1, 2. Σόσκε μπορεί τι αβέλ δύσκολη η ζωή ι Ντεβλέσκε υπηρετόνγκι αμαρέ ντιβεσέντε; (Ντικχ ο φωτογραφίες σο ισί κι αρχή)

ΜΠΟΥΤ γιατροί ντα νοσοκόμες φροντίνενα τζενέν σο λένγκε νασφαλίματα μπορίνενα τι πφερέν γιαβερέν-ντα. Κερένα-λες ανταβά επειδή μανγκένα τι βοηθίνεν-λεν. Αλλά χρειαζίντιβελα επίσης τι αρακχαβέν-πες για μα τι πφερντιόν βον-ντα οντουλέ νασφαλέ τζενένταρ σο προσπαθίνενα τι κερέν-λεν λατσσές. Σαρ υπηρέτες ι Ιεχωβάσκε, ισινάμ σε εκ κατάσταση σο μοιάζελα ανταλάσαρ. Μπουτ αμένταρ τζουβντιάσα ντα κεράσα μπουτί τζενέντζαρ σο ισί πνευματικά μολυσμέ κατά απόψεις ντα κατά ιδιότητες σο ισί μπουτ διαφορετικές κατά Ντεβλέσκε ιδιότητες. Ανταβά μπορεί τι αβέλ δύσκολος αμένγκε.

² Κο τελευταία ντιβεσά ανταλέ ντουνιάσκε, ο τζενέ σο να μανγκένα ι Ντεβλές να ντένα σημασία κο κανόνες λέσκε σο σικαβένα ο σωστός ντα ο λάθος. Ο απόστολος Παύλος βακερντάς καλά μπέτι ιδιότητες κα τθερένας όταν γραφιντάς ι δεύτερη επιστολή ι Τιμοθεόσκε. Ο Παύλος βακερντάς ότι ανταλά μπέτι ιδιότητες κα σικάντιβενας ατζέ πιο μπουτ καζόμ ερεσάσα κο τέλος ανταλέ ντουνιάσκο. (Διαβάνεν 2 Τιμόθεο 3:​1-5, 13) Παρόλο σο μπορεί μα τι μπεϊντίνασα ιτς ανταλά μπέτι  ιδιότητες, κα μπορίναας τι επηρεάντιβας κατά τρόπος σο σκεφτίνενα, κερένα λάφι ντα συμπεριφερίντιβενα ο τζενέ. (Παροιμίες 13:​20) Ανταλέ μαθημάστε, κα ντικχάς καζόμ διαφορετικές ισί ανταλά ιδιότητες κατά ιδιότητες σο τθερέλα ι Ντεβλέσκο λαός. Επίσης, κα ντικχάς σαρ μπορίνασα τι αρακχαβάς-αμέν για μα τι μολύντιβας κατά μπέτι ιδιότητες καζόμ βοηθίνασα γιαβερέ τζενέν τι γνωρίνεν ι Ιεχωβάς.

3. Καλέ τζενένγκε βακερένα ο εδάφια 2 Τιμόθεο 3:​2-5;

³ Ο Παύλος γραφιντάς ότι κο τελευταία ντιβεσά, “ο πράγματα κα αβένας μπουτ δύσκολα ντα να κα αβέλας εύκολος τι ντας-λεν πέρα”. Σοράν, βακερντάς 19 μπέτι ιδιότητες σο κα αβένας μπουτ συνηθισμέ αμαρέ ντιβεσέντε. Ανταλά ιδιότητες μοιάζενα οντουλέντζαρ σο βακερντάς ο Παύλος κο εδάφια Ρωμαίους 1:​29-31, αλλά κο εδάφια 2 Τιμόθεο 3:​2-5 υπαρχίντιβενα λάφια σο να αρακχάσα-λεν πουθενά γιαβερτθέ κο Χριστιανικές Ελληνικές Γραφές. Ο Παύλος αρχισάλο ακαλέ λαφίντζαρ: «Σόσκε ο τζενέ κα . . .» Βέβαια να τθερένα σαρέ ο τζενέ ανταλά μπέτι ιδιότητες. Ο Χριστιανοί τθερένα μπουτ διαφορετικές ιδιότητες.​—Διαβάνεν Μαλαχίας 3:18.

