1. Σο μπορεί τι αβέλ αμένγκε κάνα χασαράσα αμαρί ζορ;

ΚΑΘΕ ντιβές τθεράσα προβλήματα ντα κεράσα ο πιο λατσσό για τι νταϊντίνας-λεν. Αλλά ισί δύσκολος τι νταϊντίνας αμαρέ προβλήματα κάνα να τθεράσα ζορ. Οτθάρ, πρέπει τι ντικχάς ο πράγματα σο κερένα-αμέν τι χασαράς αμαρί ζορ σαρ εκ τσορ σο μανγκέλα τι λελ αμένταρ αμαρί σιγουριά, αμαρό θάρρος ντα αμαρί χαρά. Ο εδάφιος Παροιμίες 24:​10 ντα η υποσημείωση βακερένα: «Άμα χασαρντάν το κουράγιος κάνα τθερέσα προβλήματα, να κα τθερές μπουτ ζορ». Οτθάρ, κάνα χασαράσα αμαρό κουράγιος, μπορεί τι νιωθίνασα αζόμ μπίζουρανε σο ισί αμένγκε δύσκολος τι ντας-λεν πέρα ι προβληματέντζαρ.

2. Καλά πράγματα μπορεί τι κερέν-αμέν τι χασαράς αμαρί ζορ, ντα σο κα ντικχάς ανταλέ μαθημάστε;

² Ισί μπουτ πράγματα σο κερένα-αμέν τι χασαράς αμαρί ζορ. Μερικά ανταλένταρ ισί ο λάθη ντα ο νασφαλιπέ. Ή μπορεί τι χασαρντάμ αμαρί ζορ επειδή ατζέ να λιντάμ εκ διορισμός σο μανγκάσα κι υπηρεσία κι Ιεχωβάσκι ή επειδή ο τζενέ αμαρέ τθανέστε να μανγκένα τι ασουνέν ι Ντεβλέσκε. Ανταλέ μαθημάστε, κα ντικχάς μερικά πράγματα σο μπορίνασα τι κεράς για τι αρακχάς αμαρί ζορ.

3. Σο κα βοηθίνελ-αμέν μα τι νιωθίνας μπέτι αμαρέ νεαυτόσκε ντα αμαρέ λαθίνγκε;

³ Κα αβέλας εύκολος τι νιωθίνας μπέτι αμαρέ νεαυτόσκε ντα αμαρέ λαθίνγκε. Ανταβά μπορεί τι κερέλ-αμέν τι πακιάς ότι επειδή κεράσα λάθη, ο Ιεχωβά να κα μανγκέλ-αμέν κο νεβό ντουνιάς. Ισί μπουτ επικίνδυνος τι σκεφτίνας αντικάς. Σαρ πρέπει τι ντικχάς αμαρέ λάθη; Η Γραφή βακερέλα ότι, εκτός κατά Ιησούς, σαρέ ο τζενέ «αμαρτιντέ». (Ρωμ. 3:​23) Αλλά Οντουβά σο κερντάς τι γραφίντιβελ η Αγία Γραφή να ντικχέλα σάντε αμαρέ λάθη ούτε μπεκλεντίνελα αμένταρ τι αβάς  τέλειοι. Οκιά μπάνταρ, ισί εκ λατσσό Ντατ σο μανγκέλα τι βοηθίνελ-αμέν. Επίσης κερέλα υπομονή. Ντικχέλα καζόμ μπουτ πρέπει τι μαράς-αμέν για μα τι νιωθίνας μπέτι αμαρέ νεαυτόσκε ντα αμαρέ λαθίνγκε, ντα μανγκέλα τι βοηθίνελ-αμέν.​—Ρωμ. 7:​18, 19.

