αβιλί κάνα ισινέ πο μπουτ από 90 μπρεσένγκο. Αζομάν, ο Μήδοι ντα ο Πέρσες λιντέας ι Βαβυλώνα ντα κερέλας-λα κουμάντος ο βασιλιάς Δαρείος. Κάποιοι αξιωματικοί σο υπηρετίνενας τον Δαρείο να συμπαθίνενας τον Δανιήλ ντα να σεβάνενας ι Ντεβλές σο ντέλας λατρεία. Οτθάρ, κερντέ εκ πφιρνικανό σχέδιος για τι μερέλ ο Δανιήλ. Κερντέ ι βασιλιάς τι νικαβέλ εκ νόμος σο κα σικαβέλας άμα ο Δανιήλ κα αβέλας αφοσιωμέ πι Ντεβλέστε ή κο βασιλιάς. Ο μόνος πράγμας σο χρειαζίντιβελας τι κερέλ ο Δανιήλ για τι σικαβέλ πι αφοσίωση κο βασιλιάς, ντα αντικάς μα τι ξεχωρίνελ σαρέ κατά γιαβερά, ισινέ τι τσσιναβέλ τι προσευχίντιβελ κο Ιεχωβά για 30 ντιβεσά. Ο Δανιήλ να μανγκλάς τι κερέλ-λες ανταβά. Οτθάρ, φουρτιντέ-λες κι γούρνα κι λιονταρίνγκι. Αλλά ο Ιεχωβά ευλογιντάς-λες επειδή ισινέ αφοσιωμέ ντα σωντάς-λες κατά μούι ι λιονταρίνγκο. (Δαν. 6:​12-15, 20-22) Σαρ μπορίνασα τι σικλιάς τι σικαβάς μπαρί αφοσίωση κο Ιεχωβά, σαρ οντιά σο σικαντάς ο Δανιήλ;

12. Σαρ σικλιλό ο Δανιήλ τι σικαβέλ μπαρί αφοσίωση κο Ιεχωβά;

¹² Σαρ βακέρντιλο πο οπρέ, ανταβά σο τσσίντελα-αμέν τι αβάς αφοσιωμέ ισί η ζουρανί αγάπη. Ο Δανιήλ σικαντάς μπαρί αφοσίωση κο Ιεχωβά επειδή μανγκέλας μπουτ πι Νταντές σο ισί κο ουρανός. Ο Δανιήλ σίγουρα μπαριαρντάς ανταγιά αγάπη επειδή σκεφτίνελας ο ιδιότητες ι Ιεχωβάσκε ντα ο τρόπος σο σικαβέλας-λεν. (Δαν. 9:4) Επίσης, ο Δανιήλ  σκεφτίνελας λατσσές σαρέ ο λατσσέ πράγματα σο κερντάας ο Ιεχωβά λέσκε ντα Πι λαόσκε, ντα νιωθίνελας εκτίμηση ανταλένγκε.​—Δαν. 2:​20-23· 9:​15, 16.

13. (α) Σαρ δοκιμάντιβελα η αφοσίωση αμαρέ τερνένγκι; Βακερέν εκ παράδειγμας. (Ντικχέν ι φωτογραφία-ντα) (β) Σαρ σικαβέλα ο βίντεος, σαρ κα μπορίνενας τι απαντίνεν κάνα πουτσένα-τουμέν άμα ο Μάρτυρες συμφωνίνενα οντουλέντζαρ σο τζάνα μουρσά μουρσέντζαρ ντα τζουβλιά τζουβλίντζαρ;