4. Σο μανγκέλα τι βακερέλ ότι εκ τζενό ισί πφερντό μπαρικανιπέ;

⁴ Αφού ο Παύλος βακερντάς ότι μπουτ τζενέ κα μανγκένας σάντε πουμαρό νεαυτός ντα ο λοβέ, βακερντάς επίσης ότι κα αβένας μπαρικανέ, εγωιστές ντα πφερντέ μπαρικανιπέ. Ο τζενέ σο τθερένα ανταλά ιδιότητες μπουτ φαρ αμντίνενα ότι ισί πιο λατσσέ κατά γιαβερά επειδή ισί σουκάρ, μπορίνενα τι κερέν μπουτ πράγματα, ισί χουλανέ ή επιτυχιμέ. Ασακέ τζενέ μανγκένα μπουτ τι ισαρέν-λεν ο γιαβερά. Εκ μορφωμέ τζενό γραφιντάς εκχέ ασακέ τζενέσκε: «Αντρέ λέσκε γκίστε υπαρχίντιβελα εκ χουρντό ναός σο οτθέ προσκυνίνελα πο νεαυτός». Μερικοί βακερντέ ότι ο μπαρικανιπέ ισί αζόμ μπέτι πράγμας σο ατζέ-ντα ο μπαρικανέ τζενέ να μπεϊντίνενα όταν ντικχένα γιαβερέν τι αβέν μπαρικανέ.

5. Σαρ αβιλέ μπαρικανέ ατζέ-ντα κάποιοι πιστοί υπηρέτες ι Ιεχωβάσκε;

⁵ Ο Ιεχωβά μισίνελα ο μπαρικανιπέ ή σαρ βακέρντιβελα γιαβέρτουλους κι Γραφή, μισίνελα ο «μπαρικανέ γιακχά». (Παροιμίες 6:​16, 17) Κι πραγματικότητα, ο μπαρικανιπέ να μουκχέλα ι τζενέν τι πλησιάνεν ι Ντεβλές. (Ψαλμός 10:4) Ισί εκ ιδιότητα ι Μπενγκέσκι. (1 Τιμόθεο 3:6) Δυστυχώς όμως, ατζέ-ντα μερικά τζενέ σο υπηρετίνενας πιστά ι Ιεχωβάς αβιλέ μπαρικανέ. Για παράδειγμας, ο Οζίας, σο ισινέ βασιλιάς κο Ιούδας, ισινέ πιστός μπουτ μπρεσά. Αλλά η Γραφή βακερέλα: «Κάνα λιντάς ζορ, λέσκο γκι αβιλό μπαρικανό ντα ανταβά κερντάς-λες καταστροφή, ντα να ατσσιλό πιστός κο Ιεχωβά, πι Ντεβλέστε». Ο Οζίας γκιλό κο ναός ντα πφαμπαρντάς θυμίαμας, ενώ να τθερέλας ο δικαίωμας τι κερέλ-λες ανταβά. Πιο σοράν, ο πιστός βασιλιάς Εζεκίας αβιλό βοβ-ντα μπαρικανό, σάντε για χάνικ καιρός.​—2 Χρονικών 26:​16· 32:​25, 26.