4, 5. Καβά πράγμας σο βακερένα ο εδάφια 1 Ιωάννη 3:​19, 20 βοηθιντάς ντουέ πφενίν τι αρακχέν πουμαρί ζορ;

⁴ Σκεφτίνεν σο αβιλό-πες κι Ντέμπορα ντα κι Μαρία. * Κάνα η Ντέμπορα ισινέ χουρντί, λάκι φαμιλί κερέλας-λα τι νιωθίνελ μπουτ μπέτι πι νεαυτόσκε. Χάνικ φαρ ασουνέλας εκ λατσσό λάφι. Ανταβά κερντάς-λα τι σκεφτίνελ μπέτι πι νεαυτόσκε. Κάνα κερέλας χουρντέ λάθη, νιωθίνελας ότι ισινέ άχρηστη. Η Μαρία-ντα νακχλάς κάτι ασακό. Λάκε τζενέ κερένας-λα τι λατζάλ πι νεαυτόσκε. Οτθάρ, νιωθίνελας ότι να τθερέλας αξία. Ντα κάνα σικλιλί ι αλήθεια, νιωθίνελας ότι να ισινέ άξια τι βακέρντιβελ Μάρτυρας ι Ιεχωβάσκι!

⁵ Όμως, οντουλά ντούι πφενιά να τσσιναντέ τι υπηρετίνεν ι Ιεχωβάς. Σόσκε; Εκ πράγμας σο βοηθιντάς-λεν ισινέ ότι κερντέ προσευχή ντα μουκχλέ κο Ιεχωβά ο πφαριπέ σο βάντενας. (Ψαλμ. 55:​22) Αγαντέ ότι αμαρό Ντατ, ο Ιεχωβά, τζανέλα ότι ο μπέτι πράγματα σο αβιλέ-πες αμένγκε ανγκλέ μπορεί τι κερένα-αμέν τι νιωθίνας μπέτι αμαρέ νεαυτόσκε. Αλλά ντικχέλα ο λατσσέ πράγματα σο τθεράσα αμαρέ γκίστε​—ιδιότητες σο αμέν να ντικχάσα αμαρέ νεαυτόστε.​—Διαβάνεν 1 Ιωάννη 3:​19, 20.

6. Σο μπορεί τι σκεφτίνελ εκ τζενό άμα κα κερέλ πάλι εκ λάθος;

⁶ Εκ τζενό μπορεί τι μαρέλα-πες τι τσσιναβέλ εκ μπέτι πράγμας σο ισί σικλό τι κερέλ. Αλλά μπορεί τι κερέλ πάλι οντουβά λάθος ντα αντικάς τι χασαρέλ πι ζορ. Σίγουρα, νιωθίνασα τύψεις κάνα αμαρτίνασα. (2 Κορ. 7:​10) Αλλά δεν πρέπει τι χαν-αμέν ο τύψεις, τι σκεφτίνας ότι να τθεράσα καέκ αξία ντα τι βακεράς: “Τίποτα να κεράβα λατσσές. Σαρ αβέλα-πες τι συγχωρίνελ-μαν ο Ιεχωβά;” Ανταβά νανέ μπαγιά ντα μπορεί τι κερέλ-αμέν τι τσσιναβάς τι υπηρετίνας ι Ιεχωβάς. Ντεν-τουμέν γκοντί σο διαβαντάμ κο εδάφιος Παροιμίες 24:​10​—να κα τθεράς ζορ άμα κα χασαράς αμαρό κουράγιος. Αντίς τι σκεφτίνεν αντικάς, κερέν προσευχή κο Ιεχωβά ντα μανγκέν λέσταρ τι συγχωρίνελ-τουμέν για τι “τακτοποιήνεν ο θέματα” λέσαρ. (Ησ. 1:​18) Κάνα ο Ιεχωβά ντικχέλα ότι μετανιωσάλεν μπαγιά, κα συγχωρίνελ-τουμέν. Κερέν λάφι κο πρεσβύτεροι-ντα. Κα βοηθίνεν-τουμέν τι αβέν πάλι λατσσέ αμαλά ι Ιεχωβάσαρ.​—Ιακ. 5:​14, 15.