¹³ Σαρ ο Δανιήλ, αντικάς αμαρέ τερνέ-ντα τθερένα ντονταλάι πουμένταρ τζενέν σο να σεβάνενα ι Ιεχωβάς ντα λέσκε κανόνες. Ασακέ τζενέ μπέκιμ να συμπαθίνενα οντουλέν σο βακερένα ότι μανγκένα ι Ντεβλές. Μερικοί μπέκιμ προσπαθίνενα ατζέ-ντα τι νταραβέν αμαρέ τερνέν για τι τσσιναβέν τι αβέν αφοσιωμέ κο Ιεχωβά. Ντικχέν για παράδειγμας σο αβιλό-πες εκχέ τερνέστε, κο Γκρέιαμ, σο τζουβντιόλα κι Αυστραλία. Βοβ νακχλάς εκ δυσκολία κάνα τζάλας γυμνάσιος. Εκ φαρ, η καθηγήτρια πουτσλάς ι μαθητέν σο κα κερένας άμα εκ λένγκε αμαλένταρ κα μουτθαβέλας λένγκε ότι τζάλας μουρσέντζαρ. Η καθηγήτρια βακερντάς ότι σαρέ οντουλά σο κα συμφωνίνενας οντουλέσαρ σο τραμπιντάς λένγκο αμάλ έπρεπε τι τζαν κι εκ μπάντα κι αιθουσάκι. Οντουλά σο να κα συμφωνίνενας, κι γιαβέρ μπάντα. Ο Γκρέιαμ βακερέλα: «Σαρί η τάξη γκιλί κι μπάντα σο συμφωνίνελας ανταλέσαρ, εκτός μάνταρ ντα εκχέ γιαβερέ Μαρτυράσταρ». Ανταβά σο αβιλό-πες σοράν δοκιμαντάς μπαγιά ι αφοσίωση του Γκρέιαμ κο Ιεχωβά. Βοβ βακερέλα: «Σαρό κο μάθημας, ο γιαβερά μαθητές αλλά εμ αμαρί καθηγήτρια πρασάνας-αμέν ντα προσβαλίνενας-αμέν. Κερντόμ ο πο λατσσό σο μπορίναβας για τι κεράβ λάφι οντουλένγκε σο πακιάβα ήρεμε ντα λογικέ τροπόσαρ, αλλά να μανγκένας τι ασουνέν τίποτα». Σαρ νιωσάλο ο Γκρέιαμ κάνα δοκιμασάλι λέσκι αφοσίωση; Βοβ βακερέλα: «Να μπεϊντίναβας κάνα μο συμμαθητές προσβαλίνενας-μαν, αλλά ισινόμας μπουτ χαρούμενος σόσκε κερντόμ λάφι οντουλένγκε σο πακιάβας χωρίς τι κεράβ παλάλ». c

14. Καλέ τροπόσαρ μπορίνασα τι σικλιάς τι σικαβάς μπαρί αφοσίωση κο Ιεχωβά;

¹⁴ Μπορίνασα τι σικλιάς τι σικαβάς μπαρί αφοσίωση κο Ιεχωβά άμα, σαρ ο Δανιήλ, τθεράσα Λέσκε μπαρί αγάπη. Μανγκάσα ι Ιεχωβάς ατζέ πο μπουτ κάνα σικλιάσα για το ιδιότητες λέσκε. Για παράδειγμας, μπορίνασα τι ρόντας αχόρτ κο πράγματα σο κερντάς. (Ρωμ. 1:​20) Άμα μανγκένα τι μπαριαρέν τουμαρί αγάπη ντα τουμαρό σεβασμός ι Ιεχωβάσκε, κα μπορίνενας τι διαβάνεν ο χουρντέ θέματα σο ισί κι σειρά «Μανγκέλας Γκοντί για τι Κερντιόλ;» ή τι ντικχέν ο βίντεα. Μπορίνενα επίσης τι ντικχέν πληροφορίες κατά βιβλιάρια Δημιουργήθηκε η Ζωή; ντα Σαρ Αβιλί η Ζωή​—Παντς Ερωτήσεις σο Ισί Λατσσό τι Κεράς. Ντικχέν σο βακερντάς εκ τερνί πφεν κατά Δανία, η Έστερ, για το εκδόσεις ανταλά: «Ο τρόπος σο εξηγίνενα ο πληροφορίες ισί μπουτ σουκάρ. Ο βιβλιάρια να βακερένα τούκε σο τι πακιάς. Απλώς βακερένα σαρ ισί ο πράγματα ντα μουκχένα-τουτ τι τραμπίνες». Ο Μπεν βακερέλα: «Ανταλά πληροφορίες μπαριαρντέ μπουτ μι πίστη. Σικαντέ μάνγκε ότι ο Ντεβέλ δημιουργιντάς ι ζωή». Κάνα κα διαβάνεν ανταλά πληροφορίες, μάλλον κα συμφωνίνεν οντουλέσαρ σο βακερέλα η Γραφή: «Άξιος ισινάν Ιεχωβά, αμαρό Ντεβέλ, τι λες ι δόξα, ι τιμή ντα ι ζορ, σόσκε τούι κερντάν-λεν σαρέ».​—Αποκ. 4:​11. d

15. Καβά ισί εκ γιαβέρ τρόπος σο μπορίνασα τι τθεράς εκ ζουρανί φιλία ι Ιεχωβάσαρ;