6. Σόσκε κα μπορίνελας τι αβέλ μπαρικανό ο Δαβίδ; Αλλά σόσκε ατσσιλό ταπεινός;

⁶ Μερικοί αβένα μπαρικανέ επειδή ισί σουκάρ, ζουρανέ, τθερένα μπαρό ναβ, ταλέντος κι μουσική ή επειδή ο γιαβερά ισαρένα-λεν. Ο Δαβίδ τθερέλας-λεν σαρέ ανταλά, αλλά ατσσιλό ταπεινός σαρί πι ζωή. Για παράδειγμας, κάνα ο Δαβίδ μουνταρντάς τον Γολιάθ, ο βασιλιάς Σαούλ βακερντάς λέσκε ότι μπορίνελας τι παντρίνελ λέσκε τσσαγιάσαρ. Αλλά ο Δαβίδ βακερντάς: «Κον ισινόμ με ντα κον ισί μο τζενέ, μι νταντέσκι φαμιλί κο Ισραήλ, για τι αβάβ ι βασιλιάσκο τζαμουτρό;» (1 Σαμουήλ 18:​ 18) Σο βοηθιντάς τον Δαβίδ τι ατσσόλ ταπεινός; Τζανέλας ότι σαρέ ανταλά ιδιότητες, ικανότητες ντα προνόμια τθερέλας-λεν επειδή ο Ντεβέλ ισινέ ταπεινός ντα ντινάς-λες σημασία. (Ψαλμός 113:​5-8) Ο Δαβίδ αγαβέλας ότι σο-ντα λατσσό πράγμας τθερέλας, αβέλας κατά Ιεχωβά.​—Ντικχ 1 Κορινθίους 4:7.

7. Σο κα βοηθίνελ-αμέν τι αβάς ταπεινοί;

⁷ Σαρ ο Δαβίδ, ο υπηρέτες ι Ιεχωβάσκε αντιβές προσπαθίνενα τι αβέν ταπεινοί. Αμαρό γκι πφερντιόλα εκτίμηση όταν σκεφτίνασα ότι ο Ιεχωβά, ο πιο Μπαρό σαριλένταρ, ισί ταπεινός. (Ψαλμός 18:​35) Μανγκάσα τι κεράς αμαρέ ζωγιάτε ακαλά λάφια: «Ιρίν ι συμπόνια ντα τουμαρέ σουκάρ αισθήματα, ο λατσσιπέ, ι ταπεινότητα, ι ηρεμία ντα ι υπομονή». (Κολοσσαείς 3:​12) Επίσης τζανάσα ότι η αγάπη «να ισαρέλα-πες, να πφερντιόλα μπαρικανιπέ». (1 Κορινθίους 13:4) Όταν ο γιαβερά ντικχένα ότι ισινάμ ταπεινοί, μπορεί τι μανγκέν βον-ντα τι γνωρίνεν ι Ιεχωβάς. Σαρ εκ Χριστιανή πι λατσσέ συμπεριφοράσαρ μπορίνελα τι βοηθίνελ πι ρομές τι γνωρίνελ ι Ιεχωβάς, αντικάς η ταπεινότητα-ντα σο τθερένα ο υπηρέτες ι Ντεβλέσκε μπορίνελα τι βοηθίνελ ι τζενέν τι γνωρίνεν ι Ντεβλές.​—1 Πέτρου 3:1.

8. (α) Αμαρέ ντιβεσέντε, σο άποψη τθερένα μερικοί ι τσσαβένγκε σο να ντένα καν πουμαρέ νταντές ντα νταγιά; (β) Σο βακερέλα η Γραφή τι κερέν ο τσσαβέ;

⁸ Ο Παύλος βακερντάς σαρ κα συμπεριφερίντιβελας ο εκ τζενό κο γιαβέρ κο τελευταία ντιβεσά. Γραφιντάς ότι ο τσσαβέ να κα ντένας καν πουμαρέ νταντές ντα πουμαρέ νταγιά. Αμαρέ ντιβεσέντε, μπουτ βιβλία, σινεμάδες ντα έργα κι τηλεόραση σικαβένα ότι ισί φυσιολογικός ντα νανέ λάθος ο τσσαβέ μα τι ντεν καν πουμαρέ νταντές ντα νταγιά. Αλλά ισί μπαγιά ότι ανταβά χαλαβέλα ι ενότητα ι φαμιλίνγκι ντα ανέλα μπέτι αποτελέσματα κι κοινωνία. Ο τζενέ τζανένα ανταγιά αλήθεια κατά πουρανέ μπρεσά. Για παράδειγμας, κι αρχαία Ελλάδα, αν εκ τζενό κα νταπέλας πι νταντές ντα πι νταγιά, κα χασαρέλας σαρέ πο πολιτικά δικαιώματα. Ο ρωμαϊκός νόμος βακερέλας ότι αν κάποιος κα ντέλας πι νταντές, κα μπορίνελας τι τιμωρίντιβελ σαρ εκ δολοφόνος. Εμ ο Εβραϊκές εμ ο Ελληνικές Γραφές ντένα κο τσσαβέ ι εντολή τι σεβάνεν πουμαρέ νταντές ντα νταγιά.​—Έξοδος 20:​12· Εφεσίους 6:​1-3.