7. Σόσκε δεν πρέπει τι χασαράς αμαρί ζορ άμα μαράσα-αμέν τι κεράς ο σωστός;

⁷ Ο Ζαν-Λικ, εκ πρεσβύτερος κατά Γαλλία, βακερέλα σαρέ οντουλένγκε σο μαρένα-πες  τι νικαβέν οπρά-πουμένταρ εκ ελάττωμας: «Δίκαιος κο γιακχά κι Ιεχωβάσκε νανέ οντουβά σο να κερέλα ποτές λάθη, αλλά οντουβά σο μετανιώνελα πι λαθίνγκε ντα μαρέλα-πες τι αλλάνελ». (Ρωμ. 7:​21-25) Οτθάρ, μα σκεφτίνεν ότι να τθερένα καέκ αξία άμα μαρένα-τουμέν τι κερέν ο σωστός. Ντεν-τουμέν γκοντί ότι καέκ νανέ ντιπ δίκαιος κο γιακχά κι Ντεβλέσκε. Σαρέ τθεράσα ανάγκη ι Ντεβλέσκο λατσσιπέ σο να αξίνασα-λες ντα σικαβέλα-λες αμένγκε αντράλ κατά λύτρος.​—Εφεσ. 1:7· 1 Ιωάν. 4:10.

8. Κάσταρ μπορίνασα τι λας βοήθεια κάνα χασαράσα αμαρί ζορ;

⁸ Μπορίνασα τι λας ζορ αμαρέ πφραλένταρ ντα πφενίνταρ​—αμαρέ πνευματικέ φαμιλιάταρ! Βον κα ασουνέν-αμέν κάνα τθεράσα ανάγκη τι κεράς λάφι ντα κα ντεν-αμέν ζορ πουμαρέ λατσσέ λαφίντζαρ. (Παρ. 12:​25· 1 Θεσ. 5:​14) Η Τζόι, εκ πφεν κατά Νιγηρία σο χασαρντάας πι ζορ, βακερέλα: «Σο κα κεράβας άμα να τθεράβας ι πφραλέν ντα ι πφενίν; Η ζορ σο λάβα λένταρ σικαβέλα μάνγκε ότι ο Ιεχωβά απαντίνελα μι προσευχιέντε. Επίσης, λένταρ σικλιλόμ τι νταβ ζορ οντουλέν σο ισί πφανγκέ γκίσκε». Πρέπει όμως τι ντας-αμέν γκοντί ότι αμαρέ πφραλά μπορεί μα τι τζανένα ότι μανγκάσα βοήθεια. Οτθάρ, μπορεί τι χρειαζίντιβελα τι βακεράς αμέν εκχέ πφραλέσκε ή εκχέ πφενιάκε ότι μανγκάσα βοήθεια.

9. Σαρ ντένα-αμέν ζορ ο εδάφια Ψαλμός 41:3 ντα 94:19;

⁹ Τι μανγκέν βοήθεια κατά Ιεχωβά. Κάνα να ισινάμ λατσσές ντα πιο μπουτ άμα τθεράσα μπουτ μπρεσά εκ νασφαλιπέ, μπορεί τι αβέλ αμένγκε δύσκολος τι σκεφτίνας σωστέ τροπόσαρ. Παρόλο σο ο Ιεχωβά ακανά να κερέλα θαύματα για τι αβάς λατσσές, λοκχιαρέλα αμαρό γκι ντα ντέλα-αμέν ι ζορ τι νταϊντίνας. (Διαβάνεν Ψαλμός 41:3· 94:​19) Για παράδειγμας, μπορεί τι κερέλ ι πφραλέν ντα ι πφενίν τι βοηθίνεν-αμέν κάνα μανγκάσα βοήθεια εκχέ μπουτιάτε κο κχερ ή κο ψώνια. Μπορεί τι κερέλ-λεν τι προσευχίντιβεν αμέντζαρ. Ή μπορεί τι βοηθίνελ-αμέν τι ντας-αμέν γκοντί κάτι λέσκε Λαφίσταρ σο λοκχιαρέλα αμαρό γκι, σαρ ισί η σουκάρ ζωή σο μπεκλεντίνασα τι τθεράς κο νεβό ντουνιάς χωρίς νασφαλίματα ντα ντουκχ.​—Ρωμ. 15:4.

