1, 2. Σόσκε κεράσα ι Ανάμνηση κάθε μπρες;

 ΠΑΣΕ 2.000 μπρεσά πο τζανγκλέ, ο Ιησούς ντινάς πι ζωή αμένγκε, για τι μπορίνας τι τζουβντιάς για πάντα. Ι ιράτ πριν τι μερέλ, ο Ιησούς βακερντάς πι μαθητένγκε τι κερέν ι Ανάμνηση απλέ τροπόσαρ, μαντρέσαρ ντα μολιάσαρ, για τι ντεν-πες γκοντί ι θυσία σο κερντάς μανγκιμάσαρ.​—1 Κορ. 11:​23-26.

² Ντάσα καν κι εντολή κι Ιησούσκι επειδή μανγκάσα-λες μπουτ. (Ιωάν. 14:​15) Κάθε μπρες κο εβδομάδες πριν ντα σοράν κατά Ανάμνηση, σικαβάσα αμαρί εκτίμηση σαρέ οντουλένγκε σο κερντάς καζόμ ντάσα αμαρέ σαατίσταρ για τι σκεφτίνας λατσσές με προσευχή σο μανγκέλα τι βακερέλ λέσκο μεριπέ ι τζενένγκε. Ντα χαράσαρ κεράσα πο μπουτ κο έργος, καζόμ καλίνασα καμπόρ πο μπουτ τζενέν αβέλα-πες τι αβέν αμέντζαρ ανταλέ σημαντικέ ντιβεσέστε. Μανγκάσα σαρέ αμαρέ γκίσαρ μα τι μουκχάς τίποτα τι τσσιναβέλ-αμέν τι τζας κι Ανάμνηση.

3. Σο κα ντικχάς ανταλέ μαθημάστε;

³ Ανταλέ μαθημάστε, κα ντικχάς καλέ τρινέ τροπόντζαρ ο λαός ι Ιεχωβάσκο κερντάς μπαρέ προσπάθειες για τι κερέλ ι Ανάμνηση ι Ιησούσκε μεριμάσκι: (1) κερένα ι Ανάμνηση αντικάς σαρ σικλιαρντάς-λεν ο Ιησούς τι κερέν-λα, (2) καλίνενα γιαβερέν κι Ανάμνηση ντα (3) κερένα ι Ανάμνηση παρόλο σο νακχένα δυσκολίες.

4. Καλά αλήθειες βακέρντιβενα κάθε μπρες κι Ανάμνηση, ντα σόσκε πρέπει τι τθερέν μπαρί αξία αμένγκε; (Λουκάς 22:​19, 20)

⁴ Κάθε μπρες κι Ανάμνηση, ασουνάσα εκ ομιλία σο βασίντιβελα  κι Γραφή ντα ντέλα ξεκάθαρες απαντήσεις μπουτέ ερωτησιέντε. Σικλιάσα σόσκε ο τζενέ τθερένα ανάγκη ο λύτρος ντα σαρ ο μεριπέ εκχέ τζενέσκο συγχωρίνελα ο αμαρτίες μπουτέ τζενένγκε. Αβέλα αμαρέ γκοντιάτε σο σικαβένα ο μαντρό ντα η μολ ντα κον πρέπει τι χαν ντα τι πιν λένταρ. (Διαβάνεν Λουκάς 22:​19, 20) Επίσης, σκεφτίνασα λατσσές ο ευλογίες σο μπεκλεντίνενα οντουλά σο τθερένα ι ελπίδα τι τζουβντιόν κι πφουβ. (Ησ. 35:5, 6· 65:​17, 21-23) Ανταλά αλήθειες πρέπει τι τθερέν μπαρί αξία αμένγκε. Δισεκατομμύρια τζενέ να τζανένα-λεν ντα να αγαβένα καζόμ πααλίς ισί η θυσία ι Ιησούσκι. Ντα να κερένα ι Ανάμνηση λέσκε μεριμάσκι αντικάς σαρ σικλιαρντάς βοβ τι κερέν-λα. Σόσκε;

5. Σοράν κατά μεριπέ ι πο μπουτ αποστολόνγκο, σο αβιλό-πες κο τρόπος σο σικλιαρντάς ο Ιησούς τι κεράς ι Ανάμνηση;