9. Σο κα βοηθίνελ ι τσσαβέν τι ντεν καν πουμαρέ νταντές ντα νταγιά;

⁹ Σο μπορίνελα τι βοηθίνελ ι τσσαβέν τι ντεν καν πουμαρέ νταντές ντα νταγιά ατζέ-ντα άμα ο γιαβερά να κερένα-λες ανταβά; Όταν ο τσσαβέ σκεφτίνενα σαρέ ο λατσσέ πράγματα σο κερντέ λένγκε λένγκο ντατ ντα λένγκι ντάι, πρέπει τι εκτιμίνεν-λεν ντα τι μανγκέν τι ντεν-λεν καν. Ο τερνέ-ντα πρέπει τι αγαβέν ότι ο Ντεβέλ, σο ισί ο Ντατ σαριλένγκο, μπεσέλα λένταρ τι ντεν καν πουμαρέ νταντές ντα νταγιά. Κάνα ο τερνέ βακερένα κο γιαβερά λατσσέ πράγματα λένγκε, βοηθίνενα πουμαρέ αμαλέν τι σεβάνεν πιο μπουτ πουμαρέ νταντές ντα νταγιά. Όμως, άμα ο νταντά ντα ο νταγιά να τθερένα ιτς αγάπη πουμαρέ τσσαβένγκε, μπορεί τι αβέλ πιο δύσκολος ι τσσαβένγκε τι  ντεν-λεν καν. Αλλά όταν εκ τερνό νιωθίνελα ότι λέσκο ντατ ντα λέσκι ντάι μανγκένα-λες μπαγιά, ανταβά μπορίνελα τι βοηθίνελ-λες τι ντελ-λεν καν ατζέ-ντα κάνα ισί δύσκολος. Εκ τερνό πφραλ, ο Όστιν, βακερέλα: «Παρόλο σο μπουτ φαρ μανγκάβας τι κεράβ μιρό, μο ντατ ντα μι ντάι τσσουβένας λογικούς κανόνες, εξηγίνενας σόσκε τσσουβένας-λεν ντα κερένας μάντζαρ λάφι ελεύθερα. Ανταβά βοηθιντάς-μαν τι νταβ καν. Μπορίναβας τι ντικχάβ ότι πφαμπόνας μάνγκε ντα οτθάρ μανγκάβας τι κεράβ-λεν τι χαιρίνεν».

10, 11. (α) Καλά μπέτι ιδιότητες σικαβένα ότι ο τζενέ να μανγκένα ο εκ ι γιαβερές; (β) Καζόμ μανγκένα ο αληθινοί Χριστιανοί ι γιαβερέν;