10. Σαρ αρακχλάς ο Ισάνγκ πι ζορ σοράν κατά ατύχημας σο τθερέλας;

¹⁰ Ο Ισάνγκ, σο τζουβντιόλα κι Νιγηρία, τθερέλας εκ ατύχημας ντα ο γιατρός βακερντάς λέσκε ότι να κα πφιρέλ πάλι. Ο Ισάνγκ βακερέλα: «Τθεράβας μπαρί ντουκχ αντρέ μι γκίστε. Ισινόμας πφαμπαρντέ γκίσκο». Αλλά ατσσιλό στεναχωριμέ; Νάα! Σο βοηθιντάς-λες; «Μι ρομνί ντα με να τσσιναντάμ τι προσευχίντιβας κο Ιεχωβά ντα τι σικλιαράς-αμέν λέσκε Λαφίσταρ», βακερέλα. «Επίσης, ισινάμας αποφασισμέ τι σικαβάς αμαρί εκτίμηση σαρέ ι λατσσέ πραγματένγκε σο τθεράας, εμ ι ζωγιάκε σο μπεκλεντίνασα τι τθεράς κο νεβό ντουνιάς κι Ντεβλέσκο».

11. Σαρ αρακχέλας χαρά η Σίντι κάνα ισινέ μπουτ νασφαλί;

¹¹ Η Σίντι, σο τζουβντιόλα κο Μεξικό, σικλιλί ότι τθερέλας εκ μπουτ πφαρό νασφαλιπέ. Σαρ ντινάς-λεν πέρα; Καζόμ κερέλας θεραπεία, τσσουντάς στόχος τι ντελ μαρτυρία κάθε ντιβές. Η Σίντι γραφίνελα: «Ανταβά βοηθιντάς-μαν τι τθεράβ μι γκοντιάτε ι γιαβερέν, ντα όχι ι εγχείρηση, ι ντουκχ ή καζόμ μπέτι νιωθίναβας. Οντουβά σο κεράβας ισινέ ακαβά: Κάνα κεράβας λάφι ι γιατρόντζαρ, πουτσάβας λένγκε φαμιλίνγκε. Σοράν, πουτσάβας-λεν σόσκε τραμπιντέ τι κερέν εκ αζόμ δύσκολη μπουτί. Αντικάς, ισινέ εύκολος τι αγαβάβ σο τι βακεράβ για τι ερεσέλ αντρέ λένγκε γκίστε. Μπερεκέτι γιατροί βακερένας ότι μπουτ χάνικ φαρ εκ νασφαλό τζενό πουτσέλας-λεν σαρ ισινέ βον. Ευχαριστίνενας-μαν σο σικαβάβας λένγκε  ενδιαφέρον. Ντα μερικοί ντένας-μαν πουμαρό νούμερος. Ο Ιεχωβά βοηθιντάς-μαν τι νταϊντίναβ ο δύσκολα ντιβεσά μι ζωγιάκε ντα ντινάς-μαν αζόμ μπαρί χαρά σο να νακχέλας μι γκοντιάταρ!»​—Παρ. 15:15.

12, 13. Σο κερένα μερικοί σο ισί νασφαλέ ή πφουρέ για τι κερέν έργος, ντα καλά ισί ο αποτελέσματα;