⁵ Χάνικ σοράν κατά μεριπέ ι πο μπουτ αποστολόνγκο σο τθερέλας ο Ιησούς, ψεύτικοι Χριστιανοί τσσουντέ-πες κι κχανγκιρί. (Ματθ. 13:​24-27, 37-39) Βακερένας «λάθος πράγματα για τι κερέν ι μαθητέν τι ακολουθίνεν-λεν». (Πράξ. 20:​29, 30) Εκ κατά «λάθος πράγματα» σο αρχισάλε τελικά τι σικλιαρέν ο ψεύτικοι Χριστιανοί ισινέ ότι ο Ιησούς να ντινάς πο σώμας «εκ φαρ για πάντα για τι βάντελ ο αμαρτίες μπουτέ τζενένγκε», σαρ βακερέλα η Γραφή, αλλά ότι λέσκι θυσία πρέπει τι αβέλ-πες συνέχεια. (Εβρ. 9:​27, 28) Αντιβές, μπουτ λατσσέ τζενέ πακιάνα ανταλά χουχαΐματα. Γκιντίντιβενα κο κχανγκιριά μπουτ φαρ, ατζέ-ντα κάθε ντιβές, για τι λεν ι μεταλαβιά. b Γιαβερά θρησκείες ντένα-πες γκοντί ο μεριπέ ι Ιησούσκο πο χάνικ φαρ, αλλά ο πο μπουτ τζενέ σο πακιάνα λέντε να αγαβένα ξεκάθαρα σο μανγκέλα τι βακερέλ ο μεριπέ ι Ιησούσκο ι τζενένγκε. Μερικά τζενέ μπέκιμ πουτσένα πουμαρό νεαυτός: “Μπορίνελα μπαγιά ο μεριπέ ι Ιησούσκο τι συγχωρίνελ μο αμαρτίες;” Σόσκε πουτσένα-λες ανταβά; Κάποιες φαρ επηρεασάλε οντουλένταρ σο βακερένα ότι η θυσία ι Ιησούσκι να συγχωρίνελα ο αμαρτίες. Σο κερντέ ανταλέσκε ο αληθινοί μαθητές ι Ιησούσκε;

6. Σο αγαντάς εκ ομάδα κατά σπουδαστές ι Γραφιάκε κο 1872;

⁶ Κο 1870, εκ ομάδα κατά σπουδαστές ι Γραφιάκε σο οδηγίνελας-λεν ο Κάρολος Τέηζ Ρώσσελ αρχισάλε τι ρόντεν αχόρτ κι Γραφή. Μανγκένας τι σικλιόν σο σημασία τθερέλας μπαγιά η θυσία ι Ιησούσκι ντα σαρ έπρεπε τι ντεν-πες γκοντί λέσκο μεριπέ. Κο 1872, αγαντέ κατά Γραφή ότι ο Ιησούς μπαγιά ντινάς λύτρος σαρέ ι τζενένγκε. Να ατσσικιαρντέ πουμένγκε ανταλά σο σικλιλέ. Οκιά μπάνταρ, πφιραντέ-λεν αντράλ κατά βιβλία, εφημερίδες ντα περιοδικά. Χάνικ σοράν ανταλέσταρ, σαρ ο Χριστιανοί κο πρώτος αιώνας, αρχισάλε τι γκιντίντιβεν σάντε εκ φαρ κο μπρες για τι κερέν ι Ανάμνηση.

7. Σο λατσσιπέ ντικχάσα κατά ροντιπέ σο κερντέ οντουλά πρώτοι σπουδαστές ι Γραφιάκε;

⁷ Αντιβές, ντικχάσα λατσσιπέ κατά ροντιπέ σο κερντέ οντουλά Χριστιανοί αζόμ μπρεσά πο τζανγκλέ. Σαρ; Ι Ιεχωβάσκε ευλογιάσαρ, αμαρέ γιακχά πουτάρντιλε ντα αγαβάσα σο μανγκέλα τι βακερέλ η θυσία ι Ιησούσκι ντα σο κα κερέλ σαρέ ι τζενένγκε. (1 Ιωάν. 2:1, 2) Ντα σικλιλάμ κατά Γραφή ότι ο τζενέ σο κερένα ι Ντεβλέσκο γκι τθερένα ντούι ελπίδες​—μερικοί κα τθερέν αθάνατη ζωή κο ουρανός ντα εκατομμύρια γιαβερά κα τθερέν ζωή για πάντα κι πφουβ. Τζάσα πο πασέ κο Ιεχωβά κάνα σκεφτίνασα καζόμ μανγκέλα-αμέν ντα καζόμ λατσσιπέ τθερέλα ο κάθε εκ αμένταρ  κατά θυσία ι Ιησούσκι. (1 Πέτρ. 3:​18· 1 Ιωάν. 4:9) Οτθάρ, σαρ αμαρέ πιστά πφραλά κο πουρανέ μπρεσά, καλίνασα γιαβερέν τι κερέν αμέντζαρ ι Ανάμνηση αντικάς σαρ σικλιαρντάς ο Ιησούς.