¹⁰ Ο Παύλος βακερντάς γιαβερά-ντα ιδιότητες σο σικαβένα ότι ο τζενέ να μανγκένα ο εκ ι γιαβερές. Αφού βακερντάς ότι “να κα ντένας καν πουμαρέ νταντές ντα πουμαρέ νταγιά”, βακερέλα ότι κα αβένας αχάριστοι. Ανταβά ισί λογικός, επειδή ο αχάριστοι να εκτιμίνενα ο λατσσέ πράγματα σο κερένα λένγκε ο γιαβερά. Ο Παύλος βακερντάς επίσης ότι ο τζενέ να κα αβένας αφοσιωμέ. Κα τθερένας σορό, σο μανγκέλα τι σικαβέλ ότι να κα μανγκένας τι κερέν ειρήνη ι γιαβερέντζαρ. Κα κουσένας ντα κα αβένας προδότες, αφού κα βακερένας μπέτι πράγματα σο προσβαλίνενα όχι σάντε ι τζενέν, αλλά ι Ντεβλές-ντα. Ντα κα κατηγορίνενας με ψεύτικα λάφια ι γιαβερέν για τι χαλαβέν λένγκο λατσσό ναβ. *​—Ντικχ ι υποσημείωση.

¹¹ Ο υπηρέτες ι Ιεχωβάσκε ισί μπουτ διαφορετικοί κατά πιο μπουτ τζενέ κο ντουνιάς επειδή μανγκένα μπαγιά ι γιαβερέν. Ανταβά κερένας-λες πάντα. Ο Ιησούς βακερντάς ότι η μόνη εντολή κο Μωσαϊκός Νόμος σο ισινέ πιο σημαντική κατά εντολή τι μανγκέν ι γιαβερέ τζενέν ισινέ η εντολή τι μανγκέν ι Ντεβλές. (Ματθαίος 22:​38, 39) Ο Ιησούς βακερντάς επίσης ότι ο αληθινοί Χριστιανοί κα αγαντίντιβενας κατά αγάπη σο σικαβένα ο εκ κο γιαβέρ. (Διαβάνεν Ιωάννης 13:​34, 35) Ο αληθινοί Χριστιανοί κα μανγκένας ατζέ-ντα πουμαρέ ντουσμανίν.​—Ματθαίος 5:​43, 44.

12. Σαρ σικαβέλας ο Ιησούς αγάπη ι γιαβερένγκε;

¹² Ο Ιησούς μανγκέλας μπουτ ι τζενέν. Σικαντάς-λες ανταβά κάνα τζάλας τθαν τθανέστε για τι βακερέλ κο τζενέ ο λατσσέ αμπέρια για τη Βασιλεία ι Ντεβλέσκι. Κερντάς λατσσές ι κορορέν, ι μπανγκέν, ι λεπρόν ντα ι λαλορέν. Επίσης, αντάς ι μουλέν πάλι κι ζωή. (Λουκάς 7:​22) Παρόλο σο μπουτ τζενέ μισίνενας-λες, ο Ιησούς ντινάς ατζέ-ντα πι ζωή για τι σώνελ ι τζενέν. Λέσκι αγάπη σικαβέλας τέλεια ι αγάπη λέσκε Νταντέσκι. Σαρό κο ντουνιάς, ο Μάρτυρες ι Ιεχωβάσκε μοιάζενα κο Ιησούς ντα σικαβένα αγάπη ι γιαβερένγκε.

13. Σαρ η αγάπη σο σικαβάσα ι γιαβερένγκε βοηθίνελα-λεν τι γνωρίνεν ι Ιεχωβάς;

¹³ Η αγάπη σο σικαβάσα κο τζενέ, μπορίνελα τι κερέλ-λεν τι μανγκέν τι γνωρίνεν αμαρέ ουράνιε Νταντές. Για παράδειγμας, εκ μουρς κι Ταϋλάνδη γκιλό σε εκ περιφερειακή συνέλευση ντα κερντάς λέσκε εντύπωση κάνα ντικχλάς σαρ ο πφραλά ντα ο πφενιά σικαβένας αγάπη ο εκ ι γιαβερέσκε. Κάνα βουρτισάλο κχερέ, μανγκλάς τι κερέλ μελέτη ντούι φαρ κι εβδομάδα. Σοράν κερέλας λάφι ι Ντεβλέσκε σαρέ πι τζενένγκε. Ντα σάντε σιοβ μάσεκ πιο σοράν, κερντάς πρώτη φαρ ο διάβασμας ι Γραφιάκο κι Αίθουσα Βασιλείας. Σικαβάσα αγάπη ι γιαβερένγκε; Πουτσέν τουμαρό νεαυτός: “Κεράβα ο πιο λατσσό για τι βοηθίναβ ι γιαβερέν μι φαμιλιάτε, κι εκκλησία ντα κο έργος; Προσπαθίναβα τι ντικχάβ ι γιαβερέν σαρ ντικχέλα-λεν ο Ιεχωβά;”