¹² Οντουλά σο ισί νασφαλέ ή πφουρέ μπορεί τι χασαρένα πουμαρί ζορ σόσκε ναστί κερένα αζόμ μπουτ έργος. Όμως, μπουτ λένταρ αρακχένα τρόπους για τι ντεν μαρτυρία. Κο Ηνωμένες Πολιτείες, εκ πφεν σο βακερένας λάκε Λόρελ, τζουβντιόλας 37 μπρεσά εκχέ μηχανημάσαρ σο βοηθίνελας-λα τι λελ ανάσα! Τθερέλας καρκίνος, κερντάς μπαρέ εγχειρήσεις ντα τθερέλας προβλήματα κο δέρμας. Όμως, παρόλο σο τθερέλας αζόμ μπαρέ προβλήματα, να τσσιναντάς ποτές τι κερέλ έργος. Ντέλας μαρτυρία κο γιατροί ντα γιαβερέ τζενέντε σο τζάνας λάκε κχερέστε. Καβά ισινέ ο αποτέλεσμας; Βοηθιντάς 17 ή πιο μπουτ τζενέν τι σικλιόν ι Ιεχωβάσκε! *

¹³ Ο Ρισάρ, εκ πρεσβύτερος κατά Γαλλία, τθερέλα εκ λατσσί συμβουλή οντουλένγκε σο ναστί νικιόνα πουμαρέ κχερέσταρ ή ισί αντρέ κο γηροκομείος. «Βακεράβα λένγκε τι τσσουβέν χάνικ έντυπα εκχέ τθανέστε σο ντικχίντιβελα. Ανταβά ταρτίνελα ι γιαβερένγκι προσοχή ντα βοηθίνελα τι πουτάρντιβεν συζητήσεις. Αντικάς λένα ζορ αμαρέ αγαπημέ πφραλά ντα πφενιά σο ναστί τζάνα έργος κχερ κχερέστε». Οντουλά σο ναστί νικιόνα πουμαρέ κχερέσταρ μπορίνενα επίσης τι κερέν έργος με επιστολές ή κατά τηλέφωνος.

14. Σαρ μουκχλάς λατσσό παράδειγμας ο βασιλιάς Δαβίδ;

¹⁴ Μπορεί μα τι τθεράσα εκ ευθύνη σο κα μανγκάας τι τθεράς κι Ιεχωβάσκι υπηρεσία επειδή ισινάμ πφουρέ, νασφαλέ ή τθεράσα εκ γιαβέρ πρόβλημας. Άμα αβέλα-πες αμένγκε κάτι ασακό μπορίνασα τι σικλιάς μπουτ πράγματα κατά βασιλιάς Δαβίδ. Ο Δαβίδ μανγκέλας μπουτ τι κερέλ ο ναός ι Ντεβλέσκο, αλλά ο Ιεχωβά τραμπιντάς εκχέ γιαβερές τι κερέλ-λες ανταβά. Όμως, ο Δαβίδ ντινάς μπουτ χρυσάφι ντα ασήμι για τι βοηθίνελ οντουλές σο κα κερέλας ανταγιά μπουτί. Σο λατσσό παράδειγμας!​—2 Σαμ. 7:​12, 13· 1 Χρον. 29:1, 3-5.

15. Σαρ αρακχλάς πι ζορ ο Ιγκ;

¹⁵ Επειδή ισινέ νασφαλό, ο Ιγκ, εκ πφραλ κι Γαλλία, τσσιναντάς τι αβέλ πρεσβύτερος ντα ναστί κερέλας ατζέ-ντα κάποια χουρντέ πράγματα αντρέ κο κχερ. Βοβ γραφίνελα: «Κι αρχή, νιωθίναβας άχρηστος ντα χασαρντόμ ντιπ μι ζορ. Αλλά καζόμ νακχέλας ο καιρός, αγαντόμ καζόμ σημαντικός ισί μα τι τσσουβάβ μι γκίστε οντουλένγκε σο ναστί κεράβας ντα χαιρίναβας σο μπορίναβας  ατζέ-ντα αντικάς τι υπηρετίναβ ι Ιεχωβάς. Ισινόμ αποφασισμέ μα τι μουκχάβ-μαν. Σαρ ο Γεδεών ντα λέσκε 300 μουρσά​—σο ισινέ σαρέ κχινέ—​αντικάς με-ντα να κα τσσιναβάβ τι μαράβ-μαν!»​—Κριτ. 8:4.