8. Σο τθερέλα κερντό ο λαός ι Ιεχωβάσκο για τι καλίνελ γιαβερέν κι Ανάμνηση; (Ντικχέν ι φωτογραφία)

⁸ Ο λαός ι Ιεχωβάσκο καλίνελα κατά πουρανέ μπρεσά γιαβερέν κι Ανάμνηση. Κο 1881, εκ ανακοίνωση κι Σκοπιά καλιντάς πφραλέν ντα πφενίν τι γκιντίντιβεν εκχέ κχερέστε κο Αλεγκένι κι Πενσυλβανία οντουλέ μπαρέ ντιβεσέσκε. Πο σοράν, κάθε κχανγκιρί κερέλας πιρί Ανάμνηση. Κο Μάρτιος κο 1940, βακέρντιλο κο πφραλά ότι κα μπορίνενας τι καλίνεν καλέ-ντα τζενές τι αρακχένας κο τομέας σο μανγκέλας τι σικλιόλ πο μπουτ. Κο 1960, για πρώτη φαρ ο Μπέθελ ντινάς κο κχανγκιριά τυπωμέ προσκλήσεις. Από αζομάν, ντιντιλέ δισεκατομμύρια προσκλήσεις ι Αναμνησιάκε. Σόσκε ντάσα αζόμ μπουτ αμαρέ σαατίσταρ ντα ζοριάταρ για τι καλίνας γιαβερέν;

9, 10. Καλά τζενέ βοηθίντιβενα κατά προσπάθειες σο κεράσα για τι καλίνας γιαβερέν κι Ανάμνηση; (Ιωάννης 3:16)

⁹ Εκ λόγος σο καλίνασα γιαβερέν τι αβέν αμέντζαρ κι Ανάμνηση ισί ότι μανγκάσα σαρέ οντουλά σο αβένα πρώτη φαρ τι σικλιόν ι αλήθεια οντουλένγκε σο τθερέλα κερντό ο Ιεχωβά ντα ο Ιησούς σαρέ αμένγκε. (Διαβάνεν Ιωάννης 3:​16) Μπεκλεντίνασα ότι οντουλά σο κα ντικχέν ντα κα ασουνέν κι Ανάμνηση κα τσσίντεν-λεν τι σικλιόν πο μπουτ ντα τι αβέν υπηρέτες ι Ιεχωβάσκε. Αλλά βοηθίντιβενα γιαβερά-ντα.

 ¹⁰ Καλίνασα οντουλέν-ντα σο ισί αδρανείς. Κεράσα-λες ανταβά για τι ανάς λένγκε γκοντιάτε ότι ο Ντεβέλ συνεχίνελα τι μανγκέλ-λεν. Μπουτ τζενέ αβένα, ντα χαιρίνασα μπουτ σο ντικχάσα-λεν. Κάνα αβένα κι Ανάμνηση, ντένα-πες γκοντί καζόμ μπουτ μπεϊντίνενας ο έργος ι Ιεχωβάσκο ανγκλέ. Ντικχέν σο αβιλό-πες κι Μόνικα, σο τσσιναντάας τι κερέλ έργος. c Κο νασφαλιπέ κι Κορωνοϊόσκο, αρχισάλι πάλι τι κερέλ έργος. Κάνα γκιλί κι Ανάμνηση κο 2021, βακερντάς: «Ανταγιά Ανάμνηση ισινέ μπουτ ξεχωριστή μάνγκε. Πρώτη φαρ σοράν από 20 μπρεσά, μπορισάλομ τι κεράβ έργος ντα τι καλίναβ τζενέν κι Ανάμνηση. Κερντόμ ο πο λατσσό σο μπορίναβας σόσκε ισινόμ πφερντί εκτίμηση οντουλένγκε σο κερντέ μάνγκε ο Ιεχωβά ντα ο Ιησούς». (Ψαλμ. 103:​1-4) Είτε ο τζενέ κα δεχτίνεν είτε να κα δεχτίνεν αμαρί πρόσκληση, αμέν κεράσα σο νακχέλα αμαρέ βαστένταρ για τι καλίνας γιαβερέν κι Ανάμνηση, σόσκε τζανάσα ότι ο Ιεχωβά εκτιμίνελα αμαρέ προσπάθειες.