14, 15. Καλά μπέτι ιδιότητες τθερένα μπουτ τζενέ; Σαρ αλλαντέ μερικοί πουμαρό χαρακτήρας;

¹⁴ Κο τελευταία ντιβεσά, ο τζενέ τθερένα γιαβερά-ντα μπέτι ιδιότητες σο δεν πρέπει τι τθεράς. Για παράδειγμας, μπουτ λένταρ ισί ντουσμάνια ι λατσσιμάσκε. Μισίνενα ο λατσσιπέ ντα τζάνα κόντρα λέστε. Ασακέ τζενέ να ατσσικιαρένα πουμαρό νεαυτός ντα ισί άγριοι. Μερικοί μανγκένα τι νακχέλ λένγκο. Κερένα πράγματα χωρίς τι σκεφτίνεν ντα να χάλα-λεν ανάγκη σαρ κα επηρεάνεν ι γιαβερέν οντουλά σο κερένα.

¹⁵ Μπουτ τζενέ σο συμπεριφερίντιβενας σαρ άγρια ζώα αλλαντέ πουμαρό χαρακτήρας. Ανταγιά μπαρί αλλαγή βακέρντιλιας εκχέ προφητειάτε κι Γραφή. (Διαβάνεν Ησαΐας 11:6, 7) Οτθέ διαβάνασα ότι άγρια ζώα, σαρ ισί ο λύκοι ντα ο λιοντάρια, μπεσένα ειρηνικά με ήρεμα ζώα, σαρ ισί ο μπρακέ ντα ο μοσχάρια. Σόσκε κα τθερένας ειρήνη; Σοράν, ανταγιά προφητεία βακερέλα: «Σόσκε η πφουβ κα πφερντιόλ κατά σικλιαριπέ ι Ιεχωβάσκο». (Ησαΐας 11:9) Ο ζώα ναστί σικλιόνα ι Ιεχωβάσκε, άρα με συμβολικός τρόπος, ανταγιά προφητεία βακερέλα για το αλλαγές σο κερένα ο τζενέ κο χαρακτήρας.

16. Σαρ βοηθιντάς η Γραφή μπουτέ τζενέν τι αλλάνεν πουμαρό χαρακτήρας;

¹⁶ Μπουτ πφραλά ντα πφενιά ισινέ άγριοι σαρ λύκοι αλλά ακανά τθερένα ειρήνη ι γιαβερέντζαρ. Μπορίνενα τι διαβάνεν ασακέ εμπειρίες κι σειρά «Η Αγία Γραφή Αλλάζει Ζωές», κο ιστότοπος jw.org. Οντουλά σο γνωριντέ ι Ιεχωβάς ντα υπηρετίνενα-λες νανέ σαρ οντουλά σο βακερένα ότι μανγκένα ι Ντεβλές, αλλά οντουλέντζαρ  σο κερένα σικαβένα ότι νανέ μπαγιά ανταβά. Ασακέ τζενέ κερένα-πες ότι υπηρετίνενα ι Ντεβλές, αλλά συμπεριφερίντιβενα τροπόσαρ σο σικαβέλα ότι να κερένα-λες ανταβά. Όμως, αντρέ κι Ιεχωβάσκο λαός ισί μπουτ τζενέ σο ανγκλέ ισινέ άγριοι αλλά ακανά “ιριντέ ο νεβό χαρακτήρας σο κερντιλό αντικάς σαρ μανγκέλα ο Ντεβέλ με αληθινή δικαιοσύνη ντα αφοσίωση”. (Εφεσίους 4:​23, 24) Κάνα ο τζενέ σικλιόνα ι Ντεβλέσκε, αγαβένα ότι τθερένα ανάγκη τι ακολουθίνεν λέσκε κανόνες. Ανταβά βοηθίνελα-λεν τι αλλάνεν οντουλά σο πακιάνα, ο τρόπος σο σκεφτίνενα ντα οντουλά σο κερένα. Νανέ εύκολος τι κερέν ασακέ αλλαγές, αλλά ο πνεύμας ι Ντεβλέσκο κα βοηθίνελ οντουλέν σο μανγκένα τι κερέν-λες τι χαιρίνελ.