16. Σο σικλιάσα κατά άγγελοι;

¹⁶ Ο πιστοί άγγελοι ισί εκ μπουτ λατσσό παράδειγμας. Κάνα ισινέ βασιλιάς ο Αχαάβ, ο Ιεχωβά μανγκλάς κατά άγγελοι τι βακερέν λέσκε καλέ τροπόσαρ κα μπορίνενας τι χουχαβέν οντουλέ πφιρνέ βασιλιάς. Μπερεκέτι άγγελοι βακερντέ σο σκεφτίνενας. Αλλά ο Ντεβέλ τραμπιντάς εκχέ αγγελός ντα βακερντάς λέσκε ότι οντουβά σο σκεφτιντάς ισινέ λατσσό. (1 Βασ. 22:​19-22) Μήπως ο γιαβερά άγγελοι χασαρντέ πουμαρί ζορ ντα βακερντέ: “Σινανέ ντινόμ μι σαατίσταρ”; Νάα. Ο άγγελοι ισί μπαγιά ταπεινοί ντα μανγκένα τι ντιντιόλ σαρί η δόξα κο Ιεχωβά.​—Κριτ. 13:​16-18· Αποκ. 19:10.

17. Σο πρέπει τι κεράς άμα χασαράσα αμαρί ζορ επειδή να τθεράσα ο ευθύνες σο κα μανγκάας κι Ιεχωβάσκι υπηρεσία;

¹⁷ Τι ντεν-τουμέν γκοντί ότι ο πιο μπαρό προνόμιος αμαρό ισί τι τθεράς οπρ’ αμέντε ι Ντεβλέσκο ναβ ντα τι κεράς λάφι λέσκε Βασιλειάκε. Μπορεί τι λας ή τι χασαράς ευθύνες κι υπηρεσία κι Ιεχωβάσκι. Αλλά να κερένα-αμέν ανταλά ευθύνες πολύτιμους ι Ντεβλέσκε. Κάνα ισινάμ ταπεινοί, αζομάν ισινάμ πολύτιμοι ι Ιεχωβάσκε ντα αμαρέ πφραλένγκε ντα πφενίνγκε. Οτθάρ, τι μολίνεν ι Ιεχωβάς τι βοηθίνελ-τουμέν τι ατσσόν ταπεινοί. Τι ανέν τουμαρέ γκοντιάτε ο μπουτ λατσσέ παραδείγματα ταπεινέ τζενένγκε σο ισί κο Λάφι κι Ντεβλέσκο. Τι κερέν σο νακχέλα τουμαρέ βαστέσταρ για τι υπηρετίνεν σαρέ τουμαρέ γκίσαρ τουμαρέ πφραλέν.​—Ψαλμ. 138:6· 1 Πέτρ. 5:5.

18, 19. Σαρ μπορίνενα τι αβέν χαρούμενοι κο έργος ατζέ-ντα κάνα ο τζενέ τουμαρέ τθανέστε να μανγκένα τι ασουνέν;

¹⁸ Μήπως μπάζιμα χασαρένα τουμαρί ζορ επειδή ο τζενέ τουμαρέ τθανέστε να μανγκένα τι ασουνέν ι Ντεβλέσκε ή επειδή να αρακχένα μπερεκέτι τζενέν κο κχερά; Άμα αβέλα-πες ανταβά, σαρ μπορίνασα τι ατσσικιαράς ή τι μπαριαράς αμαρί χαρά; Κα αρακχέν μερικές συμβουλές σο κα βοηθίνεν-τουμέν κο πλαίσιος « Σαρ τι Αρακχέν πιο Μπουτ Χαρά κο Έργος». Επίσης, ισί σημαντικός τι σκεφτίνεν σωστά ι εργόσκε. Σο μανγκέλα τι βακερέλ ανταβά;