11. Σαρ ευλογίνελα ο Ιεχωβά αμαρέ προσπάθειες για τι καλίνας ι τζενέν κι Ανάμνηση; (Αγγαίος 2:7)

¹¹ Ο Ιεχωβά ευλογίνελα μπουτ ο προσπάθειες σο κεράσα για τι καλίνας ι τζενέν κι Ανάμνηση. Κο 2021, παρόλο σο ναστί κεράας οντουλά σο κεράας ανγκλέ ιτιρί κατά Κορωνοϊός, ο τζενέ σο γκιλέ κι Ανάμνηση ισινέ 21.367.603​—πο μπουτ σαρέ κατά γιαβερά μπρεσά. Δηλαδή σχεδόν ντούι επκάς φαρ ο αριθμός ι Ιεχωβάσκε Μαρτυρένγκο σο ισί σαρό κο ντουνιάς! Σίγουρα, ι Ιεχωβάς να χάλα-λες ανάγκη ο αριθμοί. Ο σημαντικός λέσκε ισί ο τζενέ. (Λουκ. 15:7· 1 Τιμ. 2:3, 4) Τζανάσα ότι ο Ιεχωβά χρησιμοποιήνελα ο έργος σο κεράσα τι καλίνας γιαβερέν για τι βοηθίνελ-αμέν τι αρακχάς ι τζενέν σο τθερένα λατσσό γκι.​—Διαβάνεν Αγγαίος 2:7.

12. Σο κα μπορίνελας τι δυσκολίνελ-αμέν τι κεράς ι Ανάμνηση; (Ντικχέν ι φωτογραφία)

¹² Ο Ιησούς βακερντάας ότι, κο τελευταία ντιβεσά, κα νακχάας σαβέ τι μανγκές δυσκολίες​—κόντρα αμαρέ φαμιλιάταρ ντα γιαβερένταρ, τζένγκια, νασφαλίματα ντα μπουτ γιαβερά. (Ματθ. 10:​36· Μάρκ. 13:9· Λουκ. 21:​10, 11) Ισί φαρ σο ασακέ προβλήματα δυσκολίνενα-αμέν τι κεράς ι Ανάμνηση ι Ιησούσκε μεριμάσκι. Σο κερντέ αμαρέ πφραλά ντα πφενιά για τι νακχαβέν ασακέ δυσκολίες, ντα σαρ βοηθιντάς-λεν ο Ιεχωβά;

13. Σαρ ευλογιντάς ο Ιεχωβά ι Αρτιομίς σο ισινέ μπίνταρανο ντα αποφασισμέ τι κερέλ ι Ανάμνηση κι φυλακή;

¹³ Φυλακή. Αμαρέ πφραλά σο ισί κι φυλακή οντουλένγκε σο πακιάνα κερένα ο πο λατσσό για τι κερέν ι Ανάμνηση ι Ιησούσκε μεριμάσκι. Ντικχέν σο αβιλό-πες κο Αρτιόμ. Κο βακίτι κι Αναμνησιάκο κο 2020, ισινέ πφαντό εκχέ κελίστε σο ισινέ 17 τετραγωνικά μέτρα, γιεκ παντζέ γιαβερέ τζενέντζαρ. Παρόλο σο ισινέ πφαντό, μπορισάλο τι αρακχέλ κάποια πράγματα για τι χρησιμοποιήνελ-λεν σαρ μαντρό ντα μολ, ντα αποφασιντάς τι κερέλ ι ομιλία ι Αναμνησιάκι πέσκε. Αλλά ο γιαβερά τζενέ σο ισινέ λέσαρ πίνας τσιγάρα ντα κουσένας μπουτ. Σο κερντάς ο Αρτιόμ; Πουτσλάς-λεν άμα κα μπορίνενας μα τι κουσέν ντα μα τι πιν τσιγάρα σάντε εκχέ σαατίσκε. Σαστισάλο κάνα βον συμφωνιντέ μα τι πιν τσιγάρα ντα μα τι κουσέν καζόμ κα ατσσικιαρέλας η Ανάμνηση. Ο Αρτιόμ βακερέλα: «Βακερντόμ λένγκε ότι άμα μανγκένας κα μπορίναβας τι κεράβ λέντζαρ λάφι ι Αναμνησιάκε». Παρόλο σο βακερντέ ότι να μανγκένας τι ασουνέν, κάνα ντικχλέ ντα ασουντέ ι Αρτιομίς τι κερέλ ι Ανάμνηση, πουτσλέ-λες μπερεκέτι πράγματα.