¹⁵ Εκ γιαβέρ τρόπος για τι σικλιάς τι σικαβάς ζουρανί αγάπη ι Ιεχωβάσκε ισί τι εξετάνας προσεκτικά ι ζωή λέσκε Τσσαβέσκι, ι Ιησούσκι.  Εκ τερνί πφεν, η Σαμίρα, σο τζουβντιόλα κι Γερμανία, κερντάς-λες ανταβά. Βόι βακερέλα: «Γνωριντόμ πο λατσσές ι Ιεχωβάς αντράλ κατά Ιησούς». Κάνα η Σαμίρα ισινέ χουρντί, δυσκολίντιβελας τι αγαβέλ σαρ αβέλας-πες τι τθερέλ αισθήματα ο Ιεχωβά. Μπορίνελας όμως τι αγαβέλ σαρ νιωθίνελας ο Ιησούς. «Μπεϊντίναβας ι Ιησούς επειδή ισινέ λατσσό ι γιαβερέντζαρ ντα μανγκέλας ι τσσαβέν», βακερέλα η Σαμίρα. Καζόμ πο μπουτ σικλιόλας ι Ιησούσκε, αζόμ πο πασέ τζάλας κο Ιεχωβά. Σόσκε; Βόι βακερέλα: «Χάνικ χάνικ, αγαντόμ ότι ο Ιησούς μοιάζελα ντιπ πι Νταντέστε. Μοιάζενα μπουτ. Αγαντόμ ότι ανταβά ισινέ εκ λόγος σο ο Ιεχωβά μπουτσσαντάς ι Ιησούς κι πφουβ, για τι σικλιόν ο τζενέ πο λατσσές ι Ιεχωβάς». (Ιωάν. 14:9) Άμα μανγκένα τι κερέν πο ζουρανί τουμαρί φιλία ι Ιεχωβάσαρ, ντεν τουμαρέ σαατίσταρ για τι σικλιόν καζόμ πο μπουτ μπορίνενα ι Ιησούσκε. Άμα κα κερέν-λες ανταβά, κα μπαριαρέν τουμαρί αγάπη ντα τουμαρί αφοσίωση κο Ιεχωβά.

16. Σαρ βοηθίντιβασα κάνα ισινάμ αφοσιωμέ; (Ψαλμός 18:​25· Μιχαίας 6:8)

¹⁶ Μπουτ φαρ, ο τζενέ σο ισί αφοσιωμέ ο εκ κο γιαβέρ τθερένα ζουρανέ φιλίες σο ατσσικιαρένα μπουτ μπρεσά. (Ρουθ 1:​14-17) Επίσης, ο τζενέ σο ισί αφοσιωμέ κο Ιεχωβά τθερένα σημαντικούς λόγους τι νιωθίνεν ειρήνη αντρέ πουμέντε. Σόσκε; Επειδή ο Ιεχωβά ντέλα πο λάφι τι αβέλ αφοσιωμέ κο τζενέ σο ισί αφοσιωμέ λέστε. (Διαβάνεν Ψαλμός 18:​25· Μιχαίας 6:8) Σκεφτίνεν​—ο Δημιουργός, σο ισί ο πο ζουρανό, ντέλα πο λάφι ότι κα μανγκέλ-αμέν για πάντα! Ντα κάνα τθεράσα ανταγιά ζουρανί φιλία ι Ιεχωβάσαρ, καέκ δοκιμασία, καέκ ντουσμάνι, ατζέ-ντα ο μεριπέ να μπορίνελα τι χαλαβέλ αμαρί φιλία λέσαρ. (Δαν. 12:​13· Λουκ. 20:​37, 38· Ρωμ. 8:​38, 39) Οτθάρ, ισί μπουτ σημαντικός τι μοιάζας κο Δανιήλ ντα τι ατσσάς αφοσιωμέ κο Ιεχωβά!

17, 18. Σο γιαβέρ μπορίνασα τι σικλιάς κατά Δανιήλ;

¹⁷ Ανταλέ μαθημάστε, ντικχλάμ σάντε ντούι ιδιότητες του Δανιήλ. Αλλά μπορίνασα τι σικλιάς ατζέ πο μπουτ λέσταρ. Για παράδειγμας, ο Ιεχωβά ντινάς κο Δανιήλ μερικές φαντασίες ντα μερικά σουνέ, αλλά εμ ι ικανότητα τι εξηγίνελ προφητείες. Μπουτ οντουλέ προφητειένταρ ήδη νικίστιλε μπαγιά. Γιαβερά προφητείες βακερένα λεπτομέρειες πραγματένγκε σο κα αβέν-πες κο μέλλον, ντα κα επηρεάνεν κάθε τζενές κι πφουβ.

¹⁸ Κο γιαβέρ μάθημας, κα ντικχάς ντούι προφητείες σο γραφιντάς ο Δανιήλ. Άμα κα αγαβάς-λεν, ανταβά κα βοηθίνελ-αμέν σαριλέν, χουρντέν ντα μπαρέν, τι λας γκοντιαβέρ αποφάσεις ακανά. Ανταλά προφητείες μπορίνενα επίσης τι μπαριαρέν αμαρό θάρρος ντα αμαρί αφοσίωση για τι αβάς έτοιμοι τι νταϊντίνας ο δοκιμασίες σο ισί ακριβώς ανγκλ’ αμέντε.