¹⁹ Ντεν-τουμέν γκοντί ότι μανγκένα τι βοηθίνεν ι τζενέν τι σικλιόν ι Ντεβλέσκε ναβέσκε ντα λέσκε Βασιλειάκε. Ο Ιησούς σικαντάς ξεκάθαρα ότι σάντε χάνικα τζενέ κα αρακχέν ο ντρομ σο γκερέλα κι ζωή. (Ματθ. 7:​13, 14)  Κάνα ισινάμ κο έργος, τθεράσα ο προνόμιος τι συνεργαζίντιβας ι Ιεχωβάσαρ, ι Ιησούσαρ ντα ι αγγελόντζαρ. (Ματθ. 28:​19, 20· 1 Κορ. 3:9· Αποκ. 14:6, 7) Ο Ιεχωβά ταρτίνελα πασέ πέστε οντουλέν σο μανγκένα τι υπηρετίνεν-λες. (Ιωάν. 6:​44) Οντουλέσκε, άμα εκ τζενό να κα ασουνέλ ανταγιά φαρ οντουβά σο βακεράσα λέσκε, μπορεί τι ασουνέλ ι γιαβέρ φαρ σο κα τζας.

20. Σαρ βοηθίνενα-αμέν ο εδάφια Ιερεμίας 20:8, 9 τι αρακχάς αμαρί ζορ;

²⁰ Σικλιάσα μπουτ πράγματα κατά προφήτης Ιερεμίας. Κερέλας έργος εκχέ τθανέστε σο ο τζενέ να ασουνένας. Προσβαλίνενας-λες ντα πρασάνας-λες «σαρό ο ντιβές». (Διαβάνεν Ιερεμίας 20:8, 9) Εκ φαρ χασαρντάς αζόμ μπουτ πι ζορ σο μανγκέλας τι τσσιναβέλ τι κερέλ έργος. Να κερντάς-λες όμως. Σόσκε; «Ο λάφια ι Ιεχωβάσκε» ισινέ σαρ γιακ αντρέ κο Ιερεμίας, ντα ναστί ατσσικιαρέλας-λεν αντρέ πέστε! Ανταβά αβέλα-πες αμέντζαρ-ντα κάνα πφεράσα αμαρί γκοντί ντα αμαρό γκι ι Ντεβλέσκε Λαφίσαρ. Ανταβά ισί ατζέκ εκ λόγος για τι σικλιαράς-αμέν κάθε ντιβές κατά Γραφή ντα τι σκεφτίνας λατσσές οντουλά σο διαβάνασα. Αντικάς, κα τθεράς πιο μπαρί χαρά κο έργος ντα μπορεί τι αρχίνεν τι ασουνέν-αμέν πιο μπουτ τζενέ.​—Ιερ. 15:16.

21. Σαρ μπορίνασα τι αρακχάς αμαρί ζορ;

²¹ «Ο Μπενγκ κερέλα σο νακχέλα λέσκε βαστένταρ για τι χασαράς αμαρί ζορ», βακερέλα η Ντέμπορα. Αλλά ο Ιεχωβά Ντεβέλ ισί μπουτ πιο ζουρανό κατά Μπενγκ. Οτθάρ, κάνα χασαρένα τουμαρί ζορ, μολίνεν ι Ιεχωβάς τι βοηθίνελ-τουμέν τι ντεν-λεν πέρα τουμαρέ λαθίντζαρ. Κα ντελ-τουμέν ζορ κάνα ισινέν νασφαλέ. Κα βοηθίνελ-τουμέν τι συνεχίνεν τι σκεφτίνεν σωστά για το ευθύνες κι υπηρεσία κι Ντεβλέσκι. Ντα κα βοηθίνελ-τουμέν τι σκεφτίνεν σωστά ι εργόσκε. Επίσης, τι πουτρέν τουμαρό γκι τουμαρέ Νταντέσκε, ι Ιεχωβάσκε, ντα τι βακερέν λέσκε τουμαρέ ανησυχίες. Λέσκε βοηθειάσαρ, μπορίνενα τι αρακχέν πάλι τουμαρί ζορ.