17. Σαρ μπορίνασα μα τι επηρεάντιβας κατά τζενέ σο τθερένα μπέτι ιδιότητες;

¹⁷ Καζόμ τζάλα, αβέλα ατζέ πιο εύκολος τι ντικχίντιβελ η διαφορά σο τθερένα οντουλά σο υπηρετίνενα ι Ντεβλές οντουλένταρ σο να υπηρετίνενα-λες. Πρέπει τι προσοχίνας για μα τι επηρεάνεν-αμέν ο μπέτι ιδιότητες οντουλένγκε σο να υπηρετίνενα ι Ντεβλές. Μανγκάσα τι κεράς οντουβά σο βακερέλα ο Ιεχωβά, τι νασάς ντουρ οντουλένταρ σο τθερένα ο ιδιότητες σο βακέρντιβενα κο εδάφια 2 Τιμόθεο 3:​2-5. Όμως, ναστί νασάσα ντιπ οντουλένταρ σο τθερένα μπέτι ιδιότητες. Μπορεί τι χρειαζίντιβελα τι κεράς μπουτί λέντζαρ, τι τζας κο σχολείος λέντζαρ ή τι τζουβντιάς λέντζαρ. Αλλά να χρειαζίντιβελα τι σκεφτίνας ντα τι συμπεριφερίντιβας σαρ βον. Σο μπορίνελα τι βοηθίνελ-αμέν; Μπορίνασα τι κεράς προσωπική μελέτη ντα τι τραμπίνας αμαλέν σο μανγκένα ι Ιεχωβάς για τι κεράς αμαρί φιλία λέσαρ πιο ζουρανί.

18. Σαρ μπορίνενα οντουλά σο βακεράσα ντα κεράσα τι βοηθίνεν ι γιαβερέν τι γνωρίνεν ι Ιεχωβάς;

¹⁸ Μανγκάσα επίσης τι βοηθίνας γιαβερέν τι γνωρίνεν ι Ιεχωβάς. Τι ρόντεν ευκαιρίες για τι ντεν μαρτυρία ντα τι μανγκέν κατά Ιεχωβά βοήθεια για τι βακερέν ο σωστός λάφι κο σωστός σαάτι. Πρέπει τι βακεράς ι γιαβερένγκε ότι ισινάμ Μάρτυρες ι Ιεχωβάσκε. Αντικάς, αμαρί λατσσί συμπεριφορά κα ντελ δόξα κο Ντεβέλ όχι αμέντε. Ο Ιεχωβά σικλιαρντάς-αμέν «μα τι αβάς τζενέ σο να τθερένα σεβασμός ντα μανγκένα ι ντουνιάσκε πράγματα, αλλά τι τζουβντιάς ανταλέ ντουνιάστε τροπόσαρ σο σικαβέλα ότι ισινάμ λογικοί, δίκαιοι ντα σεβάνασα ι Ντεβλές». (Τίτο 2:​11-14) Άμα μοιάζασα κο Ιεχωβά ντα κεράσα οντουλά σο μανγκέλα, ο γιαβερά κα ντικχέν-λες ανταβά. Ντα μερικοί μπορεί ατζέ-ντα τι βακερέν: «Μανγκάσα τι αβάς τουμέντζαρ, σόσκε ασουντάμ ότι ο Ντεβέλ ισί τουμέντζαρ».​—Ζαχαρίας 8:23.