14. Καλά προσπάθειες αβιλέ για τι κερντιόλ η Ανάμνηση αντρέ κο Κορωνοϊός;

 ¹⁴ Κορωνοϊός. Κάνα αβιλό ο Κορωνοϊός, ο λαός ι Ιεχωβάσκο να μπορίνελας τι κερέλ ι Ανάμνηση πασάλ. Αλλά ανταβά να τσσιναντάς-αμέν τι κεράς ι Ανάμνηση. d Ο κχανγκιριά σο τθερένα Ίντερνετ κερντέ ι Ανάμνηση αντράλ κατά Zoom. Αλλά σο αβιλό-πες ι εκατομμύριε πφραλέντζαρ σο να τθερένας Ίντερνετ; Μερικέ τθεμέντε, κανονιντέ τι ασούντιβελ η ομιλία κατά τηλεόραση ή κατά ραδιόφωνος. Επίσης, ο γραφεία τμήματος γκιντιντέ βίντεος ι ομιλία πο μπουτ από 500 τσσιμπέντε, για τι μπορίνεν τι κερέν ι Ανάμνηση οντουλά-ντα σο τζουβντιόνα τθεμέντε σο ισί ντουρ. Πιστά πφραλά γκερντέ ι ομιλία οντουλέντε σο να μπορίνενας τι ντικχέν-λα γιαβερέ τροπόσαρ.

15. Σο σικλιόνα κατά Σου;

¹⁵ Κόντρα κατά φαμιλί. Μερικέ τζενένγκε, η πο μπαρί δυσκολία για τι κερέν ι Ανάμνηση ισί η κόντρα κατά φαμιλί. Ντικχέν ο παράδειγμας εκχέ τζενιάκο σο κερέλα μελέτη ντα βακέρντιβελα Σου. Κο 2021, κο  ντιβές πριν κατά Ανάμνηση, η Σου βακερντάς κι πφεν σο κερέλας-λα μελέτη ότι, ιτιρί κατά κόντρα σο τθερέλας κο κχερ, ναστί κα τσσουβέλας-πες κι Ανάμνηση. Η πφεν διαβαντάς ο εδάφιος Λουκάς 22:​44. Σοράν βακερντάς λάκε ότι, κάνα νακχάσα δυσκολίες, πρέπει τι μανγκάς ι Ιεχωβάσκι βοήθεια αντράλ κατά προσευχή, σαρ κερέλας ο Ιησούς, ντα τι ντας σαρί αμαρί μπέσα Λέστε. Ο γιαβέρ ντιβές, η Σου κερντάς ο μαντρό ντα ι μολ ντα ντικχλάς ι Πρωινή Λατρεία κο ιστότοπος jw.org. Ι ιράτ, κορκορί πι δωματιόστε, ασουντάς ι Ανάμνηση κατά τηλέφωνος. Σοράν, η Σου γραφιντάς κι πφεν: «Ντινάν-μαν μπαρί ζορ ίτζι. Κερντόμ ο πο λατσσό για τι ασουνάβ ι Ανάμνηση, ντα μπαγιά ο Ιεχωβά κερντάς σαρέ ο γιαβερά. Ναστί βακεράβα λαφίντζαρ καζόμ μπαρί χαρά ντα εκτίμηση τθεράβα». Πακιάνα ότι ο Ιεχωβά μπορίνελα τι βοηθίνελ-τουμέν άμα νακχένα κάτι ασακό;

16. Σόσκε ισινάμ σίγουροι ότι ο Ιεχωβά κα ευλογίνελ αμαρέ προσπάθειες για τι κεράς ι Ανάμνηση; (Ρωμαίους 8:​31, 32)

¹⁶ Ο Ιεχωβά εκτιμίνελα μπουτ αμαρέ προσπάθειες για τι κεράς ι Ανάμνηση ι Ιησούσκε μεριμάσκι. Μπορίνασα τι αβάς σίγουροι ότι κα ευλογίνελ-αμέν άμα σικαβάσα εκτίμηση οντουλένγκε σο κερντάς αμένγκε. (Διαβάνεν Ρωμαίους 8:​31, 32) Οτθάρ, τι αβάς αποφασισμέ τι τζας κι Ανάμνηση ανταβά μπρες. Ντα κο εβδομάδες πριν ντα σοράν κατά Ανάμνηση, μανγκάσα τι κεράς πο μπουτ ι Ιεχωβάσκε.